Èske Jewova ap reponn priyè m?

1-2. Sa k fè nou ka santi Jewova pa reponn priyè nou?

“PRAN tout plezi w nan Jewova e l ap ba ou tout sa w swete nan kè w.” (Sòm 37:4). Ala yon bèl pwomès! Men, èske nou ta dwe atann pou Jewova ban n tout sa n mande l menm kote a? Poukisa l bon pou n poze tèt nou kesyon sa a? Ann imajine egzanp ki vin annapre yo. Yon sè selibatè priye pou l asiste Lekòl pou evanjelizatè Wayòm nan. Men, anpil ane pase e yo pa janm envite l. Yon jèn frè priye Jewova pou l geri anba yon maladi grav pou l ka fè plis nan kongregasyon an. Men, sante l pa amelyore. Paran ki kretyen priye pou pitit yo ret nan laverite. Men, pitit yo deside sispann sèvi Jewova.

² Petèt ou menm tou ou te mande Jewova yon bagay, men, ou pa jwenn sa w te mande a. Sa ka fè w panse Jewova reponn priyè lòt moun, men li pa reponn priyè pa w. Oswa ou ka ap di tèt ou siman ou te fè yon bagay ki mal. Gen yon sè ki rele Janiceb ki te santi l konsa. Li menm ak mari l te anvi al sèvi nan Betèl e yo te priye Jewova sou sa. Men sa l di: “Mwen te sèten yo t ap rele n nan Betèl nan yon bat je.” Men, mwa te pase, ane te pase, yo pa t janm envite yo nan Betèl. Men sa Janice di: “Mwen te santi m tris e m pa t ka konprann sa k te pase a. Mwen t ap mande tèt mwen sa m te fè ki pa t fè Jewova plezi. Mwen te priye Jewova anpil sou sa. Poukisa li pa t reponn priyè m?”

 3. Sou ki sa nou pral pale nan atik sa a?

³ Pafwa, nou ka ap mande tèt nou si Jewova koute priyè n. Menm yon seri mesye nan tan lontan ki te fidèl te konn mande tèt yo sa (Jòb 30:20; Sòm 22:2; Aba. 1:2). Ki sa k ka ba w konviksyon Jewova ap reponn priyè w (Sòm 65:2)? Pou n ka jwenn repons kesyon sa a, toudabò, n ap bezwen reponn kesyon ki vin annapre yo: 1) Ki sa nou ka atann pou Jewova fè? 2) Ki sa Jewova vle nou fè? 3) Sa k fè nou ka bezwen priye pou lòt bagay?

 4. Selon Jeremi 29:​12, ki sa Jewova pwomèt l ap fè?

⁴ Jewova pwomèt l ap koute priyè nou. (Li Jeremi 29:12.) Bondye nou an renmen sèvitè fidèl li yo, donk l ap toujou koute priyè yo (Sòm 10:17; 37:28). Men, sa pa vle di l ap ban nou kèlkeswa sa nou mande l. Nou ka bezwen tann monn nouvo a rive pou n jwenn kèk nan bagay nou mande l yo.

 5. Ki sa Jewova chèche wè lè l ap koute priyè nou? Esplike.

⁵ Jewova chèche wè si sa nou mande yo ann amoni ak objektif li (Eza. 55:​8, 9). Objektif Jewova gen ladan l pou tout tè a chaje ak moun ki kontan obeyi l kòm Dirijan yo. Men, Satan fè konnen lèzòm t ap pi byen si yo dirije tèt yo poukont yo (Jen. 3:​1-5). Pou Jewova montre aklè sa Dyab la di a se manti, li kite lèzòm dirije tèt yo poukont yo. Sepandan, lefètke se lèzòm k ap dirije, sa lakòz anpil nan pwoblèm nou jwenn jodi a (Ekl. 8:9). Sa fè n konprann Jewova pap elimine tout pwoblèm sa yo depi kounye a. Si l ta fè sa, gen moun ki ta ka panse lèzòm kapab dirije tèt yo poukont yo, e yo kapab rezoud pwoblèm yo genyen yo.

 6. Poukisa nou bezwen gen konviksyon Jewova ap toujou fè sa ki bon e ki jis?

⁶ Plizyè moun ka ap priye Jewova pou menm bagay, epi Jewova pa reponn yo menm jan. Pa egzanp, lè wa Ezekyas te malad anpil, li te sipliye Jewova pou l geri l. Vrèmanvre, Jewova te geri l (2 Wa 20:​1-6). Yon lòt bò, lè apot Pòl te sipliye Jewova pou l retire “yon pikan [li te gen] nan chè” l, petèt li te gen yon pwoblèm sante, Jewova pa t retire pwoblèm nan (2 Kor. 12:​7-9). Epitou, ann pran egzanp apot Jak ak apot Pyè. Wa Ewòd te vle touye yo toule de. Kongregasyon an te priye pou Pyè, e sandout pou Jak tou. Sepandan, yo te touye Jak, men, Jewova te fè yon mirak pou l sove lavi Pyè (Tra. 12:​1-11). Nou te ka mande tèt nou: ‘Poukisa Jewova te sove lavi Pyè, men li pa t sove lavi Jak?’ Labib pa di anyen sou sac. Yon bagay ki sèten, Jewova “pa janm fè enjistis”. (Det. 32:4.) E nou konnen Jewova te renmen ni Pyè, ni Jak (Rev. 21:14). Pafwa, Jewova ka pa reponn priyè nou fason nou te espere a. Men, nou gen konfyans Jewova renmen nou e li toujou fè sa ki jis, se sa k fè nou aksepte fason li chwazi reponn priyè nou. — Jòb 33:13.

 7. Ki sa nou fè efò pou nou pa fè, e poukisa?

⁷ Nou fè efò pou n pa konpare sitiyasyon nou ak sitiyasyon lòt moun. Pa egzanp, nou ka priye Jewova pou yon bagay byen presi, men, li pa ban nou sa n mande a. Men, annapre nou aprann gen yon lòt moun ki te mande menm bagay la, e sanble Jewova ba li l. Yon sè ki rele Anna te viv sa. Li te priye Jewova pou Matthew, mari l, geri anba maladi kansè. Nan menm epòk la, te gen de sè ki granmoun ki te gen kansè tou. Anna te sipliye Jewova pou Matthew e pou sè yo. Sè yo te geri anba maladi kansè a, men, Matthew mouri. Okòmansman, Anna t ap mande tèt li si se Jewova ki geri sè yo. E si se li ki te fè sa, poukisa li pa t reponn li lè l te mande l pou mari l refè? Nòmalman, nou pa konn sa k fè de sè yo geri. Men, yon bagay nou konnen, Jewova gen solisyon pou tout soufrans nou yo, e li pa ka tann pou l resisite zanmi l ki mouri yo. — Jòb 14:15.

 8. a) Selon Ezayi 43:​2, ki jan Jewova ede nou? b) Ki jan lapriyè kapab ede nou lè n ap fè fas ak eprèv ki difisil? (Gade videyo ki gen tit Lapriyè ede nou andire.)

⁸ Jewova ap toujou ede nou. Piske Jewova se Papa nou e li renmen nou, li pa renmen wè n k ap soufri (Eza. 63:9). Sepandan, se pa tout pwoblèm li anpeche nou jwenn, yon seri pwoblèm nou ta ka konpare ak rivyè oswa flanm dife. (Li Ezayi 43:2.) Men, li pwomèt nou l ap ede nou “janbe” yo. E kèlkeswa eprèv nou jwenn kounye a, l ap toujou ede n pou n kontinye gen bon relasyon avè l. Epitou, Jewova ban nou lespri sen l ki gen anpil fòs pou ede n andire (Lik 11:13; Flp. 4:13). Konsa, nou kapab gen konfyans n ap toujou jwenn egzakteman sa n bezwen pou n andire e pou n ka ret fidèl avè l.d

 9. Ann amoni ak Jak 1:​6, 7, poukisa nou bezwen gen konfyans Jewova ap ede nou?

⁹ Jewova vle nou fè l konfyans (Ebre 11:6). Pafwa, nou ka jwenn yon seri pwoblèm ki parèt twòp pou nou. Nou ka menm kòmanse ap mande tèt nou si Jewova ap ede nou. Men, Bib la ban n asirans, grasa pisans Bondye, nou ka “grenpe yon miray”. (Sòm 18:29.) Donk, nou pap kite dout anvayi n, okontrè, n ap priye Jewova ak anpil lafwa toutpandan nou gen konfyans l ap reponn nou. — Li Jak 1:​6, 7.

10. Bay yon egzanp ki montre fason nou ka aji ann amoni ak priyè nou.

¹⁰ Jewova vle nou aji ann amoni ak priyè nou yo. Pa egzanp, yon frè ka priye Jewova pou l mande l ede l jwenn jou konje nan travay li pou l ka asiste kongrè rejyonal. Ki jan Jewova ka reponn priyè sa a? Li ka bay frè a kouraj li bezwen pou l pale ak patwon l sou sa. Men, frè a ap bezwen al kot patwon l pou l mande l sa. Li ka bezwen fè sa plizyè fwa. Li ka menm mande yon lòt anplwaye pou chanje jou travay avè l. E si sa nesesè, li ka mande pou yo pa peye l jou l pap travay yo.

11. Poukisa nou pa dwe sispann priye konsènan pwoblèm nou genyen?

¹¹ Jewova vle n kontinye priye pou bagay ki enpòtan pou nou (1 Tes. 5:17). Jezi te fè konnen gen yon seri bagay nou mande nou pap jwenn yo tousuit (Lik 11:9). Donk, pa bay vag! Priye ak tout kè w e kontinye fè sa (Lik 18:​1-7). Lè n kontinye priye pou yon bagay, nou montre Jewova sa n ap mande a enpòtan anpil pou nou. Epitou, nou montre Jewova nou gen konfyans li kapab ede nou.

12. a) Bay yon kesyon nou ta dwe poze tèt nou anrapò ak bagay nou mande Jewova, e poukisa? b) Ki jan nou ka veye nou montre nou gen respè pou Jewova nan priyè nou? (Gade kare ki gen tit “Èske sa m ap mande Jewova yo montre mwen gen respè pou li?”)

¹² Si nou priye Jewova pou yon bagay e li pa ban nou sa n mande l la, gen twa kesyon nou ka poze tèt nou. Premyèman: ‘Èske sa m mande Jewova a se sa m ta dwe mande l?’ Byen souvan, nou panse nou konnen sa k pi bon pou nou. Men, bagay nou mande yo ka pa bon pou nou pi devan. Si n ap priye konsènan yon pwoblèm, ka gen yon pi bon solisyon pou pwoblèm nan pase solisyon n ap chèche a. E gen bagay n ap priye pou yo ki ka pa ann amoni ak volonte Jewova (1 Jan 5:14). Ann reflechi sou egzanp paran nou te pale de yo pi wo a. Yo te mande Jewova pou ede pitit yo a ret nan laverite. Sanble se yon bon bagay yo mande Jewova. Sepandan, Jewova pap fòse nou youn sèvi l. Li vle nou tout, san wete pitit nou yo, chwazi adore l (Det. 10:​12, 13; 30:​19, 20). Se sa k fè paran yo te kapab mande Jewova pito pou l ede yo touche kè pitit yo a pou l ka vin renmen Jewova e pou l vin zanmi L. — Pwo. 22:6; Efe. 6:4.

13. Selon Ebre 4:​16, ki lè Jewova ap ede nou? Esplike.

¹³ Dezyèm kesyon nou ka poze tèt nou se: ‘Èske se moman pou Jewova reponn priyè m nan?’ Nou ka santi nou bezwen Jewova reponn priyè n yo tousuit. Men, an reyalite, Jewova konnen pi bon moman pou l ede nou. (Li Ebre 4:16.) Lè n pa jwenn yon bagay nou te mande Jewova tousuit, nou ka panse repons li ban nou se: ‘Non.’ Men, repons lan gendwa se: ‘Fè yon ti tann.’ Ann pran egzanp jèn frè ki te priye Jewova pou l geri l anba maladi l la. Si Jewova te fè yon mirak pou l geri l, Satan te ka jwenn rezon pou l di sa k fè frè a kontinye ap sèvi Jewova se paske Jewova te geri l (Jòb 1:​9-11; 2:4). Anplis de sa, Jewova deja fikse yon lè pou l geri tout maladi (Eza. 33:24; Rev. 21:​3, 4). Annatandan, nou pa ka atann pou Jewova fè mirak pou l geri nou. Nan ka sa a, frè a te ka mande Jewova pito pou l ba l fòs e pou l ede l santi l anpè pou l ka andire maladi l genyen an e pou l kontinye sèvi L fidèlman. — Sòm 29:11.

14. Ki sa w aprann nan eksperyans Janice te fè a?

¹⁴ Sonje egzanp Janice ki te priye Jewova pou l al sèvi nan Betèl. Se apre senkan te fin pase Janice te vin konprann fason Jewova te reponn priyè l. Men sa l di: “Jewova te itilize tan sa a pou l anseye m e pou l ede m vin yon pi bon kretyen. Mwen te bezwen aprann fè Jewova plis konfyans, mwen te bezwen amelyore fason m fè etid pèsonèl mwen, e m te bezwen aprann pou m gen kè kontan kèlkeswa kote m ap sèvi Jewova”. Annapre, yo te voye Janice ak mari l nan sèvis sikonskripsyon. Lè Janice ap reflechi, men sa l di: “Jewova te reponn priyè m, menmsi se pa t fason mwen te panse a. Sa te pran tan pou m konprann repons Jewova te ban m nan se te yon bèl kado. Men, mwen gen Jewova anpil rekonesans dèske l ban m posiblite pou m wè jan l renmen m e jan l byen aji avè m.”

15. Poukisa li ka bon pafwa pou n pa twò dirèk nan sa n ap mande nan priyè nou? (Gade foto yo tou.)

¹⁵ Twazyèm kesyon nou ka poze tèt nou se: ‘Èske m ta dwe mande Jewova yon lòt bagay?’ Byenke li bon pou n klè nan sa n ap mande Jewova, pafwa li ka pi bon pou n pa twò dirèk yon fason pou n ka wè sa Jewova vle pou nou. Ann pran egzanp sè selibatè ki t ap priye pou l asiste Lekòl pou evanjelizatè Wayòm nan. Li vle asiste lekòl la pou l ka al sèvi kote yo bezwen plis pwoklamatè. Donk, pandan l t ap kontinye priye pou yo envite l nan lekòl la, li te ka mande Jewova tou pou l ede l wè lòt posiblite ki genyen pou l fè plis nan travay predikasyon an (Tra. 16:​9, 10). Apre sa, li ta ka aji ann amoni ak priyè l fè a, li ta ka mande siveyan sikonskripsyon an si gen yon kongregasyon nan zòn nan ki bezwen plis pyonye. Oswa li te ka ekri yon biwo filyal pou mande ki kote yo bezwen plis pwoklamatè Wayòm nan.e

16. Ki konviksyon nou kapab genyen?

¹⁶ Jan nou sot aprann sa, nou gen konviksyon Jewova ap toujou reponn priyè nou yon fason ki montre li renmen nou e l ap toujou fè sa yon fason ki jis (Sòm 4:3; Eza. 30:18). Pafwa, nou ka pa jwenn repons nou te swete a. Men, Jewova ap toujou reponn priyè nou. Li renmen nou anpil. E li pap janm abandone n (Sòm 9:10). Donk, “se pou nou toujou met konfyans nou nan li”, toutpandan n ap kontinye priye l ak tout kè n. — Sòm 62:8.