“Fason sa fèt la ann akò ak volonte w”

 1. Ki sa k te fè Jezi ‘vin kontan epi l vin ranpli ak lespri sen’?

ÈSKE W ka imajine ki jan sa t ap ye pou w wè Jezi ki “vin kontan anpil, e [ki] vin ranpli ak lespri sen”? Petèt ou imajine li menm k ap souri, je l k ap briye tèlman l kontan. Ki sa k fè l kontan konsa? Li te fèk voye 70 nan disip li yo al preche bon nouvèl Wayòm Bondye a. Li te vrèman enterese nan fason yo t apral ranpli asiyasyon sa a. Gen anpil moun ki gen otorite ki pa t vle tande bon nouvèl la, tankou espè nan Lalwa yo ak Farizyen yo, yon seri moun ki te entèlijan e ki te fè gwo etid. Yo te fè anpil moun konsidere Jezi kòm yon senp bòs chapant e yo te fè moun yo konsidere disip li yo kòm “moun ki pa t fè gwo etid, e [kòm] moun òdinè”. (Tra. 4:13; Mak 6:3.) Sepandan, disip yo te retounen sot preche avèk anpil kè kontan. Yo te preche malgre yo te jwenn opozisyon menm nan men demon yo! Ki sa k te fè kè yo kontan e ki sa k te fè yo gen kouraj konsa? — Li Lik 10:1, 17-21.

 2. a) Nan ki sans disip Jezi yo te tankou timoun? b) Ki sa k te fè disip Kris yo rive konprann yon seri verite ki enpòtan?

² Men sa Jezi te di Jewova: “Papa, ou menm ki Seyè syèl la ak tè a, m ap ba w louwanj devan tout moun, paske ou kache bagay sa yo pou moun save ak moun lespri, men se timoun piti ou revele yo. Wi, O Papa, paske fason sa fèt la ann akò ak volonte w.” ​(Mat. 11:25, 26). Nòmalman, Jezi pa t vle di disip li yo te timoun nan yon sans literal. Olye de sa, li te konnen yo te sanble ak timoun an konparezon ak moun ki te fè gwo etid e ki te entèlektyèl ki t ap viv nan peyi a, yon seri moun ki te saj nan pwòp je pa yo. Sa k pi enpòtan an, Jezi te anseye disip li yo pou yo vin tankou timoun piti, pou yo kontinye aji avèk imilite e pou yo kite moun anseye yo (Mat. 18:1-4). Ki byenfè yo te jwenn lefètke yo gen imilite? Pa mwayen lespri sen, Jewova te ede disip yo konprann yon seri verite ki enpòtan alòske moun save ak moun lespri ki pa t pran disip yo pou anyen yo pa t ka rive konprann verite sa yo akoz Satan ak pwòp ògèy pa yo.

 3. Ki sa nou pral egzamine nan atik sa a?

³ Nou pa sezi dèske Jezi te kontan anpil konsa! Li te kontan pou l wè jan Jewova te fè tout kalite moun ki gen imilite rive konprann yon seri verite espirityèl ki pwofon kèlkeswa nivo edikasyon yo. Li te kontan anpil tou dèske metòd ansèyman sa a te ann akò ak volonte Papa l. Èske Jewova chanje? E ki fason l montre metòd ansèyman sa a toujou ann akò ak volonte l? Toutpandan n ap egzamine repons kesyon sa yo, nou kapab wè jan metòd ansèyman sa a fè kè n kontan anpil menm jan sa te fè kè Jezi kontan.

 4. Nan ki sans Toudegad senplifye a se yon bèl kado?

⁴ Nan dènye ane ki sot pase yo, òganizasyon Jewova a te plis met aksan sou yon enstriksyon ki senp e ki klè lè l ap bay direksyon nan domèn espirityèl. Ann konsidere twa egzanp. Premyèman, nou vin gen yon Toudegad senplifyea. Anfèt, edisyon Toudegad sa a se yon bèl kado pou moun ki pa fin twò alèz ak lang oswa ki twouve l difisil pou yo fè lekti. Chèf fanmi yo rann yo kont kounye a pitit yo pi dispoze etidye peryodik sa a ki se prensipal mwayen nou jwenn manje nan domèn espirityèl. Gen anpil moun ki te ekri lèt pou yo montre jan yo kontan. Gen yon sè ki fè konnen li te konn pè fè kòmantè nan etid Toudegad la. Men sa l di: “Mwen te pè pale devan moun.” Li pa konsa kounye a! Men sa l te di apre l te fin kòmanse sèvi ak edisyon senplifye a: “Kounye a, mwen fè plis kòmantè pase anvan e m pa pè ankò. Mwen remèsye Jewova e m remèsye nou tou.”

 5. Bay kèk avantaj nou jwenn nan Tradiksyon monn nouvo revize a.

⁵ Dezyèmman, gen yon Bib Tradiksyon monn nouvo revize ki te parèt ann anglè nan reyinyon ànyèl ki te fèt nan dat 5 oktòb 2013 lab. Kounye a, yo diminye kantite mo ki gen nan anpil vèsè, sepandan, sans yo pa chanje e yo menm vin pi klè. Pa egzanp, kounye a vin gen 19 mo olye de 27 nan Jòb 10:1; Pwovèb 8:6 li menm gen 13 mo olye de 20. Toule de vèsè sa yo vin pi klè nan edisyon revize a. Anfèt, men sa yon frè Bondye chwazi pou al nan syèl ki gen plizyè dizèn ane depi l ap sèvi Jewova fidèlman fè konnen: “Apre m fin li liv Jòb la nan edisyon revize a m santi se kòmsi se premye fwa m konprann li!” Gen anpil moun ki di menm bagay la.

 6. Ki santiman w genyen konsènan ajisteman ki te fèt nan fason nou te konprann Matye 24:45-47 yo?

⁶ Twazyèmman, ann konsidere kèk ajisteman nou fèk sot fè nan fason n te konprann kèk vèsè. Pa egzanp, nou te vrèman kontan pou ajisteman ki te parèt nan Toudegad 15 jiyè 2013 la sou fason nou vin konprann “esklav fidèl ki prevwayan an”. (Mat. 24:45-47.) Nou te vin konprann esklav fidèl la se Kolèj santral la alòske “domestik” yo se tout moun esklav la ap bay manje nan domèn espirityèl yo kit moun sa yo se moun Bondye chwazi pou al nan syèl kit yo se “lòt mouton”. (Jan 10:16.) Se pa ti kontan nou kontan aprann verite sa yo e se pa ti kontan nou kontan fè nouvo yo konprann verite sa yo! Ki lòt fason ankò Jewova montre metòd ansèyman nou an ki senp e ki klè a se yon metòd ki ann akò ak volonte l?

7, 8. Bay egzanp kèk istwa pwofetik yo pale de yo nan Bib la.

⁷ Si w gen plizyè dizèn ane depi w ap sèvi Jewova, sandout ou remake jan gen chanjman k ap fèt tikras pa tikras nan fason piblikasyon nou yo esplike anpil nan istwa ki ekri nan Bib la. Sa k fè sa? Anvan sa, piblikasyon nou yo te plis konn sèvi ak mo lonbray ak mo reyalite a pou l esplike istwa biblik yo. Yo te konsidere istwa a jan l parèt nan Bib la kòm yon lonbray epi reyalite a se nenpòt akonplisman pwofetik istwa sa a ta genyen alavni. Èske n gen yon rezon biblik ki pèmèt nou prezante istwa yo konsa? Wi. Pa egzanp, Jezi te pale konsènan “siy pwofèt Yona a”. (Li Matye 12:39, 40.) Jezi te fè konnen tan Yona te pase nan vant pwason an, ki t ap yon tonm pou Yona si Jewova pa t prezève lavi l, te pwofetize kantite tan li t ap gen pou l pase nan tonm nan.

⁸ Gen lòt istwa pwofetik Bondye te fè ekri nan Bib la tou. Apot Pòl te pale konsènan anpil nan yo. Pa egzanp, relasyon Abraram te gen ak Aga ansanm ak Sara a te pwofetize relasyon Jewova te gen ak nasyon Izrayèl la ansanm ak pati òganizasyon Bondye a ki nan syèl la (Gal. 4:22-26). Menm jan an tou, tabènak la, tanp lan, jou Pwopisyasyon an, Gran prèt la ansanm ak lòt aspè ki te gen nan Lwa Jewova te bay pa mwayen Moyiz la te yon “lonbray bon bagay ki gen pou vini yo”. (Ebre 9:23-25; 10:1.) Lafwa nou ap vin pi solid lè n etidye bèl istwa pwofetik sa yo. Men, èske sa vle di tout moun, tout evènman oswa tout bagay yo pale de yo nan Bib la se lonbray yon moun oswa yon bagay ki gen pou vini?

 9. Anvan sa, ki fason yo te konn esplike istwa Nabòt la?

⁹ Anvan sa, byen souvan, se konsa nou te konn esplike istwa yo. Pa egzanp, ann konsidere istwa Nabòt, yon moun rèn Jezabèl, yon rèn ki te mechan, te akize san rezon e l te fè touye yon fason pou Ahab, mari l, te ka pran jaden rezen Nabòt la (1 Wa 21:1-16). Nan ane 1932, yo te fè konnen istwa sa a gen yon sans senbolik. Yo te fè konnen Ahab ak Jezabèl te reprezante Satan ak òganizasyon l lan, Nabòt te reprezante Jezi, epi lanmò Nabòt te pwofetize lanmò Jezi. Sepandan, plizyè dizèn ane annapre, nan liv “Se pou non w vin sen” an (anglè) ki te parèt nan ane 1961, yo te fè konnen Nabòt te reprezante moun Bondye chwazi pou al nan syèl yo epi Jezabèl te reprezante lakretyente. Konsa, pèsekisyon Nabòt te sibi anba men Jezabèl la te reprezante pèsekisyon moun Bondye chwazi pou al nan syèl yo ap sibi pandan dènye jou yo. Pandan plizyè ane, fason sa a yo te konn esplike istwa biblik yo te fòtifye lafwa pèp Bondye a. Nan ka sa a, ki sa k fè yo vin ak chanjman sa a?

10. a) Lefètke esklav la te vin pran plis prekosyon, kòman sa te ede l lè l ap esplike kèk istwa biblik? b) Sou ki sa piblikasyon nou yo met plis aksan kounye a?

¹⁰ Jan n gendwa te atann sa, pandan tout ane ki pase yo, Jewova te ede “esklav fidèl ki prevwayan an” pran plis prekosyon tikras pa tikras. Lefètke esklav la vin pran plis prekosyon, sa te pouse l fè plis atansyon lè yo vle konsidere yon istwa biblik kòm yon istwa pwofetik. Se sèlman si yo gen yon bon baz ki parèt byen klè nan Ekriti yo y ap fè sa. Anplis de sa, yo te rann yo kont gen kèk esplikasyon yo te bay anvan sa konsènan lonbray yo ak reyalite yo ki te difisil pou anpil moun konprann. Li ka difisil anpil pou moun yo konprann sans ansèyman sa yo, pou yo rive sonje yo e pou yo aplike yo. Sepandan, sa k pi mal la, sèke lè yo konsantre yo twòp sou tout ti detay nan fason istwa biblik y ap egzamine yo gen posiblite pou yo akonpli sa ka fè yo pèdi leson moral ak leson pratik ki gen nan istwa sa yo. Se sa k fè, kounye a piblikasyon nou yo met plis aksan sou leson ki pratik e ki senp ki gen rapò ak lafwa, andirans, atachman pou Bondye ansanm ak lòt kalite enpòtan ankò nou aprann nan istwa biblik yoc.

11. a) Kounye a, ki jan nou konprann istwa Nabòt la, e poukisa egzanp mesye sa a aprann nou anpil leson? b) Ki sa k fè nan ane ki fèk sot pase yo se apèn si piblikasyon nou yo te pale konsènan lonbray ak reyalite? (Gade “Kesyon lektè yo poze” ki nan Toudegad sa a.)

¹¹ Kidonk, kounye a ki jan n ta dwe konprann istwa Nabòt la? Yon fason ki pi klè e ki pi senp, mesye sa a ki te jis pa t mouri paske l te lonbray Jezi oswa moun Bondye chwazi pou al nan syèl yo, men, li te mouri paske l te kenbe entegrite l. Li te ret atache ak Lwa Jewova a menm lè gen moun ki t ap mal sèvi ak pouvwa yo pou pèsekite l (Nonb 36:7; 1 Wa 21:3). Konsa, egzanp Nabòt la aprann nou anpil leson paske nenpòt nan nou ka jwenn pèsekisyon pou menm rezon sa yo. (Li 2 Timote 3:12.) Moun tout kote kapab aprann yon leson ki fòtifye lafwa yo nan istwa sa a, yo ka konprann li, yo ka sonje l e yo ka aplike l.

12. a) Ki sa n pa ta dwe panse konsènan istwa biblik yo? b) Ki sa k fè n ka rive jwenn esplikasyon ki byen klè konsènan bagay pwofon yo? (Gade nòt anba paj la.)

¹² Èske n ta dwe panse se leson pratik sèlman nou ka aprann nan istwa biblik yo e yo pa gen lòt siyifikasyon? Non. Jodi a, li pi fasil pou piblikasyon nou yo anseye n yon bagay ki pou fè n sonje yon lòt bagay oswa pou yo sèvi ak bagay sa a pou montre yon lòt bagay. Li ra pou piblikasyon nou yo prezante anpil istwa biblik kòm lonbray yon bagay k ap reyalize egzakteman jan yo rakonte l la. Pa egzanp, nou kapab gen rezon pou n di fason Nabòt te kenbe entegrite l menm lè l t ap fè fas ak pèsekisyon ak lanmò a fè n sonje fason Kris ansanm ak moun Bondye chwazi pou al nan syèl yo kenbe entegrite yo. Sepandan, sa fè n sonje tou fason anpil “lòt mouton” Seyè a kenbe fidelite yo. Yon konparezon ki senp e ki klè konsa ann akò ak metòd ansèyman Bondye ad.

13. Ki egzanp ki montre kounye a nou esplike kèk nan parabòl Jezi te bay yo yon fason ki pi senp e ki pi klè?

¹³ Jezi Kris se pi gran Anseyan ki te pase sou tè a. Li te renmen sèvi ak parabòl lè l ap anseye (Mat. 13:34). Parabòl yo pèmèt nou rive jwenn yon seri imaj vivan ki pouse n reflechi e ki touche kè n. Èske piblikasyon nou yo te vin esplike parabòl Jezi yo yon fason ki pi senp e ki pi klè tank ane yo t ap pase? Repons lan se wi! Èske n pa t kontan dèske Toudegad 15 jiyè 2008 la te pèmèt nou jwenn yon esplikasyon klè sou parabòl Jezi te bay konsènan ledven an, grenn moutad la ak filè a? Kounye a, nou konprann byen klè parabòl sa yo gen rapò ak Wayòm Bondye a ansanm ak bèl bagay Wayòm nan ap akonpli nan rasanbleman vrè disip Kris yo nan monn mechan sa a.

14. a) Ki fason n te esplike parabòl bon Samariten an? b) Ki jan n konprann parabòl Jezi a jodi a?

¹⁴ Sepandan, ki sa n ka di konsènan istwa oswa parabòl Jezi te bay ki gen plis detay yo? Nòmalman, gen kèk nan yo nou dwe pran nan yon sans senbolik oswa pwofetik alòske gen lòt ki gen leson pratik. Men, ki jan n ka fè diferans lan? Pandan ane ki sot pase yo, repons kesyon sa a te vin pi klè tikras pa tikras. Pa egzanp, ann wè kòman nou te esplike parabòl Jezi te bay konsènan bon Samariten an (Lik 10:30-37). Nan ane 1924, Toudegad la te fè konnen Samariten an reprezante Jezi, wout ki soti Jerizalèm pou al Jeriko a, yon wout ki te sou pant yon mòn, reprezante sitiyasyon limanite depi rebelyon ki te fèt ann Edenn nan, bandi yo reprezante yon seri gwo asosyasyon ansanm ak kèk moun k ap eksplwate moun epi prèt la ak Levit la reprezante lakretyente. Jodi a, piblikasyon nou yo sèvi ak parabòl sa a pou fè tout kretyen sonje yo pa dwe nan patipri lè y ap ede moun ki nan bezwen sitou nan domèn espirityèl. Èske sa pa fè n kontan dèske Jewova fè n pi byen konprann ansèyman l yo?

15. Ki sa n pral egzamine nan atik ki vin apre a?

¹⁵ Nan atik ki vin apre a, nou pral egzamine yon lòt parabòl Jezi te bay ki se parabòl dis fi vyèj yo (Mat. 25:1-13). Ki fason Jezi te vle pou disip li yo k ap viv nan dènye jou yo rive konprann kokennchenn parabòl sa a? Èske tout ti detay ki nan parabòl pwofetik sa a, sa vle di chak moun, chak bagay ak chak evènman gen yon siyifikasyon senbolik? Oswa èske l gen yon leson pratik disip Kris yo t ap bezwen pou gide yo nan dènye jou yo? Ann gade pou n wè.