“ Suiv mwen ” — Ki sa Jezi te vle di ?

1, 2. Ki pi bèl envitasyon yon imen te ka resevwa, e ki kesyon nou ta dwe poze tèt nou ?

KI PI bèl envitasyon ou te janm resevwa ? Sa ki vin nan lespri w, gendwa se moman kote yo te envite w asiste yon evènman espesyal, tankou maryaj de moun ki chè pou ou. Oswa ou ka raple w jou yo te envite w patisipe nan yon travay ki enpòtan. Si w te jwenn envitasyon konsa, sandout ou te santi w trè kontan, e ou te menm konsidere sa tankou yon onè. Men alaverite, ou resevwa yon envitasyon ki pi bèl lontan. Nou chak, nou resevwa l. E fason nou chwazi reponn envitasyon sa a gen yon gwo efè sou nou. Se chwa ki pi enpòtan n ap fè nan lavi a.

² De ki envitasyon n ap pale la a ? Se yon envitasyon Jezi Kris fè, li menm ki se sèl Pitit Gason Jewova, Bondye Toupisan an, e yo pale de envitasyon sa a nan Bib la. Nan Mak 10:21, nou li pawòl sa yo Jezi te di : “ Vin suiv mwen. ” Anfèt, se nou chak Jezi fè envitasyon sa a. Li bon pou nou mande tèt nou : ‘ Ki jan m ap reponn envitasyon sa a ? ’ Repons kesyon an ka parèt evidan. Kiyès ki pou ta refize yon si bèl envitasyon ? Se etonan, men pifò moun refize. Poukisa ?

3, 4. a) Ki bagay moun ka anvye mesye ki te pwoche bò kote Jezi pou l poze l kesyon sou lavi etènèl la te genyen ? b) Ki bèl kalite Jezi kapab te wè lakay jèn chèf rich la ?

³ Reflechi sou egzanp yon mesye ki te resevwa envitasyon sa a dirèkteman nan men Jezi sa gen anviwon 2 000 an. Mesye sa a te yon moun yo respekte anpil. Li te gen omwen twa bagay lèzòm gen tandans konsidere kòm bagay moun ta renmen genyen, kòm bagay moun ka menm anvye : jenès, richès ak pouvwa. Labib dekri l kòm yon “ jennonm ”, kòm yon moun ki “ trè rich ” e kòm yon “ chèf ”. (Matye 19:20 ; Lik 18:18, 23.) Sepandan, jennonm sa a te gen yon kalite ki te pi enpòtan toujou. Li te tande pale de Jezi, Gran Anseyan an, e li te renmen sa l te tande a.

⁴ Pifò chèf nan jou sa yo pa t bay Jezi respè li te merite a (Jan 7:48 ; 12:42). Men, chèf sa a te aji yon lòt jan. Men sa Bib la di nou : “ Pandan [Jezi] t ap soti pou l al sou wout li, yon sèten mesye kouri e l tonbe ajenou devan l e li poze l kesyon sa a : ‘ Bon Anseyan, ki sa m dwe fè pou m eritye lavi etènèl ? ’ ” ​(Mak 10:17). N ap remake ki jan mesye sa a te chofe pou l pale avèk Jezi : li kouri al jwenn li an piblik, menm jan nenpòt moun ki pòv, ki pa gen gwo pozisyon nan sosyete a, ta ka fè. Anplis de sa, avèk respè, li met ajenou devan Kris. Donk, nan yon sèten degre, li te gen imilite lakay li, e li te konsyan li pòv espirityèlman. Jezi te bay bèl kalite sa yo enpòtans (Matye 5:3 ; 18:4). Konsa, se pa etonan pou “ Jezi gade l e li santi l gen lanmou pou li ”. (Mak 10:21.) Men, ki jan Jezi te reponn kesyon jennonm nan ?

 5. Ki jan Jezi te reponn jennonm rich la, e ki jan nou fè konnen se pa t povrete ki te “ yon bagay ” li te manke a ? (Gade nòt anba paj la tou.)

⁵ Jezi fè konnen Papa l te deja bay enfòmasyon sou kesyon esansyèl sa a anrapò ak jwenn lavi etènèl la. Li fè referans ak Ekriti yo, e jennonm nan di li obeyi Lwa Moyiz la fidèlman. Sepandan, Jezi, ki gen yon klèvwayans estrawòdinè, te wè yon bagay ki pi pwofon (Jan 2:25). Li te santi chèf sa a gen yon pwoblèm espirityèl grav. Kidonk, Jezi di : “ Gen yon bagay ou manke. ” Ki “ yon bagay ” sa a ? Jezi di : “ Ale, vann tout sa w genyen, e bay pòv yo. ” ​(Mak 10:21). Èske Jezi te vle di fòk yon moun pa gen lajan ditou pou l sèvi Bondye ? Nona. Kris t ap revele yon bagay ki gen yon gwo enpòtans.

 6. Ki envitasyon Jezi te fè, e ki sa reyaksyon jèn chèf rich la revele sou eta kè l ?

⁶ Pou Jezi eklèsi sa k te manke a, li ofri mesye a yon bèl opòtinite. Li di l : “ Vin suiv mwen. ” Imajine sa : Pitit Gason Bondye Trèwo a envite mesye a dirèkteman pou l suiv li ! Epitou, Jezi pwomèt li yon rekonpans ki depase sa nou ka imajine. Li di : “ W ap gen yon trezò nan syèl la. ” Èske jèn chèf rich la te tou aksepte opòtinite sa a, envitasyon glorye sa a ? Men sa istwa a rapòte : “ Pawòl sa a fè l chagren e li ale tou tris, paske li te gen anpil byen. ” ​(Mak 10:21, 22). Konsa, pawòl sanzatann sa yo Jezi te di a te revele yon pwoblèm ki genyen nan kè mesye sa a. Li te twò atache ak byen l yo e, sandout, li te twò atache ak pouvwa e ak prestij ki mache avèk yo. Malerezman, lanmou li te genyen pou bagay sa yo te depase lontan kèlkeswa lanmou li te genyen pou Kris. Donk, “ yon bagay ” li te manke a, se te yon lanmou sensè pou Jewova ak Jezi Kris, yon lanmou ki makònen ak espri sakrifis. Piske jennonm nan pa t gen yon lanmou konsa, li te refize envitasyon eksepsyonèl sa a. Men, nan ki sans sa konsène w ?

 7. Poukisa nou mèt sèten envitasyon Jezi a konsène nou jodi a ?

⁷ Envitasyon Jezi a pa t pou mesye sa a sèlman, ni nonplis li pa t rezève sèlman pou kèk moun. Jezi te di : “ Si yon moun vle suiv mwen, se pou l [...] suiv mwen nètale. ” ​(Lik 9:23). N ap remake yo di “ yon moun ”, kidonk nenpòt moun ka suiv Kris si li vrèman “ vle ”. Bondye atire moun sensè sa yo vin jwenn Pitit Gason l lan (Jan 6:44). Se pa moun rich sèlman, se pa moun pòv sèlman, se pa moun ki nan yon sèten ras oswa yon sèten nasyon sèlman, e se pa moun ki t ap viv nan epòk sa a sèlman, men se tout moun yo ofri opòtinite pou yo aksepte envitasyon Jezi a. Konsa, pawòl Jezi ki di “ vin suiv mwen ” an vrèman aplike nan ka pa w. Men, poukisa ou dwe anvi suiv Kris ? E ki sa sa enplike anfèt ?

 8. Ki bezwen tout moun genyen, e poukisa ?

⁸ Gen yon verite nou dwe rekonèt : nou gen yon bezwen fondamantal pou nou jwenn bon dirijan. Se pa tout moun ki admèt nesesite sa a, men sa pa anpeche li la. Jewova te enspire yon pwofèt li, Jeremi, pou l ekri verite etènèl sa a : “ Mwen byen konnen, o Jewova, lòm ki fèt ak tè, wout li pa nan men l. Sa pa nan men lòm k ap mache pou l dirije pa l. ” ​(Jeremi 10:23). Lèzòm pa gen ni kapasite, ni dwa pou yo gouvène tèt yo. Vrèmanvre, pifò pati nan istwa limanite ranpli ak move dirijan (Eklezyas 8:9). Nan epòk Jezi te sou tè a, dirijan yo te konn toupizi moun, yo te konn fè yo abi, e yo te konn twonpe yo. Jezi te dekri sitiyasyon pèp la avèk presizyon, li te fè konnen moun yo “ tankou mouton ki san bèje ”. (Mak 6:34.) Limanite nan menm sitiyasyon an jodi a. Kit ou pran nou antanke gwoup, kit ou pran nou chak apa, nou bezwen dirijan nou ka fè konfyans e nou ka respekte. Èske Jezi ranpli kondisyon sa a ? Annou reflechi sou plizyè rezon ki fè repons lan se wi.

 9. Ki sa ki distenge Jezi parapò ak tout lòt dirijan ?

⁹ Premyèman, se Jewova Dye ki te chwazi Jezi. Pifò dirijan imen yo, se lèzòm enpafè parèy yo ki chwazi yo, e byen souvan moun sa yo ki chwazi yo a konn twonpe yo e yo gen tandans fè erè jijman. Jezi se yon dirijan ki diferan. Depi nan tit li pote a nou wè sa. Mo “ Kris ” la, tankou mo “ Mesi ” a, siyifi “ Wen ”. Annefè, se Souvren Seyè linivè a menm ki te wenn Jezi, sa vle di ki te nome l espesyalman nan pozisyon sakre l la. Men sa Jewova Dye te di konsènan Pitit Gason l lan : “ Gade ! Sèvitè m nan, li menm mwen chwazi a, byenneme m nan, li menm nanm mwen pran plezi nan li a ! M ap mete lespri m sou li. ” ​(Matye 12:18). Pa gen moun ki pi byen konnen pase Kreyatè nou an ki kalite dirijan nou bezwen. Sajès Jewova san limit, donk nou gen yon pakèt rezon pou nou gen konfyans nan chwa li fè a. — Pwovèb 3:5, 6.

10. Poukisa egzanp Jezi se pi bon egzanp pou lèzòm suiv ?

¹⁰ Dezyèmman, Jezi kite yon egzanp pafè pou nou, yon egzanp ki motive nou. Pi bon dirijan an gen kalite moun l ap dirije yo ka admire e yo ka imite. Li dirije grasa egzanp li bay e li motive yo yon fason pou yo vin pi bon moun. Ki kalite ou ta plis respekte lakay yon dirijan ? Kouraj li ? Sajès li ? Konpasyon l ? Pèseverans li devan pwoblèm ? Etan w ap etidye istwa lavi Jezi sou tè a, w ap rann ou kont li te gen kalite sa yo, san konte lòt ankò. Jezi se reflè pafè Papa li ki nan syèl la, konsa, li posede chak kalite Bondye genyen, yon fason pafè. Li te vrèman yon moun ki pafè nèt. Kidonk, nan tout sa li te fè, nan chak pawòl li te pwononse, nan chak santiman li te devwale, nou jwenn yon bagay ki merite pou nou imite. Labib di li kite “ yon modèl pou nou, pou nou ka suiv tras li fidèlman ”. — 1 Pyè 2:21.

11. Ki jan Jezi te pwouve li se “ ekselan bèje a ” ?

¹¹ Twazyèmman, Kris te vrèman viv ann amoni ak pawòl sa yo li te di : “ Mwen se ekselan bèje a. ” ​(Jan 10:14). Li te fasil pou moun ki t ap viv nan tan biblik yo konprann egzanp sa a. Bèje yo te konn travay di pou yo pran swen mouton ki sou kont yo. Yon “ ekselan bèje ” t ap mete sekirite ak byennèt twoupo a anvan sekirite ak byennèt pa l. Pa egzanp, David, yon zansèt Jezi, te yon bèje depi l te tou piti, e nan plizyè okazyon, li te riske lavi l pou l repouse atak yon bèt sovaj mechan sou mouton l yo (1 Samyèl 17:34-36). Jezi li menm al pi lwen toujou : li bay vi l pou moun ki suiv li (Jan 10:15). Konbyen dirijan ki gen yon espri sakrifis konsa ?

12, 13. a) Nan ki sans yon bèje konnen mouton l yo, e nan ki sans yo konnen l ? b) Poukisa w vle pou se Ekselan Bèje a ki dirije w ?

¹² Jezi se te “ ekselan bèje a ” nan yon lòt sans ankò. Li te di : “ Mwen konnen mouton m yo e mouton m yo konnen m. ” ​(Jan 10:14). Reflechi sou pawòl sa yo Jezi te di la a. Pou yon obsèvatè ki pa fè atansyon, yon twoupo mouton gendwa annik sanble ak yon pil bèt ki plen plim sou kò yo. Sepandan, bèje a konnen chak mouton youn pa youn. Li konnen ki femèl mouton ki pral bezwen èd li talè konsa lè yo pral met ba, ki ti mouton ki bezwen yo pote yo toujou paske yo twò piti e yo twò fèb pou yo mache lontan poukont yo, e li konnen ki mouton ki te malad oswa ki te blese sa pa gen twò lontan. Menm jan an tou, mouton yo konnen bèje yo a. Yo rekonèt vwa l, yo pa janm pran vwa l pou vwa yon lòt bèje. Lè yo detekte nan ton vwa bèje a gen yon danje oswa gen yon ijans, yo reyaji byen vit. Kote l mennen yo, yo suiv li. E li konnen egzakteman ki kote pou l mennen yo. Li konnen ki kote ki chaje ak zèb vèt, ki kote kouran dlo yo fre e yo klè, e ki kote yo ka manje san yo pa an danje. Toutpandan l ap veye sou mouton yo, yo santi yo an sekirite. — Sòm 23.

¹³ Èske w pa swaf yon dirijan konsa ? Ekselan Bèje a gen yon repitasyon enkonparab kòm moun ki trete moun k ap suiv li yo egzakteman konsa. Li pwomèt l ap gide w pou w ka viv ak kè kontan, pou vi w gen yon sans depi kounye a e pou toutan gen tan (Jan 10:10, 11 ; Revelasyon 7:16, 17) ! Donk, nou bezwen konnen egzakteman sa sa enplike pou nou suiv Kris.

14, 15. Pou nou ka suiv Kris, poukisa sa pa sifi pou nou deklare nou se kretyen oswa pou nou santi nou gen yon gwo atachman pou Jezi ?

¹⁴ Jodi a, plizyè santèn milyon moun kwè yo aksepte envitasyon Kris la. Anfèt, yo chwazi pou yo rele tèt yo kretyen. Petèt yo fè pati legliz kote paran yo te batize yo, oswa yo santi yo gen yon gwo atachman pou Jezi e yo aksepte l kòm Sovè pèsonèl yo. Men, èske sa fè yo se moun k ap suiv Kris pou otan ? Èske se sa Jezi te gen nan tèt li lè l te envite nou pou nou vin suiv li ? Sa mande plis pase sa.

¹⁵ Reflechi sou pati nan monn nan kote se lakretyente k ap domine, anpalan de nasyon kote pifò sitwayen ki ladan yo deklare y ap suiv Kris. Èske lakretyente reflete ansèyman Jezi Kris yo ? Oswa, èske nan peyi sa yo, okontrè se lahèn, kraze zo, krim ak enjistis nou wè, bagay ki sanble anpil ak sa nou jwenn nan rès monn nan ? Mohandas Gandhi, yon dirijan endou yo respekte, te di yon lè : “ Mwen pa konnen okenn moun ki fè plis pou limanite pase Jezi. Annefè, Krisyanis la pa gen anyen ki mal ladan l. ” Li ajoute : “ Pwoblèm nan se avèk nou menm kretyen. Nou poko kòmanse viv ann akò ak sa n ap anseye yo. ”

16, 17. Byen souvan, ki sa ki manke lakay moun ki di yo se kretyen yo, e ki sa ki distenge moun k ap suiv Kris toutbonvre yo ?

¹⁶ Jezi te di konsènan moun ki vrèman ap suiv li yo, se pa sèlman pawòl yo oswa yon etikèt yo bay tèt yo ki t ap pèmèt moun rekonèt yo, men, se sitou aksyon yo poze. Pa egzanp, li te di : “ Se pa tout moun k ap di m : ‘ Seyè, Seyè ’, k ap antre nan wayòm syèl la, men se moun ki fè volonte Papa m ki nan syèl la. ” ​(Matye 7:21). Poukisa yon pakèt moun konsa, ki deklare Jezi se Seyè yo, pa fè volonte Papa l ? Sonje jèn chèf rich la. Byen souvan, ‘ gen yon bagay ki manke ’ pami moun ki di yo se kretyen yo : yon lanmou sensè pou Jezi ak Sila ki te voye l la.

¹⁷ Kòman sa fè posib ? Èske plizyè milyon moun ki rele tèt yo kretyen yo pa deklare tou yo renmen Kris ? Sandout. Men, lanmou pou Jezi e pou Jewova mande plis pase pawòl nan bouch. Jezi te di : “ Si yon moun renmen m, l ap obsève pawòl mwen. ” ​(Jan 14:23). E yon lòt fwa, li t ap pale antanke bèje, li te di : “ Mouton m yo koute vwa m, e mwen konnen yo, e yo suiv mwen. ” ​(Jan 10:27). Wi, vrè prèv ki demontre lanmou nou pou Kris pa senpleman chita nan pawòl nou oswa nan santiman nou, men sitou nan aksyon nou.

18, 19. a) Ki efè sa nou aprann sou Jezi dwe gen sou nou ? b) Nan ki bi yo ekri liv sa a, e ki byenfè l ap pote pou moun ki, depi lontan, te konsidere tèt yo kòm moun k ap suiv Kris ?

¹⁸ Sepandan, aksyon nou yo pa annik fèt konsa konsa. Yo reflete jan de moun nou ye pa anndan an. Donk, se la pou travay nou an kòmanse. Jezi te di : “ Men sa lavi etènèl la siyifi : se pou yo aprann konnen w, ou menm, sèl vrè Dye a, ak sila ou te voye a, Jezi Kris. ” ​(Jan 17:3). Si nou chèche gen yon konesans egzak sou Jezi, e si nou medite sou sa nou aprann nan, kè nou ap touche. N ap vin renmen l chak jou pi plis, e n ap devlope lakay nou yon pi gwo dezi pou nou suiv li jou apre jou.

¹⁹ Se nan bi sa a yo ekri liv sa a. Li pa la pou l bay yon rezime konplè sou lavi ak ministè Jezi, men li la pou l ede nou wè pi klè toujou kòman pou nou suiv lib. Li fèt pou l ede nou gade nan glas Ekriti yo, e pou nou mande tèt nou : ‘ Èske m ap suiv Jezi toutbon ? ’ ​(Jak 1:23-25). Petèt, depi lontan, ou konsidere tèt ou kòm yon mouton Ekselan Bèje a ap dirije. Men, èske w pa dakò nou ka toujou chèche mwayen pou nou amelyore ? Men yon egzòtasyon Labib fè nou : “ Kontinye verifye si nou nan lafwa, kontinye teste sa nou menm nou ye. ” ​(2 Korentyen 13:5). Sètènman, sa vo lapèn pou nou asire nou moun k ap gide nou an, se Ekselan Bèje nou an, Jezi, li menm Jewova anpèsòn nome pou l dirije nou.

20. Ki sa nou pral egzamine nan chapit ki vin apre a ?

²⁰ Nou swete pou etid liv sa a ede w ranfòse lanmou w pou Jezi e pou Jewova. Pandan yon lanmou konsa ap gide lavi w, w ap jwenn pi gwo lapè ak kè kontan ki posib nan vye monn sa a, e w ap viv pou w louwe Jewova pou toutan dèske li ban nou Ekselan Bèje a. Natirèlman, etid n ap fè sou Kris la dwe chita sou yon bon baz. Kidonk, li apwopriye, nan chapit 2 a, pou nou egzamine wòl Jezi jwe nan objektif inivèsèl Jewova.