Jòb

 2 “Èske yon moun ka itil Bondye yon bagay?

Èske yon moun ki gen bon konprann ka fè yon bagay pou Bondye+?

 3 Ki enpòtans sa gen pou Toupisan an* lefètke w jis?

Ki sa sa fè pou li lè w mache fidèl+?

 4 Èske l ap pini w

E li t ap jije w poutèt ou gen respè pou li?

 5 Èske se pa paske w fè anpil mechanste,

E w pa sispann fè peche+?

 6 Paske, ou pran afè frè w kòm garanti san rezon

E w pran rad moun sou yo, ou kite yo toutouni*+.

 7 Ou pa bay moun ki fatige dlo pou yo bwè,

E w retire manje nan men moun ki grangou+.

 8 Peyi a se pou moun ki gen pouvwa+,

E se moun ki nan gwo pozisyon ki ret ladan l.

 9 Epitou, ou voye moun ki vèv yo ale de men vid,

E w kase ponyèt timoun ki san papa yo.

10 Se sa k fè gen pyèj* toutotou w+,

Epi, laperèz tonbe sou ou bridsoukou.

11 Se sa k fè li tèlman fè nwa ou pa ka wè,

E gwo dlo kouvri w.

12 Èske se pa kote ki pi wo nan syèl la Bondye ye?

Epi, gade jan tout zetwal yo byen wo.

13 Men, ou di: ‘Ki sa Bondye konnen atò?

Èske l ka wè nan fènwa pwès pou l jije?

14 Nyaj yo bare l, se sa k fè l pa wè,

Pandan l ap pwonmennen nan pati ki pi wo nan syèl la.’

15 Èske w suiv chemen ki la depi lontan an,

Chemen mechan yo ap mache ladan l lan,

16 Moun lanmò pran anvan lè yo*,

Moun gwo dlo* k ap desann pote ale tankou yon kay+?

17 Yo te di vrè Dye a: ‘Kite n an repo!’

E yo te di: ‘Ki sa Toupisan an ka fè pou nou?’

18 Epoutan, se li menm ki te plen kay yo ak bon bagay.

(Mwen pa reflechi menm jan ak moun ki mechan yo ditou.)

19 Moun ki jis yo ap wè sa e y ap kontan,

Moun ki inosan yo ap pase yo nan rizib e y ap di:

20 ‘Yo detwi ènmi nou yo,

E gen yon dife k ap kankannen sa ki rete yo.’

21 Aprann konnen Bondye e w ap anpè,

Epi, bon bagay ap vin jwenn ou.

22 Obeyi lwa ki sot nan bouch li,

E konsève pawòl li yo nan kè w+.

23 Si w retounen vin jwenn Toupisan an, w ap refè+,

Si w retire bagay mal nan tant ou,

24 Si w ta jete lò* w genyen yo atè

E w ta voye lò ki sot Ofi yo+ nan galèt ki nan ravin yo,

25 Lè sa a, Toupisan an ap tankou lò* ki gen anpil valè pou ou,

E l ap tounen ajan ki gen plis valè pou ou a.

26 Paske, lè sa a, se nan Toupisan an tout plezi w ap ye,

E w ap leve tèt ou devan Bondye.

27 W ap sipliye l, l ap koute w,

E w ap respekte ve w fè yo.

28 Tout sa w deside fè ap byen pase,

E limyè ap klere chemen w.

29 Paske y ap rabese w lè w pale avèk awogans,

Men, l ap sove moun ki met tèt yo byen ba*.

30 L ap delivre moun ki inosan yo.

Konsa, si men w pa tranpe nan anyen ki sal, se sèten l ap delivre w.”