IMAJINE ou menm ki nan yon bèl jaden. Pa gen anyen k ap fè w distrè, pa gen okenn bri ki sot nan yon vil toupre a ki vin jwenn ou. Jaden an gwo anpil e pa gen anyen ki vin deranje lapè ki gen ladan l. E sa k pi bèl la, ou pa gen okenn enkyetid, pa gen okenn maladi k ap ba w pwoblèm, okenn alèji ni okenn doulè. Ou tande byen, ou wè byen, ou ka pran sant, ou ka pran gou e w ka manyen bagay yo san pwoblèm.

Toudabò, je w admire bèl koulè flè yo, apre sa ou gade limyè a k ap danse sou yon ti kouran dlo, apre sa ou gade plant yo ak zèb yo ki vèt e ki klere nan solèy la oswa ki parèt pi fonse nan lonbray la. Ou santi yon ti van fre k ap pase sou po w e w pran bon sant li pote vin jwenn ou yo. Ou tande bri fèy yo, bri dlo a k ap frape sou wòch yo, zwazo yo k ap chante ak bri ti bèt yo ap fè toutpandan y ap fè travay yo. Pandan w ap imajine tout sa, èske w pa santi w anvi viv yon kote konsa?

Toupatou sou tè a, gen moun ki kwè se yon kote konsa istwa lèzòm te kòmanse. Pandan plizyè syèk, yo te anseye juif yo, kretyen yo ak mizilman yo te gen yon jaden ki rele Edenn, e se la Bondye te mete Adan ak Èv. Selon Bib la, lavi yo te pezib e yo te gen kè kontan. Yo t ap viv anpè youn ak lòt, yo te anpè ak bèt yo e yo te anpè ak Bondye. Mete sou sa, Bondye te ba yo posiblite pou yo viv pou toutan nan bon kondisyon sa yo. — Jenèz 2:15-24.

Endou yo gen fason pa yo yo wè paradi ki te gen nan tan lontan an. Boudis yo kwè tout lidè espirityèl yo genyen yo, ki rele Bouda, te soti nan yon seri epòk lontan lè monn nan te yon paradi. E gen yon pakèt relijyon ann Afrik ki aprann moun yo yon seri istwa ki sanble anpil ak istwa Adan ak Èv la.

Anfèt, sanble nan anpil relijyon ak nan anpil tradisyon, moun yo kwè nan yon paradi ki te egziste okòmansman. Men sa yon ekriven fè konnen: “Nan anpil sivilizasyon, moun yo kwè nan yon paradi ki te la okòmansman kote moun te viv yon fason ki pafè, yo te lib, yo te anpè, yo te gen kè kontan, yo te nan abondans e yo pa t gen strès, pa t gen pwoblèm ak konfli. […] An jeneral, kwayans sa a fè moun vrèman anvi retounen gen paradi sa a yo pèdi a.”

Èske l posib pou tout istwa sa yo ak tout tradisyon sa yo gen menm sous? Lefètke “moun yo an jeneral” kwè nan paradi sa a èske sa ta vle di li soti nan yon bagay ki te egziste toutbon? Èske nan tan lontan te gen yon jaden Edenn ki te egziste e èske Adan ak Èv te egziste toutbon?

Pou yon seri moun sa se bagay ki pa fè sans. Nan epòk sa a, kote lasyans devlope anpil, gen anpil moun ki di tèt yo istwa sa yo se lejann. Men, nou ka sezi aprann pami moun sa yo gen moun ki kwè nan Bondye. Anpil chèf relijye fè moun yo pa kwè nan jaden Edenn nan. Yo fè konnen yon kote konsa pa t janm egziste. Yo di se yon senbòl li ye, yon imaj, yon lejann, yon parabòl.

Se vre, gen anpil parabòl nan Bib la. Parabòl pifò moun konnen yo se Jezi li menm ki te bay yo. Men, Bib la pa pale de sa k te pase ann Edenn nan kòm yon parabòl, men kòm yon bagay ki te rive, yon istwa toutbon. Si sa yo di sou Edenn yo pa t janm rive vre, èske moun pa ka fè rès Bib la konfyans? Annou egzamine sa k fè kèk moun gen dout sou jaden Edenn nan e ann wè si rezon yo bay yo gen sans. Apre sa, nou pral egzamine sa k fè istwa sa a ta dwe gen enpòtans pou nou chak.

ÈSKE W konn istwa Adan ak Èv ak jaden Edenn nan? Toupatou sou tè a, moun abitye ak istwa sa a. Sa w panse si w ta li l? W ap jwenn li nan Jenèz 1:26–3:24. Men pwen kle istwa a:

Jewovaa fè yon gason ak pousyè tè a, li rele l Adan e li mete l nan yon jaden yon kote ki rele Edenn. Se Bondye li menm ki te plante jaden sa a. Li te gen anpil dlo ladan l ak bèl pyebwa ki bay fwi. Nan mitan jaden sa a, gen yon pyebwa ki rele “pyebwa konesans sa ki byen ak sa ki mal”. Bondye te entèdi moun pou yo manje fwi ki sot nan pyebwa sa a, li te di yo si yo dezobeyi, sa ap lakòz yo mouri. Rive yon lè, Jewova fè yon konpay pou Adan, yon fi ki rele Èv e li te fè l ak youn nan kòt Adan yo. Bondye ba yo responsablite pou yo pran swen jaden an e li di yo pou yo fè pitit e pou yo plen tè a.

Pandan Èv poukont li, gen yon sèpan ki vin pale avè l. Li fè l vin anvi manje fwi pyebwa Bondye te di yo pou yo pa manje a lè l fè l konprann Bondye ba l manti e l ap anpeche l jwenn yon bon bagay, yon bagay k ap fè l vin menm jan ak Bondye. Èv koute Satan epi l manje fwi Bondye te di yo pa manje a. Pi devan, Adan koute l, li dezobeyi Bondye tou. Jewova bay Adan, Èv ak sèpan an pinisyon pou sa yo fè a. Lè Bondye fin mete moun yo deyò nan jaden an, ki te yon paradi, li mete zanj pou bare antre jaden an.

Pandan yon epòk, biblis yo, moun save yo ak istoryen yo te konn di sa ki nan liv Jenèz la se verite e li ann amoni ak listwa. Nan epòk nou an, moun plis gen tandans gen dout sou bagay sa yo. Men, sa k fè moun gen dout sou sa Bib la di sou Adan, Èv ak jaden Edenn nan? Ann egzamine kat nan sa moun yo di yo.

1. Èske jaden Edenn nan te yon kote toutbon?

Poukisa moun yo gen dout sou sa? Filozofi jwe yon wòl nan sa. Pandan plizyè syèk, teyolojyen yo te panse jaden Bondye a toujou egziste. Men, Legliz te kite yon seri filozòf grèk, tankou Platon ak Aristòt, enfliyanse l paske mesye sa yo te fè konprann pa gen anyen sou tè a ki ka pafè. Se sèl nan syèl ki gen pèfeksyon. Donk, teyolojyen yo te panse paradi Bondye te fè a ta dwe pi pre syèl lab. Gen nan yo ki di jaden an te chita sou tèt yon mòn ki wo anpil, li tèlman wo, vye tè sa a pa ka gen enfliyans sou li. Gen lòt ki fè konnen se nan pòl Nò oswa pòl Sid li ye. Gen lòt tou ki fè konnen se sou lalin li ye oubyen toupre lalin. Konsa, jaden Edenn nan te vin tounen yon lejann pou moun yo. Gen kèk biblis ki fè konnen pozisyon jaden Edenn nan se yon bagay ki san sans, kòmkwa yon kote konsa pa t janm egziste.

Men, se pa konsa Bib la prezante jaden an. Nan Jenèz 2:8-14, nou aprann plizyè detay sou kote sa a. Li te nan lès rejyon ki rele Edenn nan. Te gen yon rivyè ki te wouze l e twa lòt rivyè te pran nesans nan rivyè sa a. Yo bay non chak nan kat rivyè sa yo e yo bay yon ti esplikasyon sou kote yo pase. Pandan lontan, detay sa yo te bay biblis yo pwoblèm. Anpil nan yo te fouye pasaj sa a nan Bib la pou yo jwenn enfòmasyon ki montre ki kote rejyon sa a ye. Men, yo te vin ak yon pakèt opinyon ki kontrè youn ak lòt. Èske sa vle di fason yo dekri kote ki te rele Edenn nan, jaden an ak rivyè ki te ladan l yo, se manti oubyen se lejann?

Fè yon ti reflechi. Sa Bib la di nou sou sa k te pase nan jaden Edenn nan te pase sa gen anviwon 6 000 an. Sanble se Moyiz ki te ekri yo e sanble li te sèvi ak sa lòt moun te di l oubyen menm ak dokiman ki te egziste anvan sa. Poutan, Moyiz te ekri tout bagay sa yo anviwon 2 500 an annapre. Sa k te pase nan Edenn nan te deja pase lontan anvan Moyiz te ekri l la. Kounye a, èske l posib pou yon seri eleman kle tankou rivyè yo chanje pozisyon apre plizyè douzèn syèk? Kwout tè a toujou an mouvman. Sanble zòn kote Edenn te ye a se yon kote ki toujou gen tranblemanntè e sanble anviwon 17 pousan nan pi gwo tranblemanntè ki fèt sou tè a se nan zòn sa a yo fèt. Nan zòn sa yo, li fasil pou chanjman fèt. Mete sou sa, delij ki te fèt nan epòk Noye a gendwa te chanje jan tè a te ye yon fason nou pa ka konnen jodi ac.

Men, gen kèk bagay nou konnen. Istwa nou jwenn nan liv Jenèz la pale de jaden Edenn nan kòm yon kote ki te egziste toutbon. De nan kat rivyè yo pale de yo nan istwa a, anpalan de rivyè Efrat ak Tig, oswa Idekèl, kontinye koule jodi a, e yo pre anpil. Istwa a menm site non peyi kote rivyè sa yo pase ak resous natirèl anpil moun konnen ki gen nan zòn nan. Moun ki te premye gen posiblite pou yo li istwa sa a, anpalan de moun ki te ann Izrayèl nan tan lontan yo, te twouve detay sa yo ba yo bonjan enfòmasyon.

Èske se konsa sa ye pou lejann yo? Oubyen èske yo gen tandans retire yon seri detay moun ka verifye oubyen demanti? An jeneral, pifò istwa yo konn rakonte yo konn kòmanse konsa: “Vwala se te...”. Men, lè se sa listwa rapòte, yo bay bonjan enfòmasyon, jan nou wè sa nan istwa sou Edenn nan.

2. Èske nou ka kwè Bondye te fè Adan ak pousyè tè e li te fè Èv ak yon kòt Adan?

Selon sa lasyans fè konnen, se vre kò moun gen yon seri eleman nou jwenn nan tè a, tankou idwojèn, oksijèn ak kabòn. Men, ki jan yo te fè mete eleman sa yo ansanm pou fè yon kreyati vivan?

Selon sa anpil syantifik fè konnen, lavi te kòmanse poukont li, li te kòmanse ak yon seri fòm lavi ki senp anpil e ki te vin pi konplike ofiramezi pandan plizyè milyon ane. Sepandan, mo “senp” lan gendwa pa fin egzak, paske tout sa ki vivan se bagay ki konplike anpil, menm fòm lavi ki pi piti ou ka wè nan mikwoskòp sèlman ki gen yon sèl selil yo. Pa gen anyen ki montre gen okenn fòm lavi ki te parèt konsa konsa e pa gen anyen ki montre sa ap janm ka fèt. Men, tout sa ki vivan montre aklè gen yon moun ki te fè yo ki gen yon entèlijans ki pi siperyè lontan pase entèlijans pa noud. — Women 1:20.

Èske w panse w ka ap koute yon bèl mizik oubyen w ap gade yon bèl tablo oubyen w ap gade yon gwo bagay yo fè nan domèn teknoloji, e pou w ta di se pa okenn moun ki te fè yo? Jamè! Poutan, fason kò moun fèt pi konplike, pi bèl e l pi byen fèt lontan pase bèl bagay sa yo nou sot site yo. Ki jan yon moun ka fè panse pa gen yon moun ki te kreye l? Mete sou sa, sa Bib la di nan liv Jenèz la montre pami tout fòm lavi ki gen sou tè a se sèl lèzòm ki te fèt pòtre ak Bondye (Jenèz 1:26). Donk, li nòmal pou se moun sou tè a sèlman ki kapab demontre menm kalite ak Bondye e ki kapab santi yo anvi kreye. Pafwa, yo fè yon seri bèl mizik, bèl travay atis oubyen gwo bagay nan domèn teknoloji. Èske n ta dwe sezi lè n konnen se Bondye ki pi gwo Kreyatè a?

Ki sa k difisil nan kreye fi a avèk yon zo kòt ki sot nan gason ane? Bondye te ka sèvi ak lòt mwayen pou l kreye fi a, men fason l te kreye l la gen yon pakèt siyifikasyon. Li te vle pou gason an ak fi a marye e pou yo vin pwòch anpil youn ak lòt kòmsi yo te “yon sèl chè”. (Jenèz 2:24.) Lefètke yon gason ak yon fi ka ede youn lòt, yo ka vin pwòch youn ak lòt e yo ka ret ansanm nètale, èske se pa yon prèv klè ki montre gen yon Kreyatè ki gen sajès ak lanmou?

Mete sou sa, gen yon seri moun ki travay nan domèn jenetik jodi a ki rekonèt sanble tout moun soti nan yon sèl gason ak yon sèl fi. Donk, èske sa yo di nan liv Jenèz la se lejann?

3. Pyebwa konesans sa ki byen ak sa ki mal la ak pyebwa lavi a sanble pa t egziste vre.

An reyalite, liv Jenèz la pa fè konnen pyebwa sa yo te gen yon pouvwa espesyal oubyen yo te gen yon pouvwa majik nan yo. Men, se te pyebwa toutbon, e Jewova te bay yo yon sans senbolik.

Èske moun pa konn fè menm bagay la kèk fwa? Pa egzanp, yon jij gendwa avèti yon moun pou l pa derespekte tribinal la, pou lalwa pa kondane l. Se pa mèb yo, lòt bagay ki la yo ak mi tribinal la jij la vle anpeche moun nan derespekte, men se sistèm jistis tribinal la reprezante a. Gen plizyè wa tou ki te sèvi ak sèp ak kouwòn kòm senbòl ki montre otorite yo.

Donk, ki sa de pyebwa yo te reprezante? Gen yon pakèt teyori konplike sou sa. Men, vrè repons lan, menm lè l senp, se yon repons ki gen anpil siyifikasyon. Pyebwa konesans sa ki byen ak sa ki mal la reprezante yon dwa se Bondye sèlman ki genyen l, se dwa pou l detèmine sa ki byen ak sa ki mal (Jeremi 10:23). Li nòmal pou Bondye te konsidere se yon bagay mal pou yon moun ta vòlè fwi nan pyebwa a! Yon lòt bò, pyebwa lavi a reprezante yon kado se sèl Bondye ki ka bay li, e kado sa a se lavi ki pap janm fini an. — Women 6:23.

4. Yon sèpan k ap pale sanble ak bagay ki sot nan istwa ki pa verite.

Se vre, aspè sa a nan istwa ki nan liv Jenèz la ka parèt dwòl, sitou si nou pa reflechi sou lòt istwa Bib la rakonte. Men, Bib la ede nou pi byen konprann pwen sa a tikras pa tikras.

Kiyès oswa ki sa ki fè sèpan sa a te sanble ap pale? Moun nan Izrayèl tan lontan yo te konn lòt bagay ki te ede yo pi byen konprann wòl sèpan sa a te jwe a. Pa egzanp, yo te konnen menm lè bèt yo pa ka pale, yon espri ka fè yon bèt sanble ap pale. Moyiz te ekri sa k te rive Balaam nan tou. Bondye te voye yon zanj pou fè bourik Balaam nan pale tankou moun. — Nonb 22:26-31; 2 Pyè 2:15, 16.

Èske lòt espri yo, sa gen ladan l espri ki ènmi Bondye yo, ka fè mirak? Moyiz te wè prèt ki te konn fè maji ann Ejip yo ki t ap kopye mirak Bondye te fè yo, tankou fè yon baton sanble tounen yon sèpan. Se nan men espri ki ènmi Bondye yo yo te jwenn pouvwa pou yo fè kalite gwo aksyon sa yo. — Egzòd 7:8-12.

Se Moyiz Bondye te enspire pou ekri liv Jòb la tou. Liv sa a bay anpil enfòmasyon konsènan prensipal ènmi Bondye a, ki se Satan, ki te fè konprann sèvitè Jewova yo pap ret fidèl avè l (Jòb 1:6-11; 2:4, 5). Èske Izrayelit nan tan lontan yo te konprann Satan te fè yon jan pou sèpan ann Edenn nan parèt ap pale, e konsa li te ka twonpe Èv pou l fè l sispann ret fidèl ak Bondye? Sanble se sa yo te konprann.

Èske Satan se fòs ki te dèyè sèpan an? Pi devan, Jezi te fè konnen Satan “se yon mantè e li se papa manti”. (Jan 8:44.) Se “papa manti” a ki te bay premye manti a nan tout listwa limanite. Li te fè sa lè l te pale ak Èv. Bondye te avèti Adan ak Èv si yo manje fwi ki sot nan pyebwa sa a, y ap mouri, men sèpan an te di lekontrè. Li te di: “Nou pap mouri pyès.” ​(Jenèz 3:4). Sa klè, Jezi te konnen Satan te sèvi ak sèpan an pou l pale. Revelasyon Jezi te bay apot Jan an montre sa byen klè, paske ladan l Jezi rele Satan “premye sèpan an”. — Revelasyon 1:1; 12:9.

Èske li vrèman enposib pou yon espri ki gen pouvwa fè yon sèpan sanble ap pale? Menm moun ki pa gen menm pouvwa ak espri yo ka fè yon fason pou moun wè se yon ti poupe k ap pale, alòske se yo menm k ap pale san bouch yo pa parèt ap bat.

Pi gwo prèv la

Èske w pa dakò moun ki gen dout sou sa ki di nan liv Jenèz la pa gen rezon pou yo gen dout? Yon lòt bò, gen bonjan prèv ki montre istwa sa a se yon verite.

Pa egzanp, Bib la di Jezi Kris se “temwen fidèl la, temwen ki toujou di laverite a”. (Revelasyon 3:14.) Lefètke l te yon moun pafè, li pa t janm bay manti, ni li pa t janm tòde laverite okenn fason. Mete sou sa, li te fè konnen li te egziste byen lontan anvan lavi l te kòmanse sou tè a. Anfèt, li te viv bò kot Jewova, Papa l, “anvan monn nan te egziste”. (Jan 17:5.) Donk, li te vivan lè lavi te kòmanse sou tè a. Ki sa temwen nou plis ka fè konfyans lan te fè konnen?

Jezi te pale de Adan ak Èv kòm moun ki te egziste toutbon. Li te pale de maryaj yo lè l t ap esplike prensip Jewova bay pou yon sèl gason marye ak yon sèl fi (Matye 19:3-6). Si yo pa t egziste e si jaden kote yo t ap viv la se te yon lejann, ebyen swa yo te twonpe Jezi, swa li te yon mantè. Sa pa posib! Jezi te nan syèl la, li t ap gade pandan bagay sa yo t ap fèt nan jaden an. Ki pi gwo prèv nou ka gen sou sa?

An reyalite, yon moun ki pa kwè nan sa nou jwenn nan liv Jenèz la ka manke lafwa nan Jezi. Sa ka fè l enposib pou l konprann kèk nan pi gwo sijè ki gen nan Bib la ak kèk nan pwomès ki bay plis rekonfò yo. Ann wè ki jan sa ka fèt.

[Footnotes]

YOUN nan objeksyon ki ka fè moun plis sezi kèk biblis soulve konsènan istwa Edenn nan, se fè yo fè konnen rès Bib la pa soutni istwa sa a. Pa egzanp, men sa Paul Morris, yon pwofesè ki fè etid sou relijyon, ekri: “Pa gen okenn referans biblik byen presi annapre ki pale sou istwa Edenn nan.” Menmsi gen kèk espè ki dakò ak sa l di a, sa pa vle di li gen rezon pou sa.

Bib la pale de jaden Edenn, Adan, Èv ak sèpan an plizyè fwa.a Men, sa anpil biblis eseye fè la a se yon ti bagay konpare ak lòt bagay yo di. Lefètke chèf relijye yo ak moun k ap kritike Bib la ap eseye kritike istwa jaden Edenn nan ki nan liv Jenèz la, se manti y ap bay sou Bib la. Ki jan yo fè sa?

Pou nou konnen sa ki te pase ann Edenn, li enpòtan pou n konprann rès Bib la. Pa egzanp, Pawòl Bondye a la pou ede nou jwenn repons tout gwo kesyon enpòtan lèzòm genyen yo. Souvan, repons Bib la bay pou kesyon sa yo gen rapò ak evènman ki te pase nan jaden Edenn nan. Ann egzamine kèk egzanp.

● Poukisa nou vyeyi epi nou mouri? Adan ak Èv t ap viv pou toutan si yo te kontinye soumèt devan Jewova. Se sèlman si yo te rebele, yo t ap mouri. Nan menm jou yo te rebele a, anfèt, yo te mouri (Jenèz 2:16, 17; 3:19). Yo te vin enpafè, e se sèlman peche ak enpèfeksyon yo te ka transmèt bay desandan yo. Men sa Bib la di: “Akoz yon sèl moun peche antre nan monn nan, e akoz peche lanmò antre, e konsa lanmò blayi sou tout moun paske yo tout te peche.” — Women 5:12.

● Poukisa Bondye pèmèt mechanste? Nan jaden Edenn nan, Satan te fè konnen Bondye se yon mantè k ap kache sa ki byen pou kreyati l yo (Jenèz 3:3-5). E li te lage dout sou dwa legal Bondye genyen pou l dirije a. Adan ak Èv te chwazi suiv Satan, sa vle di yo te rejte dwa legal Bondye genyen pou l dirije a. Yo te dakò lèzòm ka deside poukont yo sa ki byen ak sa ki mal. Jistis ak sajès Jewova genyen te fè l wè sèl fason pou l byen jere sitiyasyon sa a se kite tan pase, pou l bay lèzòm posiblite pou yo dirije tèt yo jan yo vle. Piske Satan kontinye ap enfliyanse lèzòm, se youn nan bagay ki fè vin gen anpil mechanste, e tikras pa tikras, sa fè gwo verite sa a vin parèt aklè: Lèzòm pa ka dirije tèt yo san Bondye. — Jeremi 10:23.

● Ki objektif Bondye gen pou tè a? Nan jaden Edenn nan, Jewova te bay yon modèl sou fason pou tè a ye. Li te bay Adan ak Èv lòd pou yo ranpli tè a ak desandan yo e li te ba yo “pouvwa” sou li pou yo te ka fè tout tè a vin bèl epi pou gen amoni ant tout sa ki egziste sou li menm jan ak jaden Edenn nan (Jenèz 1:28). Kidonk, objektif Bondye se pou tè a tounen yon paradi ki plen ak desandan Adan ak Èv, ki fòme yon fanmi ki ini e ki pafè. Yon bon pati nan Bib la montre fason Bondye pral reyalize objektif li te genyen depi okòmansman an.

● Poukisa Jezi te vin sou tè a? Rebelyon ki te fèt ann Edenn nan lakòz Adan ak Èv ak desandan yo kondane pou yo mouri, men Bondye lanmou an ban nou espwa. Bib la di li te voye Pitit li a sou tè a pou l bay lavi l kòm ranson (Matye 20:28). Sa sa vle di? Jezi se “dènye” Adan an epi li te reyisi fè sa Adan pa t ka fè a. Piske l te rete obeyisan ak Jewova, li te sove lavi lèzòm. Li te bay lavi l kòm ranson yon fason pou tout moun ka jwenn padon pou peche yo e pou yo ka gen lavi Adan ak Èv te genyen anvan yo te peche a (1 Korentyen 15:22, 45; Jan 3:16). Konsa, Jezi bay garanti objektif Jewova genyen pou l fè tè a tounen yon paradi menm jan ak Edenn nan ap reyalize.b

Objektif Bondye genyen an se pa yon bagay konsa konsa, ni se pa yon sijè yo etidye nan teyoloji ki pa verite. Menm jan jaden Edenn nan te egziste toutbonvre sou tè a kote te gen bèt ak moun toutbon, se konsa tou, pwomès Bondye fè pou lavni an reyèl e l ap reyalize talè konsa. Èske w ap la lè sa a? Sa depann anpil de ou. Bondye vle pou avni sa a posib pou anpil moun, menm pou moun k ap fè sa ki mal. — 1 Timote 2:3, 4.

Pandan Jezi te prèske mouri, li te pale ak yon mesye ki t ap mennen yon movèz vi. Mesye sa a te yon kriminèl, li te konnen li merite mouri. Men, li te chèche rekonfò ak espwa nan men Jezi. Ki repons Jezi te ba li? Jezi te di l: “W ap avè m nan Paradi a.” ​(Lik 23:43). Si Jezi te vle pou ansyen kriminèl sa a resisite e pou l gen posiblite pou l viv pou toutan nan yon paradi menm jan ak jaden Edenn nan, èske w pa panse li vle menm bagay la pou ou tou? Wi, li vle sa! Papa l vle sa tou! Si w ta renmen jwenn avni sa a, fè tout sa w kapab pou w aprann konnen Bondye ki te fè jaden Edenn nan.

[Nòt]

[Kare/​Foto]

YON PWOFESI KI MAKÒNEN TOUT BIB LA ANSANM

“M ap mete rayisman ant ou menm [sèpan an] ak fi a, ant desandans ou ak desandans pa l. L ap kraze tèt ou e ou menm w ap blese l nan talon.” — Jenèz 3:15.

Sa se premye pwofesi ki nan Bib la Bondye te bay ann Edenn. Kiyès fi a, desandans li an, sèpan an ak desandans sèpan an reprezante? Nan ki sans t ap gen rayisman nan mitan yo?

SÈPAN AN

Satan Ledyab. — Revelasyon 12:9.

FI A

Òganizasyon Jewova a ki nan syèl la, ki gen zanj yo ladan l (Galat 4:26, 27). Ezayi te pale de “fi a”, li te fè konnen fi a t apral bay yon nasyon espirityèl. — Ezayi 54:1; 66:8.

DESANDANS SÈPAN AN

Moun ki chwazi fè sa Satan vle. — Jan 8:44.

DESANDANS FI A

Toudabò, gen Jezi Kris ladan l, ki se prensipal moun ki soti nan pati òganizasyon Jewova a ki nan syèl la. Apre sa, gen frè Kris yo ki gen pou dirije nan syèl la avèk li ki fè pati “desandans” lan tou. Kretyen sa yo Bondye chwazi pou al nan syèl la fè pati yon nasyon espirityèl, “Izrayèl Bondye a”. — Galat 3:16, 29; 6:16; Jenèz 22:18.

BLESE NAN TALON

Se lè yo te fè Mesi a soufri, men sa pa t dire anpil tan. Satan te reyisi fè touye Jezi sou tè a. Men, Bondye te resisite Jezi.

KRAZE TÈT

Se lè yo pral detwi Satan. Jezi pral detwi Satan pou toutan. Men anvan sa, Jezi pral kraze travay Satan te kòmanse depi ann Edenn nan. — 1 Jan 3:8; Revelasyon 20:10.

Pou w jwenn yon apèsi byen klè sou tèm Bib la, gade bwochi La Bible : quel est son message ? Se Temwen Jewova yo ki pibliye l.

[Foto]

Adan ak Èv te peche, e sa te lakòz yo soufri anpil.