Mak
9 Li di yo ankò: “Anverite m ap di nou sa: Gen kèk nan moun ki kanpe la a ki pap mouri toutotan yo pa wè Wayòm Bondye a k ap vini avèk pisans+.” 2 Sis jou apre, Jezi pran Pyè, Jak ak Jan, li mennen yo sou yon mòn byen wo poukont yo. Epi, aparans li chanje devan yo+, 3 rad sou li te kòmanse klere, yo vin tèlman blan, pa gen pèsonn sou tè a ki konn lave rad ki te ka fè yo vin blan konsa. 4 Epitou, Eli ak Moyiz parèt devan yo, yo t ap pale ak Jezi. 5 Lè sa a, Pyè di Jezi: “Anseyan*, se yon bon bagay lefètke nou la a. Ebyen, annou monte twa tant, youn pou ou, youn pou Moyiz e youn pou Eli.” 6 Anfèt, li pa t konn sa pou l di ankò, paske yo te pè. 7 Epi, gen yon nyaj ki parèt ki kouvri yo, e gen yon vwa+ ki soti nan nyaj la ki di: “Se Pitit Gason m, Pitit mwen renmen anpil la+. Koute l+.” 8 Epi, lamenm, yo gade toutotou yo, yo pa wè pèsonn avèk yo ankò, sof Jezi.
9 Apre sa, pandan y ap desann mòn nan, li ba yo yon lòd byen klè pou yo pa di pèsonn sa yo te wè a+, jiskaske Bondye leve Pitit lòm nan sot nan lanmò+. 10 Yo te pran lòd li bay la oserye*, men, youn t ap pale ak lòt sou sa leve sot nan lanmò sa a vle di. 11 Yo poze l kesyon, yo di: “Poukisa espè nan Lalwa yo di Eli+ dwe vini anvan+?” 12 Li di yo: “Wi, Eli ap vini anvan e l ap met tout bagay nan lòd+. Men, ki jan fè Ekriti sakre yo di Pitit lòm nan dwe soufri anpil+ e yo pap pran l pou anyen+? 13 Men, m ap di nou sa: Eli+ te vini vre, e yo te fè l sa yo vle, jan sa te ekri sou li a+.”
14 Lè yo rive kot lòt disip yo, yo wè yon gwo foul moun bò kote yo, e te gen espè nan Lalwa ki t ap fè diskisyon avèk yo+. 15 Men, kou tout moun nan foul la wè Jezi, yo sezi, yo kouri al jwenn li e yo salye l. 16 Li mande yo: “Sou ki sa n ap diskite avèk yo la a?” 17 Gen yon moun nan foul la ki reponn li: “Anseyan, mwen te mennen pitit gason m nan ba ou paske li gen yon movèzespri sou li ki fè l bèbè+. 18 Kèlkeswa kote l pran l, li lage l atè, bouch tigason an fè kim, li manje dan e li vin san fòs. Mwen te mande disip ou yo pou yo chase l, men yo pa t kapab.” 19 Jezi reponn, li di yo: “O! Nou se yon jenerasyon moun ki pa gen lafwa+. Pandan konbyen tan m ap oblije rete avèk nou? Pandan konbyen tan m ap oblije sipòte nou? Mennen tigason an ban mwen+.” 20 Epi, yo mennen l ba li, men, kou movèzespri a wè Jezi, li fè pitit la pran kriz. Apre l fin tonbe atè, li plede woule atè a e bouch li fè kim. 21 Epi, Jezi mande papa a: “Depi konbyen tan li konsa?” Papa a di: “Depi l toupiti. 22 Souvan, li lage l nan dife e li lage l nan dlo tou pou l touye l. Men, si w kapab fè yon bagay, gen pitye pou nou. Ede nou.” 23 Jezi di l: “Apa w di: ‘Si w kapab’! Ebyen, tout bagay posib pou moun ki gen lafwa+.” 24 Menm kote a, papa tigason an di byen fò: “Mwen gen lafwa! Ede m gen plis lafwa toujou+!”
25 Lè Jezi wè yon foul moun ap kouri vin jwenn yo, li pale di ak movèzespri a, li di l: “Ou menm, espri ki fè moun bèbè e ki fè moun soud, mwen ba w lòd, soti sou li e pa antre sou li ankò+!” 26 Apre tipitit la fin rele e li fin fè plizyè gwo kriz, espri a soti, e tipitit la vin tankou yon moun ki mouri. Se sa k fè pifò moun ki te la yo t ap di: “Li mouri!” 27 Men, Jezi pran men l, li fè l leve, epi li leve kanpe. 28 Se sa k fè, apre Jezi fin antre nan yon kay, disip li yo pran l apa, epi yo di l: “Sa k fè nou pa t ka chase demon an+?” 29 Li di yo: “Se lapriyè sèlman ki pou fè kalite demon sa a soti.”
30 Yo soti kote yo te ye a y ale, yo pase Galile, men li pa t vle moun konn sa. 31 Paske, li t ap anseye disip li yo, li t ap di yo: “Yo gen pou yo trayi Pitit lòm nan e pou yo livre l nan men lèzòm. Y ap touye l+, men menm lè yo touye l, l ap leve sou twa jou*+.” 32 Men, yo pa t konprann sa l di a, e yo te pè poze l kesyon.
33 Epi, yo rive Kapènawòm. Lè l rive anndan yon kay, li mande yo: “Sou ki sa nou t ap diskite sou wout la+?” 34 Yo ret an silans, paske pandan yo te sou wout la, yo t ap diskite pou yo konnen kiyès nan yo ki pi enpòtan. 35 Lè sa a, li chita e li rele 12 apot yo, li di yo: “Si yon moun vle pou se li ki pi enpòtan, li dwe vin moun ki gen mwens enpòtans lan e li dwe sèvi tout moun+.” 36 Epi, li pran yon timoun piti, li mete l kanpe nan mitan yo, li pase bra l nan kou l e li di yo: 37 “Nenpòt moun ki resevwa youn nan timoun sa yo+ poutèt non mwen, se mwen li resevwa tou. E moun ki resevwa m, se pa mwen sèlman li resevwa, men li resevwa Sila a ki voye m nan tou+.”
38 Jan di l: “Anseyan, nou te wè yon moun k ap sèvi ak non w pou l chase demon, nou te eseye anpeche l fè sa, paske li pa suiv nou+.” 39 Men, Jezi di: “Pa eseye anpeche l, paske pa gen yon moun k ap fè yon mirak nan non m, epi pou l pale m mal byen vit apre sa. 40 Paske, nenpòt moun ki pa kont nou, li pou nou+. 41 Paske, kèlkeswa moun ki ban nou yon gode dlo pou nou bwè paske nou se moun Kris+, anverite m ap di nou sa: Li pa gendwa pèdi rekonpans li+. 42 Men, kèlkeswa moun ki fè youn nan tipiti sa yo pèdi lafwa yo genyen an*, li t ap pi bon pou moun sa a si yo ta mare yon wòch moulen nan kou l, tankou wòch moulen bourik yo konn vire a, epi yo lage l nan lanmè+.
43 “Si jamè men w fè w peche*, koupe l. Li pi bon pou ou pou w antre nan lavi a tou andikape olye pou w ale ak toule de men w nan Jeyèn* nan, nan dife ki pa ka etenn nan+. 44 *—— 45 Si se pye w ki fè w peche*, koupe l. Li pi bon pou ou pou w antre nan lavi a tou ap bwete olye pou yo lage w ak toule de pye w nan Jeyèn* nan+. 46 *—— 47 E si se je w ki fè w peche*, voye l jete+. Li pi bon pou ou pou w antre nan Wayòm Bondye a ak yon sèl grenn je olye pou yo lage w ak toule de je w nan Jeyèn* nan+, 48 kote vè yo pa mouri e kote dife a pa etenn+.
49 “Paske, dife dwe vide sou tout moun sa yo tankou sèl y ap vide+. 50 Sèl se bon bagay. Men, si sèl la desale, ak ki sa n ap fè l vin sale ankò+? Se pou nou gen sèl nan nou+ e se pou nou kontinye gen lapè nan mitan nou+.”