Ou mèt gen konfyans Jewova ap ede w nan moman difisil

1-2. a) Nan ki sans sitiyasyon pa nou sanble ak sitiyasyon Juif ki te retounen Jerizalèm yo? b) Fè yon ti pale sou difikilte Juif yo te jwenn. (Gade kare ki gen tit “Epòk Aje, Zakari ak Esdras”.)

ÈSKE pafwa ou konn ap enkyete w pou demen? Petèt ou pèdi travay ou e w poko wè ki jan w pral pran swen fanmi w. Ou ka ap enkyete w pou sekirite fanmi w akoz pwoblèm politik, pèsekisyon oswa opozisyon w jwenn nan travay predikasyon an. Èske w ap fè fas ak youn nan pwoblèm sa yo? Si se ka pa w, w ap jwenn ankourajman lè w egzamine fason Jewova te ede Izrayelit nan tan lontan yo lè yo te jwenn pwoblèm ki te sanble ak pwoblèm sa yo.

² Sa te mande lafwa pou Juif ki te fè tout vi yo ap viv Babilòn te kite bèl vi yo t ap mennen nan Babilòn pou yo t al nan yon peyi pifò nan yo pa t vrèman konnen. Lè yo te rive, sa pa t pran tan pou yo te vin gen pwoblèm pou yo pran swen fanmi yo, san wete pwoblèm politik ki te genyen ak opozisyon yo te jwenn. Se sa k fè gen nan yo ki te twouve l difisil pou yo te kontinye patisipe nan travay ki t ap fèt pou rekonstwi tanp Jewova a. Se poutèt sa, ozanviwon ane 520 anvan epòk nou an, Jewova te voye de pwofèt, Aje ak Zakari, al ankouraje pèp la (Aje 1:1; Zak. 1:1). Jan nou pral wè sa, ankourajman pwofèt sa yo te bay la te itil anpil. Sepandan, anviwon 50 an annapre, Juif ki te retounen yo te vin dekouraje ankò. Lè sa a, Esdras, yon moun ki te konn kopye Lalwa byen, te sot Babilòn vin Jerizalèm pou l ankouraje pèp Bondye a pou yo bay adorasyon y ap ba Li a premye plas nan lavi yo. — Esd. 7:​1, 6.

 3. Ki kesyon nou pral egzamine? (Pwovèb 22:19).

³ Pwofesi Aje a ak pwofesi Zakari a te ede pèp Bondye a nan tan lontan pou yo kontinye gen konfyans nan Jewova lè te gen opozisyon. Konsa tou, yo ka ede n jodi a pou n kontinye gen konfyans Jewova ap ede nou nan moman difisil. (Li Pwovèb 22:19.) Pandan n ap egzamine mesaj Bondye te bay pa mwayen Aje ak Zakari a, e pandan n ap egzamine egzanp Esdras, n ap reponn kesyon ki vin annapre yo: Ki efè difikilte Juif ki te retounen yo te jwenn te gen sou yo? Poukisa nou bezwen kontinye fè volonte Bondye nan moman difisil? E ki jan nou ka vin gen plis konfyans nan Jewova lè bagay yo rèd anpil?

4-5. Ki sa petèt ki te fè Juif yo vin pa chofe ankò nan travay rekonstriksyon tanp lan?

⁴ Lè Juif ki te retounen yo te rive Jerizalèm, yo te gen anpil travay pou yo fè. Yo pa t pran anpil tan pou yo te rekonstwi lotèl Jewova a e pou yo te fè fondasyon tanp lan (Esd. 3:​1-3, 10). Men, yo te vin dekouraje byen vit. Sa k fè sa? Nonsèlman yo te gen pou yo rekonstwi tanp lan, yo te gen pou yo konstwi kay pa yo, pou yo fè jaden e pou yo pran swen fanmi yo (Esd. 2:​68, 70). Mete sou sa, ènmi yo ki te opoze ak yo te fè konplo pou kanpe travay ki t ap fèt pou rekonstwi tanp lan. — Esd. 4:​1-5.

⁵ Juif ki te retounen sot ann egzil yo te soufri tou akoz pwoblèm ekonomik ak pwoblèm politik ki te genyen. Peyi yo a te vin anba kontwòl anpi Pès la. Apre wa Siris, yon wa ki t ap dirije anpi Pès la, te mouri nan ane 530 anvan epòk nou an, Kanbiz, ki te ranplase l, te vle met men sou peyi Ejip. Pandan sòlda Kanbiz yo te sou wout pou y al ann Ejip, sanble yo te egzije Izrayelit yo pou yo ba yo manje, dlo ak kote pou yo rete, e sa te vin fè pèp la gen plis pwoblèm toujou. Nan kòmansman rèy Dariyis I^ye, ki te ranplase Kanbiz, te gen soulèvman ak pwoblèm politik. Se sèten, sitiyasyon sa yo te lakòz anpil nan moun ki te retounen sot ann egzil yo ap mande tèt yo ki jan yo t ap fè pran swen fanmi yo. Akoz tout difikilte Juif yo te jwenn, gen nan yo ki te santi se pa t bon moman pou yo te rekonstwi tanp Jewova a. — Aje 1:2.

 6. Selon Zakari 4:​6, 7, ki lòt difikilte Juif yo te jwenn, e ki asirans Zakari te ba yo?

⁶ Li Zakari 4:​6, 7. Nonsèlman te gen pwoblèm ekonomik ak pwoblèm politik, Juif yo te jwenn pèsekisyon tou. Nan ane 522 anvan epòk nou an, ènmi Juif yo te rive fè entèdi travay ki t ap fèt pou rekonstwi tanp lan. Men, Zakari te bay Juif yo asirans Jewova t ap sèvi ak lespri L ki gen anpil pisans pou l retire nenpòt obstak ki te ka genyen. Nan ane 520 anvan epòk nou an, wa Dariyis te leve entèdiksyon yo te mete sou travay ki t ap fèt nan tanp lan, e li te menm bay Juif yo lajan. Epitou, li te bay gouvènè ki nan zòn nan lòd pou yo ede Juif yo. — Esd. 6:​1, 6-10.

 7. Lè Juif ki te retounen yo te bay volonte Bondye premye plas nan lavi yo, ki benediksyon yo te jwenn?

⁷ Pa mwayen Aje ak Zakari, Jewova te pwomèt pèp li a li t ap ede yo si yo te bay travay ki t ap fèt pou rekonstwi tanp lan priyorite (Aje 1:​8, 13, 14; Zak. 1:​3, 16). Grasa ankourajman pwofèt yo, Juif ki te retounen yo te rekòmanse travay ki t ap fèt nan tanp lan nan ane 520 anvan epòk nou an e yo te fin rekonstwi l nan mwens pase senkan. Piske Juif yo te bay volonte Jewova premye plas nan lavi yo malgre difikilte yo te jwenn, Jewova te ede yo, li te ba yo sa yo te bezwen pou yo viv e pou yo te rete pwòch avè l. Konsa, yo te adore Jewova ak kè kontan. — Esd 6:​14-16, 22.

 8. Ki jan pawòl nou jwenn nan Aje 2:4 la ede n kontinye fè volonte Bondye? (Gade nòt la tou.)

⁸ Tank gwo tribilasyon an ap pwoche, nou rive wè jan l enpòtan pou n obeyi kòmandman ki mande pou n patisipe nan travay predikasyon an (Mak 13:10). Sepandan, nou ka twouve l difisil pou n kontinye fè travay predikasyon an si nou gen pwoblèm ekonomik oswa nou jwenn opozisyon nan travay la. Ki sa k ka ede n bay Wayòm nan premye plas? Se lè nou kontinye gen konfyans “Jewova, Chèf lame yo,”b bò kote nou. L ap ede nou si nou kontinye met enterè Wayòm nan anvan enterè pa nou. Donk, nou pa gen anyen pou n pè. — Li Aje 2:4.

9-10. Ki jan yon mari ak madanm li te rive wè pawòl Jezi te di nou jwenn nan Matye 6:33 a se laverite?

⁹ Ann pran egzanp Oleg ak Irina,c yon mari ak madanm k ap sèvi kòm pyonye. Apre yo te fin deplase al ede yon kongregasyon nan yon lòt zòn, yo te pèdi travay yo paske te vin gen plis pwoblèm ekonomik nan peyi a. Malgre yo te fè anviwon ennan san yo pa gen yon travay fiks, yo te toujou santi Jewova ap ede yo, e pafwa frè ak sè yo te konn ede yo. Ki sa yo te fè nan moman difisil sa yo? Oleg, ki te santi l dekouraje okòmansman, fè konnen: “Lefètke nou te okipe nan travay predikasyon an, sa te ede n kontinye bay sa ki pi enpòtan nan lavi a priyorite.” Pandan li menm ak madanm li te kontinye ap chèche travay, yo te ret okipe nan travay predikasyon an.

¹⁰ Yon jou, lè yo te sot preche, yo te aprann gen yon bon zanmi yo ki te fè 160 kilomèt ap vwayaje pou l pote de sak pwovizyon pou yo. Men sa Oleg di: “Jou sa a, nou te wè yon lòt fwa ankò jan Jewova ak kongregasyon an ap pran swen nou. Nou gen konviksyon Jewova pa janm bliye sèvitè l kèlkeswa jan sitiyasyon yo ta parèt sanzespwa.” — Mat. 6:33.

11. Ki sa nou ka atann si n kontinye fè volonte Bondye?

¹¹ Jewova vle nou kontinye patisipe nan travay fè disip la, yon travay k ap sove lavi moun. Jan nou te wè sa nan paragraf 7 la, Aje te ankouraje Juif yo pou yo rekòmanse nan sèvis sakre yo t ap bay Jewova a tankou yo t ap poze fondasyon tanp lan ankò. Si yo te fè sa, Jewova te pwomèt li t ap “beni” yo (Aje 2:​18, 19). Nou menm tou, nou kapab gen konfyans Jewova ap beni efò nou fè si nou met travay li ban nou fè a anvan tout lòt bagay.

12. Poukisa Esdras ak moun ki te ann egzil menm jan avè l yo te bezwen gen yon lafwa solid?

¹² Nan ane 468 anvan epòk nou an, Esdras te vwayaje ak yon dezyèm gwoup Juif soti Babilòn pou vin Jerizalèm. Esdras ak moun ki te retounen ansanm avè l yo te bezwen gen yon lafwa solid pou yo te fè vwayaj sa a. Yo t ap gen pou yo vwayaje nan wout ki gen danje e yo t ap pote anpil lò ak anpil ajan yo te resevwa pou tanp lan. Sa te ka fè vòlè atake yo byen fasil (Esd. 7:​12-16; 8:31). Mete sou sa, yo pa t pran tan pou yo te rann yo kont Jerizalèm pa t an sekirite. Vil la pa t gen anpil moun, e yo te bezwen repare miray li yo ak pòtay li yo. Ki jan egzanp Esdras ka ede n vin gen plis konfyans nan Jewova?

13. Ki jan Esdras te fè vin gen plis konfyans nan Jewova? (Gade nòt la tou.)

¹³ Esdras te wè jan Jewova te ede pèp Li a nan moman difisil. Kèk ane anvan sa, nan ane 484 anvan epòk nou an, sanble Esdras t ap viv Babilòn lè wa Asyeris te bay yon dekrè pou yo touye tout Juif nan anpi Pès la (Estè 3:​7, 13-15). Lavi Esdras te an danje! Akoz menas sa a, Juif “nan chak tèritwa” te fè jèn e yo te nan gwo lapenn. Se sèten yo te priye Jewova pou ede yo (Estè 4:3). Imajine jan Esdras ak Juif parèy li yo te santi yo lè bagay yo te vire kont moun ki t ap fè konplo pou fè detwi Juif yo (Estè 9:​1, 2)! Sanble sa Esdras te viv nan moman difisil sa yo te prepare l pou difikilte li t apral jwenn pi devan, e sanble tou sa te fè l gen plis konfyans Jewova kapab pwoteje pèp Li a.d

14. Ki leson yon sè te aprann lè l te wè jan Jewova te ede l nan moman difisil?

¹⁴ Lè n wè jan Jewova pran swen nou nan moman difisil, nou vin gen plis konfyans nan li. Ann pran egzanp Anastasia k ap viv ann Ewòp delès. Li te kite travay li paske li pa t vle mele nan politik. Men sa l di: “Se premye fwa nan vi m mwen pa t gen kòb.” Apre sa, li di: “M te kite sa nan men Jewova e m te wè jan li te pran swen m avèk tandrès. Si m ta vin pèdi travay mwen ankò, mwen pap pè. Si Papa m ki nan syèl la pran swen m jodi a, l ap pran swen m demen.”

15. Ki sa k te ede Esdras kontinye gen konfyans nan Jewova? (Esdras 7:​27, 28).

¹⁵ Esdras te wè men Jewova nan lavi l. Lè Esdras t ap panse ak kantite fwa Jewova te soutni l, sandout sa te ede l kontinye gen konfyans nan Li. Note ekspresyon ki di “Jewova, Bondye m nan, te avè m”. (Li Esdras 7:​27, 28.) Esdras te itilize yon ekspresyon menm jan an sis fwa antou nan liv ki pote non l lan. — Esd. 7:​6, 9; 8:​18, 22, 31.

16. Nan ki sitiyasyon nou ka pi byen wè men Jewova nan lavi nou? (Gade foto a tou.)

¹⁶ Jewova kapab ede n lè n nan yon sitiyasyon difisil. Pa egzanp, lè n ap mande patwon n konje pou n ka asiste kongrè, oswa lè n al kote l pou n mande l chanje orè travay nou pou n ka asiste tout reyinyon yo, sa ban nou posiblite pou n wè men Jewova nan lavi nou. Nou ka sezi wè jan tout bagay byen pase. Lè konsa, nou vin gen plis konfyans nan Jewova.

17. Ki jan Esdras te montre l gen imilite nan moman difisil? (Gade foto ki sou paj kouvèti a.)

¹⁷ Avèk imilite, Esdras te priye Jewova pou l mande l èd. Chak fwa Esdras te santi responsablite li te genyen yo te twòp pou li, li te priye Jewova avèk imilite (Esd. 8:​21-23; 9:​3-5). Fason Esdras te aji te fè moun ki te bò kote l yo ede l e sa te fè yo imite lafwa l (Esd. 10:​1-4). Lè nou gen anpil tètchaje akoz pwoblèm materyèl oswa n ap enkyete n pou sekirite fanmi nou, nou dwe priye Jewova avèk konfyans.

18. Ki sa k ka ede n vin gen plis konfyans nan Jewova?

¹⁸ Avèk imilite, si nou mande Jewova pou l ede nou e nou aksepte èd kwayan parèy nou, n ap vin gen plis konfyans nan li. Erika, yon manman twa pitit, te kontinye gen konfyans nan Jewova menm lè gwo malè te rive l. Nan yon ti tan tou kout, li te pèdi yon pitit li te gen nan vant li, e mari l li te renmen anpil te mouri. Lè l ap reflechi ak sa k te rive, men sa l di: “Ou pa ka konnen davans fason Jewova ap ede w. Ou ka jwenn èd fason w pa t ap atann. Pawòl zanmi m yo te di ak ti jès yo te fè te ede m wè Jewova te sèvi avè yo pou l reponn anpil nan priyè m yo. Si m fè zanmi m yo konn pwoblèm mwen, y ap ka ede m pi fasil.”

19-20. Ki sa nou aprann nan egzanp Juif ki pa t ka retounen Jerizalèm yo?

¹⁹ Nou ka aprann yon bèl leson nan egzanp Juif ki pa t kapab retounen Jerizalèm yo. Gen ladan yo ki pa t ka retounen paske yo te twò granmoun, oswa yo te malad, oubyen sitiyasyon fanmi yo pa t pèmèt yo fè sa. Aktout sa, yo te dispoze ede moun ki te retounen yo, yo te ba yo sa yo t ap bezwen pou tanp lan (Esd. 1:​5, 6). Sanble anviwon 19 an apre premye gwoup moun yo te fin retounen Jerizalèm, moun ki te rete Babilòn yo te kontinye voye kontribisyon Jerizalèm. — Zak. 6:10.

²⁰ Menmsi nou pa ka fè tout sa n ta renmen fè nan sèvis Bondye, nou mèt gen asirans Jewova wè efò sensè nou fè pou nou fè l plezi. Ki jan nou fè konn sa? Nan epòk Zakari a, Jewova te mande pwofèt li a pou l fè yon kouwòn ak lò ak ajan moun ki te ann egzil nan Babilòn yo te voye (Zak. 6:11). “Gwo kouwòn” sa a, “ki [te] bèl anpil”, t ap fè tout moun “sonje” jan yo renmen bay (Zak. 6:​14, nòt). Nou ka gen konfyans Jewova pap janm bliye efò sensè nou fè pou n sèvi l nan moman difisil. — Ebre 6:10.

21. Ki sa k ap ede n gen konfyans nan Jewova kèlkeswa sa k rive alavni?

²¹ Pa gen dout, n ap kontinye jwenn difikilte nan dènye jou sa yo, e bagay yo ka menm vin pi mal alavni (2 Tim. 3:​1, 13). Sepandan, nou pa bezwen enkyete nou twòp. Sonje pawòl Jewova te di pèp li a nan epòk Aje a: “Mwen avèk nou. [...] Pinga nou pè.” (Aje 2:​4, 5). Nou menm tou, nou kapab gen asirans Jewova ap avèk nou depi nou fè tout sa n kapab pou n fè volonte l. Lè n byen pwofite leson nou aprann nan pwofesi Aje ak Zakari te bay yo ak leson nou aprann nan egzanp Esdras, n ap kontinye fè Jewova konfyans, kèlkeswa difikilte nou ta jwenn alavni.