“Veye pou pèsonn pa pran nou nan pyèj”!

 1. Selon Kolosyen 2:4, 8, ki jan Satan eseye kontwole lespri nou?

SATAN vle fè nou vire do bay Jewova. Pou l rive fè sa, li eseye chanje fason n panse pou l ka kontwole lespri nou e pou l ka fè nou obeyi l. Li eseye konvenk nou oswa li eseye twonpe n pou n suiv li lè l sèvi ak yon seri bagay pou atire nou. — Li Kolosyen 2:4, 8.

2-3. a) Sa k fè nou pa dwe minimize avètisman nou jwenn nan Kolosyen 2:8 la? b) Ki sa nou pral egzamine nan atik sa a?

² Èske li posib pou Satan twonpe nou vre? Wi, li posib! Sonje sa, Pòl pa t ekri avètisman nou jwenn nan Kolosyen 2:8 la pou moun ki pa kwayan. Li te ekri l pou kretyen Bondye chwazi pa mwayen lespri sen pou y al nan syèl (Kol. 1:2, 5). Si kretyen nan epòk sa a te dwe veye pou Satan pa twonpe yo, alewè pou nou menm jodi a (1 Kor. 10:12)! Sa k fè sa? Kounye a, se ozalantou tè a Satan ye menm e objektif li se twonpe sèvitè fidèl Bondye yo (Rev. 12:9, 12, 17). Mete sou sa, n ap viv nan yon epòk kote moun ki mechan ak moun ki mètdam “ap vin pi mal toujou”. — 2 Tim. 3:1, 13.

³ Nan atik sa a, nou pral pale sou fason Satan sèvi ak “twonpri ki san valè” pou l eseye chanje fason nou panse. Nou pral pale sou twa nan “manèv” oswa “plan” li genyen (Efe. 6:11, nòt). Epi, nan atik ki vin apre a, nou pral egzamine fason pou nou elimine kèlkeswa move efè taktik li yo te gentan gen sou fason nou panse. Toudabò, ann gade sa nou ka aprann nan fason Satan te twonpe Izrayelit yo apre yo te fin antre nan Peyi Bondye te pwomèt la.

4-6. Selon Detewonòm 11:10-15, lè Izrayelit yo t al abite nan Peyi Bondye te pwomèt la, ki chanjman yo te bezwen fè nan fason yo te konn fè jaden?

⁴ Satan te byen reflechi pou l te fè Izrayelit yo tonbe nan adore zidòl. Ki jan l te fè sa? Kòm li te konnen yo te bezwen jwenn manje pou yo manje, li te pwofite sitiyasyon an. Lè Izrayelit yo te antre nan Peyi Bondye te pwomèt la, yo te oblije chanje fason yo te konn fè jaden. Lè yo te ann Ejip, se ak dlo ki te sot nan Rivyè Nil la yo te konn wouze jaden. Men, nan Peyi Bondye te pwomèt la, se pa konsa sa te ye, pa t gen yon gwo rivyè pou yo jwenn dlo pou wouze jaden. Jaden yo te wouze nan sezon lapli oswa ak lawouze. (Li Detewonòm 11:10-15; Eza. 18:4, 5.) Donk, Izrayelit yo te bezwen sèvi ak nouvo metòd pou yo fè jaden. Sa pa t ap fasil, paske pifò nan moun ki te gen eksperyans nan fè jaden yo te mouri nan dezè a.

⁵ Apre Jewova te fin fè pèp li a konnen sitiyasyon yo te chanje, li te ba yo yon avètisman ki pa vrèman sanble gen rapò ak fè jaden. Li te di yo: “Fè atansyon pou nou pa kite kè nou fè n al adore lòt dye e pou l fè nou pwostène devan yo.” (Det. 11:16, 17). Poukisa Jewova te avèti yo pou yo pa al adore fo dye alòske se sou nouvo metòd pou fè jaden l t ap pale?

⁶ Jewova te konnen Izrayelit yo te ka anvi aprann kèk teknik nan men yon seri payen ki t ap viv bò kote yo sou fason yo fè jaden nan zòn nan. Se vre, vwazen sa yo te gen plis eksperyans lontan pase Izrayelit yo, e moun ki te nan pèp Jewova a te ka aprann kèk teknik nan men yo ki te ka itil yo, men se te yon danje. Moun peyi Kanaran ki te konn fè jaden yo te adore Baal e kwayans yo gen nan Baal te gen enfliyans sou fason yo panse. Pou yo menm, Baal se te mèt syèl la e se li ki te bay lapli. Jewova pa t vle pou pèp li a kwè nan manti sa yo. Poutan, se pa ni de ni twa fwa Izrayelit yo te pito chwazi adore Baal (Nonb 25:3, 5; Jij 2:13; 1 Wa 18:18). Kounye a, ann gad ki jan Satan te reyisi pran Izrayelit yo nan pyèj.

 7. Ki jan lafwa Izrayelit yo te pase anba eprèv lè yo te antre nan Peyi Bondye te pwomèt la?

⁷ Premye taktik Satan te itilize se jwe sou dezi nòmal yo te genyen pou yo wè lapli wouze peyi a. Pa t konn gen anpil lapli ki tonbe nan Peyi Bondye te pwomèt la soti fen avril rive septanm. Pou Izrayelit yo te ka jwenn manje pou yo manje e pou yo te ka fè bèl rekòt, yo te bezwen lapli a ki te konn kòmanse tonbe nan zòn mwa oktòb. Satan te twonpe Izrayelit yo lè l te fè yo kwè si yo vle fè bèl rekòt, yo te dwe fè menm sa nasyon payen ki te ozalantou yo te konn fè. Nasyon sa yo te kwè yo dwe fè yon seri seremoni pou dye yo ka fè lapli tonbe. Moun ki pa t gen lafwa nan Jewova yo te kwè se sèl fason sa a yo te ka evite gen yon gwo sechrès, donk yo te konn fè seremoni payen pou yo onore fo dye ki rele Baal la.

 8. Ki dezyèm taktik Satan te itilize? Esplike.

⁸ Satan te itilize yon dezyèm taktik sou Izrayelit yo. Li te jwe sou yon seri dezi imoral. Nasyon payen yo te konn fè yon seri aksyon ki imoral anpil lè y ap adore dye yo te genyen yo. Nan adorasyon devègonde sa a, te gen ni fi ni gason ki te konn fè pwostitisyon nan tanp yo. Nonsèlman yo te aksepte omoseksyalite ak lòt fòm imoralite seksyèl, men tou yo te konsidere yo kòm bagay ki nòmal (Det. 23:17, 18; 1 Wa 14:24)! Payen yo te kwè se lè yo fè seremoni sa yo dye yo t ap fè tè a bay rannman. Seremoni payen yo te konn fè kote yo te pratike imoralite seksyèl te atire anpil Izrayelit, e sa te fè yo lage kò yo nan adore fo dye. An reyalite se Satan ki te pran yo nan pyèj.

 9. Jan Oze 2:16, 17 montre sa, ki jan Satan te chèche fè Izrayelit yo bliye Jewova?

⁹ Satan te sèvi ak yon twazyèm taktik. Li te chèche fè Izrayelit yo bliye Jewova. Nan epòk pwofèt Jeremi, Jewova te fè konnen fo pwofèt yo te fè pèp Li a bliye non l. Yo “t ap sèvi Baal” e yo te ankouraje pèp la fè menm bagay la (Jer. 23:27). Sanble pèp Bondye a te sispann sèvi ak non Jewova e yo te konn sèvi ak non Baal, ki vle di “Pwopriyetè” oubyen “Mèt”. Aksyon sa a te fè l difisil pou Izrayelit yo wè diferans ant Jewova ak Baal, sa ki t ap fè l pi fasil pou yo mele seremoni yo fè pou Baal yo ak adorasyon y ap bay Jewova. — Li Oze 2:16, 17 ak nòt la.

10. Ki taktik Satan itilize jodi a?

¹⁰ Satan sèvi ak menm taktik yo jodi a. Li jwe sou dezi nòmal moun genyen, li fè pwomosyon pou imoralite seksyèl e li chèche fè moun bliye Jewova. Annou egzamine dènye taktik sa a anvan.

11. Ki jan Satan chèche fè moun bliye Jewova?

¹¹ Satan chèche fè moun bliye Jewova. Apre lanmò apot Jezi yo, gen yon seri swadizan kretyen ki te kòmanse gaye fo ansèyman (Tra. 20:29, 30; 2 Tes. 2:3). Aposta sa yo te kòmanse fè l difisil pou moun konnen kiyès sèl vrè Dye a ye. Pa egzanp, yo te sispann sèvi ak non Bondye lè yo t ap refè bib yo genyen yo e yo te pito sèvi ak yon seri ekspresyon tankou “Seyè”. Lefètke yo te retire non Bondye epi yo te mete “Seyè” nan plas li, sa te fè l difisil pou yon moun k ap li Bib la wè Jewova pa menm ak lòt “seyè” Bib la pale de yo (1 Kor. 8:5). Yo te sèvi ak menm mo “Seyè” a ni pou Jewova ni pou Jezi, e sa te fè li difisil pou moun konprann Jewova ak Pitit Gason l lan se pa menm moun nan e yo pa gen menm pozisyon (Jan 17:3). Piske sa lage moun nan konfizyon, sa fè doktrin Trinite a vin pran pye, yon doktrin Pawòl Bondye a pa anseye. Kòm rezilta, pou anpil moun, Bondye se yon mistè e yo kwè yo pa ka konnen l. Sa a se yon gwo manti! — Tra. 17:27.

12. Ki sa fo relijyon ankouraje moun fè, e ki rezilta sa bay jan nou wè sa nan Women 1:28-31?

¹² Satan jwe sou dezi imoral moun genyen. Nan tan lontan, ann Izrayèl, Satan te sèvi ak fo relijyon pou l ankouraje moun lage kò yo nan imoralite seksyèl. Li kontinye fè menm bagay la jodi a. Fo relijyon tolere moun k ap fè imoralite e yo menm ankouraje moun fè imoralite. Konsa, anpil moun ki di y ap sèvi Bondye sispann obeyi prensip moral Bondye bay ki byen klè yo. Nan yon lèt apot Pòl te ekri Women yo, li te esplike sa k ap rive relijyon k ap ankouraje moun fè imoralite seksyèl yo. (Li Women 1:28-31.) Pami “bagay ki pa kòrèk” yo, gen tout kalite fòm imoralite seksyèl, san wete omoseksyalite (Wom. 1:24-27, 32; Rev. 2:20). Donk, li enpòtan anpil pou nou kontinye obeyi ansèyman klè Bib la bay yo!

13. Bay yon lòt taktik Satan itilize.

¹³ Satan jwe sou dezi ki nòmal yo. Li nòmal pou nou anvi aprann metye ki ka ede nou pran swen tèt nou ak fanmi nou (1 Tim. 5:8). Byen souvan nou aprann metye sa yo lè n al lekòl e lè nou etidye anpil. Men, nou dwe fè atansyon. Sistèm edikasyon nan anpil peyi pa sèlman ede etidyan yo gen ase kapasite pou yo pran swen tèt yo men tou yo anseye yo filozofi lèzòm yo. Yo ankouraje etidyan yo pou yo gen dout sou egzistans Bondye e pou yo pa gen respè pou Bib la. Yo fè yo konnen sèl fason yo ka esplike kote lavi soti se pa mwayen teyori evolisyon an (Wom. 1:21-23). Ansèyman konsa depaman nèt ak “sajès Bondye”. — 1 Kor. 1:19-21; 3:18-20.

14. Ki sa filozofi lèzòm yo ankouraje moun fè?

¹⁴ Filozofi lèzòm yo meprize prensip Bondye yo ki dwat oubyen yo an kontradiksyon ak yo. Yo pa ankouraje moun chèche gen fwi lespri Bondye a, men yo pouse yo pratike “zèv lachè yo”. (Gal. 5:19-23.) Yo fè moun yo gen ògèy ak awogans, e sa fè moun yo vin “renmen pwòp tèt yo”. (2 Tim. 3:2-4.) Defo sa yo pa gen anyen pou yo wè ak imilite, yon kalite yo ankouraje sèvitè Bondye yo pou yo genyen (2 Sam. 22:28). Gen kretyen k al nan inivèsite ki vin panse menm jan ak monn nan olye yo panse menm jan ak Bondye. Ann pran yon egzanp pou ede n wè sa k ka rive lè n pa rekonèt danje sa a.

15-16. Ki sa w aprann nan eksperyans yon sè te fè?

¹⁵ Gen yon sè ki nan sèvis aplentan depi plis pase 15 an ki di: “Lè m te fin batize, mwen te li e m te tande avètisman ki montre danje ki genyen lè yon moun al nan inivèsite, men m pa t okipe avètisman sa yo. Mwen te panse konsèy sa yo pa t pou mwen.” Ki difikilte l te jwenn? Men sa l admèt: “Etidye pou kou yo te tèlman pran tan ak efò, sa te fè m pa ka jwenn tan pou m priye Jewova jan m te konn fè sa anvan, m te twò fatige pou m pran plezi nan pale sou Bib la ak lòt moun e m te twò fatige pou m byen prepare reyinyon yo. Erezman, kou m te rann mwen kont jan plonje nan fè gwo etid te gen move efè sou relasyon m ak Jewova, mwen te konprann mwen dwe kanpe. E se sa m te fè.”

¹⁶ Ki efè gwo etid sè a te fè a te gen sou panse l? Men sa l di: “Mwen jennen pou m di edikasyon mwen t ap chèche genyen an te aprann mwen pou m konsantre sou defo lòt moun, sitou frè m ak sè m yo, pou m atann yo fè plis pase sa yo ka fè, e pou m rete lwen yo. Sa te pran m anpil tan pou m sispann panse konsa. Moman sa a nan lavi m te fè m wè jan se yon danje pou yon moun meprize avètisman Papa nou ki nan syèl la ban nou pa mwayen òganizasyon l lan. Jewova te konnen m pi byen pase jan m konn tèt mwen. Si m te koute, sa pa t ap rive!”

17. a) Ki detèminasyon nou ta dwe pran? b) Ki sa nou pral egzamine nan atik ki vin apre a?

¹⁷ Se pou w pran detèminasyon pou w pa janm kite “filozofi ak twonpri ki san valè” monn Satan an pran w nan pyèj. Se pou w toujou ap pwoteje tèt ou kont taktik Satan yo (1 Kor. 3:18; 2 Kor. 2:11). Pa janm kite l fè w bliye Jewova. Se pou w viv ann amoni ak prensip moral wo nivo Jewova bay yo. E pa kite Satan twonpe w pou w meprize konsèy Jewova yo. Men, ki sa pou w fè si w rann ou kont lespri monn nan te deja gen move efè sou fason w panse? Atik ki vin apre a pral montre ki jan Pawòl Bondye a ka ede nou ranvèse panse ak abitid “ki byen anrasinen”. — 2 Kor. 10:4, 5.