Byenveyans: Yon kalite moun demontre nan pawòl ak nan aksyon

ALA sa bon lè yon moun demontre byenveyans! Lè nou rann nou kont yon moun gen sousi pou nou, nou gen rekonesans pou sa. Piske se nou tout ki renmen lè moun trete nou avèk byenveyans, ki jan nou ka vin gen bèl kalite sa a?

Demontre byenveyans vle di montre n enterese toutbon nan lòt moun e n montre sa nan pawòl nou ak nan aksyon nou. Kòm byenveyans se yon kalite ki pouse moun aji, li pa sifi pou n annik montre nou janti pou n panse nou gen byenveyans. Se lanmou sensè nou gen pou lòt moun ak mete nou mete nou nan plas yo k ap fè nou gen bonjan byenveyans. Mete sou sa, kalite byenveyans sa a fè pati fwi lespri sen an Bondye vle pou kretyen yo genyen an (Gal. 5:22, 23). Piske nou dwe chèche gen byenveyans, ann wè ki jan Jewova ak Pitit gason l lan demontre kalite sa a ak fason nou ka suiv egzanp yo.

Jewova gen byenveyans ak konsiderasyon pou tout moun, san wete “moun ki engra, [...] ak moun ki mechan”. (Lik 6:35.) Pa egzanp, Jewova “fè solèy li leve ni sou moun ki mechan ni sou moun ki bon e li fè lapli tonbe ni sou moun ki jis ni sou moun ki pa jis”. (Mat. 5:45.) Konsa, menm moun ki pa rekonèt Jewova kòm Kreyatè yo benefisye tout bon bagay li bay pou yo ka gen lavi e pou yo jwenn yon ti kè kontan nan lavi a.

Jewova bay yon egzanp estrawòdinè nan demontre byenveyans nan fason li te boule ak Adan ak Èv. Yon ti tan apre Adan ak Èv fin peche, yo te “kole fèy fig frans ansanm pou yo pase nan tay yo pou kouvri kò yo”. Men, Jewova te konnen yo t ap bezwen rad ki apwopriye pou yo te ka viv pa deyò jaden an, kote tè a te modi e se “pikan ak chadwon” ki te pouse ladan l. Donk, Jewova te ba yo sa yo te gen bezwen lè l te fè “rad long ak po bèt” pou yo. — Jen. 3:7, 17, 18, 21.

Byenke Jewova gen byenveyans ni pou “moun ki engra, [...] ni [pou] moun ki mechan”, li vle demontre byenveyans sitou pou moun k ap sèvi l fidèlman. Pa egzanp, nan epòk pwofèt Zakari, gen yon zanj ki te gen pwoblèm lè l te wè moun yo kanpe travay yo t ap fè pou rekonstwi tanp Jerizalèm nan. Jewova te koute zanj lan lè zanj lan t ap fè konnen sa k ap trakase l e Jewova te reponn li “ak bèl ti pawòl, pawòl ki bay konsolasyon”. (Zak. 1:12, 13.) Jewova te aji menm jan an ak pwofèt Eli. Yon lè, pwofèt la te tèlman dekouraje li te mande lanmò. Jewova te byen konprann santiman Eli e l te voye yon zanj ankouraje l. Mete sou sa, Bondye te bay pwofèt la asirans li pa t poukont li. Apre Eli te fin tande bon pawòl sa yo e l te jwenn èd li te bezwen an, li te vin kapab kontinye fè travay li te gen pou l fè a (1 Wa 19:1-18). Pami sèvitè Bondye yo, kiyès ki te pi byen imite Jewova nan demontre bèl kalite sa a ki se byenveyans?

Pandan Jezi te sou tè a, moun te konnen l kòm yon moun ki gen byenveyans ak konsiderasyon pou lòt moun. Li pa t janm aji yon fason ki di ak moun ni li pa t janm aji kòm diktatè. Kòm li te gen sousi pou moun, li te di: “Vin jwenn mwen, nou tout ki bouke e ki gen chay n ap pote, e m ap ban nou fòs. [...] Paske, jouk mwen an fasil pou moun pote.” (Mat. 11:28-30). Piske Jezi te demontre byenveyans pou yo, yo te suiv li tout kote l ale. Jezi te “gen pitye pou yo”, sa ki te pouse l ba yo manje, geri moun ki malad e ki enfim yo, epi anseye yo “anpil bagay” sou Papa l. — Mak 6:34; Mat. 14:14; 15:32-38.

Yon bagay ki montre Jezi te gen anpil byenveyans se lefètke li te konprann yo e l te montre l gen bon jijman nan fason l aji ak yo. Anfèt, menm lè yo te vin kote Jezi nan yon moman ki pa t apwopriye, li te resevwa tout moun ki te chèche wè l yo avèk “jantiyès”. (Lik 9:10, 11). Pa egzanp, gen yon dam ki te manyen rad li paske l te espere li t ap geri anba yon san ki t ap koule sou li. Byenke dam nan te pè paske l pa t pwòp selon Lalwa, Jezi pa t blame l (Lev. 15:25-28). Jezi te gen konpasyon pou dam sa a ki t ap soufri depi 12 an, li te di l: “Pitit fi m, lafwa w geri w. Ale anpè, ou geri anba maladi ki t ap fè w soufri a.” (Mak 5:25-34). Ala yon bèl aksyon ki demontre byenveyans!

Nan egzanp nou sot wè la yo, nou te wè bonjan byenveyans mache ak aksyon. Nan parabòl bon Samariten an, Jezi te montre nesesite pou nou aji pou n demontre byenveyans. Malgre Samariten yo ak Juif yo pa t antann yo, Samariten nan parabòl la te gen pitye pou yon mesye vòlè te pran afè l, yo te bat li e yo te kite l twaka mò sou wout la. Se byenveyans Samariten an te genyen ki te pouse l aji. Li te panse blese mesye a e l te mennen l nan yon otèl. Apre sa, Samariten an peye mèt otèl la pou pran swen mesye ki blese a e l te fè konnen l ap peye pou nenpòt lòt depans yo ta fè. — Lik 10:29-37.

Byenke souvan se nan aksyon nou demontre byenveyans, nou kapab demontre byenveyans tou nan pawòl byen reflechi nou di k ap ankouraje moun. Se sa k fè, menm lè “tètchaje yon moun genyen fè kè l vin lou”, Labib fè konnen “yon bèl ti pawòl fè kè l kontan”. (Pwo. 12:25.) Lè se byenveyans ak bonte ki pouse n pataje kèk bagay ki ankourajan ak lòt moun, n ap ka ankouraje yoa. Bon pawòl nou di yo ap montre nou gen sousi pou yo. Lè yo jwenn ankourajman konsa, y ap ka pi byen fè fas ak pwoblèm yo jwenn nan lavi a. — Pwo. 16:24.

Lefètke Bondye kreye lèzòm “pòtre ak li”, sa fè tout moun gen kapasite pou yo demontre kalite sa a ki se byenveyans (Jen. 1:27). Pa egzanp, lè apot Pòl t ap vwayaje al Wòm, Jiliyis, ofisye lame women ki t ap siveye Pòl la, “te byen boule ak Pòl, li te pèmèt li al kay zanmi l pou yo pran swen l” nan vil Sidon (Tra. 27:3). Yon ti tan annapre, lè bato Pòl t ap vwayaje a te fè nofraj, moun sou zile Malt yo te “boule trè byen” ni ak Pòl ni ak lòt moun ki te nan bato a. Moun ki te sou zile a te menm fè dife pou viktim yo chofe (Tra. 28:1, 2). Byenke sa yo te fè yo te merite felisitasyon, byenveyans gen ladan l plis pase annik fè yon bon aksyon yon lè konsa.

Pou nou fè Bondye plezi toutbon, byenveyans dwe vin yon kalite ki fè pati pèsonalite nou ak fason nou viv. Se poutèt sa Jewova mande n pou n “abiye” nou ak byenveyans (Kol. 3:12). Men, n ap dakò li pa toujou fasil pou n demontre kalite sa a ki soti nan Bondye. Sa k fè sa? Se paske nou ka timid, nou ka manke konfyans nan tèt nou, nou ka ap fè fas ak opozisyon oswa nou ka toujou gen tras egoyis lakay nou. Sepandan, nou ka rive fè fas ak difikilte sa yo lè nou konte sou lespri sen e lè n imite fason Jewova demontre byenveyans. — 1 Kor. 2:12.

Èske n wè nan ki domèn nou bezwen travay pou n demontre byenveyans? Pou kòmanse, nou dwe mande tèt nou: ‘Lè yon moun ap pale avè m, èske m mete m nan plas li? Èske m rive wè lè lòt moun nan bezwen? Ki dènye fwa mwen te demontre byenveyans pou yon moun ki pa fanmi m oswa bon zanmi m?’ Apre sa, nou ka fikse kèk objektif, tankou aprann pi byen konnen moun nan antouraj nou, sitou moun nan kongregasyon nou. Konsa, n ap pi byen konn sitiyasyon yo ak sa yo bezwen. Epi, nou dwe fè efò pou n demontre byenveyans pou moun sa yo fason nou t ap renmen yo demontre byenveyans pou nou si nou te nan plas yo (Mat. 7:12). Finalman, Jewova ap beni efò nou fè pou n demontre byenveyans si n mande l èd. — Lik 11:13.

Pòl te bay yon bèl egzanp nan demontre byenveyans. Pa egzanp, li “konn byen resevwa tout moun ki vin wè l”. (Tra. 28:30, 31.) Moun te alèz pou yo vin kot Pòl paske li te montre l enterese nan yo pèsonèlman, e l te konn fè sa ni nan pawòl ni nan aksyon. Menm jan an tou, lè n byen konpòte n sa ka atire lòt moun nan laverite. Lè n demontre byenveyans pou tout moun, san wete moun ki opoze avè n yo, nou ka touche kè yo e yo ka pa opoze avè n ankò (Wom. 12:20). Rive yon lè, mesaj ki nan Bib la ka menm atire yo.

Nan Paradi ki pral gen sou tè a, se sèten, anpil moun k ap resisite pral kontan pwofite bonjan byenveyans lan, petèt pou premye fwa nan vi yo. Rekonesans ap pouse yo menm tou demontre byenveyans pou lòt moun. Kèlkeswa moun ki pral viv nan epòk sa a ki refize demontre byenveyans e ki refize ede lòt moun pap kontinye viv anba dominasyon Wayòm Bondye a. Yon lòt bò, moun Bondye fè favè pou viv pou toutan yo pral aji youn ak lòt avèk lanmou e avèk byenveyans (Sòm 37:9-11). Pral gen lapè ak sekirite nan monn nan! Sepandan, anvan bèl epòk sa a rive, ki jan n ka jwenn byenfè lè n demontre byenveyans?

Men sa Bib la di: “Lè yon moun bon moun, se tèt li l fè byen.” (Pwo. 11:17). Lè yon moun bon moun sa atire lòt moun, e yo menm tou yo vle aji byen ak moun sa a. Men sa Jezi te di: “Se ak mezi nou mezire a y ap mezire pou nou tou.” (Lik 6:38). Kidonk, yon moun ki gen byenveyans fasil pou gen bon zanmi e pou amitye sa yo dire.

Apot Pòl te ankouraje moun nan kongregasyon Efèz yo pou yo ‘aji byen youn ak lòt, pou yo gen kè sansib ak tandrès, pou youn padone lòt ak tout kè l’. (Efe. 4:32.) Yon kongregasyon kote kretyen yo demontre byenveyans e yo chèche ede youn lòt jwenn anpil byenfè. Yo pa janm pale yon fason ki di, ni ap plede kritike moun oswa di pawòl pou blese moun. Olye yo tonbe nan fè tripotay, yo fè tout sa yo kapab pou yo sèvi ak lang yo pou yo ede lòt moun (Pwo. 12:18). Konsa, kongregasyon an ap pwogrese nan domèn espirityèl.

Vrèmanvre, byenveyans se yon kalite moun demontre nan pawòl ak nan aksyon. Lè n gen byenveyans, nou imite pèsonalite Jewova, Bondye nou an, li menm ki akeyan e ki renmen bay (Efe. 5:1). Anretou, n ap fòtifye kongregasyon nou yo e n ap atire lòt moun nan adorasyon ki pwòp la. Se pou moun toujou konnen nou antanke moun k ap demontre byenveyans!