Esdras

6 Lè sa a, wa Dariyis te bay lòd e yo te fouye nan achiv yo* nan zòn yo konn mete trezò yo nan Babilòn. 2 Yo te jwenn yon woulo nan sitadèl ki nan Ekbatàn nan, nan tèritwa peyi Medi, e men sa ki te ekri ladan l:

3 “Nan premye ane rèy wa Siris la, wa Siris te bay yon lòd konsènan kay Bondye a ki te nan Jerizalèm+. Li te di: ‘Se pou Juif yo rebati kay la pou l vin yon kote y ap gen pou yo fè sakrifis, e yo dwe fè fondasyon kay la. Kay la ap mezire anviwon 60 koude* wotè ak 60 koude lajè+. 4 L ap gen twa ranje gwo wòch ak yon ranje bwa+, e se nan trezò wa a lajan y ap depanse yo ap soti+. 5 Epi, se pou yo retounen ak veso annò ansanm ak veso ann ajan ki te nan kay vrè Dye a, veso Nebikadneza te pran nan tanp lan nan Jerizalèm al Babilòn+ avè yo a, pou y al mete yo nan plas yo, nan tanp lan nan Jerizalèm, nan kay Bondye a+.’

6 “Epitou, pinga Tatenayi, gouvènè zòn ki pa lòtbò Rivyè a*, ak Chetaboznayi ansanm ak lòt moun k ap travay nan gouvènman an avèk nou yo ak ti gouvènè yo ki nan zòn ki pa lòtbò Rivyè a+ anpeche travay la fèt. 7 Pa deranje travay konstriksyon kay Bondye a. Gouvènè ki alatèt Juif yo ak ansyen ki pami Juif yo pral rebati kay Bondye a menm kote l te ye a. 8 Mete sou sa, men lòd mwen bay sou sa nou dwe fè pou ansyen ki pami Juif yo rebati kay Bondye a: Nou dwe pran lajan nan trezò wa a+, lajan taks yo ranmase nan zòn ki pa lòtbò Rivyè a, pou nou bay mesye yo san pèdi tan pou yo fè depans, e pa sispann ba yo lajan+. 9 E kèlkeswa sa yo bezwen, jenn towo bèf+ ansanm ak gwo mouton+ ak ti mouton+ pou yo fè sakrifis y ap boule nèt pou Bondye nan syèl la, ble+, sèl+, diven+ ak luil+, selon sa prèt ki nan Jerizalèm yo mande, yo dwe ba yo bagay sa yo chak jou san mank, san rete, 10 pou yo ka kontinye fè ofrann ki fè Bondye k ap dirije nan syèl la plezi e pou yo priye pou wa a ak pitit gason l yo viv lontan+. 11 Epi, men lòd mwen bay ankò: Si yon moun vyole lwa sa a, y ap rache yon poto bwa nan kay li, y ap leve moun sa a anlè pou yo kloure l sou li*, epi y ap fè kay li tounen yon latrin piblik* pou bagay mal sa a li fè a. 12 E se pou Bondye ki chwazi kote sa a pou fè konn non l+ kraze tout wa ak tout pèp ki ta eseye vyole lòd sa a e ki ta detwi kay Bondye a ki nan Jerizalèm! Se mwen menm, Dariyis, ki bay lòd sa a. Se pou yo obeyi l tousuit.”

13 Lè sa a, Tatenayi, gouvènè zòn ki pa lòtbò Rivyè a, ak Chetaboznayi+ ansanm ak lòt moun k ap travay nan gouvènman an avèk yo te obeyi tout lòd wa Dariyis te bay yo san pèdi tan. 14 Epi, ansyen ki pami Juif yo te kontinye travay konstriksyon an, e travay la t ap mache byen+. Yo te jwenn ankourajman nan sa pwofèt Aje+ ak Zakari+, pitit pitit Ido a, te anonse yo. Yo te fini travay la, dapre lòd Bondye Izrayèl la+ te bay e dapre lòd Siris+, Dariyis+ ak Atagzèsès+, wa peyi Pès la, te bay. 15 Yo te fin bati kay la sou twazyèm jou nan mwa Ada*, nan sizyèm ane rèy wa Dariyis.

16 Apre sa, Izrayelit yo, prèt yo, Levit yo+ ak lòt moun ki te sot ann egzil yo te inogire* kay Bondye a ak kè kontan. 17 Men bèt yo te bay kòm sakrifis lè yo t ap inogire kay Bondye a: 100 towo bèf, 200 gwo mouton ak 400 ti mouton, e yo te bay 12 bouk kabrit kòm sakrifis pou peche pou tout pèp Izrayèl la, sa ki egal ak kantite tribi ki gen ann Izrayèl+. 18 Yo te fè prèt yo ak Levit yo konnen nan ki gwoup yo ye pou yo ka fè sèvis Bondye nan Jerizalèm+, dapre sa ki ekri nan liv Moyiz la+.

19 Moun ki te sot ann egzil yo te fete fèt Pak la sou 14^yèm jou nan premye mwa a+. 20 Tout prèt yo ak tout Levit yo nèt te pirifye tèt yo+, konsa, yo tout te pwòp. Yo te touye bèt pou sakrifis pou Pak la pou tout moun ki te sot ann egzil yo, ni pou tèt yo, ni pou prèt parèy yo. 21 Epi, Izrayelit ki te sot ann egzil yo te manje ladan l ansanm ak tout moun ki te avèk yo ki te sispann fè salte nasyon nan zòn ki ozalantou yo t ap fè yo e ki te pirifye tèt yo pou yo adore* Jewova, Bondye Izrayèl la+. 22 Epitou, yo te fè sèt jou ap fete fèt Pen san ledven an+, paske Jewova te fè yo gen kè kontan e li te touche kè wa peyi Asiri a pou l fè l aji byen ak yo+. Konsa, wa a te ba yo èd* pou yo fè travay konstriksyon kay vrè Dye a, Bondye Izrayèl la.