Annou grandi nan konesans egzak la avèk “ anpresman ”
TOUT sèvitè Jewova ap chèche jwenn apwobasyon l. Se poutèt sa, nou fè efò pou nou ranfòse lafwa nou e pou nou bay Jewova yon sèvis sakre avèk zèl. Men, apot Pòl atire atansyon nou sou yon danje ki te touche Juif ki t ap viv nan epòk li a. Men sa l te di : “ Yo gen zèl pou Bondye, men se pa selon konesans egzak la. ” (Wom. 10:2, NW). Pa gen dout nan sa, lafwa nou genyen an ak adorasyon n ap bay Jewova a pa ta dwe baze sou santiman sèlman. Nou bezwen gen konesans egzak sou Kreyatè nou an e sou volonte l.
Gen lòt kote Pòl te montre pou yon moun gen konduit Bondye apwouve a, fòk li chèche gen konesans. Li te priye Bondye pou disip Kris yo “ ranpli ak konesans egzak ” sou volonte Bondye pou yo ka ‘ mache yon fason ki diy devan Jewova, nan bi pou yo fè l plezi nèt ’ toutpandan y ap ‘ kontinye pote fwi nan tout zèv ki bon e y ap kontinye grandi nan konesans egzak sou Bondye ’. (Kol. 1:9, 10, NW.) Poukisa li enpòtan anpil pou nou gen “ konesans egzak ” la ? E poukisa nou ta dwe chèche ogmante konesans sa a plis toujou ?
Bagay ki ka ede nou gen lafwa
Lafwa nou baze sou konesans egzak nou genyen sou Bondye e sou volonte l nou aprann nan Bib la. Si nou pa gen bonjan konesans sa a, lafwa nou ap frajil anpil. Nenpòt ti bagay ap ka kraze l. Pòl te ankouraje nou pou nou ofri Bondye yon sèvis sakre “ avèk kapasite nou genyen pou n rezone ” (NW) e pou nou “ chanje tout lide ki nan tèt nou ”. (Wom. 12:1, 2.) Lè nou etidye Labib regilyèman, sa ka ede nou fè sa.
Ewa se yon pyonye pèmanan k ap viv Polòy. Men sa l di : “ Si m pa t konn etidye Pawòl Bondye a regilyèman, mwen t ap sispann grandi nan konesans egzak mwen gen sou Jewova. Mwen t ap pèdi idantite m kòm kretyen nan yon tikras tan, lafwa m gen nan Bondye t ap febli, e sa t ap fè m pèdi relasyon m ak Jewova ki se bagay ki gen plis valè mwen genyen. ” Annou bat pou sa pa janm rive nou. Annou konsidere egzanp yon mesye ki te vin gen plis konesans sou Jewova e ki te jwenn apwobasyon l poutèt sa.
“ Ala renmen mwen renmen lalwa ou la ! ”
Sòm 119 se yon chante ki ekri sou fòm yon powèm ki eksprime santiman salmis ki ekri l la te gen nan kè l pou lwa Jewova yo, rapèl li yo, pawòl li yo, prensip li yo, kòmandman l yo ak desizyon jidisyè l yo. Men sa l te ekri : “ Mwen pran tout plezi m’ nan fè sa ou mande. [...] Prensip ou yo fè kè m’ kontan. ” Men sa li te ekri ankò : “ Ala renmen mwen renmen lalwa ou la ! Se tout lajounen m’ap kalkile sou li. ” — Sòm 119:16, 24, 47, 48, 77, 97.
Salmis la di li te ‘ pran plezi l ’ nan Pawòl Bondye. Li di tou li te “ kalkile ” sou li. Sa montre li te medite sou Pawòl Bondye a e li te menm pran plezi nan meditasyon sa a. Konsa, salmis la montre li te renmen etidye lwa Bondye a. Se pa santiman sèlman ki te fè l gen lanmou sa a. Depreferans, li te gen dezi sensè pou l “ kalkile ” sou lwa Bondye a yon fason pou l te ka byen konprann pawòl li. Atitid li te montre li te vle gen yon konesans ki pi egzak sou Bondye e sou volonte l.
Vrèman, lanmou salmis la te gen pou Pawòl Bondye te sot nan fon kè l. Nou ka poze tèt nou kesyon sa yo : ‘ Èske mwen menm mwen konsa tou ? Èske m pran plezi pou m li yon pòsyon Labib chak jou e pou m analize pòsyon m li a ? Èske m fè anpil efò pou m li Labib chak jou e pou m priye Jewova anvan m li l ? ’ Si nou ka reponn wi pou kesyon sa yo, nou gen anpil chans pou nou “ grandi nan konesans egzak sou Bondye ”.
Men sa Ewa di : “ Mwen toujou fè efò pou m amelyore etid pèsonèl mwen. Depi lè mwen resevwa bwochi ‘ Voyez le bon pays ’ a, mwen sèvi avèk li prèske chak fwa m ap etidye. Mwen fè plis efò pou m fè rechèch nan Étude perspicace des Écritures la e nan lòt ouvraj referans nou genyen yo lè sa nesesè. ”
Annou konsidere egzanp Wojciech ak Małgorzata tou. Yo gen gwo responsablite familyal. Ki jan yo fè pou yo etidye Labib pèsonèlman malgre pwogram yo chaje ? Men sa yo di : “ Nou fè tout sa nou kapab pou nou jwenn tan pou nou etidye Pawòl Bondye a pèsonèlman. Apre sa, nan etid familyal nou e nan konvèsasyon nou gen chak jou, nou pataje pwen nou te twouve ki enteresan yo oswa pwen ki te ankouraje nou yo. ” Lefètke yo etidye Labib afon, sa ba yo anpil kè kontan e sa ede yo “ grandi nan konesans egzak sou Bondye ”.
Etidye avèk lespri nou byen dispoze pou n aprann
Antanke kretyen, nou gen asirans Bondye ‘ vle pou tout kalite moun sove e li vle yo gen yon konesans egzak sou laverite ’. (1 Tim. 2:3, 4, NW.) Sa montre nou jan li enpòtan pou nou li Labib e pou nou fè efò pou nou “ konprann ” sa l di (Mat. 15:10). Yon bagay ki ka ede nou fè sa, se lè nou etidye avèk lespri nou byen dispoze pou n aprann. Se konpòtman sa a Bereyen yo te genyen lè Pòl te fè yo konnen bon nouvèl la. Men sa Labib di : “ Yo te resevwa pawòl la byen vit san traka [“ avèk anpresman ”, NW]. Chak jou yo t’ap egzaminen sa ki te ekri nan Liv la pou wè si sa Pòl t’ap di yo a se vre. ” — Tra. 17:11.
Èske ou menm tou ou gen anpresman pou w etidye Labib menm jan ak Bereyen yo ? E lè w ap etidye, èske w bat pou w pa kite anyen distrè w ? Yon kretyen kapab fè efò pou l imite Bereyen yo menmsi li pa t renmen etidye anvan. Anplis, kèk moun gen tandans li mwens e yo gen tandans etidye mwens ofiramezi y ap antre nan laj, men yon kretyen pa oblije fè sa. Kèlkeswa laj yon moun, li kapab chèche yon mwayen pou l pa kite anyen anpeche l etidye. Ofiramezi w ap li, ou ka chèche enfòmasyon avèk swen pou w pataje ak lòt moun. Pa egzanp, èske w ka fikse objektif pou w pataje sa w te li oswa sa w te aprann nan etid ou avèk konjwen w oubyen avèk zanmi w ? Lè w pale de sa w aprann yo, sa ap ede w grave yo nan kè w ak nan lespri w e y ap gen yon bon enfliyans sou lòt moun.
Nan etid w ap fè, ou kapab suiv egzanp Ezra, yon sèvitè Bondye nan tan lontan ki te “ prepare kè l pou l fouye nan lwa Jewova a ”. (Ezra 7:10, NW.) Kòman w ka fè sa ? Ou kapab chèche yon bon anviwònman pou w etidye. Apre sa, chita epi priye Jewova pou l ba w direksyon e pou l ba w sajès (Jak 1:5). Mande tèt ou : ‘ Ki sa m pral aprann nan etid sa a ? ’ Toutpandan w ap li, chèche ide kle yo. Ou gendwa note pwen sa yo oubyen ou ka souliye pati ou ta plis renmen sonje yo. Chèche fason w ka sèvi ak ide w jwenn yo lè w ap preche, lè w ap pran desizyon oubyen lè w ap ankouraje lòt kretyen parèy ou. Lè w prèske rive nan fen etid la, fè yon ti revizyon tou kout sou sa w te wè yo. Sa kapab ede w sonje sa w aprann yo.
Men sa Ewa di li fè : “ Lè m ap li Labib, mwen sèvi ak referans ki nan maj yo, mwen sèvi tou ak Index des publications de la Société Watch Tower e avèk Watchtower Library sou CD-ROM. Mwen pran nòt, nan entansyon pou m sèvi avèk yo nan ministè a. ”
Gen kèk moun ki gen lontan depi y ap fè etid apwofondi e ki pran plezi nan aprann konnen Bondye (Pwo. 2:1-5). Poutan, yo gen anpil responsablite e yo gen difikilte pou yo rezève yon ti tan pou yo fè etid pèsonèl regilyèman. Ki ajisteman w ka fè nan pwogram ou si w gen pwoblèm sa a tou ?
Kòman m ka jwenn tan pou m etidye ?
Sandout, w ap dakò li pi fasil pou yon moun jwenn tan pou l fè yon bagay li renmen. Gen anpil moun ki twouve yon bagay ki ede yo toujou fè etid pèsonèl yo, se lè yo fikse objektif ki reyalis. Pa egzanp, yo fikse objektif pou yo li tout Bib la. Se vre, li ka parèt difisil anpil pou w li jeneyaloji ki long yo oubyen pou w li deskripsyon detaye yo bay sou fason tanp lan te fèt oubyen pou w li pwofesi konplike ki pa sanble gen yon lyen avèk lavi w ap mennen chak jou. Men, chèche suiv kèk etap ki ka ede w atenn objektif ou. Pa egzanp, anvan w egzamine yon pòsyon nan Labib ki parèt difisil pou ou, ou gendwa fè lekti sou sa k te konn fèt nan epòk la oubyen sou aplikasyon li kapab genyen. Nou ka jwenn enfòmasyon konsa nan liv “ Toute Écriture est inspirée de Dieu et utile ” la, yon liv ki disponib nan anviwon 50 lang.
Lè w ap li Labib, yon bon bagay ou kapab fè se sèvi ak imajinasyon w. Sa ap ede w imajine pèsonaj ki nan pòsyon w ap li a e sa ap ede w imajine jan evènman yo te pase. Si w aplike sijesyon sa yo, sa ka fè moman etid ou yo pi enteresan e ou ka tire plis pwofi ladan yo. Epitou, w ap plis anvi rezève tan pou yo. Konsa, l ap pi fasil pou w kenbe abitid ou genyen pou w li Labib chak jou.
Sijesyon sa yo ka itil nou chak pèsonèlman. Men, ki sa yon fanmi kote moun yo gen anpil aktivite kapab fè ? Èske manm fanmi an pa ta ka fè yon ti chita ansanm pou yo pale sou byenfè yo ka jwenn lè yo fè etid familyal ? Yon ti chita pale konsa ka ede nou jwenn kèk bon ide. Pa egzanp, li ka ede nou wè nou kapab leve pi bonè chak maten oubyen sèten jou nan semèn nan pou nou egzamine yon pòsyon nan Bib la ansanm. Oubyen tou, chita pale sa a ka fè nou wè nesesite pou nou fè ajisteman nan pwogram fanmi an. Pa egzanp, gen fanmi ki twouve li bon pou yo egzamine tèks pou jounen an oswa pou yo li yon pòsyon Labib apre yo fin manje an fanmi. Anvan yo kòmanse debarase tab la oubyen anvan y al nan yon lòt aktivite, yo pran 10 oswa 15 minit pou yo egzamine Ekriti yo oubyen pou yo li pòsyon lekti Labib pou semèn nan. Okòmansman, li ka parèt difisil pou yon fanmi fè sa, men nan yon tikras tan, sa ka vin rantre nan abitid fanmi an e manm fanmi an ka vin pran anpil plezi ladan l.
Wojciech ak Małgorzata esplike sa k te ede fanmi pa yo. Men sa yo di : “ Anvan sa, nou te konn pèdi tan nan aktivite ki pa enpòtan oubyen ki banal. Nou te pran desizyon pou nou redui tan nou te konn pase ap voye e-mail. Nou te redui tan nou te konn pase nan pastan nou e nou te fikse yon jou ak yon lè pou nou etidye afon. ” Pa gen dout nan sa, fanmi sa a pa regrèt li te fè ajisteman sa yo. Fanmi pa w ka fè menm jan an tou.
Li enpòtan anpil pou nou grandi nan konesans egzak la
Lè w etidye Pawòl Bondye a afon, sa ka ede w pote “ fwi nan tout zèv ki bon ”. (Kol. 1:10, NW.) Toutpandan w ap fè sa nan lavi w, pwogrè w ap vin parèt klè pou tout moun. W ap vin yon moun espirityèl ki byen konprann verite ki nan Bib la. W ap ka pran pi bon desizyon e w ap pi efikas lè w ap bay lòt moun èd, ou pap yon moun ki pa ekilibre menm jan ak moun ki pa gen konesans yo. Sa k pi enpòtan an, w ap vin pi pwòch Jewova. W ap vin gen plis apresyasyon pou kalite l yo, e sa pral parèt klè nan fason w ap pale ak lòt moun konsènan li menm. — 1 Tim. 4:15 ; Jak 4:8.
Kèlkeswa laj ou oubyen eksperyans ou genyen, ou bezwen fè tout posib ou pou w pran plezi nan Pawòl Bondye a e pou w etidye l afon avèk yon lespri ki byen dispoze pou w aprann. Ou mèt gen asirans Jewova pap bliye efò w fè yo (Ebre 6:10). E l ap vide benediksyon sou ou.
[Kare nan paj 13]
LÈ NOU ‘ GRANDI NAN KONESANS EGZAK LA ’ :
Nou ranfòse lafwa nou nan Bondye e nou mache yon fason ki fè l plezi.— Kol. 1:9, 10.
Nou vin gen yon bonjan konpreyansyon. Sa ban nou disènman e sa fè nou kapab pran bon desizyon.— Sòm 119:99.
Nou jwenn plis plezi nan ede lòt moun vin pi pwòch Jewova.— Mat. 28:19, 20.
[Foto nan paj 14]
Li ka difisil pou nou jwenn yon bon kote pou nou etidye, men li enpòtan pou nou fè sa.
[Foto nan paj 15]
Gen fanmi ki pran abitid li yon pòsyon nan Bib la ansanm apre yo fin manje.