Jòb
42 Apre sa, Jòb reponn Jewova, li di l:
2 “Kounye a, mwen konnen ou kapab fè tout bagay,
E pa gen anyen ou panse fè ki enposib pou ou+.
3 Ou te di: ‘Kiyès sa a k ap vin lage dout sou sa m fin deside san l pa gen konesans lan+?’
Se konsa, mwen te pale san m pa t konprann
Bagay ki twòp pou mwen, bagay mwen pa konnen+.
4 Ou te di: ‘Tanpri, koute, mwen pral pale.
Mwen pral poze w kesyon, e ou menm, w a di m sa w konnen+.’
5 Mwen te konn tande pale de ou,
Men kounye a, mwen wè w ak je m.
6 Se sa k fè, mwen retire sa m te di a*+
E mwen chita nan pousyè ak nan sann pou m montre m repanti+.”
7 Lè Jewova fin pale ak Jòb, Jewova di Elifaz, moun Teman an:
“Mwen fache anpil kont ou menm ak de zanmi w yo+, paske nou pa t di laverite sou mwen+, jan Jòb, sèvitè m nan, te fè sa. 8 Kounye a, pran sèt towo bèf ak sèt mal mouton, epi, al kot Jòb, sèvitè m nan, pou nou ofri yon sakrifis n ap boule nèt pou tèt nou. Epi, Jòb, sèvitè m nan, ap priye pou nou+. M ap dakò avè l kanmenm si l mande m* pou m pa regle avèk nou pou bagay sòt nou di yo, paske nou pa t di laverite sou mwen, jan Jòb, sèvitè m nan, te fè a.”
9 Se konsa, Elifaz, moun Teman an, Bildad, desandan Chouwa a, ak Sofa, desandan Naama a*, t al fè sa Jewova te di yo fè a. Epi, Jewova te koute priyè Jòb la.
10 Apre Jòb fin priye pou zanmi l yo+, Jewova te retire Jòb nan soufrans li te ye a+ e li te fè l vin rich ankò*. Jewova te ba l de fwa lavalè sa l te gen deja yo+. 11 Tout frè l ak sè l yo ak tout ansyen zanmi l yo+ te vin wè l e yo te manje avè l lakay li. Yo te gen pitye pou li e yo te konsole l pou tout malè Jewova te kite rive l yo. Yo chak te ba l yon pyès monnen ak yon bag lò.
12 Konsa, Jewova te beni dènye pati nan lavi Jòb plis pase kòmansman lavi l+. Jòb te vin gen 14 000 mouton, 6 000 chamo, 1 000 pè bèf ak 1 000 femèl bourik+. 13 Epi, li te vin gen sèt lòt pitit gason ak twa lòt pitit fi+. 14 Li te rele premye pitit fi l la Jemima, li te rele dezyèm nan Kezya e li te rele twazyèm nan Kerènapouk. 15 Nan tout peyi a, pa t gen fi ki te bèl menm jan ak pitit fi Jòb yo e papa yo te ba yo yon eritaj ansanm ak frè yo.
16 Apre sa, Jòb te viv 140 an. Li te wè pitit li yo ak pitit pitit li yo rive jis sou kat jenerasyon. 17 Alafen, Jòb mouri, apre l fin pase yon pakèt tan ap byen viv*.