LESON 32

Wayòm Bondye a deja ap dirije!

Édition imprimée

Wayòm Bondye a kòmanse dirije nan syèl la an 1914. E se nan menm ane sa a dènye jou gouvènman lèzòm yo te kòmanse. Ki jan nou fè konn sa? Ann egzamine kèk pwofesi nan Bib la e ann egzamine fason monn nan ye ak fason moun yo ye depi 1914.

1. Ki sa pwofesi ki nan Bib la aprann nou?

Liv Dànyèl la ki nan Bib la fè konnen Wayòm Bondye a t ap kòmanse dirije nan fen yon peryòd ki rele “sèt tan”. (Dànyèl 4:16, 17). Plizyè syèk apre sa, Jezi te pale de menm peryòd sa a kòm “tan ki fikse pou nasyon yo”, e li te fè konnen li poko fini (Lik 21:24). Jan nou pral wè sa, sèt tan sa yo te fini nan ane 1914.

2. Ki jan monn nan ye e ki jan moun yo ye depi 1914?

Men sa disip Jezi yo te mande Jezi: “Ki siy k ap siy prezans ou e k ap siy fen sistèm nan?” (Matye 24:3). Pou Jezi te reponn yo, li te anonse plizyè bagay ki t apral fèt lè l kòmanse dirije antanke Wa nan Wayòm Bondye a ki nan syèl la. Pami bagay sa yo t ap gen lagè, rate manje ak tranblemanntè. (Li Matye 24:7.) Mete sou sa, Bib la te anonse fason moun yo t ap ye nan “dènye jou yo” ki t ap fè tan yo “difisil pou moun sipòte”. (2 Timote 3:1-5.) Se sitou depi 1914 nou ka wè monn nan ak moun yo vin konsa.

3. Poukisa bagay yo vin difisil konsa nan monn nan depi lè Wayòm Bondye a kòmanse dirije?

Yon ti tan apre Jezi fin Wa nan Wayòm Bondye a, li fè lagè nan syèl la ak Satan ak demon yo. Satan pèdi gè a. Bib la fè konnen “yo pimpe l sou tè a, e yo pimpe zanj li yo sou tè a avèk li”. (Revelasyon 12:9, 10, 12.) Satan fache anpil paske li konnen yo pral detwi l. Se sa k fè, li lakòz gen anpil pwoblèm ak anpil soufrans sou tout tè a. Sa fè nou konprann poukisa bagay yo difisil konsa nan monn nan. Wayòm Bondye a pral rezoud tout pwoblèm sa yo.

FOUYE PLIS

Gade ki jan nou rive konnen Wayòm nan te kòmanse dirije an 1914 e gade ki efè sa ta dwe gen sou nou.

4. Kalkil dat sou sa Bib la te anonse montre Wayòm Bondye a kòmanse dirije an 1914

Gade VIDEYO a.

VIDEYO: Wayòm Bondye a kòmanse dirije an 1914 (5:02)

Bondye te fè Nebikadneza, wa nan Babilòn nan tan lontan an, fè yon rèv kote l te montre l sa k t apral pase alavni. Rèv sa a ak esplikasyon Dànyèl te bay sou li montre li gen rapò ni ak rèy Nebikadneza a ni ak Wayòm Bondye a. Li Dànyèl 4:17a.

Li Dànyèl 4:20-26, epi sèvi ak tablo a pou w reponn kesyon ki vin apre yo:

A) Ki sa Nebikadneza te wè nan rèv li a? — Gade vèsè 20 ak 21.
B) Ki sa k t ap gen pou rive pyebwa a? — Gade vèsè 23.
C) Ki sa k t ap gen pou rive nan fen “sèt tan” yo? — Gade vèsè 26.

Rapò rèv sou pyebwa a genyen ak Wayòm Bondye a

PWOFESI A (Dànyèl 4:20-36)

Dominasyon

A) Yon gwo pyebwa

Yo kanpe dominasyon an

B) “Koupe pyebwa a”, epi kite “sèt tan pase”

Chouk yon pyebwa yo sèke ak fè e ak kuiv.

Dominasyon an rekòmanse

C) “W ap rejwenn wayòm ou an ankò”

Premye fwa pwofesi sa a te akonpli...

D) Kiyès pyebwa a te reprezante? — Gade vèsè 22.
E) Ki jan dominasyon l lan te kanpe? — Li Dànyèl 4:29-33.
F) Ki sa k te rive Nebikadneza nan fen “sèt tan” yo? — Li Dànyèl 4:34-36.

PREMYE FWA PWOFESI A TE AKONPLI

Dominasyon

D) Nebikadneza, wa Babilòn

Wa Nebikadneza ki kanpe yon fason ki montre li gen ògèy.

Yo kanpe dominasyon an

E) Apre 606 anvan epòk nou an, Nebikadneza te pèdi tèt li e li te vin pa kapab dirije pandan sèt ane

Nebikadneza ki bese atè k ap manje zèb tankou yon bèt.

Dominasyon an rekòmanse

F) Nebikadneza retounen nan nòmal li e li rekòmanse dirije

Wa Nebikadneza ki kanpe ak de men l anlè.

Dezyèm fwa pwofesi sa a te akonpli...

G) Kiyès pyebwa a te reprezante? — Li 1 Kwonik 29:23.
H) Ki jan dominasyon yo a te kanpe? Ki jan nou fè konnen dominasyon sa a te kanpe toujou pandan Jezi te sou tè a? — Li Lik 21:24.
I) Ki lè e ki kote dominasyon sa a te rekòmanse?

DEZYÈM FWA PWOFESI SA A TE AKONPLI

Dominasyon

G) Wa Izrayèl ki te reprezante dominasyon Bondye yo

Plizyè wa izrayelit ki vin youn apre lòt ki chita sou twòn. Reyon limyè klere sou yo.

Yo kanpe dominasyon an

H) Yo detwi Jerizalèm. Wa ki te konn dirije ann Izrayèl yo te sispann dirije pandan 2520 an

Yon dife ki detwi vil Jerizalèm tan lontan an nan ane 607 anvan epòk nou an. 2520 an pase apre sa.

Dominasyon an rekòmanse

I) Jezi kòmanse dirije nan syèl la antanke Wa nan Wayòm Bondye a

Jezi k ap dirije tè a detan l chita sou twòn li nan syèl la an 1914. Gen reyon limyè k ap sot sou li.

Konbyen tan sèt tan yo dire?

Yon pati nan Bib la ede nou konprann yon lòt pati. Pa egzanp, liv Revelasyon an fè konnen twa tan edmi egal 1 260 jou (Revelasyon 12:6, 14). Sèt tan egal de fwa twa tan edmi, sa vle di 2 520 jou. Pafwa, yon jou reprezante yon ane nan Bib la (Ezekyèl 4:6). E se sa k rive nan pwofesi ki nan liv Dànyèl la konsènan sèt tan yo. Yo reprezante 2 520 ane.

5. Monn nan chanje depi 1914

Gade VIDEYO a.

VIDEYO: Monn nan chanje depi 1914 (1:10)

Jezi te anonse jan monn nan t ap ye lè l fin Wa. Li Lik 21:9-11, epi reponn kesyon sa a:

Kiyès nan bagay sa yo ou wè ki rive oubyen ou tande ki rive?

Apot Pòl te fè konnen fason moun yo t ap ye nan dènye jou dominasyon lèzòm nan. Li 2 Timote 3:1-5, epi reponn kesyon sa a:

Èske w wè moun yo konsa jodi a?

Foto ki ansanm: Foto ki montre fason monn nan t ap ye ak fason moun yo t ap ye nan dènye jou yo. 1. Yon chèf militè ki sou yon estrad ki leve men l e k ap pale byen fò. 2. Yon seri bilding ki kraze apre yon tranblemanntè. 3. Avyon degè. 4. Yon seri moun ki gen kach nen nan figi yo k ap mache nan lari. 5. Tou jimèl nan Nouyòk yo k ap pran dife apre atak teworis la. 6. Yon mesye k ap pran dwòg. 7. Yon mari k ap rele sou madanm li e ki leve pwen l pou l bat li. 8. Plizyè kalite dwòg ak bwason ki gen alkòl. 9. De medam ki gen rad alamòd ak bijou sou yo k ap fè yon sèlfi. 10. Yon didje ki devan yon foul moun nan yon konsè. 11. Yon moun ki nan yon manifestasyon ki pral voye yon kòktèl moloktòv.

6. Montre w kwè Wayòm Bondye a ap dirije kounye a

Li Matye 24:3, 14, epi reponn kesyon sa yo:

Ki travay enpòtan ki montre Wayòm Bondye a ap dirije kounye a?
Ki jan w ka patisipe nan travay sa a?

Wayòm Bondye a ap dirije kounye a, e jou kote l pral pran kontwòl tè a nèt la prèske rive. Li Ebre 10:24, 25, epi reponn kesyon sa a:

Ki sa nou chak ta dwe fè tank “nou wè se pwoche jou a ap pwoche”?

Foto ki ansanm: 1. Yon etidyan Labib k ap asiste yon reyinyon Temwen Jewova yo. 2. Menm etidyan sa a k ap preche yon moun li konnen. — Ki sa w t ap fè si w ta konn yon bagay ki ka ede lòt moun e ki ka sove lavi yo?

SI YON MOUN TA MANDE W: “Sa k fè Temwen Jewova yo pale de 1914 konsa?”

Ki sa w t ap reponn?

SA W TE APRANN

Pwofesi nan Bib la, kalkil dat ak fason monn nan ye montre Wayòm Bondye a deja ap dirije. Nou montre nou kwè sa lè nou preche konsènan Wayòm Bondye a ak lè nou asiste reyinyon yo.