“ Gade ! Lyon ki soti nan tribi Jida a ”

1-3. Ki danje Jezi oblije afwonte, e kòman l reyaji ?

YON latriye moun dèyè Jezi pou yo arete l. Mesye sa yo, ki vin ak epe ak baton e ki gen sòlda nan mitan yo, fòme yon gwo foul moun. Yo deplase nan lari Jerizalèm yo ki fènwa, e yo janbe vale Kidwòn nan pou y ale nan mòn Olivye. Yo tout yo gen yon sèl move entansyon an. Malgre gen plèn lin, yo mache ni ak lanp ni ak tòch. Èske y ap bezwen yo pou yo klere wout yo paske gen nyaj ki bare limyè lalin nan ? Oswa èske yo atann yo moun yo dèyè l la ap kache nan lonbray pyebwa yo ? Gen yon bagay ki sèten : yon moun ki atann li Jezi ap kraponnen, moun sa a pa byen konnen kiyès Jezi ye.

² Jezi okouran danje k ap pwoche a. Sepandan, li rete la ap tann. Foul moun yo ap pwoche, Jida alatèt yo, li menm yon lè ki te yon zanmi diy de konfyans. Avèk odas, Jida trayi Jezi, li idantifye ansyen mèt li a pa mwayen yon salitasyon ipokrit ak yon bo. Malgre sa, Jezi rete kalm. Apre sa, li abòde foul la, li di : “ Kiyès n ap chèche ? ” Yo reponn : “ Jezi Nazareyen an. ”

³ Pifò moun t ap panike devan yon foul ki ame konsa. Petèt se reyaksyon sa a foul la atann li mesye ki devan l lan ap genyen. Men, Jezi pa ni kraponnen, ni chape pou l li, ni li pa kouri bay yon manti. Olye de sa, li senpleman di : “ Mwen se li. ” Fason l aji a tèlman kalm, li tèlman demontre li gen kouraj, mesye yo ret sezi. Yo kilbite pa dèyè e yo tonbe atè ! — Jan 18:1-6 ; Matye 26:45-50 ; Mak 14:41-46.

4-6. a) Ak ki sa yo konpare Pitit Gason Bondye a, e poukisa ? b) Bay twa fason Jezi te demontre li gen kouraj.

⁴ Kòman Jezi te ka rive fè fas ak yon gwo danje konsa avèk yon trankilite e avèk yon metriz total kapital ? Nou jwenn repons lan nan yon sèl mo : kouraj. Se youn nan kalite ki ra moun tèlman admire e yo tèlman ta renmen jwenn lakay yon chèf, e pa gen okenn moun ki janm rive atenn li nan degre Jezi te atenn li an, alewè pou l ta depase Jezi. Nan chapit anvan an, nou te aprann nan ki pwen Jezi te yon moun ki enb e ki dou. Yo te gen rezon rele l “ Timouton ” an (Jan 1:29). Sepandan, akoz kouraj Jezi te demontre, yo te dekri l yon lòt fason ki vrèman diferan. Men sa Bib la di konsènan Pitit Gason Bondye a : “ Gade ! Lyon ki soti nan tribi Jida a. ” — Revelasyon 5:5.

⁵ Byen souvan, nan lespri moun yo, lyon ak kouraj mache ansanm. Èske sa te janm rive w ou te twouve w bab pou bab ak yon mal lyon ? Nan ka sa a, siman te gen yon bagay ki te separe w ak bèt la, petèt se te kaj kote li te ye nan yon pak. Malgre sa, yon eksperyans konsa ka efreyan. Etan w ap fikse vizaj gwo kreyati pisan sa a e pandan li menm tou l ap fikse w, li difisil pou w ta imajine bèt sa a k ap kouri pou yon bagay li pè. Labib pale de lyon kòm “ bèt ki pi pisan pami bèt yo e ki pa janm kase tèt tounen devan pèsonn ”. (Pwovèb 30:30.) Se yon kalite kouraj konsa Kris genyen.

⁶ Annou fè yon ti pale sou twa fason Jezi te demontre li gen yon kouraj ki pòtre ak kouraj yon lyon : li te pran pozisyon pou laverite, li te defann sa ki jis e li te fè fas ak opozisyon. Nou pral rann nou kont tou, nou tout, kit nou se moun ki brav natirèlman, kit nou pa brav natirèlman, nou ka imite Jezi nan demontre nou gen kouraj.

7-9. a) Ki sa k te pase lè Jezi te gen 12 an, e nan ki sans, dapre ou menm, sitiyasyon sa a te ka entimide yon moun ? b) Ki jan Jezi te demontre li gen kouraj nan rapò li ak anseyan yo nan tanp lan ?

⁷ Nan yon monn Satan, “ papa manti ” a, ap dirije, souvan, sa mande kouraj pou nou pran pozisyon pou laverite (Jan 8:44 ; 14:30). Jezi pa t tann li rive nan laj adilt anvan li pran yon pozisyon konsa. A 12 an, Jezi ak paran l te separe apre fèt Pak ki t ap fèt Jerizalèm nan. Pandan twa jou, ak kè kase, Mari ak Jozèf t ap chèche tigason an. Finalman, yo jwenn li nan tanp lan. E ki sa l t ap fè la ? Li te ‘ chita nan mitan anseyan yo, li t ap koute yo e li t ap poze yo kesyon ’. (Lik 2:41-50.) Annou egzamine kad kote diskisyon sa a te fèt la.

⁸ Selon sa istoryen yo fè konnen, kèk nan chèf relijye ki pi enpòtan yo te konn pran abitid rete nan tanp lan apre fèt yo e yo te konn anseye sou youn nan gwo galri ki te la yo. Moun te konn chita nan pye yo pou koute yo e pou poze yo kesyon. Anseyan sa yo se te moun ki byen fòme. Yo te gen anpil konesans sou Lwa Moyiz la e sou dividal lwa ak tradisyon lèzòm fè ki te vin ogmante ofiramezi ane ap pase. Ki jan w t ap santi w si w ta chita nan mitan yo ? Ou pa t ap santi w entimide ? Se t ap yon bagay nòmal. E si se sèlman apèn 12 an ou ta genyen ? Gen anpil jèn ki timid (Jeremi 1:6). Gen ladan yo ki fè tousa yo kapab pou yo evite atire atansyon anseyan yo nan lekòl. Jèn sa yo pè pou yo pa poze yo kesyon, pou yo pa deziyen yo, pou yo pa twouve yo nan sitiyasyon kote yo santi yo jennen oswa kote y ap pase yo nan rizib.

⁹ Epoutan, se la nou jwenn Jezi, li chita nan mitan mesye sa yo ki byen fòme, e san l pa pè, l ap poze yo kesyon ki pwofon. E li menm fè plis pase sa. Men sa Bib la fè nou konnen : “ Tout moun ki t ap koute l yo te ret sezi devan entèlijans li e devan repons li yo. ” ​(Lik 2:47). Bib la pa di nou ki sa l te di nan okazyon sa a, men nou ka gen konfyans li pa t kontante l repete manti ki te tèlman popilè pami anseyan relijye sa yo (1 Pyè 2:22). Non, li te pran pozisyon pou laverite Pawòl Bondye a, e se sèten, moun ki t ap koute l yo te sezi wè yon tigason 12 an te ka eksprime l avèk entèlijans e avèk kouraj konsa.

10. Ki jan jèn kretyen yo jodi a imite kouraj Jezi ?

¹⁰ Jodi a, anpil jèn kretyen ap suiv tras Jezi. Se vre, kontrèman ak Jezi, yo pa pafè. Sepandan, menm jan avè l, yo pa tann yo rive nan laj adilt pou yo pran pozisyon pou laverite. Kit se nan lekòl, kit se nan zòn kote yo rete, avèk tak, yo poze moun kesyon, yo koute yo, e avèk respè, yo pataje laverite avèk yo (1 Pyè 3:15). Antanke gwoup, jèn sa yo ede kamarad lekòl, anseyan ak vwazen pou yo vin suiv Kris. Kouraj yo dwe vrèman fè Jewova plezi ! Pawòl Li a konpare jèn sa yo ak gout lawouze ki rafrechisan, ki agreyab e ki anpil. — Sòm 110:3.

11, 12. Nan laj adilt, ki jan Jezi te demontre li defann laverite avèk kouraj ?

¹¹ Jezi, nan laj adilt, te defann laverite avèk kouraj yon pakèt fwa. Anfèt, ministè li te derape avèk yon konfwontasyon anpil moun ta ka konsidere ki bay laperèz. Jezi te oblije fè fas ak Satan, ènmi Jewova ki pi pisan e ki pi danjere a, non pa antanke akanj lan ki pisan, men kòm yon senp òm ki fèt ak chè ak san. Jezi te repouse Satan e li te kontrekare move aplikasyon Satan te fè ak yon pòsyon nan Ekriti enspire yo. Jezi te mete fen nan rankont lan, lè li te bay lòd sa a avèk kran : “ Al fè wout ou, Satan ! ” — Matye 4:2-11.

¹² Konsa, Jezi te trase modèl pou ministè li. Avèk kran, li te defann Pawòl Papa l la kont efò ki t ap fèt pou tòde l oswa pou mal sèvi avè l. Nan epòk sa a, menm jan ak kounye a, malonètete nan domèn relijye se te bagay ki te trè kouran. Men sa Jezi te di chèf relijye nan epòk li a : “ Nou anile pawòl Bondye a pa mwayen tradisyon nou nou transmèt. ” ​(Mak 7:13). Pèp la an jeneral te gen gwo admirasyon pou mesye sa yo, men Jezi pa t pè denonse yo kòm gid ki avèg e ki ipokrita (Matye 23:13, 16). Ki jan nou ka imite aspè sa a nan egzanp kouraj Jezi te demontre ?

13. Ki sa nou bezwen sonje pandan n ap imite Jezi, men, ki privilèj nou genyen ?

¹³ Natirèlman, n ap sonje nou pa gen kapasite Jezi genyen pou l li nan kè moun, ni nonplis nou pa gen otorite l genyen pou l jije. Sepandan, nou ka imite fason l te konn defann laverite avèk kran. Pa egzanp, lè nou devwale fo doktrin relijye yo, anpalan de manti yo anseye byen souvan sou Bondye, sou objektif li e sou Pawòl li, se gaye n ap gaye limyè nan yon monn ki nan fènwa akoz pwopagann Satan (Matye 5:14 ; Revelasyon 12:9, 10). Nou ede moun yo pou yo libere anba esklavaj fo ansèyman k ap ranpli kè yo ak yon krent egzajere e k ap gate relasyon yo avèk Bondye. Nou vrèman gen yon gwo privilèj pou nou wè reyalizasyon pwomès sa a Jezi te fè a : “ Laverite ap libere nou. ” — Jan 8:32.

14, 15. a) Bay youn nan fason Jezi te fè moun konprann “ sa jistis ye ”. b) Etan Jezi t ap pale ak yon Samaritèn, ki prejije li pa t okipe ?

¹⁴ Gen pwofesi nan Bib la ki te predi Mesi a t apral fè nasyon yo konprann “ sa jistis ye ”. (Matye 12:18 ; Izayi 42:1.) Se sèten, Jezi te kòmanse fè sa pandan l te sou tè a. Avèk anpil kouraj, li te toujou montre li jis e li san patipri nan fason l te konn boule ak moun yo. Pa egzanp, li te refize adopte prejije ansanm ak entolerans, ki pa baze sou Ekriti yo e ki te tèlman popilè nan monn ki te antoure l la.

¹⁵ Lè Jezi t ap pale ak yon Samaritèn bò pi Sicha a, disip li yo te etone. Poukisa ? Nan epòk sa a, an jeneral, Juif yo pa t vle wè Samariten yo, e mepri sa a te la depi yon pakèt tan anvan Jezi te vin sou tè a (Ezra 4:4). Anplis de sa, gen kèk raben ki te konn denigre medam yo. Selon règ raben yo te fè, règ yo te vin ekri annapre, yo te dekouraje yon gason gen konvèsasyon avèk yon fi, yo te menm lese konprann medam yo pa t diy pou yo anseye yo Lalwa Bondye. Yo te konsidere sitou Samaritèn yo kòm moun ki kontamine. Jezi pa t teni kont de prejije sa yo : an piblik, li te anseye Samaritèn nan (ki t ap mennen yon vi imoral), e li te menm revele l idantite li antanke Mesi a. — Jan 4:5-27.

16. Poukisa kretyen yo bezwen kouraj pou yo montre yo diferan anrapò ak kesyon prejije a ?

¹⁶ Èske w janm twouve w pami moun ki gen vye prejije ? Petèt, avèk mepri, y ap pran plezi sou moun ki soti nan yon lòt ras oswa nan yon lòt nasyon, petèt y ap pale yon fason negatif konsènan moun ki pa menm sèks avèk yo, oswa yo meprize moun ki gen yon nivo sosyal oubyen yon nivo ekonomik ki diferan ak pa yo. Moun k ap suiv Kris yo pa apwouve pwennvi ki demontre lahèn konsa e yo travay di pou yo elimine tout tras prejije nan pwòp kè yo (Travay 10:34). Nou chak, nou dwe kiltive kouraj pou nou montre nou san patipri nan domèn sa a.

17. Ki aksyon Jezi te fè nan tanp lan, e poukisa ?

¹⁷ Kouraj Jezi genyen te pouse l lite tou pou pwòpte pèp Bondye a e pou dispozisyon ki pran nan kad adorasyon ki pa kontamine a. Byen bonè nan ministè li, li te antre nan lakou tanp lan nan Jerizalèm, e sa te ba l degou pou l wè machann yo ak kanbis yo k ap regle aktivite komès yo la. Jezi te vin ranpli ak yon endiyasyon ki jis, e li te mete mesye ava sa yo ak tout komès yo deyò (Jan 2:13-17). Annapre, li te aji menm jan an ankò, lè ministè l te pre fini (Mak 11:15-18). Aksyon sa yo pa t manke pa fè l gen ènmi ki pisan, men sa pa t fè l ezite. Poukisa ? Depi l te toupiti, li te konn rele tanp sa a mezon Papa l, e li te di sa ak tout konviksyon l (Lik 2:49). Kesyon pou moun vin sal adorasyon ki pa kontamine ki te konn fèt nan tanp lan se yon enjistis li pa t ap janm ka tolere. Zèl li te genyen te ba l kouraj pou l fè sa ki te nesesè a.

18. Ki jan kretyen yo jodi a ka aji avèk kouraj anrapò ak pwòpte kongregasyon an ?

¹⁸ Menm jan an tou, moun k ap suiv Kris yo jodi a sousye yo anpil konsènan pwòpte pèp Bondye a e konsènan dispozisyon ki pran nan kad adorasyon ki pa kontamine a. Si yo wè yon konpayon kretyen ki komèt yon peche grav, yo pa annik fèmen je sou sa. Avèk kouraj, yo pale ak moun nan oswa ak ansyen yo sou sa (1 Korentyen 1:11). Yo asire yo ansyen nan kongregasyon an okouran sa k pase a. Ansyen yo ka ede moun ki fèb espirityèlman yo, e yo ka pran dispozisyon pou yo prezève pwòpte espirityèl mouton Jewova yo. — Jak 5:14, 15.

19, 20. a) Ki enjistis ki te gaye nan epòk Jezi a, e ak ki presyon Jezi te fè fas ? b) Poukisa moun k ap suiv Kris yo refize mele nan politik e nan vyolans ? Bay youn nan rekonpans yo jwenn pou pozisyon yo a.

¹⁹ Sepandan, èske nou dwe tire konklizyon kòmkwa Jezi te konn konbat enjistis sosyal ki te gen nan monn nan an jeneral ? Sètènman te gen enjistis toutotou l. Yon pisans etranje te okipe peyi l. Women yo t ap toupizi Juif yo ak yon prezans militè pisan, yo t ap mete gwo enpo sou do Juif yo, e yo te menm konn nui koutim relijye yo. Li pa etonan pou anpil moun te vle Jezi mele nan kesyon politik nan epòk li a (Jan 6:14, 15). La ankò, li te dwe demontre kouraj li.

²⁰ Jezi te fè konnen Wayòm li an pa fè pati monn nan. Pa mwayen egzanp li, li te fòme moun k ap suiv li yo pou yo pa mele nan lit politik ki t ap fèt nan epòk la e pou yo konsantre yo okontrè sou predikasyon bon nouvèl Wayòm Bondye a (Jan 17:16 ; 18:36). Li te anseye yon leson pisan anrapò ak netralite, lè foul la te vin arete l. Pyè kouri pase alaksyon : san reflechi, li rale epe l e li blese yon mesye. Li fasil pou nou konprann Pyè. Si jamè li ta sanble li jistifye pou moun sèvi ak vyolans, se te nan nuit sa a, lè yo te atake Pitit Gason Bondye a, ki inosan. Malgre sa, nan moman sa a, Jezi te tabli prensip pou disip terès li yo suiv jis jodi a lè l di : “ Mete epe w nan plas li, paske tout moun ki pran epe ap peri anba epe. ” ​(Matye 26:51-54). Se sèten, menm jan ak jodi a, sa te mande moun k ap suiv Kris yo kouraj pou yo kenbe yon pozisyon pezib konsa nan epòk sa a. Kòm rezilta pozisyon net pèp Bondye a pran jodi a antanke kretyen, dosye l vyèj anrapò ak pakèt lagè, olokos, soulèvman ak lòt zak vyolans tankou sa yo, k ap fèt nan tan modèn nan. Bon dosye sa a se yon rekonpans pou kouraj yo.

21, 22. a) Ki èd Jezi te resevwa anvan li te fè fas ak eprèv ki pi di nan eprèv li te rankontre yo ? b) Ki jan Jezi te montre li gen kouraj jiska lafen ?

²¹ Pitit Gason Jewova a te konnen lontan alavans li t apral jwenn gwo opozisyon isit sou tè a (Izayi 50:4-7). Li te fè fas ak anpil menas lanmò, jis rive nan sa yo dekri nan kòmansman chapit sa a. Ki jan Jezi te fè rive kenbe kouraj li malgre danje sa yo ? Ebyen, ki sa Jezi t ap fè anvan foul la te vin arete l ? Li t ap priye Jewova ak tout kè l. E ki sa Jewova te fè ? Bib la di nou “ Bondye te tande [Jezi] avèk favè ”. (Ebre 5:7.) Jewova te voye yon zanj sot nan syèl la pou l fòtifye Pitit Gason l lan ki aji ak kouraj. — Lik 22:42, 43.

²² Yon tikras tan apre yo te fin fòtifye Jezi, li di apot li yo : “ Leve, ann ale. ” ​(Matye 26:46). Reflechi sou kran ki gen nan pawòl sa yo. Pandan li di : “ Ann ale ” a, li konnen li t apral mande foul la pou yo epaye zanmi l yo, li konnen konpayon sa yo t apral abandone l e yo t apral chape pou l yo e li konnen li t ap gen pou l al afwonte pi gwo eprèv li nan lavi a poukont li. Poukont li, li fè fas ak yon pwosè ki ilegal e ki enjis, li fè fas ak mokri, ak gwo soufrans e ak yon lanmò ki terib. Nan tout eprèv sa yo, li pa janm manke kouraj.

23. Poukisa nou ka di Jezi pa t temerè nan fason l te fè fas ak danje e nan fason l te fè fas ak menas lanmò ?

²³ Èske Jezi te temerè ? Non, temerè pa gen anyen pou l wè avèk vrè kouraj. Anfèt, Jezi te anseye moun k ap suiv li yo pou yo pran prekosyon, e avèk pridans, pou yo evite danje yon fason pou yo ka kontinye fè volonte Bondye (Matye 4:12 ; 10:16). Sepandan, nan sitiyasyon li te twouve l la, li te konnen pa t gen okenn mwayen pou l te evite l. Li te konnen sa volonte Bondye enplike. Jezi te detèmine pou l kenbe entegrite l, konsa, sèl sa l te ka fè se al afwonte eprèv la dirèkteman.

24. Poukisa nou mèt gen asirans nou ka demontre nou gen kouraj devan nenpòt eprèv ki ka rive ?

²⁴ Se pa ni de ni twa fwa, moun k ap suiv Jezi yo mache nan tras Mèt yo a avèk kouraj ! Anpil ladan yo kenbe fèm devan mokri, pèsekisyon, arestasyon, prizon, gwo soufrans e menm lanmò. Ki kote moun ki enpafè jwenn yon kouraj konsa ? Sa pa soti nan pwòp fòs pa yo. Jezi te resevwa èd ki sot nan syèl la, e se menm bagay la pou moun k ap suiv li yo tou (Filipyen 4:13). Konsa, annou pa janm pè sa demen ka pote. Annou pran detèminasyon pou nou kenbe entegrite nou, e Jewova ap ban nou kouraj nou bezwen an. Annou kontinye jwenn fòs nan egzanp Jezi, Chèf nou an, ki te di : “ Pran kouraj ! Mwen venk monn nan. ” — Jan 16:33.