Poukisa nou dwe priye nan non Jezi ?
SOUVAN Jezi te konn anseye moun yo sou lapriyè. Nan epòk pa l la, chèf relijye juif yo te konn priye “ nan gwo kafou ”. Poukisa ? “ Pou fè moun wè. ” Pa gen dout, yo te vle pou moun admire yo pou devosyon yo montre yo genyen anrapò ak relijyon pa yo a. Anpil ladan yo te konn fè yon seri priyè ki long kote y ap plede di menm pawòl yo, kòmsi se lè “ yo di yon pakèt pawòl ”, Bondye ap koute priyè yo fè a (Matye 6:5-8). Jezi te fè konnen jan de pratik sa yo san valè, e konsa, sa ede moun ki sensè yo wè ki sa yo pa dwe fè lè y ap priye. Sepandan, li pa t sèlman anseye sa pou yon moun pa fè lè l ap priye.
Jezi te anseye priyè n ap fè yo ta dwe demontre nou gen dezi pou nou wè non Bondye sangtifye, pou nou wè Wayòm li a vini e pou nou wè volonte l fèt. Jezi te montre tou li apwopriye pou nou priye Bondye pou l ede nou ak pwoblèm ki afekte nou pèsonèlman (Matye 6:9-13 ; Lik 11:2-4). Jezi te bay plizyè egzanp pou l montre si nou vle Jewova tande priyè nou yo, nou bezwen pèsiste, nou bezwen gen lafwa e nou bezwen gen imilite (Lik 11:5-13 ; 18:1-14). E li te ranfòse ansèyman li te bay yo avèk egzanp pa l. — Matye 14:23 ; Mak 1:35.
Sandout, enstriksyon sa a Jezi te bay disip li yo te ede yo amelyore priyè y ap fè. Men, Jezi te tann jis lè li te rive nan dènye nuit li t ap pase sou tè a pou l te bay disip li yo leson ki te pi enpòtan nan domèn lapriyè a.
“ Yon gwo chanjman nan fason moun te konn priye ”
Jezi te pase pifò nan dènye nuit li sou tè a ap bay apot fidèl li yo ankourajman. Se te yon moman ki te apwopriye pou l revele yo yon bagay ki nouvo. Li te di yo : “ Mwen se chemen an e laverite a e lavi a. Pèsonn pap vin jwenn Papa a eksepte pa mwayen mwen. ” Nan pita, li te ba yo yon pwomès ki te ankourajan, li te di yo : “ Kèlkeswa sa nou mande nan non m, m ap fè l, yon fason pou Papa a ka jwenn glwa anrapò ak Pitit la. Si nou mande yon bagay nan non m, m ap fè l. ” Nan moman konvèsasyon an te prèske fini, li te di yo : “ Jiska prezan, nou pa mande anyen nan non mwen. Mande e n ap resevwa, pou lajwa nou vin konplè. ” — Jan 14:6, 13, 14 ; 16:24.
Pawòl sa yo te enpòtan anpil. Gen yon diksyonè biblik ki di sa te “ yon gwo chanjman nan fason moun te konn priye ”. Jezi pa t vle di pou yo sispann priye Bondye pou yo priye l pito. Olye de sa, li te bay yon nouvo fason pou moun pwoche bò kote Jewova Dye.
Anfèt, Bondye te toujou koute priyè sèvitè fidèl li yo (1 Samyèl 1:9-19 ; Sòm 65:2). Sepandan, depi lè Izrayèl te vin pèp Bondye te fè alyans avè l la, moun ki te vle Bondye koute priyè yo te dwe rekonèt se Izrayèl ki nasyon li chwazi a. Annapre, apati epòk Salomon an, yo te dwe rekonèt tanp lan se kote li chwazi pou moun fè sakrifis pou li (Detewonòm 9:29 ; 2 Kwonik 6:32, 33). Men, sistèm adorasyon sa a pa t la pou toutan. Jan apot Pòl te ekri sa, ni Lalwa Bondye te bay Izrayèl la, ni sakrifis yo te konn ofri nan tanp lan, se te ‘ lonbray bon bagay ki te gen pou vini yo, men yo pa t gen bagay yo yo menm ’. (Ebre 10:1, 2.) Pakonsekan, reyalite sa a te dwe ranplase lonbray la (Kolosyen 2:17). Depi nan ane 33 nan epòk nou an, yon moun pa bezwen obeyi Lwa Moyiz la ankò pou l gen bonjan relasyon ak Jewova. Okontrè, relasyon sa a baze sou obeyisans li anvè moun Lalwa te anonse a : Jezi Kris. — Jan 15:14-16 ; Galat 3:24, 25.
Yon non ki “ anlè tout lòt non ”
Jezi te etabli yon mwayen ki pi enpòtan pou moun pwoche bò kote Jewova lè l te idantifye tèt li kòm yon zanmi ki gen pouvwa, kòm yon moun ki ouvri pòt pou nou yon fason pou Bondye koute priyè nou yo e pou l reponn yo. Ki sa k fè Jezi ka aji konsa pou nou ?
Piske nou tout fèt ak peche, pa gen okenn aksyon nou kapab fè ni okenn sakrifis nou kapab ofri ki ka pirifye nou anba tach peche ki nan nou an oswa ki ka fè nou gen dwa pou nou gen relasyon avèk Jewova, Bondye nou an ki sen (Women 3:20, 24 ; Ebre 1:3, 4). Sepandan, Jezi te bay lavi pafè li te genyen antanke imen an pou l peye pou peche moun ki kapab rekonsilye ak Bondye yo (Women 5:12, 18, 19). Kounye a, tout moun ki ta renmen peche yo efase gen posiblite pou yo pwòp devan Jewova e pou yo gen “ libète pou [yo] pale ” avè l, men y ap ka fè sa sèlman si yo demontre yo gen lafwa nan sakrifis Jezi a e yo priye nan non l. — Efezyen 3:11, 12.
Lè nou priye nan non Jezi, nou montre nou gen lafwa nan omwen twa fasèt nan wòl li jwe antanke moun k ap reyalize objektif Bondye a : 1) Li se “ Timouton Bondye a ”, e sakrifis li a sèvi kòm baz pou fè moun jwenn padon pou peche yo. 2) Jewova te resisite l e kounye a l ap sèvi antanke “ gran prèt ” pou l fè moun benefisye de ranson an. 3) Se li menm sèl ki “ chemen ” pou moun pwoche bò kote Jewova nan lapriyè a. — Jan 1:29 ; 14:6 ; Ebre 4:14, 15.
Lè nou priye nan non Jezi, nou montre nou onore l. Onè sa a apwopriye paske volonte Jewova se pou “ tout jenou pliye nan non Jezi [..], e se pou tout lang rekonèt aklè Jezi Kris se Seyè, pou glwa Bondye, Papa a ”. (Filipyen 2:10, 11.) Men, sa ki pi enpòtan toujou, sèke lè nou priye nan non Jezi, sa bay Jewova glwa, li menm ki te bay Pitit li a pou nou. — Jan 3:16.
Nou dwe priye avèk “ tout kè ” nou, e non pa yon fason mekanik.
Labib itilize divès tit ak divès non pou l prezante nou Jezi, yon fason pou nou ka konprann tout enpòtans wòl Jezi jwe a. Yo ede nou konprann tout byenfè nou jwenn grasa sa Jezi te fè, sa l ap fè kounye a ak sa l pral fè an favè nou alavni. (Gade kare “ Jezi jwe yon wòl trèzenpòtan ”.) Vrèmanvre, yo bay Jezi “ non ki anlè tout lòt non an ”a. Yo ba l tout pouvwa ni nan syèl la ni sou tè a. — Filipyen 2:9 ; Matye 28:18.
Priye nan non Jezi ta dwe plis pase yon senp abitid
Vrèman, si nou vle Jewova koute priyè nou yo, nou dwe fè yo nan non Jezi (Jan 14:13, 14). Men, nou pa ta renmen janm repete ekspresyon “ nan non Jezi ” a tou senpleman paske nou gen abitid fè sa. Poukisa ?
Annou pran yon egzanp. Lè òm dafè yo ap ekri lòt moun yon lèt ki gen rapò ak biznis, yo konn mete yon fòmil politès ladan l. Èske w panse pawòl sa yo se pawòl ki vrèman soti nan kè yo, oubyen se jis yon règ pou ekri lèt y ap suiv ? Alaverite, lè nou itilize non Jezi nan priyè n ap fè, li pa ta dwe tankou yon fòmil politès yon òm dafè mete nan konklizyon yon lèt li ekri. Se vre nou dwe “ priye toutan ”, men nou dwe fè sa avèk “tout kè ” nou, e non pa yon fason mekanik. — 1 Tesalonisyen 5:17 ; Sòm 119:145.
Ki sa w ka fè pou ekspresyon “ nan non Jezi ” a pa tounen yon senp ekspresyon ou di pa woutin ? Sa w panse si w medite sou kalite estrawòdinè Jezi te demontre yo ? Reflechi sou sa li deja fè pou ou e sou sa l dispoze fè pou ou. Nan priyè w ap fè, remèsye Jewova e fè louwanj pou li pou bèl fason li itilize Pitit li a. Tank w ap fè sa, se tank w ap gen plis konfyans nan pwomès sa a Jezi te fè : “ Si nou mande Papa a yon bagay, l ap ban nou li nan non mwen. ” — Jan 16:23.
a Selon yon diksyonè W. Vine ekri (Expository Dictionary of New Testament Words), mo grèk ki koresponn ak mo “ non ” an kapab fè referans ak “ tout sa yon non gen ladan l, otorite moun ki pote l la, pèsonalite l, pozisyon l, glwa l, pouvwa l [ak] grandè l ”.