Byen pwofite tout sa Jewova ban nou

1, 2. a) Ki jan Temwen Jewova yo konsidere Bib la? b) Ki pati nan Bib la ou pi renmen?

ANTANKE Temwen Jewova, nou renmen Labib. Nou jwenn konsolasyon, espwa ak enstriksyon nou ka fè konfyans ladan l (Women 15:4). Se pa yon liv ki gen panse lèzòm ladan l, men se “pawòl Bondye”. — 1 Tesalonisyen 2:13.

² Nòmalman, nou chak gen pati nou pi renmen nan Bib la. Gen moun ki renmen levanjil yo paske yo montre bèl pèsonalite Jewova genyen grasa egzanp Jezi bay (Jan 14:9). Gen lòt moun ki renmen liv ki pale de pwofesi yo tankou liv Revelasyon an ki montre “bagay ki gen pou rive talè konsa”. (Revelasyon 1:1.) Gen moun ki jwenn anpil soulajman lè yo li Sòm yo, e gen lòt moun ki renmen li bon konsèy ki nan liv Pwovèb yo. Li klè, Bib la se yon liv k ap itil tout moun.

3, 4. a) Ki jan n konsidere piblikasyon nou yo? b) Ki piblikasyon nou resevwa pou kèk gwoup moun an patikilye?

³ Piske nou renmen Bib la, nou renmen piblikasyon nou yo tou ki baze sou Pawòl Bondye a. Tout liv, bwochi, peryodik ak lòt piblikasyon nou resevwa yo se kado Jewova ban nou. Yo ede n ret pwòch li e yo ede n gen yon lafwa ki solid. — Tit 2:2.

⁴ An jeneral, anpil nan piblikasyon nou yo se pou Temwen Jewova yo ekri yo. Sepandan, gen kèk piblikasyon yo ekri pou yon gwoup moun an patikilye, tankou jèn yo oswa paran yo. Pifò nan atik ak videyo nou gen sou Entènèt yo se pou moun ki pa Temwen Jewova yo te prepare yo. Tout kalite enfòmasyon sa yo montre jan Jewova kenbe pwomès li te fè pou l bay enstriksyon agogo pou tout kalite moun. — Ezayi 25:6.

 5. Ki sa nou mèt gen asirans Jewova kontan wè?

⁵ Pifò nan nou t ap renmen gen plis tan pou n li Bib la ak piblikasyon nou yo. Se sa k fè nou ka pa toujou pran menm kantite tan pou n etidye tout piblikasyon nou resevwa yo. Nou mèt gen asirans Jewova kontan wè lè n byen sèvi ak tan nou pou n li e pou n etidye Bib la ak piblikasyon nou yo (Efezyen 5:15, 16). Men, gen yon danje nou dwe veye pou n pa pran ladan l. Ki danje sa a?

 6. Ki sa k ka fè n pa byen pwofite sa Jewova ban nou yo?

⁶ Si n pa veye tèt nou, nou kapab panse gen kèk pati nan Bib la oubyen kèk piblikasyon ki pa pou nou. Pa egzanp, e si gen yon pati nan Bib la ki pa aplikab nan sitiyasyon nou? Oubyen, e si nou pa fè pati gwoup moun yo te ekri piblikasyon sa a pou yo a? Èske n ap annik kouri li enfòmasyon sa a oubyen nou pa menm li l ditou? Si n ta fè sa, nou t ap pèdi bon enfòmasyon ki ka itil nou. Ki jan n ka evite danje sa a? Nou dwe sonje se Jewova ki ban nou tout enfòmasyon nou resevwa yo. Men sa nou li nan Bib la: “Mwen menm, Jewova, mwen se Bondye w, Sila a k ap anseye w pou byen w lan.” ​(Ezayi 48:17). Nan atik sa a, nou pral pale de twa konsèy ki kapab ede n byen pwofite tout sa Jewova ban nou.

 7. Poukisa n bezwen ouvri lespri n lè n ap li Labib?

⁷ Ouvri lespri w lè w ap li. Se vre gen kèk pati nan Bib la yo te ekri pou kèk moun an patikilye oswa yon gwoup moun. Men, Bib la di byen klè “Tout sa ki nan Ekriti yo se Bondye ki enspire yo, e yo itil”. (2 Timote 3:16.) Se pou rezon sa a, nou bezwen ouvri lespri nou lè n ap li Labib. Gen yon frè ki eseye raple tèt li li kapab aprann plizyè leson nan yon sèl istwa. Sa ede l wè yon seri leson ki pa parèt byen klè nan istwa yo. Kidonk, anvan nou li Bib la, nou bezwen mande Jewova pou l ouvri lespri nou e pou l ban nou sajès pou n rive wè leson li vle nou aprann yo. — Esdras 7:10; li Jak 1:5.

8, 9. a) Lè n ap li Labib, ki kesyon nou kapab poze tèt nou? b) Ki sa nou aprann sou Jewova lè n ap li kondisyon yon moun dwe ranpli pou l vin ansyen?

⁸ Poze kesyon. Lè w ap li Bib la, fè yon ti poz epi poze tèt ou kesyon ki vin apre yo: ‘Ki sa enfòmasyon sa a aprann mwen sou Jewova? Ki jan m ka itilize l nan lavi m? Ki jan m ka itilize l pou m ede lòt moun?’ Lè n medite sou kesyon sa yo, n ap pi byen pwofite lekti Labib nou. Ann pran yon egzanp. Bib la pale sou kèk kondisyon ansyen yo dwe ranpli. (Li 1 Timote 3:2-7.) Epoutan, pifò nan nou pa ansyen, sa ka fè n panse enfòmasyon sa a pap itil nou anyen. Sepandan, ann itilize twa kesyon nou sot poze anwo yo pou n wè ki jan lis kondisyon sa yo kapab itil nou tout.

⁹ “Ki sa enfòmasyon sa a aprann mwen sou Jewova?” Se Jewova ki ban nou lis kondisyon yon moun dwe ranpli pou l ansyen an. Li mete yon seri prensip wo nivo tout mesye ki gen responsablite nan kongregasyon an dwe suiv. Sa montre kongregasyon an gen anpil valè nan je Jewova. Bib la di li te achte l “ak san pwòp Pitit li a”. (Travay 20:28.) Se sa k fè Jewova atann li pou ansyen yo bay bon egzanp, e ansyen yo gen pou yo rann li kont pou fason yo boule ak moun ki nan kongregasyon an. Li vle nou santi nou an sekirite nan men ansyen yo (Ezayi 32:1, 2). Lè n li kondisyon sa yo, nou aprann jis nan ki pwen Jewova gen sousi pou nou toutbon.

10, 11. a) Lè n ap li kondisyon yon frè dwe ranpli pou l vin ansyen, ki jan n ka itilize enfòmasyon sa yo nan lavi nou? b) Ki jan n ka itilize enfòmasyon sa a pou n ede lòt moun?

¹⁰ “Ki jan m ka itilize l nan lavi m?” Si w deja ap sèvi antanke ansyen, ou dwe repase lis kondisyon sa yo regilyèman, epi fè efò pou w amelyore. Si w ap “chèche vin siveyan”, ou dwe eseye fè tout sa w kapab pou w ranpli tout kondisyon sa yo selon kapasite w (1 Timote 3:1). Men, tout kretyen kapab aprann nan lis kondisyon sa yo. Pa egzanp, Jewova vle pou nou chak montre nou se moun ki rezonab e ki gen bonsans (Filipyen 4:5; 1 Pyè 4:7). Lè ansyen yo se yon “egzanp pou twoupo a”, nou kapab aprann nan men yo, epi “imite lafwa yo”. — 1 Pyè 5:3; Ebre 13:7.

¹¹ “Ki jan m ka itilize l pou m ede lòt moun?” Nou kapab itilize lis kondisyon ansyen yo dwe ranpli yo pou n ede etidyan Labib yo ak lòt moun ki enterese nan Bib la konprann jan ansyen yo diferan ak chèf relijye yo. Epitou, lis sa a ka ede n sonje travay di ansyen yo ap fè nan kongregasyon an. Konsa, sa ap pouse n respekte frè sa yo (1 Tesalonisyen 5:12). Plis nou respekte ansyen yo, se plis y ap gen kè kontan nan asiyasyon yo. — Ebre 13:17.

12, 13. a) Ki kalite rechèch nou ta kapab fè si n itilize zouti nou genyen yo? b) Bay yon egzanp ki montre enfòmasyon ki gen rapò ak lavi pèsonaj biblik yo kapab ede n wè leson nou pap ka wè tousuit nan yon istwa.

¹² Fè rechèch. Lè n ap etidye Labib, nou kapab chèche repons kesyon ki vin apre yo:

• Kiyès ki ekri pati sa a nan Bib la?

• Ki kote e ki lè li te ekri l?

• Ki evènman enpòtan ki te rive lè yo te ekri liv sa a?

Enfòmasyon sa yo kapab ede n wè leson ki pa parèt byen klè tousuit yo.

¹³ Pa egzanp, men sa Ezekyèl 14:13, 14 di: “Si yon peyi ta peche kont mwen lè l aji yon fason ki montre li pa fidèl, m ap lonje men m pou m frape peyi sa a e m ap detwi rezèv manje l yo. Epi, m ap voye yon gwo grangou nan peyi a pou m elimine ni moun ni bèt k ap viv ladan l yo. ‘Menmsi Noye, Dànyèl ak Jòb ta nan peyi sa a, wi, menmsi twa mesye sa yo ta la, se tèt yo sèlman yo t ap sove poutèt yo jis.’ Se sa Jewova, Seyè ki Souvren an, di.” Si n ta fè kèk rechèch, n ap wè Ezekyèl te ekri pawòl sa yo anviwon 612 an anvan Jezi Kris. Noye ak Jòb te deja mouri depi plizyè santèn ane, men Jewova te toujou sonje fidelite yo. Men, Dànyèl te vivan toujou. Sanble li te ka gen anviwon 20 an lè Jewova te di li te jis menm jan ak Noye ak Jòb. Ki sa sa aprann nou? Jewova wè tout sèvitè fidèl li yo e l ba yo valè, menm sa ki jèn yo. — Sòm 148:12-14.

14. Ki jan enfòmasyon nou ekri pou jèn yo ede yo, e ki jan yo ka itil lòt moun tou? (Gade foto ki nan kòmansman atik la.)

¹⁴ Piblikasyon pou jèn. Nou sot aprann nou kapab byen pwofite tout pati ki nan Bib la. Menm jan an tou, nou kapab byen pwofite tout piblikasyon nou yo. Ann pran kèk egzanp. Nan ane ki sot pase yo, Jewova te bay yon pakèt enfòmasyon pou jèn yo.^[1] (Gade nòt la.) Enfòmasyon sa yo ede yo jere presyon yo jwenn nan lekòl yo ak difikilte yo rankontre toutpandan y ap grandi. Men, ki jan nou tout ka byen pwofite atik sa yo ak liv sa yo? Lè n li enfòmasyon yo ekri pou jèn yo, n ap pi byen konprann pwoblèm jèn yo ap rankontre e n ap vin pi byen plase pou n ankouraje yo.

15. Poukisa kretyen ki granmoun yo dwe enterese nan enfòmasyon ki pou jèn yo?

¹⁵ Kretyen ki granmoun yo pa dwe santi yo twò gran pou yo li enfòmasyon ki pou jèn yo. Anpil nan pwoblèm yo pale de yo nan atik sa yo se pwoblèm tout kretyen rankontre. Pa egzanp, nou tout dwe defann kwayans nou, kontwole emosyon nou, reziste anba presyon lòt moun fè sou nou, epi evite move zanmi ak divètisman ki pa bon pou yon kretyen. Se sa k fè, menmsi yo ekri piblikasyon sa yo pou jèn yo, enfòmasyon ki ladan yo soti nan Bib la e yo bon pou tout kretyen.

16. Site yon lòt bagay piblikasyon nou yo ede jèn yo fè.

¹⁶ Epitou, piblikasyon yo fè pou jèn yo kapab ede yo vin gen yon pi bon relasyon ak Jewova. (Li Eklezyas 12:1, 13.) Granmoun yo kapab aprann anpil leson nan enfòmasyon sa yo tou. Ann pran egzanp Réveillez-vous! avril 2009 ki te gen atik “Les jeunes s’interrogent... Comment trouver du plaisir à lire la Bible?” la. Atik sa a te gen anpil bon konsèy ladan l ak yon kare yon moun te ka koupe, sere epi itilize l pou etid pèsonèl. Èske atik sa a te itil moun ki granmoun yo? Gen yon sè marye ki gen pitit ki te fè konnen sa te toujou difisil pou l li Labib. Men, li te suiv konsèy ki nan atik sa a e kounye a li pran plezi li Labib. Li di li renmen wè kòman liv biblik yo makònen youn ak lòt pou vin tankou yon bèl tablo. Epi l ajoute: “Mwen pa t janm kontan li Labib konsa.”

17, 18. Ki jan n ka pi byen pwofite enfòmasyon ki nan piblikasyon yo ekri pou moun ki pa Temwen yo? Bay yon egzanp.

¹⁷ Piblikasyon pou moun ki pa Temwen. Depi ane 2008, nou te byen kontan resevwa edisyon etid Toudegad la. Yo fè edisyon sa a espesyalman pou Temwen Jewova yo, men gen peryodik se sitou pou moun ki pa Temwen Jewova yo fè yo. Ki jan n ka byen pwofite peryodik sa yo tou? Ann pran yon egzanp. Lè w envite yon moun vin nan Sal Wayòm nan, epi moun nan vini, sa fè w kontan anpil. Pandan oratè a ap bay diskou a, w ap panse ak moun ou te envite a. W ap mande tèt ou ki jan moun sa a konprann sa l ap tande yo e ki jan enfòmasyon sa a kapab chanje lavi l. Sa touche kè w e w menm vin santi w pi rekonesan pou diskou oratè a ap bay la.

¹⁸ Menm bagay la kapab rive nou lè n ap li piblikasyon yo ekri pou moun ki pa Temwen yo. Pa egzanp, Toudegad piblik la ak atik ki sou sit jw.org yo itilize mo ak ekspresyon ki fasil pou moun konprann nan esplikasyon yo bay sou Bib la. Lè n pran tan pou n li enfòmasyon sa yo, nou vin pi byen konprann verite biblik nou te deja konnen yo e n vin pi renmen yo. Epitou, nou kapab aprann nouvo fason pou n esplike kwayans nou lè n ap preche. Menm jan an tou, Réveillez-vous! pèmèt nou vin gen plis lafwa gen yon Kreyatè ki egziste. Epitou, li ede n wè ki jan pou n defann kwayans nou. — Li 1 Pyè 3:15.

19. Ki jan n ka montre nou rekonesan anvè Jewova pou sa l ban nou yo?

¹⁹ Vrèmanvre, Jewova ban nou yon pakèt konsèy ak enstriksyon pou byen nou (Matye 5:3). Ann kontinye li tout enfòmasyon li ban nou yo, epi ann viv ann amoni avèk yo. Si n fè sa, n ap byen pwofite enfòmasyon sa yo e n ap montre Jewova nou rekonesan pou tout sa l ban nou. — Ezayi 48:17.