Mak
1 Men kòmansman bon nouvèl sou Jezi Kris, Pitit Bondye a: 2 Jan sa te ekri nan liv pwofèt Ezayi a: “(Gade! Men m ap voye mesaje m nan devan w*. Se li menm ki pral prepare chemen an pou ou+.) 3 Gen vwa yon moun k ap di byen fò nan dezè a: ‘Prepare chemen an pou Jewova*! Fè wout yo vin dwat pou li+.’” 4 Konsa, Jan ki konn batize moun nan te nan dezè a, li t ap preche moun yo pou yo batize pou yo montre yo repanti, dekwa pou Bondye padone peche yo+. 5 Epi, tout moun nan tèritwa Jide ak tout moun ki te abite Jerizalèm te soti vin jwenn li, li te batize yo* nan Rivyè Jouden an, e yo te konfese peche yo devan tout moun+. 6 Jan te gen yon rad sou li ki fèt ak plim chamo, li te gen yon sentiwon ki fèt ak po bèt nan senti l+, e li te konn manje krikèt ak siwo myèl li jwenn nan bwa+. 7 Li t ap preche, li t ap di: “Gen yon moun ki gen plis pouvwa pase m k ap vin apre m, yon moun mwen pa menm merite pou m bese pou m demare kòd sandal li+. 8 Mwen batize nou nan dlo, men li menm, l ap batize nou nan lespri sen+.”
9 Nan jou sa yo, Jezi te soti Nazarèt ki nan Galile, e Jan te batize l nan Rivyè Jouden an+. 10 Menm kote a, etan Jezi ap sot nan dlo a, li wè syèl la ouvri e li wè lespri sen k ap desann sou li sou fòm yon pijon+. 11 Epi, gen yon vwa ki sot nan syèl la ki di: “Ou se Pitit Gason m, pitit mwen renmen anpil la. Mwen pran plezi nan ou+.”
12 Tousuit, lespri sen fè l al nan dezè a. 13 Se konsa, li pase 40 jou nan dezè a, Satan te tante l+, e li te ansanm ak bèt bwa yo, men zanj yo te ede l+.
14 Twouve, apre yo fin arete Jan, Jezi al Galile+, li t ap preche bon nouvèl Bondye a+, 15 li t ap di: “Tan ki te fikse a rive e Wayòm Bondye a vin pi pre. Se pou nou repanti+ e se pou nou gen lafwa nan bon nouvèl la.”
16 Pandan l ap mache bò Lanmè Galile, li wè Simon ak Andre, frè Simon an+, k ap voye filè yo nan lanmè a+, paske se pechè pwason yo te ye+. 17 Lè sa a, Jezi di yo: “Vin suiv mwen, e m ap fè nou vin pechè moun+.” 18 Lamenm, yo abandone filè yo e yo suiv li+. 19 Lè l ale yon tikras pi lwen, li wè Jak ak Jan, de pitit Zebede, ki te nan bato yo ap repare filè yo+. 20 Tousuit, li rele yo. Epi, yo kite papa yo, Zebede, nan bato a ak travayè yo, yo suiv li. 21 Epi, yo antre Kapènawòm.
Kou jou saba a kòmanse, li antre nan sinagòg la e li kòmanse anseye+. 22 Moun yo te ret bouch ouvè devan fason l anseye, paske li pa t anseye yo tankou espè nan Lalwa yo, men li te anseye yo avèk otorite+. 23 Menm moman an, gen yon mesye nan sinagòg la ki te gen yon movèzespri sou li ki di byen fò: 24 “Ki rapò nou gen avè w, Jezi, moun Nazarèt+? Èske w vini pou w detwi nou? Mwen konnen trè byen kiyès ou ye, ou se Sila a ki sen Bondye voye a+!” 25 Men, Jezi pale di avè l, li di l: “Pe bouch ou! Sot sou mesye a!” 26 Epi, movèzespri a fè mesye a tonbe kriz, li rele ak tout fòs li, epi apre sa, li sot sou mesye a. 27 Ebyen, tout moun yo te tèlman sezi, yo kòmanse pale sou sa youn ak lòt, yo t ap di: “Sa sa ye la a? Sa se yon ansèyman ki nouvo! Li pase menm movèzespri lòd avèk otorite, e yo obeyi l.” 28 Epi, menm kote a, yo gaye nouvèl sou li tout kote nan tout zòn Galile.
29 Tousuit apre yo fin kite sinagòg la, yo t al lakay Simon ak Andre. Jak ak Jan t al ansanm avèk yo+. 30 Twouve, bèlmè Simon+ te kouche malad ak lafyèv. Lamenm, yo di Jezi sa. 31 Epi, l al kot bèlmè a, li pran men l, li fè l leve, epi lafyèv la tonbe. Bèlmè a resevwa yo.
32 Lè l fin aswè, apre solèy fin kouche, pèp la kòmanse mennen tout moun ki malad ak moun ki gen demon sou yo ba li+. 33 Tout vil la te rasanble devan pòt kay la. 34 Li geri anpil moun ki te gen tout kalite maladi+ e li chase anpil demon. Men, li pa t kite demon yo pale, paske yo te konnen li se Kris la.
35 Byen bonè nan maten, pandan l te fè nwa toujou, li leve, li sot deyò, l ale nan yon zòn ki izole, e pandan l la, li kòmanse priye+. 36 Men, Simon ak moun ki te avè l yo al dèyè l, 37 e lè yo jwenn li, yo di l: “Tout moun ap chèche w.” 38 Men, li di yo: “Ann al lòt kote, nan bouk ki toupre yo, pou m ka preche nan zòn sa yo tou, paske se pou sa mwen vini+.” 39 Epi, li t ale, li t ap preche nan sinagòg yo, nan tout Galile, e li t ap chase demon+.
40 Nan zòn sa a, gen yon mesye ki te gen lèp ki vin jwenn li, mesye a menm met ajenou pou l sipliye l, li di: “Depi w vle, ou ka geri m+.” 41 Lè l wè sa, kè l fè l mal pou li, li lonje men l, li touche l, e li di l: “Wi, mwen vle! Ou geri+.” 42 Lamenm, lèp la disparèt sou mesye a e li geri. 43 Apre sa, li voye l ale tousuit e li pase l lòd, 44 li di l: “Pinga w di pèsonn anyen, men, al fè prèt la wè w, epi bay sa Moyiz te bay lòd pou moun bay yo, piske w geri+, pou sa ka sèvi kòm prèv pou yo+.” 45 Men, lè mesye a fin ale, mesye a mache fè konn sa e li gaye nouvèl la anpil. Konsa, Jezi pa t kapab antre alèz nan okenn vil, men li te rete nan zòn ki izole yo. Epoutan, moun te kontinye sot tout kote vin jwenn li+.