Malachi
2 “E kounye a, nou menm prèt yo, kòmandman sa a se pou nou+. 2 Si nou refize koute e si sa pa gen enpòtans pou nou pou n fè louwanj pou non m, m ap lage malediksyon sou nou+ e m ap fè benediksyon nou yo tounen malediksyon+. Wi, m ap fè benediksyon yo tounen malediksyon, paske nou pa bay sa enpòtans.” Se sa Jewova, Chèf lame yo, di.
3 “Gade! M ap detwi* semans nou plante yo+ akoz sa nou fè, e m ap voye poupou bèt nou te fè sakrifis nan fèt nou yo nan figi nou. Epi, y ap mennen nou al jete ladan yo*. 4 Lè sa a, n ap konnen mwen te ban nou kòmandman sa a pou alyans mwen te fè ak Levi a ka toujou la+.” Se sa Jewova, Chèf lame yo, di.
5 “Alyans mwen te fè avèk yo a se yon alyans pou pwoteje lavi yo, pou ede yo gen lapè e pou fè yo gen lakrentif* pou mwen. Yo te gen lakrentif pou mwen, wi, yo te gen lakrentif pou non m. 6 Lwa* verite a te nan bouch yo+ e yo pa t di anyen ki pa dwat. Yo te mache avè m nan lapè e yo te fè sa ki dwat+. Yo te fè anpil moun vire do bay peche. 7 Paske se konesans sou Bondye yon prèt ta dwe anseye e se lwa* Bondye bay moun ta dwe chèche jwenn nan bouch li+, paske li se mesaje Jewova, Chèf lame yo.
8 “Men, nou menm, nou vire kite wout la. Nou fè anpil moun pa fè sa lalwa di*+. Nou kraze alyans mwen te fè ak Levit yo+.” Se sa Jewova, Chèf lame yo, di. 9 “Se sa k fè m ap fè tout pèp la gen degoutans pou nou e m ap desann nou devan yo paske nou pa t kontinye mache nan wout mwen yo, men nou te montre nou gen patipri nan fason nou t ap aplike lalwa+.”
10 “Èske se pa yon sèl papa nou tout genyen+? Èske se pa yon sèl Bondye ki kreye nou? Ebyen, poukisa n ap aji an trèt youn ak lòt+, e konsa nou pa respekte alyans zansèt nou yo te fè a? 11 Jida aji an trèt, e gen yon bagay ki bay degoutans yo fè ann Izrayèl ak nan Jerizalèm, paske Jida pa respekte Jewova, li menm ki renmen sa ki sakre*+, e li pran pitit fi yon dye lòt nasyon kòm madan marye l+. 12 Jewova ap touye nenpòt moun ki nan tant Jakòb yo ki fè sa, kèlkeswa moun li ye a*, menmsi li fè yon ofrann pou Jewova, Chèf lame yo+.”
13 “Epi, gen yon lòt* bagay nou fè ankò ki fè lotèl Jewova a kouvri ak dlo k ap sot nan je moun k ap kriye ak moun k ap plenn, sa ki fè li pa okipe ofrann nou yo e li pa aksepte anyen nou bay ankò+. 14 Epi, nou di: ‘Pou ki rezon?’ Se paske Jewova te aji kòm temwen ant ou menm ak madanm ou te marye avè l depi w jèn nan, li menm ou te aji an trèt avè l la, byenke l se konpay ou e li se madanm ou, li menm ou te fè alyans avè l la*+. 15 Men, te gen yon moun ki pa t fè sa, paske te ret yon pòsyon nan lespri a nan li. E ki sa moun sa a t ap chèche? Li t ap chèche desandans* Bondye a. Se sa k fè, se pou nou veye sou tandans nou genyen*, e pinga nou aji an trèt ak madanm nou genyen depi nou jèn nan. 16 Paske mwen rayi* divòs+ e mwen* rayi moun ki plen rad yo ak vyolans*.” Se sa Jewova, Bondye Izrayèl la, Jewova ki Chèf lame yo, di. “Epi, se pou nou veye sou tandans nou genyen, e nou pa dwe aji an trèt+.
17 “Nou fè Jewova about ak pawòl n ap di yo+. Men, nou di: ‘Ki jan nou fè l about la?’ Se lè nou di: ‘Yon moun k ap fè sa ki mal se bon moun nan je Jewova e moun sa a fè l plezi+’, oswa lè nou mande: ‘Kote Bondye ki gen jistis lakay li a?’”