Referans pou Pwogram reyinyon Lavi nou ak travay nou fè a
4-10 DESANM
TREZÒ KI NAN PAWÒL BONDYE A | SOFONI 1–AJE 2
“Chèche Jewova anvan jou kòlè l la”
w01-F 15/2 18-19 § 5-7
Chèche Jewova anvan jou kòlè l la
Ou gendwa di tèt ou: ‘Mwen se yon sèvitè Bondye ki vwe e ki batize, mwen se Temwen Jewova. Èske m pa deja ranpli tout kondisyon sa yo?’ An reyalite, yon fwa w fin vwe lavi w bay Jewova sa pa vle di ou rive kote w prale a. Nasyon Izrayèl la se te byen pa Jewova, epoutan, nan epòk Sofoni an pèp Jida a pa t ap viv ann amoni ak ve yo te fè a. Kòm rezilta, rive yon lè Jewova te abandone yo. Jodi a, ‘chèche Jewova’ mande pou n chèche vin bon zanmi l epi kenbe amitye sa a toutpandan nou kontinye ap kolabore ak pati òganizasyon l lan ki sou tè a. Sa vle di pou n aprann konnen fason Jewova wè yon sitiyasyon epi byen gade fason li santi l devan yon sitiyasyon tou. Nou chèche Jewova lè nou pran san nou pou nou etidye Pawòl li a, lè nou medite sou li epi aplike sa nou aprann yo nan lavi nou. Mete sou sa, lè nou priye Jewova ak tout kè n pou l gide nou epi nou suiv direksyon li ban nou pa mwayen lespri sen l, amitye nou avè l vin pi solid e sa fè nou vin anvi sèvi l “ak tout kè nou, tout nanm nou e ak tout fòs nou”. — Detewonòm 6:5; Galat 5:22-25; Filipyen 4:6, 7; Revelasyon 4:11.
Nan Sofoni 2:3, dezyèm bagay yo mande nou fè se “chèche fè sa ki jis”. Pifò nan nou te fè gwo chanjman nan lavi nou pou nou te kapab kalifye pou nou vin yon kretyen ki batize, men nou dwe kontinye suiv prensip Bondye yo ki jis pandan tout vi n. Gen kèk nan nou ki te kòmanse byen suiv prensip sa yo men ki kite monn nan gate yo. Li pa fasil pou nou chèche fè sa ki jis, paske nou antoure ak moun ki konsidere bagay tankou imoralite seksyèl, manti ak lòt peche kòm bagay ki nòmal. Sepandan, si nou gen gwo anvi pou nou fè Jewova plezi, nou ka konbat nenpòt tandans ki ta ka pouse nou al eseye mele ak moun yo nan monn nan pou yo ka aksepte nou. Jida te pèdi apwobasyon Bondye paske li t ap imite vye pratik nasyon ki te antoure l yo t ap fè, yon seri nasyon ki pa t ap sèvi Bondye. Kidonk, nou pap imite monn nan, okontrè, annou “imite Bondye” lè nou kiltive “nouvo pèsonalite a ki te kreye selon volonte Bondye e ki konfòm ak sa vrè jistis ak vrè fidelite a mande”. — Efezyen 4:24; 5:1.
Twazyèm pwen nan Sofoni 2:3 a fè n konprann si nou vle chape nan jou kòlè Jewova a, nou dwe “chèche gen imilite”. Se chak jou nou oblije pran kontak ak gason, fi epi jèn ki pa gen imilite. Pou yo menm, lè yon moun gen tanperaman ki dou se yon pwen fèb sa ye, e lè yon moun soumèt li se yon gwo feblès. Yo egzijan, egoyis, awogan epi yo panse “dwa” yo genyen ak preferans yo dwe pase anvan pa lòt moun kèlkeswa jan sa ye. Ala sa t ap tris pou nou ta kite kèk nan atitid sa yo detenn sou nou! Se moman pou nou “chèche gen imilite”. Ki jan n ap rive gen kalite sa a? Se lè nou soumèt nou devan Bondye, aksepte disiplin li bay avèk imilite epi fè sa li mande nou fè.
25-31 DESANM
TREZÒ KI NAN PAWÒL BONDYE A | MALACHI 1-4
“Èske maryaj ou fè Jewova plezi?”
jd-F 125-126 § 4-5
Jwe wòl pa w pou lavi fanmi w ka fè Bondye plezi
Nan epòk Malachi a nan senkyèm ane anvan epòk nou an, Juif yo te konn divòse pou ti krik ti krak. Men sa Malachi te di yo: “Jewova te aji kòm temwen ant ou menm ak madanm ou te marye avè l depi w jèn nan, li menm ou te aji an trèt avè l la.” Paske mari yo te konn aji an trèt ak madanm yo, lotèl Jewova a te konn kouvri ak dlo k ap sot nan je madanm yo yo te twonpe yo, ‘k ap kriye e k ap plenn’. E prèt ki te kòwonpi yo te konn pèmèt sa! — Malachi 2:13, 14.
Nan epòk Malachi a, kòman Jewova te wè move atitid moun yo te genyen konsènan maryaj? Men sa nou li nan liv Malachi a: ‘Mwen rayi divòs, se sa Jewova Bondye Izrayèl la di.’ Malachi te di tou Jewova ‘pa chanje’. (Malachi 2:16; 3:6.) Èske w konprann sa l vle di? Depi lontan Bondye te deja kont divòs (Jenèz 2:18, 24). Li te kont divòs nan epòk Malachi a, e jis jounen jodi a li toujou kont divòs. Gen kèk moun ki ka deside kite moun yo marye avè l la jis paske yo santi yo pa jwenn tout sa yo t ap chèche lakay moun sa a. Se vre kè a trèt, men, Jewova egzamine tout sa k ladan l (Jeremi 17:9, 10). Li byen konnen tout sa yon moun ki marye ap manniganse pou l ka divòse menmsi moun sa a ta ap chèche bay tèt li rezon. Pa gen dout nan sa, “tout bagay ekspoze aklè, san anyen pa kouvri yo, devan je Sila a nou gen kont pou nou rann nan”. — Ebre 4:13.
w02-F 1/5 18 § 19
Jewova rayi moun ki trèt
Yon lòt bò, Malachi montre gen kèk mari ki pa t aji an trèt ak madanm yo paske yo ‘te ret yon pòsyon nan lespri Bondye nan yo’. (vèsè 15.) Erezman, jodi a, òganizasyon Bondye a gen yon pakèt mari konsa ki ‘onore madanm yo’. (1 Pyè 3:7.) Yo pa fè vyolans sou madanm yo e yo pa di yo vye pawòl, yo pa fòse yo fè yon seri pratik seksyèl ki degradan, e yo pa dezonore madanm yo lè yo nan flète ak yon lòt fi oswa nan gade pònografi. Anplis de sa, òganizasyon Jewova a gen yon pakèt sè ki marye ki fidèl ak Bondye ansanm ak lwa li yo e se yon benediksyon sa ye. Tout mesye ak medam sa yo konnen sa Bondye rayi, e yo pa fè bagay sa yo paske yo wè bagay yo menm jan ak Bondye. Kidonk, annou kontinye imite yo lè nou obeyi ‘Bondye antanke chèf’, e Bondye bò kote pa l ap ban nou lespri sen l. — Travay 5:29.