Li anseye sou divòs ak lanmou pou timoun

Jezi ak disip yo kite Galile, yo travèse Rivyè Jouden an e yo pase Pere pou y al nan sid. Pandan ti tan Jezi te pase Pere a, li te pale ak Farizyen konsènan prensip Bondye bay sou divòs (Lik 16:18). Kounye a, yo vin ak sijè sa a pou yo ka teste Jezi.

Moyiz te ekri pou fè konnen yon gason te ka divòse ak yon fi si l jwenn “yon bagay nan li ki pa kòrèk”. (Detewonòm 24:1.) Moun yo pa t gen menm opinyon sou rezon ki ka lakòz yon moun divòse. Gen kèk moun ki kwè moun te ka divòse pou nenpòt ti bagay. Se sa k fè, Farizyen yo mande: “Èske yon gason gen dwa divòse ak madanm li pou nenpòt rezon?” — Matye 19:3.

Jezi pa baze repons li an sou opinyon lèzòm, okontrè, li montre li byen konnen sa l ap di a lè l fè referans ak jan Bondye te vle pou maryaj ye. Men sa l di: “Èske nou pa li Sila a ki te kreye lòm depi nan kòmansman an te fè ni gason ni fi, e li te di: ‘Se pou rezon sa a, yon gason ap kite papa l ak manman l, li pral atache ak madanm li, e yo de a ap vin yon sèl chè’? Konsa, yo pa de ankò, men yo se yon sèl chè. Kidonk, sa Bondye mete anba menm jouk, pinga lòm separe l.” ​(Matye 19:4-6). Lè Bondye te marye Adan ak Èv, li pa t pran dispozisyon pou pèmèt yo divòse.

Farizyen yo pa dakò ak Jezi, yo di: “Bon, poukisa Moyiz te mande pou gason an bay fi a yon papye divòs pou l divòse avè l?” ​(Matye 19:7). Jezi di yo: “Se paske nou gen tèt di ki fè Moyiz te ban nou pèmisyon divòse ak madanm nou, men se pa konsa sa te ye okòmansman.” ​(Matye 19:8). Lè Jezi di “okòmansman” an, se pa de epòk Moyiz la l ap pale, men, l ap pale konsènan lè Bondye te vin ak maryaj nan jaden Edenn nan.

Apre sa, Jezi di yon verite ki enpòtan: “Nenpòt moun ki divòse ak madanm li, eksepte pou imoralite seksyèl [grèk, pòneya], e k al marye ak yon lòt fi, moun sa a fè adiltè.” ​(Matye 19:9). Donk, imoralite seksyèl se sèl rezon Ekriti yo bay pou moun divòse.

Lè sa a, disip yo di: “Si se konsa sa ye pou yon gason ak madanm li, pito yon moun pa marye.” ​(Matye 19:10). Li klè, yon moun ki vle marye ta dwe wè maryaj kòm yon inyon k ap dire nètale!

Anrapò ak moun ki pa marye yo, Jezi esplike gen moun ki pa marye poutèt yo gen yon pwoblèm depi yo fèt ki fè yo pa ka gen relasyon seksyèl. Gen lòt moun se chatre yo chatre yo, sa ki fè yo vin pa ka fè sèks. Sepandan, gen lòt ki metrize dezi yo genyen pou yo pa al nan relasyon seksyèl. Yo fè sa pou yo ka konsantre yo plis sou bagay ki gen rapò ak Wayòm nan. Men sa Jezi ankouraje moun ki t ap koute l yo: “Yon moun ki ka suiv pawòl sa a, li mèt suiv li.” — Matye 19:12.

Kounye a, moun yo kòmanse pote timoun piti yo bay Jezi. Sepandan, disip yo t ap eseye anpeche moun yo, paske petèt yo pa t vle yo vin deranje Jezi. Lè Jezi wè sa, li pa kontan ditou epi li di yo: “Kite timoun yo vin jwenn mwen, pa eseye bloke yo, paske se pou moun ki tankou yo Wayòm Bondye a ye. Anverite m ap di nou sa: Nenpòt moun ki pa aksepte Wayòm Bondye a tankou yon timoun piti, li pa gendwa antre ladan l.” — Mak 10:14, 15; Lik 18:15.

Se pa ti bèl leson Jezi bay la a! Pou nou ka antre nan Wayòm nan, nou dwe gen imilite epi dispoze aprann menm jan ak timoun piti. Kounye a, Jezi montre lanmou li genyen pou timoun yo lè l pran yo nan bra l epi li beni yo. E li te gen lanmou sa a pou tout moun ki “aksepte Wayòm Bondye a tankou yon timoun piti”. — Lik 18:17.