Èske w ap fè panse Jewova vin panse pa w?

1, 2. Toutpandan n ap grandi nan domèn espirityèl, ki sa n vin aprann fè? Bay yon egzanp.

IMAJINE yon timoun piti ki resevwa yon kado. Paran l di l: “Di mèsi.” Timoun nan obeyi, menmsi l fè sa san reflechi. Toutpandan l ap grandi, li vin pi apresye fason paran l panse ak jantiyès lòt moun demontre anvè l. Kounye a, li pi fasil pou l di mèsi ak tout kè l. Sa k fè sa? Se paske rekonesans vin fè pati pèsonalite l.

² Menm jan an tou, lè n te fèk aprann laverite, nou te aprann jan l enpòtan pou n obeyi bagay fondamantal Jewova mande yo. Men, toutpandan n ap kontinye grandi nan domèn espirityèl, nou vin aprann plis bagay sou panse Jewova, tankou sa l renmen, sa l pa renmen ak fason l wè bagay yo. Lè n aprann rezone menm jan an e lè n kite panse sa a enfliyanse aksyon nou ak chwa nou fè yo, nou montre nou fè panse Jewova vin panse pa n.

 3. Poukisa l ka difisil pou n fè panse Jewova vin panse pa nou?

³ Byenke n ka pran plezi aprann panse menm jan ak Jewova, sa ka difisil tou. Pafwa, fason n rezone a ki pa pafè ka vin yon obstak. Pa egzanp, nou gendwa wè l difisil pou n konprann pwennvi Jewova sou kesyon pwòpte nan domèn moral, materyalis, travay predikasyon an, mal sèvi ak san, oswa lòt bagay ankò. Ki sa n ka fè? Ki jan n ka kontinye pwogrese nan efò n ap fè pou n fè panse Bondye vin panse pa n? Epi, lè n fè sa, ki efè sa ap genyen sou fason n aji depi kounye a e alavni?

 4. Ki sa sa mande pou n suiv konsèy Pòl te bay la pou n “bay lespri nou yon lòt direksyon”?

⁴ Li Women 12:2. Nan vèsè sa a, apot Pòl esplike sa sa mande pou n aprann panse menm jan ak Jewova. Atik ki vin anvan an te ede n konprann pou n “sispann konfòme nou ak sistèm sa a”, nou dwe refize nouri tèt nou ak pwennvi monn nan ansanm ak fason l wè bagay yo. Anplis de sa, Pòl te fè konnen nou bezwen “bay lespri nou yon lòt direksyon”. Sa gen ladan l etidye Pawòl Bondye a nan objektif pou n konprann panse l yo, pou n medite sou yo, e pou n fè panse n vin ann amoni ak panse Bondye.

 5. Esplike diferans ki genyen ant yon senp lekti ak etidye.

⁵ Etidye vle di plis pase fè yon senp lekti e sa mande plis pase annik souliye repons kesyon yo. Lè n ap etidye, nou egzamine sa sijè a aprann nou sou Jewova, sou fason l aji ak sou fason l panse. Nou chèche konprann rezon ki fè Bondye bay lòd pou fè yon bagay ak rezon ki fè l kondane yon lòt. Mete sou sa, nou reflechi sou chanjman nou dwe fè nan lavi nou ak nan panse n. Byenke n ka pa fè tout bagay sa yo chak fwa n ap etidye, nou jwenn byenfè lè n pase tan, petèt mwatye nan tan nou rezève pou chak etid, pou n medite sou sa n li yo. — Sòm 119:97; 1 Tim. 4:15.

 6. Ki sa k rive lè n medite sou panse Jewova yo?

⁶ Lè n medite sou Pawòl Bondye a regilyèman, gen yon bagay estrawòdinè ki rive. Nou “verifye pèsonèlman”, wi, nou konvenk tèt nou fason Jewova rezone a pafè. Nou kòmanse wè bagay yo menm jan avè l, e nou vin dakò ak fason li panse. Nou bay lespri nou “yon lòt direksyon” e nou vin aprann reflechi yon lòt jan. Tikras pa tikras, nou fè panse Jewova vin panse pa nou.

7, 8. a) Ki jan Jewova wè kesyon reyisi nan domèn materyèl la? (Gade foto ki nan kòmansman atik la.) b) Si n gen panse Jewova, ki sa n ap toujou bay priyorite?

⁷ Nou pa dwe kouri kwè panse se jis yon egzèsis mantal. Panse ak aksyon mache ansanm (Mak 7:21-23; Jak 2:17). Ann pran kèk egzanp pou n pi byen konprann sa. Pa egzanp, nan Evanjil yo nou jwenn enfòmasyon ki klè konsènan fason Jewova wè bagay materyèl. Se Bondye menm ki te chwazi moun ki t ap vin paran Pitit gason l lan e ki t ap pran swen l, li te chwazi yon mari ak yon madanm ki pa t gen gwo mwayen (Lev. 12:8; Lik 2:24). Lè Jezi fèt, Mari te “mete l yon kote yo konn bay bèt manje, paske yo pa t jwenn kote pou yo rete”. (Lik 2:7.) Si Jewova te vle li te ka bay Pitit gason l lan yon pi bon kote pou l rete, e l te ka fè sa plizyè fason. Men, sa k te pi enpòtan pou Jewova se te fason paran Jezi yo t apral pran swen l nan domèn espirityèl.

⁸ Istwa sa a nou jwenn nan Bib la sou nesans Jezi ede n wè fason Jewova konsidere bagay materyèl. Gen kèk paran ki vle pou pitit yo gen pi bon bagay yo nan domèn materyèl, menmsi sa ka gen move efè sou relasyon timoun yo ak Jewova. Sepandan, li klè, pou Jewova se bagay espirityèl ki gen plis enpòtans. Èske w wè bagay yo menm jan ak Jewova? Ki sa aksyon nou montre? — Li Ebre 13:5.

9, 10. Ki jan n ka montre nou gen menm pwennvi ak Jewova sou kesyon fè lòt moun trebiche?

⁹ Yon lòt egzanp se fason Bondye konsidere kesyon fè lòt moun trebiche a. Men sa Jezi te di: “Kèlkeswa moun ki fè youn nan tipiti sa yo pèdi lafwa yo genyen an, li t ap pi bon pou moun sa a si yo ta mare yon wòch moulen nan kou l, tankou wòch moulen bourik yo konn vire a, epi yo lage l nan lanmè.” (Mak 9:42). Santiman ki parèt nan pawòl sa yo fò anpil! Piske Jezi reflete pèsonalite Papa l yon fason ki pafè, nou kapab gen asirans Jewova santi l menm jan an lè yon moun fè youn nan disip Jezi yo trebiche akoz aksyon l pa demontre konsiderasyon pou lòt moun. — Jan 14:9.

¹⁰ Èske n gen menm panse ak Jewova ak Jezi? Èske n fè l vin panse pa nou? Ki sa aksyon n montre? Pa egzanp, imajine gen yon stil rad oswa gen yon sèten aparans ki atire n, men, ki ka fè kèk moun nan kongregasyon an fache oswa ki ka fè lòt moun gen panse ki imoral. Èske lanmou ak sousi nou gen pou kwayan parèy nou yo ap pouse n pase sou stil sa a nou prefere a? — 1 Tim. 2:9, 10.

11, 12. Lè n chèche gen menm panse ak Bondye sou sa ki mal e nou chèche gen metriz, ki jan sa ap pwoteje n kont sa ki mal?

¹¹ Ann konsidere yon twazyèm egzanp: Jewova rayi sa ki pa dwat (Eza. 61:8). Byenke l konnen nou gen tandans fè sa ki mal akoz nou eritye peche, li vle pou n rayi sa ki pa dwat menm jan avè l. (Li Sòm 97:10.) Lè n medite sou rezon ki fè Jewova rayi sa k mal sa ap ede n fè panse l vin panse pa nou, e sa ap ban nou plis fòs pou n reziste kont sa ki mal.

¹² Lè n gen menm panse ak Jewova sou sa ki pa dwat, sa ap ede n tou idantifye kèk bagay ki mal, menm lè Pawòl Bondye a pa pale sou yo aklè. Pa egzanp, gen yon kalite dans imoral ki kòmanse gaye nan monn nan. Gen kèk moun ki ka pran pretèks dans sa a pa gen anyen mal ladan l paske se pa relasyon seksyèla. Men, èske aksyon sa yo reflete panse Bondye, li menm ki rayi kèlkeswa bagay ki mal la? Ann rete lwen tout sa ki mal lè n chèche gen metriz ak lè n gen degoutans pou bagay Jewova rayi. — Wom. 12:9.

13. Poukisa n dwe reflechi depi kounye a sou fason panse Jewova ka gen efè sou desizyon nou pral pran pi devan yo?

¹³ Lè n ap etidye, l ap bon pou n reflechi sou efè panse Jewova ka gen sou sitiyasyon nou ka jwenn pi devan yo. Konsa, si n devan yon sitiyasyon ki mande pou n pran yon desizyon tousuit, sa pap siprann nou (Pwo. 22:3). Ann egzamine kèk egzanp Bib la bay.

14. Ki sa n aprann nan fason Jozèf te repouse madan Potifa?

¹⁴ Lefètke Jozèf te repouse tantativ madan Potifa yo tousuit, yon seri tantativ madanm nan te fè pou sedui l, sa montre li te reflechi alavans sou fason Jewova konsidere fidelite nan maryaj. (Li Jenèz 39:8, 9.) Mete sou sa, lefètke l te reponn madan Potifa: “Ki jan pou m ta ka fè gwosè mechanste sa a e pou m ta peche kont Bondye?”, sa montre li te fè panse Bondye vin panse pa l. E nou menm? Ann sipoze yon kòlèg travay ou kòmanse aji yon fason ki montre l vle flète avè w. Oubyen ki sa w t ap fè si w resevwa yon imaj oswa yon mesaj byen klè ki gen rapò ak sèks sou telefòn pòtab oub? Li pi fasil lontan pou n ret fidèl si n te deja chèche konprann panse Jewova sou kesyon sa yo, si n te dakò ak yo e si n te deside sa n ap fè alavans.

15. Menm jan ak twa Ebre yo, ki jan n ka reziste anba presyon pou n fè konpwomi ak fidelite nou anvè Jewova?

¹⁵ Kounye a, ann konsidere egzanp twa Ebre yo moun konnen sou non Chadrak, Mechak ak Abèdnego. Refize yo te refize adore estati annò wa Nebikadneza te fè a ak repons dirèk yo te bay wa a montre yo te reflechi alavans sou sa sa mande pou yo ret fidèl ak Jewova (Egz. 20:4, 5; Dàn. 3:4-6, 12, 16-18). Ann sipoze patwon w ta mande w pou w bay patisipasyon w pou yon fèt yo pral fè ki gen rapò ak fo relijyon. Ki sa w t ap fè? Olye w tann sitiyasyon sa yo rive, sa w panse si w ta kòmanse reflechi depi kounye a sou pwennvi Jewova gen sou kesyon sa yo? Konsa, si youn nan sitiyasyon nou sot pale de yo la a ta rive, menm jan ak twa Ebre yo, w ap wè l pi fasil pou w fè e pou w di sa ki kòrèk la.

16. Lè n byen konprann panse Jewova, ki jan sa ap ede n prepare n si n ta gen yon ijans nan domèn medikal?

¹⁶ Lè n reflechi alavans sou nesesite pou n ret fidèl sa ka ede n si n ta gen yon ijans nan domèn medikal. Byenke nou pran fèm detèminasyon pou n pa pran san oswa nenpòt nan kat konpozan prensipal san an, gen kèk tretman ki enplike san ki mande pou chak kretyen pran pwòp desizyon l sou baz prensip biblik yo ki montre fason Jewova panse (Tra. 15:28, 29). Se sèten, pi bon moman pou n reflechi sou kesyon sa yo se pa lè n nan yon lopital, kote n gendwa ap soufri e n ka anba presyon pou n pran yon desizyon tousuit. Se depi kounye a pou w fè rechèch, pou w gen yon dokiman medikal lalwa rekonèt ki montre sa w vle, e pou w pale ak doktè wc.

17-19. Poukisa l enpòtan pou n konnen panse Jewova depi kounye a? Bay yon sitiyasyon ki mande pou n prepare pou li.

¹⁷ Finalman, ann egzamine repons Jezi te bay Pyè pou move konsèy li te ba l la lè Pyè te di l: “Pa di bagay konsa non, Seyè.” Sanble Jezi te byen reflechi alavans sou volonte Bondye gen pou li ansanm ak pasaj nan Ekriti yo ki gen rapò ak lavi l sou tè a ansanm ak lanmò l. Lefètke l te konn sa, sa te ranfòse desizyon l te pran pou l kontinye ret fidèl e pou l kontinye mennen yon vi sakrifis san l pa devye. — Li Matye 16:21-23.

¹⁸ Jodi a, volonte Bondye pou pèp li a se pou yo vin zanmi l e pou yo fè tout sa yo kapab nan travay li a (Mat. 6:33; 28:19, 20; Jak 4:8). Menm jan sa te rive Jezi, gen moun ki gen bon entansyon ki ka eseye fè n kite wout sa a. Pa egzanp, ki sa w t ap fè si patwon w ta ba w yon pwomosyon e l ta met yon bon ti kòb sou salè w, men, sa ap pran pye sou aktivite espirityèl ou yo? Oubyen si w lekòl toujou, ann sipoze yo ta ba w posiblite pou w kite lakay ou pou w al viv yon lòt kote nan objektif pou w pran plis fòmasyon. Èske se nan moman sa a ou t ap bezwen priye, fè rechèch, pale ak moun nan fanmi w e petèt ansyen yo, epi pou w pran yon desizyon? Èske l pa t ap bon pou w chèche gen panse Jewova sou kesyon sa yo depi kounye a epi w fè tout sa w kapab pou w fè panse l vin panse pa w? Konsa, si w ta jwenn yon òf konsa, li ka pa vrèman reprezante yon tantasyon pou ou. Kòm ou gen objektif espirityèl e w pran detèminasyon nan kè w, tout sa w rete pou w fè se aji ann amoni ak desizyon w te deja pran an.

¹⁹ Ou ka reflechi sou lòt sitiyasyon ki ka rive bridsoukou oswa sanzatann. Natirèlman, nou pa ka prepare n pou tout sitiyasyon. Men, si n medite sou panse Jewova nan moman etid pèsonèl nou, li ka pi fasil pou n sonje sa n te etidye sou sitiyasyon n ap fè fas la e pou n aplike l. Kidonk, toujou chèche wè panse Jewova sou kesyon yo, fè panse l vin panse pa n, epi chèche wè lè n gen menm pwennvi ak Bondye ki jan sa ap gen efè sou fason n aji kounye a ak fason n pral aji pi devan.

20, 21. a) Poukisa n ap kontan gen yon libète ki gen limit nan monn nouvo a? b) Ki jan n ka kòmanse gen kè kontan sa a depi kounye a?

²⁰ Nou pa ka tann pou n nan monn nouvo a. Pifò nan nou ap tann pou n gen lavi ki pap janm fini an nan yon paradi sou tè a. Lè Wayòm nan ap dirije tè a, lèzòm ap libere anba soufrans ki gen nan sistèm sa a. Natirèlman, menm lè sa a, moun ap kontinye gen libète pou yo deside. Chak moun ap ka deside ann amoni ak sa yo prefere ansanm ak dezi yo genyen.

²¹ Nòmalman, libète sa a ap gen limit. Se lwa ak panse Jewova yo ki pral gide moun ki gen imilite yo anrapò ak sa ki byen ak sa ki mal. Nou pral pran plezi nan sa, e kòm rezilta, nou pral gen pi gwo kè kontan an ak yon lapè total (Sòm 37:11). Annatandan, nou ka kòmanse gen kè kontan sa a lè n fè panse Jewova vin panse pa nou.