“ Ale epi fè disip ”

1-3. a) Ki sa yon kiltivatè fè lè rekòt li a twòp pou l ranmase l poukont li ? b) Ki pwoblèm Jezi te rankontre nan prentan ane 33 epòk nou an, e kòman l te fè fas ak li ?

GEN yon kiltivatè ki twouve l devan yon gwo pwoblèm. Kèk mwa anvan, li te laboure jaden l e li te simen semans. Li t ap suiv avèk atansyon premye fèy yo k ap parèt, e li te rejwi pandan plant yo t ap grandi. Kounye a, tout travay di li te fè a vin rekonpanse paske moman rekòt la rive. Men, li gen yon pwoblèm : rekòt la twòp pou l ranmase l poukont li. Pou l ka rezoud pwoblèm sa a, avèk sajès, li anplwaye kèk ouvriye e li voye yo nan jaden l lan. Anfèt, tan l genyen pou l ranmase rekòt li a, ki gen anpil valè, limite.

² Nan prentan ane 33 epòk nou an, Jezi, apre l fin resisite, vin gen yon pwoblèm menm jan an. Pandan ministè l sou tè a, li te simen semans laverite a. Kounye a, gen yon rekòt pou l ranmase, e rekòt la anpil. Anpil moun ki byen reyaji bezwen pou yo rasanble yo antanke disip (Jan 4:35-38). Kòman Jezi fè fas ak pwoblèm sa a ? Yon tikras tan anvan Jezi monte nan syèl la, sou yon mòn nan Galile, li bay disip li yo lòd pou yo jwenn plis ouvriye, li di : “ Kidonk, ale epi fè disip pami moun tout nasyon. Batize yo [...]. Anseye yo pou yo obsève tout bagay mwen te kòmande nou yo. ” — Matye 28:19, 20.

³ Kòmandman sa a se pati esansyèl nan sa sa vle di pou yon moun suiv Kris toutbon. Kidonk, annou egzamine twa kesyon. Poukisa Jezi te bay kòmandman pou gen plis ouvriye ? Ki jan li te fòme disip li yo pou yo jwenn yo ? Ki jan kòmandman sa a konsène nou ?

4, 5. Poukisa Jezi pa t ap fini travay li te kòmanse a, e kiyès ki t ap gen pou kontinye travay la apre Jezi retounen nan syèl la ?

⁴ Lè Jezi te kòmanse ministè li nan ane 29 epòk nou an, li te konnen li te derape ak yon travay li pa t ap fini poukont li. Nan ti rès tan li te rete pou l pase sou tè a, te gen yon limit nan tèritwa li t ap kapab preche, e nan kantite moun li t ap ka atenn avèk mesaj Wayòm nan. Se vre, li te konsantre predikasyon l prensipalman sou Juif yo ak pwozelit yo, “ mouton mezon Izrayèl la ki pèdi yo ”. (Matye 15:24.) Sepandan, “ mouton [...] ki pèdi ” sa yo te gaye nan tout Izrayèl, yon peyi ki te gen plizyè milye kilomèt kare. Anplis de sa, rive yon lè, yo t ap gen pou yo pote bon nouvèl la sou rès tè a. — Matye 13:38 ; 24:14.

⁵ Jezi te rekonèt t apral rete anpil travay ki pou fèt apre lanmò li. Li te di 11 apot fidèl li yo : “ Vrèmanvre mwen di nou : Moun ki egzèse lafwa nan mwen, moun sa a tou pral fè travay m ap fè yo. E li pral fè travay ki pi gwo pase sa yo, paske mwen prale pou m al jwenn Papa a. ” ​(Jan 14:12). Piske Pitit Gason an t ap retounen nan syèl la, moun ki t ap suiv li yo, nonsèlman apot li yo, men tou tout lòt disip ki t ap vini alavni yo, t apral kontinye travay predikasyon an ak travay ansèyman an (Jan 17:20). Avèk imilite, Jezi te rekonèt travay yo a t ap “ pi gwo pase ” pa l la. Nan ki sans ? Sa t apral fèt nan twa fason.

6, 7. a) Nan ki sans travay disip Jezi yo t ap fè a t ap pi gwo pase travay pa l la ? b) Ki jan nou ka montre konfyans Jezi te gen nan disip li yo pa t mal plase ?

⁶ Premyèman, disip Jezi yo t ap gen pou yo preche nan plis tèritwa. Jodi a, temwayaj yo a rive atenn bout tè a, sa vle di pi lwen lontan pase fwontyè peyi kote Jezi li menm te konn preche a. Dezyèmman, disip Jezi yo t ap gen pou yo atenn plis moun. Ti kantite disip Jezi te kite dèyè l yo vin ogmante rapid pou yo vin bay plizyè milye (Travay 2:41 ; 4:4). Jodi a, yo se plizyè milyon, e gen plizyè santèn milye nouvo k ap batize chak ane. Twazyèmman, disip Jezi yo t ap gen pou yo preche pandan yon peryòd ki pi long : depi yo te kòmanse jiska jodi a, anviwon 2 000 an gentan pase apre ministè Jezi a ki te dire twazan edmi.

⁷ Jezi te eksprime konfyans li nan disip li yo lè l te di yo yo t ap gen pou yo fè “ travay ki pi gwo pase sa yo ”. Li te konfye yo travay ki te pi enpòtan pou li a, anpalan de travay predikasyon an ak travay ansèyman “ bon nouvèl wayòm Bondye a ”. (Lik 4:43.) Li te gen konviksyon yo t ap ranpli asiyasyon sa a fidèlman. Ki sa sa vle di pou nou jodi a ? Lè nou kontinye nan ministè a avèk zèl e ak tout kè nou, nou montre konfyans Jezi te gen nan disip li yo pa t mal plase. Èske se pa yon gwo onè sa ye ? — Lik 13:24.

8, 9. Ki egzanp Jezi te kite nan ministè a, e ki jan nou ka modle ministè nou dapre egzanp li ?

⁸ Jezi te bay disip li yo pi bon fòmasyon ki posib pou ministè a. Sa ki pi enpòtan an, sèke li te trase yon egzanp pafè pou yo (Lik 6:40). Nan chapit anvan an, nou te pale sou fason Jezi te konsidere ministè l. Fè yon ti reflechi pandan yon ti tan sou disip ki t ap vwayaje avèk Jezi nan toune predikasyon l yo. Yo te remake li te preche moun yo kèlkeswa kote li te ka jwenn yo, kit se arebò letan, nan mòn, nan vil, nan mache ak nan mezon prive (Matye 5:1, 2 ; Lik 5:1-3 ; 8:1 ; 19:5, 6). Yo te konn remake li travay di, li leve bonè e li dòmi ta pou l sèvi lòt moun. Ministè li se pa t yon aktivite li fè konsa konsa lè l gen tan (Lik 21:37, 38 ; Jan 5:17) ! Sandout, yo te santi sa ki motive Jezi, se te yon lanmou pwofon li te genyen pou moun. Petèt, yo te wè nan vizaj li yon reflè konpasyon li te santi nan kè l pou moun (Mak 6:34). Dapre nou menm, ki efè egzanp Jezi a te genyen sou disip li yo ? Ki efè sa t ap gen sou ou ?

⁹ Antanke moun k ap suiv Kris, nou modle ministè nou dapre egzanp li. Kidonk, nou fè tout sa nou kapab pou nou bay “ yon temwayaj afon ”. (Travay 10:42.) Menm jan ak Jezi, n al vizite moun yo lakay yo (Travay 5:42). Nou ajiste pwogram nou si sa nesesè, yon fason pou n kapab vizite moun yo nan moman li pi pwobab pou yo lakay yo. Epitou, nou chèche moun yo, e avèk tak, nou preche yo nan andwa piblik tankou nan lari, sou plas piblik, nan magazen ak kote y ap travay. Nou kontinye ‘ travay di e nou kontinye lite ’ nan ministè a, paske nou pran travay sa a oserye (1 Timote 4:10). Yon lanmou ki sensè e ki pwofon pou lòt moun motive nou pou nou kontinye chèche opòtinite pou nou preche kèlkeswa kote a e kèlkeswa lè nou ka jwenn moun. — 1 Tesalonisyen 2:8.

10-12. Ki leson enpòtan Jezi te anseye disip li yo anvan l te voye yo al preche ?

¹⁰ Yon lòt fason Jezi te fòme disip li yo, se lè li te ba yo enstriksyon detaye sou jan pou yo akonpli ministè yo. Anvan Jezi te voye 12 apot yo toudabò, e annapre 70 disip yo, li te fè kèk seyans fòmasyon avèk yo (Matye 10:1-15 ; Lik 10:1-12). Fòmasyon an te bay bon rezilta, paske Lik 10:17 rapòte : “ Swasanndis disip yo te retounen avèk kè kontan. ” Annou reflechi sou de nan leson enpòtan Jezi te anseye yo, toutpandan n ap sonje, nou dwe konprann pawòl li yo nan kontèks koutim juif yo nan tan biblik yo.

¹¹ Jezi te anseye disip li yo pou yo fè Jewova konfyans. Li te di yo : “ Pa pran ni lò, ni ajan, ni kuiv pou bous ki nan senti nou, ni sak pou pwovizyon pou vwayaj la, ni de rad pa anndan, ni sandal, ni baton, paske ouvriye a merite manje l. ” ​(Matye 10:9, 10). Vwayajè yo te abitye mache ak yon bous nan senti yo pou yo met lajan, yon sak pou pwovizyon, ak yon pè sandal anplisa. Lè Jezi te di disip li yo pou yo pa enkyete yo konsènan bagay sa yo, anfèt, se di l te di yo : “ Mete tout konfyans nou nan Jewova, paske l ap ban nou sa nou bezwen. ” Jewova t apral pran swen yo lè li pouse moun ki t apral aksepte bon nouvèl la ofri yo ospitalite, bagay yo te abitye fè ann Izrayèl. — Lik 22:35.

¹² Epitou, Jezi te anseye disip li yo pou yo evite distraksyon ki pa nesesè. Li te di yo : “ Pa bay pèsonn akolad sou wout la. ” ​(Lik 10:4). Èske Jezi te vle di disip li yo pou yo frèt oswa pou yo endiferan ak moun ? Non, pa ditou. Nan tan biblik yo, byen souvan, salye moun te konn enplike plis pase di moun nan yon senp bonjou. Salitasyon kouran yo te gen ladan yo divès fòmalite ansanm ak konvèsasyon ki byen long. Gen yon biblis ki di : “ Salitasyon pami moun ann Oryan yo pa t fèt tankou sa fèt pami nou avèk yon senp ti panche annavan, oswa yon senp lanmen, men yo te konn bay yon pakèt akolad, yo te konn panche tèt yo ak kò yo annavan, e yo te konn menm pwostène jiska tè. Tout bagay sa yo te konn mande anpil tan. ” Lè Jezi te di disip li yo pou yo pa antre nan fè salitasyon jan yo abitye fè l la, nan yon sans, Jezi te di yo : “ Nou dwe sèvi ak tan nou fason ki pi efikas la, paske mesaj nou pote a se yon mesaj ki ijan. ”b

13. Ki fason nou ka demontre nou suiv enstriksyon Jezi te bay disip li yo nan premye syèk la ?

¹³ Nou suiv enstriksyon Jezi te bay disip li yo nan premye syèk la. Etan n ap akonpli ministè nou, nou mete tout konfyans nou nan Jewova (Pwovèb 3:5, 6). Nou konnen n ap toujou jwenn nesesite lavi a si nou “ kontinye chèche wayòm nan [...] an premye ”. (Matye 6:33.) Nan lemonnantye, moun k ap preche Wayòm nan aplentan yo kapab temwaye sa : menm nan moman ki difisil, men Jewova pa janm twò kout (Sòm 37:25). Nou rekonèt tou nesesite pou nou evite distrè. Si nou pa fè atansyon, sistèm sa a ka distrè nou byen fasil (Lik 21:34-36). Sepandan, se pa lemoman pou nou distrè. Piske gen vi ki an danje, mesaj nou an ijan (Women 10:13-15). Lè nou toujou kenbe nan kè nou nesesite pou nou aji avèk dilijans, sa ap anpeche nou kite distraksyon ki gen nan monn sa a pran tan ak enèji nou ta ka pi byen itilize si nou te pase yo nan ministè a. Pa bliye, tan ki rete a kout e rekòt la anpil. — Matye 9:37, 38.

14. Ki sa ki montre kòmandman ki rapòte nan Matye 28:18-20 an aplike pou tout moun k ap suiv Kris ? (Gade nòt anba paj la tou.)

¹⁴ Lè Jezi, ki resisite, te di : “ Ale epi fè disip ”, li te mete yon responsablite ki lou sou do moun k ap suiv li yo. Li pa t ap panse sèlman ak disip li yo ki te prezan nan jou prentan sa a sou mòn nan nan Galilec. Travay li te kòmande a mande pou yo atenn “ moun tout nasyon ”, e se yon travay ki kontinye “ jis nan konklizyon sistèm de choz la ”. Sa klè, kòmandman sa a aplike pou tout moun k ap suiv Kris, san wete nou menm jodi a. Annou pi byen egzamine pawòl Jezi yo ki rapòte nan Matye 28:18-20.

15. Poukisa li saj pou nou obeyi kòmandman Jezi te bay pou moun fè disip la ?

¹⁵ Anvan Jezi te bay kòmandman an, li te di : “ Mwen resevwa tout pouvwa ni nan syèl la ni sou tè a. ” ​(Vèsè 18). Èske toutbonvre Jezi gen yon gwo pouvwa konsa ? Wi, se sèten ! Se li ki akanj lan, kote l ap kòmande dè e dè miryad zanj (1 Tesalonisyen 4:16 ; Revelasyon 12:7). Antanke “ chèf kongregasyon an ”, li gen otorite sou moun k ap suiv li yo sou tè a (Efezyen 5:23). Depi 1914, l ap dirije nan syèl la antanke Wa mesyanik (Revelasyon 11:15). Pouvwa l rive jis nan tonm, piske l gen pouvwa pou l resisite mò (Jan 5:26-28). Lè Jezi pale an premye de kokenn pouvwa l genyen an, li fè konnen pawòl li di annapre yo, se pa yon sijesyon, men se yon lòd. N ap montre nou saj lè nou obeyi, paske pouvwa l genyen an se pa li menm ki te bay tèt li l, men se Bondye ki te ba li l. — 1 Korentyen 15:27.

16. Lè Jezi di nou “ ale ” a, ki sa l mande nou pou nou fè, e ki jan nou akonpli aspè sa a nan kòmandman l bay la ?

¹⁶ Kounye a, Jezi bay lòd la, ki kòmanse avèk yon senp mo : “ Ale. ” ​(Vèsè 19). Donk, li ban nou lòd pou nou pran inisyativ pou nou atenn lòt moun avèk mesaj Wayòm nan. Etan n ap akonpli aspè sa a nan lòd la, nou kapab sèvi ak divès metòd. Predikasyon kay an kay se fason ki pi efikas pou nou kontakte moun yo pèsonèlman (Travay 20:20). Nou chèche opòtinite tou pou nou bay temwayaj enfòmèl. Nan lavi n ap mennen chak jou, nou chofe pou nou kòmanse yon konvèsasyon sou bon nouvèl la nenpòt kote ki apwopriye. Fason n ap preche a ka chanje, li ka adapte avèk bezwen ak sitiyasyon ki nan zòn nan. Sepandan, gen yon bagay ki pa chanje : Nou “ ale ” e nou chèche moun ki diy yo. — Matye 10:11.

17. Ki jan nou “ fè disip ” ?

¹⁷ Apre sa, Jezi esplike objektif kòmandman l bay la se “ fè disip pami moun tout nasyon ”. (Vèsè 19.) Ki jan nou “ fè disip ” ? Esansyèlman, yon disip se yon moun k ap aprann, yon moun yo anseye. Sepandan, fè disip, se pa sèlman bay lòt moun konesans. Lè n ap etidye Labib avèk moun ki enterese yo, objektif nou se ede yo vin tounen moun k ap suiv Kris. Depi sa posib, nou atire atansyon etidyan nou yo sou egzanp Jezi kite, yon fason pou yo aprann vire gade bò kote l kòm Anseyan yo, kòm Modèl yo. Y ap viv jan l te konn viv, e y ap fè travay li te konn fè. — Jan 13:15.

18. Poukisa batèm nan se evènman ki pi enpòtan nan lavi yon disip ?

¹⁸ Nou jwenn yon pati esansyèl nan kòmandman an nan pawòl sa yo ki di : “ Batize yo nan non Papa a, nan non Pitit la e nan non lespri sen an. ” ​(Vèsè 19). Batèm se evènman ki pi enpòtan nan lavi yon disip, paske se yon siy apwopriye ki fè konnen moun ki batize a vwe lavi l bay Bondye ak tout kè l. Kidonk, batèm esansyèl pou nou sove (1 Pyè 3:21). Wi, lè disip ki batize a kontinye fè tout sa l kapab nan sèvis Jewova, li kapab anvizaje jwenn benediksyon san fen nan monn nouvo k ap vini an. Èske w deja ede yon moun pou l vin yon disip Kris ki batize ? Se bagay ki bay plis kè kontan nan ministè kretyen an. — 3 Jan 4.

19. Ki sa nou anseye nouvo yo, e poukisa ansèyman an ka kontinye apre yo fin batize ?

¹⁹ Jezi esplike lòt pati kòmandman an, lè l di : “ Anseye yo pou yo obsève tout bagay mwen te kòmande nou yo. ” ​(Vèsè 20). Nou anseye nouvo yo pou yo koute kòmandman Jezi yo, san wete kòmandman pou yo renmen Bondye, pou yo renmen pwochen yo, e pou yo fè disip (Matye 22:37-39). Nou anseye yo tikras pa tikras pou yo aprann esplike verite ki nan Bib la e pou yo defann lafwa yo k ap ogmante. Lè yo kalifye pou yo patisipe nan aktivite predikasyon an piblik la, nou travay ansanm avèk yo. Ni nan pawòl nou, ni nan egzanp nou bay, nou anseye yo fason yo kapab gen yon patisipasyon nan travay sa a ki pote bon rezilta. Ansèyman n ap bay nouvo disip yo gendwa poko fini lè yo batize. Moun ki fèk batize yo gendwa bezwen enstriksyon anplis k ap ede yo fè fas ak difikilte ki gen nan suiv Kris. — Lik 9:23, 24.

20, 21. a) Etan n ap obeyi kòmandman Jezi a, poukisa nou pa gen rezon pou nou pè ? b) Poukisa se pa moman pou nou ralanti, e ki ta dwe detèminasyon nou ?

²⁰ Dènye pawòl nan kòmandman Jezi a rasire nou anpil. Men sa l di : “ Gade, mwen avèk nou toule jou jis nan konklizyon sistèm de choz la. ” ​(Matye 28:20). Jezi rekonèt asiyasyon sa a se yon asiyasyon ki lou. Li konnen tou pafwa etan n ap ranpli asiyasyon sa a, nou ka jwenn reyaksyon ostil nan men opozan yo (Lik 21:12). Sepandan, pa gen okenn rezon pou nou pè. Chèf nou an pa atann pou nou ranpli asiyasyon sa a poukont nou, san èd pèsonn. Èske li pa rekonfòtan pou nou konnen Sila a ki gen “ tout otorite ni nan syèl la ni sou tè a ” la ansanm avèk nou pou l soutni nou etan n ap obeyi kòmandman sa a ?

²¹ Jezi asire disip li yo l ap ansanm avèk yo nan ministè yo a pandan plizyè syèk jis nan “ konklizyon sistèm de choz la ”. Jiskaske lafen an vini, nou dwe kontinye ranpli misyon Jezi ban n akonpli a. Kounye a se pa moman pou n ap ralanti. Gen yon kokenn rekòt espirityèl k ap fèt ! Moun ki byen reyaji yo ap rasanble an gran kantite. Antanke moun k ap suiv Kris, annou detèmine pou nou ranpli misyon lou yo konfye nou an. Annou pran rezolisyon pou nou bay tan nou, enèji nou ak resous nou pou nou obeyi kòmandman Kris la ki di : “ Ale epi fè disip. ”