Matye

18 Nan moman sa a, disip yo pwoche kot Jezi, yo di: “Kiyès ki pi enpòtan nan Wayòm syèl la+?” 2 Lè sa a, Jezi rele yon timoun piti vin jwenn li, li fè l kanpe nan mitan yo, 3 e li di: “Anverite m ap di nou sa: Si nou pa chanje pou nou vin tankou timoun piti+, nou pa gendwa antre nan Wayòm syèl la+. 4 Se sa k fè, nenpòt moun ki rabese tèt li pou l vin tankou tipitit sa a, se li ki pi enpòtan nan Wayòm syèl la+. 5 E nenpòt moun ki resevwa yon timoun piti ki tankou timoun sa a poutèt non mwen, se mwen li resevwa tou. 6 Men, kèlkeswa moun ki fè youn nan tipiti sa yo ki gen lafwa nan mwen yo pèdi lafwa*, li t ap pi bon pou moun sa a si yo ta mare yon wòch moulen nan kou l, tankou wòch moulen bourik yo konn vire a, epi yo lage l nan fon lanmè+.

7 “Malè pou monn nan akoz obstak li gen ladan l pou fè moun bite! Se vre, ap gen obstak pou fè moun bite, men malè pou moun ki lakòz sa rive! 8 Se sa k fè, si yon men w oswa yon pye w fè w peche*, koupe l, voye l jete lwen w+. Li pi bon pou ou pou w antre nan lavi a ak yon men oswa ak yon pye olye pou yo lage w ak de men w oswa ak de pye w nan dife ki pap janm etenn nan*+. 9 Menm jan an tou, si yon je w fè w peche*, rache l, voye l jete lwen w. Li pi bon pou ou pou w antre nan lavi a ak yon sèl grenn je olye pou yo lage w ak toule de je w nan dife Jeyèn* nan+. 10 Fè atansyon pou nou pa meprize youn nan tipiti sa yo. Paske, m ap di nou sa: Yo gen zanj yo nan syèl la ki toujou la devan Papa m ki nan syèl la+. 11 *——

12 “Sa nou panse? Si yon nonm gen 100 mouton e youn ladan yo pèdi+, èske li pap kite 99 lòt yo sou mòn nan pou l al chèche sa ki pèdi a+? 13 E si l rive jwenn sa ki pèdi a, wi, m ap di nou sa: L ap pi kontan pou li pase pou 99 lòt yo ki pa t pèdi. 14 Menm jan an tou, Papa m* ki nan syèl la pa ta renmen pou menm youn nan tipiti sa yo peri+.

15 “Anplis de sa, si yon frè w peche kont ou, al kote l poukont ou, fè l wè fot li fè a*+. Si l koute w, ou fè frè w la tounen nan bon chemen+. 16 Men, si l pa koute w, pran youn oswa de lòt moun avè w, dekwa pou tout bagay ka regle sou baz temwayaj* de oswa twa temwen+. 17 Si l pa koute yo, pale ak kongregasyon an. Si l pa koute ata kongregasyon an, konsidere l menm jan ak yon moun ki nan nasyon yo+, menm jan ak yon pèseptè+.

18 “Anverite m ap di nou sa: Nenpòt sa nou mare sou tè a, se bagay k ap deja mare nan syèl la, e nenpòt sa nou demare sou tè a, se bagay k ap deja demare nan syèl la. 19 Anverite m ap di nou sa yon lòt fwa: Si de nan nou sou tè a dakò pou nou mande yon bagay ki enpòtan, Papa m ki nan syèl la ap reyalize sa pou nou+. 20 Paske, kote de ou twa moun reyini nan non mwen+, mwen la nan mitan yo.”

21 Epi, Pyè avanse, li di l: “Seyè, konbyen fwa pou yon frè m peche kont mwen pou m padone l? Jiska sèt fwa?” 22 Jezi di l: “M ap di w sa, se pa jiska sèt fwa, men, jiska 77 fwa+.

23 “Se sa k fè, Wayòm syèl la ka menm jan ak yon mesye, yon wa, ki vle fè regleman ak esklav li yo. 24 Lè l kòmanse fè regleman avèk yo, yo mennen yon mesye ba li ki te dwe li 10 000 talan*. 25 Men, kòm misye pa t gen mwayen pou l peye dèt la, mèt li bay lòd pou yo vann ni misye, ni madanm li, ni pitit li ansanm ak tout sa l posede, pou peye dèt la+. 26 Lè sa a, esklav la lage kò l atè e li sipliye mèt li, li di l: ‘Pran pasyans pou mwen, e m ap remèt ou tout sa m dwe w la.’ 27 Mèt la vin pran pitye pou li, li kite l ale e li anile dèt li a+. 28 Men, esklav la sot deyò, li jwenn youn nan esklav parèy li yo ki te dwe li 100 denye*. Li met men sou li, li kòmanse trangle l, li di l: ‘Remèt mwen sa w dwe m nan.’ 29 Lè sa a, esklav parèy li a met ajenou e li kòmanse sipliye l, li di l: ‘Pran pasyans pou mwen, e m ap remèt ou kòb la.’ 30 Men, lòt la pa t vle koute l. L al fè met esklav parèy li a nan prizon pou jiskaske l peye l sa l dwe l la. 31 Ebyen, lè lòt esklav yo wè sa k pase a, sa fè yo mal anpil, e y al esplike mèt yo tout sa k te pase. 32 Lè sa a, mèt esklav la fè rele l, epi li di l: ‘Esklav mechan! Mwen te anile tout dèt ou a pou ou lè w te sipliye m nan. 33 Èske ou menm tou, ou pa t dwe gen pitye pou esklav parèy ou a, menm jan mwen menm mwen te gen pitye pou ou a+?’ 34 Menm moman an, mèt la vin an kòlè, li lage misye nan men gadyen prizon yo, jiskaske l fin peye tout sa l dwe a. 35 Se konsa Papa m ki nan syèl la ap aji avèk nou tou+, si nou chak nou pa padone frè nou ak tout kè nou+.”