ESPLIKASYON SOU KÈK VÈSÈ
Jeremi 29:11 — “Se mwen ki konnen sa m’ gen nan tèt mwen pou nou”
“‘Paske, mwen konnen sa m gen nan lide m pou m fè pou nou.’ Se sa Jewovaa di. ‘M ap ban nou lapè, mwen pap lage malè sou nou, yon fason pou m ban nou yon avni ak yon espwa.” — Jeremi 29:11, Tradiksyon monn nouvo a.
“Se mwen ki konnen sa m’ gen nan tèt mwen pou nou. Se mwen menm Seyè a k’ ap pale. Se byen nou mwen ta vle wè, pa malè nou. Mwen ta vle denmen nou jwenn sa n’ ap tann lan.” — Jeremi 29:11, Bib la.
Sa Jeremi 29:11 vle di
Jewova te pwomèt sèvitè l yo li te gen nan lespri l pou l ba yo lapè alavni. Menm lè se pou moun ki t ap viv nan tan lontan Bondye te di pawòl sa yo, se konsa l toujou panse jodi a. Li se “Bondye ki bay esperans lan”. (Women 15:13.) Anfèt, li te fè ekri pwomès sa yo nan Bib la “pou nou ka gen esperans” yon pi bèl avni. — Women 15:4.
Kontèks Jeremi 29:11
Nou jwenn pawòl sa yo nan yon lèt Bondye te fè ekri Izrayelit yo, paske Babilónyen yo te pran Izrayelit yo kòm prizonye Jerizalèm epi yo te mennen yo Babilònb (Jeremi 29:1). Bondye te di pèp Izrayèl la yo t ap gen pou yo viv ann egzil pou yon bon ti tan, donk yo te dwe bati kay, plante jaden epi fè pitit (Jeremi 29:4-9). Men, Bondye te ajoute: “Kou 70 an n ap pase Babilòn nan rive nan bout li, m ap voye je sou nou e m ap reyalize pwomès mwen te fè a lè m mennen nou tounen [Jerizalèm].” (Jeremi 29:10). Donk, Bondye te ba yo garanti li pa t ap bliye yo e esperans yo te genyen pou yo retounen lakay yo a t ap reyalize. — Jeremi 31:16, 17.
Bondye te reyalize pwomès li te fè Izrayelit yo. Jan Bondye te fè konn sa, Siris, wa Pès la te pran vil Babilòn (Ezayi 45:1, 2; Jeremi 51:30-32). Annapre, Siris te kite Juif yo retounen nan peyi yo. Apre yo te fin fè 70 an ann egzil, yo te retounen Jerizalèm. — 2 Kwonik 36:20-23; Esdras 3:1.
Piske pwomès Bondye te fè nan Jeremi 29:11 lan te reyalize, sa bay moun ki gen esperans nan pwomès Bondye yo asirans jodi a. Pami pwomès sa yo se yon lapè total pa mwayen Wayòm Bondye a anba dominasyon Kris Jezi. — Sòm 37:10, 11, 29; Ezayi 55:11; Matye 6:10.
Fason kèk moun konprann Jeremi 29:11
Sa moun yo panse: Bondye gen yon “plan” byen detèmine pou chak moun.
Sa ki verite: Bondye pèmèt chak moun chwazi sa yo vle fè ak lavi yo. Bondye te di Izrayelit yo ki te Babilòn pawòl nou jwenn nan Jeremi 29:11 lan, paske li te vle lapè pou yo alavni antanke gwoup (Jeremi 29:4). Men, Bondye te pèmèt chak moun chwazi si wi ou non yo vle pwofite pwomès li fè a (Detewonòm 30:19, 20; Jeremi 29:32). Moun ki te chwazi sèvi Bondye yo te priye l avèk yon kè sensè. — Jeremi 29:12, 13.
Sa moun yo panse: Bondye ap fè sèvitè l yo jwenn anpil byen materyèl.
Sa ki verite: Nan kèk tradiksyon Labib, mo ebre lè yo tradui l yo mete “byen” pou li nan Jeremi 29:11 lan, vle di “lapè, sante ak byennèt”. Donk, selon kontèks la, Bondye pa t pwomèt Izrayelit yo byen materyèl, men li te pwomèt yo lapè ak yon bèl avni. Nasyon Izrayèl la t ap kontinye egziste e rive yon lè yo t ap retounen Jerizalèm. — Jeremi 29:4-10.
Li Jeremi chapit 29 ansanm ak nòt yo ak referans yo.
b Anrapò ak Jeremi 29:11, men sa The Expositor’s Bible Commentary di: “Se youn nan pi bèl pwomès nou jwenn nan Bib la. Avèk lanmou Yawe [Jewova] te demontre konpasyon pou moun sa yo ki t ap viv ann egzil, paske li te ba yo bonjan rezon pou yo ret pozitif e finalman pou yo gen espwa.” — Volim 7, paj 360.