Ann aprann nan egzanp Dànyèl

 1. Sa k fè pwofèt Dànyèl te enpresyone Babilónyen yo?

PWOFÈT Dànyèl te yon jèn gason lè Babilónyen yo te fè l vin prizonye e yo te mennen l byen lwen peyi l. Men, li klè Dànyèl te enpresyone Babilónyen yo. Yo te wè ‘sa je yo ba yo’. Yo te wè Dànyèl pa t “gen okenn domaj, [li te] gen bèl aparans” e l te soti nan gran fanmi (1 Sam. 16:7). Pou rezon sa yo, Babilónyen yo te ba l fòmasyon pou l te vin yon moun enpòtan nan peyi a. — Dàn. 1:3, 4, 6.

 2. Ki jan Jewova te wè Dànyèl? (Ezekyèl 14:14).

² Se pa paske Dànyèl te gen bèl aparans oswa paske li te sot nan gran fanmi ki fè Jewova te renmen l, men, se pou kalite moun jèn gason sa a te fè efò pou l ye a. Anfèt, sanble Dànyèl te nan fen adolesans li oswa nan kòmansman ventèn li lè Jewova te fè konnen li se yon moun ki jis menm jan ak Noye ak Jòb ki te gen bon repitasyon devan Bondye pandan plizyè dizèn ane. (Jen. 5:32; 6:9, 10; Jòb 42:16, 17; li Ezekyèl 14:14.) Dànyèl te viv lontan, li te gen yon vi ki te estrawòdinè, e Jewova te kontinye renmen l pandan tout tan sa a. — Dàn. 10:11, 19.

 3. Ki sa nou pral wè nan atik sa a?

³ Nan atik sa a, nou pral wè de nan kalite Dànyèl te genyen ki te fè l gen anpil valè pou Jewova. Toudabò, nou pral pale sou chak kalite sa yo, e nou pral wè nan ki moman Dànyèl te demontre yo. Annapre, nou pral wè sa k te ede Dànyèl vin gen kalite sa yo. Finalman, nou pral wè ki jan n ka suiv egzanp li. Byenke se pou jèn yo ekri atik sa a, nou tout ka aprann nan egzanp Dànyèl.

 4. Ki jan Dànyèl te montre l gen kouraj? Bay yon egzanp.

⁴ Moun ki gen kouraj yo konn pè, men, yo pa kite laperèz anpeche yo fè sa ki dwat. Dànyèl se te yon jèn gason ki te gen anpil kouraj. Ann wè de okazyon kote l te montre l gen kouraj. Premye a, se te petèt anviwon dezan apre Babilónyen yo te fin detwi Jerizalèm. Wa Nebikadneza, ki t ap dirije Babilòn, te fè yon rèv ki te boulvèse l kote l te wè yon estati ki te gwo anpil. Li te menase pou l touye tout mesye ki gen sajès ki t ap travay pou li yo, san wete Dànyèl, si yo pa t kapab di l rèv li te fè a e si yo pa t kapab di l sa rèv la vle di (Dàn. 2:3-5). Dànyèl te oblije aji vit. Si l pa t fè sa, anpil moun t ap pèdi lavi yo. Li te “antre kot wa a e li [te] mande l pou l ba l tan pou l esplike l rèv li te fè a”. (Dàn. 2:16.) Sa te mande kouraj ak lafwa. Pa gen okenn kote nan Bib la ki montre Dànyèl te konn esplike rèv anvan sa. Li te mande zanmi l yo, Babilónyen yo te bay non Chadrak, Mechak ak Abèdnego, “pou yo priye Bondye nan syèl la pou l fè yo mizèrikòd pou l ka devwale sekrè sa a”. (Dàn. 2:18.) Jewova te reponn priyè yo te fè a. Grasa èd Bondye, Dànyèl te esplike Nebikadneza rèv la. Dànyèl ak zanmi l yo pa t pèdi lavi yo.

 5. Ki jan Dànyèl te bezwen montre l gen kouraj yon lòt fwa ankò?

⁵ Kèk tan apre Dànyèl te fin esplike rèv ki gen rapò ak estati ki gwo anpil la, yon lòt fwa ankò, li te bezwen montre l gen anpil kouraj. Nebikadneza te fè yon lòt rèv ki te boulvèse l. Nan rèv sa a, li te wè yon gwo pyebwa ki te wo anpil. Dànyèl te met kouraj sou li pou l esplike wa a sa rèv la vle di, e li te menm fè wa a konnen li t ap vin fou e li pa t ap wa pandan yon tan (Dàn. 4:25). Wa a te ka panse Dànyèl kont li, e l te ka fè touye Dànyèl. Men, Dànyèl te met kouraj sou li pou l ba l mesaj la kanmenm.

 6. Ki sa k dwe te ede Dànyèl pou l aji ak kouraj?

⁶ Ki sa k dwe te ede Dànyèl pou l aji ak kouraj pandan tout vi l? Lè Dànyèl te timoun, se sèten manman l ak papa l te ba l bèl egzanp. Pa gen dout yo te obeyi enstriksyon Jewova te bay paran ki Izrayelit yo, e yo te aprann pitit yo Lwa Bondye a (Det. 6:6-9). Nonsèlman Dànyèl te konn Dis Kòmandman yo, men, li te konn anpil detay sou Lalwa tou. Pa egzanp, li te konnen sa yon Izrayelit te ka manje ak sa l pa t ka manjeb (Lev. 11:4-8; Dàn. 1:8, 11-13). Epitou, Dànyèl te aprann istwa pèp Bondye a e l te konnen sa k te rive yo lè yo pa t obeyi prensip Jewova yo (Dàn. 9:10, 11). Eksperyans Dànyèl te fè pandan tout vi l te fè l gen konfyans Jewova ak zanj Li yo ki gen pisans t ap ede l. — Dàn. 2:19-24; 10:12, 18, 19.

 7. Ki lòt bagay ki te ede Dànyèl gen kouraj? (Gade foto a tou.)

⁷ Dànyèl te etidye sa pwofèt Bondye yo te ekri yo, san wete pwofesi Jeremi yo. Etid sa a Dànyèl te fè a te vin ede l konprann menmsi Juif yo te gen lontan depi yo prizonye nan Babilòn, sa pa t ap pran anpil tan pou yo libere (Dàn. 9:2). Lefètke Dànyèl te wè pwofesi nan Bib la reyalize, se sèten sa te fè l vin gen plis konfyans nan Jewova, e moun ki gen anpil konfyans nan Bondye ka vin gen anpil kouraj. (Konpare ak Women 8:31, 32, 37-39.) Sa k pi enpòtan an, Dànyèl te konn priye Papa l ki nan syèl la souvan (Dàn. 6:10). Dànyèl te konfese peche l devan Jewova e li te fè l konnen sa l santi. Epitou, li te mande Jewova ede l (Dàn. 9:4, 5, 19). Dànyèl te yon moun menm jan ak nou, li pa t fèt tou gen kouraj. Okontrè, li te vin gen kalite sa a paske l te konn etidye, li te konn priye Jewova e l te met konfyans li nan Li.

 8. Ki jan n ka vin gen kouraj?

⁸ Ki sa n bezwen fè pou n vin gen kouraj? Paran nou ka ankouraje n pou n met kouraj sou nou, men yo pa ka kite kalite sa a pou nou kòm eritaj. Pou w vin gen kouraj, se tankou lè w ap aprann yon metye. Youn nan fason w ka vin byen konn metye a se lè w byen suiv sa moun k ap ba w fòmasyon an ap fè e lè w fè egzakteman sa l ap fè. Menm jan an tou, nou aprann gen kouraj lè n byen gade fason lòt moun montre yo gen kalite sa a e lè n suiv egzanp yo. Donk, ki sa n aprann nan egzanp Dànyèl? Menm jan avè l, nou bezwen konn Pawòl Bondye a byen. Nou dwe chèche vin gen yon relasyon sere ak Jewova. N ap rive genyen l lè n alèz pou n pale avè l e lè n fè sa souvan. Epitou, nou bezwen met konfyans nou nan Jewova toutpandan nou gen konviksyon l ap soutni nou. Konsa, lè lafwa n ap pase anba eprèv, n ap gen kouraj.

 9. Ki byenfè nou jwenn lè n gen kouraj?

⁹ Lè n gen kouraj, sa ede n plizyè fason. Ann pale konsènan eksperyans Benn te fè. Li te nan yon lekòl nan peyi Almay kote tout moun te kwè nan evolisyon e yo te panse istwa Bib la rakonte sou kreyasyon an se yon lejann. Yon jou, yo te bay Benn posiblite pou l kanpe devan klas la pou l esplike rezon ki fè l kwè se kreye yo te kreye lavi. Benn te met kouraj sou li pou l pale sou kwayans li. Ki rezilta sa te bay? Men sa Benn di: “Pwofesè m nan te koute m ak anpil atansyon, e l te fè plizyè kopi rechèch mwen te fè pou m te kore sa m t ap di yo, epi l te bay chak elèv nan klas la youn.” Ki jan kondisip Benn yo te reyaji? Men sa Benn di: “Anpil nan yo te koute sa m t ap di yo e yo te di yo gen respè pou mwen.” Jan eksperyans Benn te fè a montre sa, byen souvan, moun respekte moun ki gen kouraj. Epitou, moun konsa ka atire moun ki gen kè sensè yo pou yo chèche konnen Jewova. Vrèmanvre, nou gen bonjan rezon pou n chèche gen kouraj.

10. Ki sa fidelite ye?

¹⁰ Nan Bib la, mo ebre lè yo tradui l yo mete “fidèl” oswa “lanmou fidèl” pou li a bay ide yon atachman plen lanmou, e byen souvan yo itilize l pou pale konsènan lanmou Bondye gen pou sèvitè l yo. Yo itilize menm mo sa a tou pou pale konsènan lanmou sèvitè Bondye yo demontre youn pou lòt (2 Sam. 9:6, 7). Tank tan ap pase, nou kapab vin pi fidèl. Ann wè ki jan Dànyèl te vin pi fidèl.

11. Ki jan fidelite Dànyèl te pase anba eprèv lè l te vin granmoun anpil? (Gade foto ki sou paj kouvèti a.)

¹¹ Nan plizyè okazyon nan lavi Dànyèl, li te jwenn yon seri eprèv ki te ka anpeche l ret fidèl ak Jewova. Men, youn nan pi gwo eprèv li te jwenn, se lè l te nan 90 an yo. Lè sa a, moun peyi Medi ak moun peyi Pès yo te pran Babilòn, e se te wa Dariyis ki t ap dirije. Gwo potanta ki t ap travay nan palè wa a pa t renmen Dànyèl e yo pa t gen respè pou Dye li t ap adore a. Donk, mesye sa yo te fè yon konplo pou yo te fè touye l. Yo te fè wa a siyen yon dekrè pou wè si Dànyèl t ap ret fidèl ak Bondye l la oswa si l t ap ret fidèl ak wa a. Sèl sa Dànyèl t ap gen pou l fè pou l te montre l fidèl ak wa a e pou l te aji menm jan ak tout lòt moun yo se te sispann priye Jewova pandan 30 jou. Dànyèl te refize fè sa. Se sa k fè yo te lage l nan twou lyon an. Men, Jewova te rekonpanse Dànyèl poutèt li te fidèl e l te delivre l anba bouch lyon yo (Dàn. 6:12-15, 20-22). Ki jan n ka ret fidèl ak Jewova menm jan ak Dànyèl?

12. Ki sa k fè Dànyèl te ret fidèl ak Jewova?

¹² Jan nou te wè sa pi wo a, pou n ret fidèl ak Jewova nou dwe renmen l anpil. Dànyèl te ret fidèl ak Jewova paske l te renmen Papa l ki nan syèl la anpil. Pa gen dout, se paske Dànyèl te konn reflechi sou kalite Jewova yo ak fason Jewova te demontre kalite sa yo ki fè l te vin renmen L anpil konsa (Dàn. 9:4). Epitou, Dànyèl te medite sou tout bon bagay Jewova te fè pou li ak pou pèp Li a e l te gen rekonesans pou sa. — Dàn. 2:20-23; 9:15, 16.

13. a) Ki difikilte jèn nou yo konn jwenn ki pase fidelite yo anba eprèv? Bay yon egzanp. (Gade foto a tou.) b) Selon videyo a, ki jan w ta ka reponn lè lòt moun mande si Temwen Jewova yo dakò ak moun ki chwazi vin omoseksyèl?

¹³ Menm jan ak Dànyèl, jèn nou yo ap viv nan mitan moun ki pa gen respè pou Jewova ak prensip li yo. Moun sa yo ka pa renmen kèlkeswa moun ki pa gen menm kwayans avè yo oswa ki pa wè bagay yo menm jan ak yo. Kèk nan yo menm eseye fè presyon sou jèn nou yo pou yo sispann fidèl ak Jewova. Pa egzanp, gade sa k te rive yon jèn gason ki rele Gabrielc, k ap viv nan peyi Ostrali. Li te fè fas ak yon sitiyasyon difisil lè l te nan klas segondè. Pwofesè a te mande elèv yo ki jan yo t ap reyaji si yon zanmi yo ta fè yo konnen li se yon omoseksyèl. Pwofesè a te di tout elèv nan klas la ki pa t ap gen pwoblèm ak yon zanmi ki chwazi viv konsa dwe al kanpe nan yon bò nan klas la, e tout moun ki pa t ap dakò yo dwe al kanpe nan lòt bò a. Men sa Gabriel te di: “Tout klas la t al kanpe nan bò kote moun ki dakò yo dwe kanpe a, sof mwen menm ak yon lòt Temwen.” Sa ki te vin pase annapre a te yon gwo eprèv pou Gabriel ki t ap bezwen montre si l t ap ret fidèl ak Jewova. Men sa l di: “Pandan tout rès kou a, lòt elèv yo, e menm pwofesè a, te pase n nan rizib e yo te manke n dega. M te fè tout sa m kapab pou m te rete kalm e pou m te defann lafwa m yon fason ki rezonab, men yo pa t koute anyen nan sa m t ap di a.” Ki jan Gabriel te santi l lefètke fidelite l te pase anba eprèv? Li di: “Mwen pa renmen moun manke m dega. Men, m te kontan anpil lefètke m te defann kwayans mwen e m te ret fidèl ak Jewova.”d

14. Bay youn nan fason nou ka ret fidèl ak Jewova.

¹⁴ Menm jan ak Dànyèl, plis nou renmen Jewova se plis n ap pran detèminasyon pou n ret fidèl avè l. N ap kapab vin gen lanmou sa a lè n aprann konnen kalite Jewova yo. Pa egzanp, nou kapab egzamine bagay li fè yo (Wom. 1:20). Si w vle vin pi renmen Jewova e vin gen plis respè pou li, ou kapab li atik tou kout nan seri ki rele “Ki kote mèvèy sa a soti?” oswa gade videyo yo. Ou kapab egzamine tou bwochi La vie a-t-elle été créée? ak bwochi Cinq questions à se poser sur l’origine de la vie. Men sa yon jèn sè ki moun peyi Dànmak ki rele Esther di anrapò ak piblikasyon sa yo: “Rezònman ki ladan yo estrawòdinè. Bwochi yo pa di w nan ki sa pou w kwè. Yo di bagay yo jan yo ye a, epi yo kite w deside.” Men sa Benn nou te pale de li pi wo a di: “Enfòmasyon ki nan bwochi sa yo te vrèman ranfòse lafwa m. Yo te ban m prèv se Bondye ki kreye lavi.” Apre w fin egzamine enfòmasyon sa yo, sandout, w ap dakò ak Bib la ki di: “Jewova, Bondye nou an, ou merite pou w resevwa glwa, onè ak pisans, paske ou kreye tout bagay.” — Rev. 4:11.e

15. Bay yon lòt fason nou kapab vin pwòch ak Jewova.

¹⁵ Yon lòt fason nou ka vin renmen Jewova anpil se lè nou byen egzamine lavi Jezi, Pitit Gason l lan. Se sa yon jèn sè ki rele Samira k ap viv nan peyi Almay te fè. Men sa l di: “Mwen te vin pi byen konnen Jewova pa mwayen Jezi.” Lè Samira te timoun, li pa t fasil pou l konprann ki jan Jewova te ka zanmi l e ki jan l te ka renmen l. Men, li te ka konprann ki jan Jezi te ka zanmi l e ki jan l te ka renmen l. Men sa l di ankò: “Mwen te renmen Jezi paske l te janti e l te renmen timoun.” Plis li t ap aprann konnen Jezi, se plis li te vin pi pwòch ak Jewova. Sa k fè sa? Men sa l di: “Tikras pa tikras m te vin konprann Jezi imite Papa l yon fason ki san fay. Yo sanble anpil. Mwen te vin rann mwen kont se youn nan rezon ki fè Jewova te voye Jezi sou tè a, pou lèzòm te ka konn Jewova pi byen.” ​(Jan 14:9). Si w vle vin pi pwòch ak Jewova, li ta bon pou w pran tan pou w aprann tout sa w kapab sou Jezi. Si w fè sa, w ap vin pi renmen Jewova e w ap vin pi fidèl avè l.

16. Ki byenfè n ap jwenn lè n fidèl? (Sòm 18:25; Miche 6:8).

¹⁶ Moun ki fidèl konn gen bon zanmi ki fidèl ak yo (Rit 1:14-17). Anplis de sa, moun ki fidèl ak Jewova gen bonjan rezon pou yo santi yo anpè. Sa k fè sa? Paske Jewova pwomèt l ap fidèl ak moun ki fidèl avè l. (Li Sòm 18:25; Miche 6:8.) Imajine sa, Kreyatè a ki Toupisan vle vin pwòch avè n! E lè l pwòch avè n, pa gen okenn eprèv ni okenn opozan k ap ka kraze relasyon sa a, menm lanmò (Dàn. 12:13; Lik 20:37, 38; Wom. 8:38, 39). Se pa ti enpòtan sa enpòtan pou n suiv egzanp Dànyèl e pou n ret fidèl ak Jewova!

17-18. Ki sa n pral aprann nan atik ki vin apre a?

¹⁷ Nan atik sa a, nou te pale sèlman sou de nan kalite Dànyèl te genyen. Men, gen anpil lòt bagay nou ka aprann sou li. Pa egzanp, Jewova te fè Dànyèl fè yon seri vizyon ak rèv e l te ba l posiblite pou l esplike yon seri pwofesi. Anpil nan pwofesi sa yo deja reyalize. Gen lòt ki bay detay sou yon seri evènman ki gen pou rive ki pral gen efè sou chak moun sou tè a.

¹⁸ Nan atik ki vin apre a, nou pral egzamine de pwofesi ki nan liv Dànyèl la. Lè n konprann pwofesi sa yo, sa kapab ede nou tout, jèn kou granmoun, pou n pran bon desizyon depi kounye a. Epitou, pwofesi sa yo kapab ede n gen plis kouraj e yo kapab ede n vin pi fidèl yon fason pou n prepare n pou eprèv k ap vin talè konsa yo.