“Lespri a fouye nan [...] bagay pwofon Bondye yo”
“Lespri a fouye nan tout bagay, menm nan bagay pwofon Bondye yo.” —1 KOR. 2:10, NW.
1. Sou ki wòl lespri sen jwe apot Pòl te mete aksan nan 1 Korentyen 2:10, e ki kesyon sa fè nou poze?
NOU vrèman bezwen remèsye Jewova pou tout travay lespri sen l akonpli pou nou! Ekriti yo pale de lespri a kòm yon èd, yon kado, yon bagay ki rann temwayaj e ki sipliye pou nou (Jan 14:16; Tra. 2:38; Wom. 8:16, 26, 27). Apot Pòl te mete aksan sou yon lòt wòl enpòtan lespri sen jwe. Li te di: “Lespri a fouye nan tout bagay, menm bagay pwofon Bondye yo.” (1 Kor. 2:10). Vrèmanvre, Jewova itilize lespri sen l pou li revele yon pakèt verite espirityèl ki pwofon. San èd sa a, ki sa nou t ap ka rive konprann nan objektif Bondye yo? (Li 1 Korentyen 2:9-12.) Sepandan, men kèk kesyon nou ka poze: Kòman lespri a fouye nan “bagay pwofon Bondye yo”? Ak ki moun Jewova te sèvi pou l te fè disip yo konprann bagay sa yo nan premye syèk la? Ki jan lespri a fouye nan bagay pwofon sa yo jodi a e ak ki moun li sèvi pou l fè sa?
2. Ki de wòl sa yo lespri a t ava jwe?
2 Jezi te pale sou de wòl lespri a t apral jwe. Yon ti tan anvan li mouri, men sa l te di apot li yo: “Men, èd la, lespri sen Papa a ap voye nan non mwen an, ap anseye nou tout bagay, e l ap fè nou sonje tout bagay mwen te di nou yo.” (Jan 14:26, NW). Donk, lespri sen an t ava travay tankou yon pwofesè ak yon èd memwa. Antanke pwofesè, li t ava ede kretyen yo konprann bagay yo pa t ka konprann anvan. Antanke èd memwa, li t ava ede yo sonje epi aplike yon fason ki kòrèk sa yo te deja konprann.
Nan premye syèk la
3. Ki pawòl Jezi te di ki montre disip li yo t ap vin konnen “bagay pwofon Bondye yo” tikras pa tikras?
3 Jezi te anseye disip li yo anpil verite ki te nouvo pou yo. Sepandan, yo te gen anpil bagay toujou pou yo aprann. Se sa k fè Jezi te di apot li yo: “Mwen gen anpil lòt bagay ankò pou m di nou, men nou pa ka konprann yo kounyeya. Men, li menm Lespri k ap moutre verite a, lè l’a vini, l’a mennen nou nan tout verite a.” (Jan 16:12, 13). Donk, Jezi te vle di yo se lespri sen ki t ap fè yo konnen bagay espirityèl pwofon yo tikras pa tikras.
4. Nan jou Pannkòt ane 33 epòk nou an, ki jan lespri sen te aji antanke yon pwofesè ak yon èd memwa?
4 Nan jou Pannkòt ane 33 epòk nou an, “Lespri k ap moutre verite a” te vini e li te desann sou anviwon 120 kretyen ki te reyini ansanm nan vil Jerizalèm. Gen anpil prèv moun te kapab wè e yo te kapab tande ki te montre sa (Tra. 1:4, 5, 15; 2:1-4). Disip yo te pale nan divès lang sou “bèl bagay Bondye te fè”. (Tra. 2:5-11.) Moman an te rive pou yo konprann yon nouvo bagay. Pwofèt Yowèl te deja anonse lespri sen t ava desann sou moun (Yow. 2:28-32). Moun ki t ap gade yo te wè pwofesi sa a akonpli yon fason yo pa t espere e apot Pyè te leve kanpe pou l esplike yo sa k t ap pase a. (Li Travay 2:14-18.) Konsa, lespri sen te aji tankou yon pwofesè pou l fè Pyè konprann byen klè sa disip yo t ap viv la se akonplisman pwofesi Yowèl la. Lespri a te aji tankou yon èd memwa tou paske li te fè Pyè site pawòl pwofèt Yowèl yo ak pawòl ki nan de nan Sòm David yo (Sòm 16:8-11; 110:1; Tra. 2:25-28, 34, 35). Bagay moun ki te la yo te wè e yo te tande yo se bagay ki vrèman pwofon ki soti nan Bondye.
5, 6. a) Apre Pannkòt ane 33 epòk nou an, ki kesyon enpòtan konsènan nouvo alyans lan ki te bezwen repons? b) Ak ki moun lespri a te sèvi pou l reponn kesyon sa yo, e ki jan yo te pran desizyon?
5 Te gen anpil lòt bagay kretyen nan premye syèk la te bezwen konprann. Pa egzanp, yo t ap poze tèt yo kesyon konsènan nouvo alyans yo te antre ladan l nan jou Pannkòt la. Èske nouvo alyans sa a te fèt pou Juif yo ak pwozelit yo sèlman? Èske yo t ap aksepte moun ki pa t Juif nan alyans sa a e èske lespri sen t ap desann sou yo tou (Tra. 10:45)? Gason ki pa t Juif yo, èske yo t ap bezwen sikonsi dabò e yo t ap bezwen suiv lwa Moyiz la (Tra. 15:1, 5)? Kesyon sa yo te vrèman enpòtan. Kretyen nan premye syèk la te bezwen pou lespri Jewova ede yo konprann bagay pwofon sa yo. Ak ki moun lespri a t apral sèvi pou l reponn kesyon sa yo?
6 Lespri a t apral sèvi ak yon gwoup frè responsab pou l pote limyè sou chak kesyon sa yo. Pyè, Pòl ak Banabas te la nan yon reyinyon kolèj santral la te fè e yo te rakonte ki jan Jewova te trete moun nasyon yo ki pa t sikonsi (Tra. 15:7-12). Apre yo te fin konpare sa mesye yo te rakonte yo ak pwofesi ki nan Ekriti ebrayik yo, lespri sen te ede frè yo nan kolèj santral la pran yon desizyon. Ansuit, yo te fè kongregasyon yo konnen desizyon yo te pran an nan lèt yo te voye ba yo. —Li Travay 15:25-30; 16:4, 5; Efe. 3:5, 6.
7. Grasa ki sa disip yo te vin konprann verite ki pwofon yo?
7 Gen anpil lòt bagay ki te vin klè pou disip yo grasa pawòl enspire Jan, Pyè, Jak ak Pòl te ekri yo. Men, apre kretyen yo te fin ekri tout liv yo te dwe ekri yo, rive yon lè, don pou moun pwofetize ak don pou yo jwenn konesans pa mwayen mirak te disparèt (1 Kor. 13:8). Èske lespri a t ap toujou kontinye jwe wòl yon pwofesè ak yon èd memwa? Èske li t ap kontinye ede kretyen yo fouye nan bagay pwofon Bondye yo? Pwofesi yo te di li t ap kontinye fè sa.
Nan tan lafen an
8, 9. Ki moun ki t ava “klere kon solèy” akoz klèvwayans yo t ap genyen nan domèn espirityèl nan tan lafen an?
8 Men ki sa yon zanj te anonse pandan li t ap pale sou tan lafen an: “E sila ki gen klèvwayans yo ap klere tankou klète lespas la. E sila yo k ap fè anpil moun vin ap pratike jistis ap klere tankou zetwal pou tan endefini, wi, pou toutan [...], e vrè konesans lan gen pou l vin anpil.” (Dàn. 12:3, 4, NW). Ki moun ki t ap gen klèvwayans e ki t ap klere yo? Nan parabòl ble ak move zèb la Jezi te di kèk bagay ki ka ede nou konprann kiyès yo ye. Men sa l te di lè l t ap pale konsènan epòk “lafen di monn” gen pou rive a: “Moun ki jis yo ap klere kon solèy nan wayòm Papa yo a.” (Mat. 13:39, 43, Bib Kreyòl La). Jan Jezi te esplike sa, “moun ki jis yo” se “pitit wayòm nan”, sètadi kretyen wen yo. —Mat. 13:38, Bib Kreyòl La.
9 Èske tout kretyen wen yo t ap “klere kon solèy”? Nan yon sans, wi, paske yo tout t ap gen pou yo patisipe nan travay predikasyon ak travay fè disip la e yo t ap gen pou yo bati youn lòt nan reyinyon yo. Kretyen wen yo t apral bay egzanp nan domèn sa yo (Zek. 8:23). Men, anplis, nan tan lafen an, gen bagay pwofon yo t ap vin konprann. Pwofesi Dànyèl te ekri yo te dwe rete “byen sele” jiskaske tan lafen an rive (Dàn. 12:9). Ki jan lespri a t apral fouye nan bagay pwofon yo e ak ki moun li t ap sèvi pou l fè sa?
10. a) Ak ki moun lespri a sèvi pou l fè moun konprann verite pwofon yo nan tan lafen an? b) Esplike ki jan nou te vin konprann kèk verite konsènan gran tanp espirityèl Jewova a.
10 Jodi a, lè moman an rive pou yon verite espirityèl vin klè, lespri sen ede moun ki responsab e ki se reprezantan “esklav fidèl ki prevwayan an” ki nan syèj mondyal la pou yo konprann verite pwofon yo pa t konprann anvan (Mat. 24:45; NW; 1 Kor. 2:13). Lè gen ajisteman ki pou fèt sou esplikasyon yo te bay, se tout moun nan Kolèj santral la ki egzamine yo (Tra. 15:6). Sa yo vin konprann yo, yo pibliye yo pou byen tout moun (Mat. 10:27). Tank tan ap pase, sa ka rive gen klarifikasyon yo bezwen fè, e yo fè klarifikasyon sa yo yon fason onèt. —Gade kare “Fason lespri a te fè konprann sa tanp espirityèl la ye”.
Annou tire pwofi jodi a grasa lespri a
11. Ki jan tout kretyen jodi a jwenn byenfè nan wòl lespri a jwe nan fè konnen bagay pwofon Bondye yo?
11 Tout kretyen fidèl jwenn anpil byenfè nan wòl lespri sen an jwe nan fè konnen bagay pwofon Bondye yo. Menm jan ak kretyen nan premye syèk la, jodi a, apre nou fin etidye yon verite lespri sen ede nou konprann, nou sonje l e nou aplike l (Lik 12:11, 12). Nou pa bezwen fè gwo klas pou nou rive konprann verite espirityèl pwofon ki nan piblikasyon nou yo (Tra. 4:13). Ki sa nou kapab fè pou nou pi byen konprann bagay pwofon Bondye yo? Men kèk konsèy nou ka suiv.
12. Ki lè nou bezwen mande Bondye lespri sen nan lapriyè?
12 Mande Bondye lespri sen nan lapriyè. Lè nou pral egzamine enfòmasyon ki baze sou Bib la, premye bagay pou nou fè, se priye Bondye pou l ban nou lespri sen pou gide nou. Li bon pou nou fè sa menm lè nou poukont nou oubyen menm lè ti tan nou genyen pou nou etidye a tou kout. Lè nou fè priyè sa yo avèk imilite, se sèten sa ap touche kè Papa nou ki nan syèl la. Tankou Jezi te montre sa, Jewova ap ban nou lespri sen l san grate tèt si nou mande l li ak tout kè nou. —Lik 11:13.
13, 14. Ki wòl preparasyon reyinyon yo jwe nan efò n ap fè pou nou rive konprann bagay pwofon Bondye yo?
13 Prepare tout reyinyon yo. Nou jwenn ‘manje nan lè pou nou manje’ grasa klas esklav la. “Esklav” la jwe wòl li lè l founi nou piblikasyon ki baze sou Bib la pou nou etidye e li fè pwogram pou reyinyon yo. Lè yo mande “tout kominote frè yo nèt” pou yo egzamine yon enfòmasyon, gen bonjan rezon ki fè yo mande sa (1 Pyè 2:17, NW; Kol. 4:16; Jid 3). Lè nou fè tout posib nou pou nou suiv tout enstriksyon yo ban nou, se kolabore nou kolabore ak lespri sen. —Rev. 2:29.
14 Lè n ap prepare reyinyon yo, li vrèman enpòtan pou nou chèche tout vèsè yo site yo e pou nou eseye konprann ki relasyon yo genyen ak sijè a. Tank n ap fè sa, se tank n ap gen yon konpreyansyon ki pi pwofon sou Bib la (Tra. 17:11, 12). Lè nou chèche vèsè yo, sa pèmèt enfòmasyon an byen chita nan lespri nou e sa pèmèt lespri sen fè nou sonje l san pwoblèm. Anplis, si nou li vèsè a nan paj Bib nou, sa ap ede nou sonje kote vèsè a ye e l ap pi fasil pou nou rejwenn li lè nou bezwen l.
15. Poukisa w dwe rete ajou ak tout piblikasyon yo, e ki jan w fè sa?
15 Rete ajou ak tout piblikasyon nou yo. Gen anpil nan piblikasyon nou yo nou pa egzamine nan reyinyon yo, men yo prepare yo pou pwofi nou. Menm atik ki nan peryodik nou ofri moun yo se pou nou menm yo prepare yo. Nan monn sa a kote moun pa gen tan, sa rive souvan nou oblije tann yon moun oswa yon bagay. Si nou mache avèk yon piblikasyon nou potko li oubyen se yon pati sèlman nou te li ladan l, nou ka tou pwofite li yon pòsyon ladan l. Kèk lòt moun aranje yo pou yo rete ajou ak dènye piblikasyon yo lè yo tande anrejistreman odyo yo pandan y ap mache oswa pandan yo nan yon machin. Gen anpil rechèch ki fèt avèk swen pou yo prepare tout enfòmasyon sa yo pou nou, se sa k fè yo kapab ede nou gen plis apresyasyon pou bagay espirityèl yo. —Aba. 2:2.
16. Poukisa lè w ap li, li bon pou w ekri kesyon ki vin nan lespri w yo e pou w fè rechèch sou yo?
16 Rezève tan pou w medite. Lè se Labib oswa piblikasyon ki baze sou Bib la w ap li, li bon pou w pran tan pou w reflechi sou sa w li a. Tank ou pran tan w pou w suiv fil rezònman yo, kèk kesyon ka monte nan lespri w. Ou kapab ekri yo pou w ka fè lòt rechèch sou yo annapre. Souvan lè nou fè rechèch sou kesyon ki kapte atansyon nou, lè sa a nou fouye plis an pwofondè. Konpreyansyon nou vin genyen yo gen anpil valè pou nou, yo tankou yon trezò nou gen nan domèn espirityèl e y ap itil nou nenpòt lè nou bezwen yo. —Mat. 13:52.
17. Ki pwogram ou suiv nan etid pèsonèl ou oswa nan etid familyal ou fè?
17 Pwograme tan pou nou fè Adorasyon an fanmi an. Kolèj santral la ankouraje nou tout pou nou rezève yon sware oswa yon lòt moman chak semèn pou nou fè etid pèsonèl nou oswa pou nou fè etid familyal. Aranjman yo te fè nan pwogram reyinyon yo fè li posib pou nou tout suiv konsèy sa a. Ki enfòmasyon ou egzamine nan sware ou fè Adorasyon an fanmi an? Gen moun ki li Labib, ki fè rechèch sou vèsè ki te fè kesyon vin nan lespri yo e yo ekri ti nòt tou kout nan Bib yo ki esplike vèsè yo. Anpil fanmi pran tan pou yo wè ki jan yo ka aplike enfòmasyon yo etidye yo nan fanmi an. Gen kèk chèf fanmi ki chwazi enfòmasyon yo santi fanmi yo ta dwe egzamine oubyen ki reponn yon kesyon manm fanmi yo ta renmen egzamine. Tank tan ap pase, pa gen dout w ap jwenn lòt sijè ou ka egzamine ak fanmi wa.
18. Poukisa nou pa ta dwe evite etidye verite pwofon ki nan pawòl Bondye a?
18 Jezi te di lespri a t ava aji tankou yon èd. Sa montre nou pa ta dwe evite etidye verite pwofon ki nan pawòl Bondye a. Verite sa yo fè pati “konesans Bondye bay la” (NW) ki gen anpil valè. Labib ankouraje nou pou nou chèche yo. (Li Pwovèb 2:1-5.) Yo revele yon pakèt detay sou sa “Bondye te pare pou moun ki renmen li”. Tank nou fè efò pou nou aprann plis sou Pawòl Jewova a, lespri sen ap ede nou, paske “lespri a fouye nan tout bagay, menm bagay pwofon Bondye yo”. —1 Kor. 2:9, 10; NW.
[Nòt anba paj]
Ki repons nou ta bay?
• Ki de wòl lespri a jwe nan ede nou fouye nan “bagay pwofon Bondye yo”?
• Ak ki moun lespri sen an te sèvi pou l ede kretyen nan premye syèk la konprann verite pwofon yo?
• Ki jan lespri sen fè verite yo vin klè jodi a?
• Ki sa w kapab fè pou w jwenn byenfè grasa lespri a?
[Kare nan paj 22]
Fason lespri a te fè konprann sa tanp espirityèl la ye
Pami “bagay pwofon Bondye yo”, bagay li te fè disip yo konprann nan premye syèk la, gen tabènak Bondye a ak tanp li yo ki te bay yon apèsi sou yon pi gwo reyalite espirityèl. Pòl te rele reyalite sa a “vrè tant lan, tant se pa lòm ki bati l la, men se Jewova ki bati l”. (Ebre 8:2, NW.) Tant sa a se gran tanp espirityèl la, ki se dispozisyon Bondye pran pou moun pwoche kote l grasa sakrifis Jezi Kris la e grasa fonksyon l genyen antanke Gran Prèt.
“Vrè tant lan” te vin egziste nan ane 29 epòk nou an lè Jezi te batize e Jewova te aksepte l antanke moun ki t apral yon sakrifis pafè a (Ebre 10:5-10). Apre lanmò Jezi ak rezirèksyon l, Jezi te antre nan Trèsen tanp espirityèl la, se la li te prezante valè sakrifis li a “devan Bondye pou nou”. —Ebre 9:11, 12, 24.
Nan yon lòt kote, apot Pòl te ekri kretyen wen yo t ‘ap grandi pou yo vin yon tanp sakre pou Jewova’. (Efe. 2:20-22, NW.) Èske tanp sa a se menm ak “vrè tanp lan” apot la te dekri nan lèt li te voye bay Ebre yo annapre a? Pandan plizyè dizèn ane, se sa sèvitè Jewova yo te panse. Yo te panse yo prepare kretyen wen yo sou tè a pou yo ka sèvi kòm “wòch” nan tanp espirityèl Jewova a nan syèl la. —1 Pyè 2:5.
Sepandan, nan zòn ane 1971, klas esklav la te kòmanse konprann tanp Pòl t ap pale de li nan lèt li te voye bay Efezyen yo pa t ap kapab gran tanp espirityèl la. Si “vrè tanp lan” te fòme ak kretyen wen ki te resisite yo, li t ap egziste apre yo te kòmanse resisite pandan “prezans Seyè a”. (1 Tes. 4:15-17, NW.) Anpalan de tabènak la, men sa Pòl te ekri: “Tant sa a se yon senbòl ki gen rapò ak tan nou ye kounye la a.” —Ebre 9:9, NW.
Lè nou konpare vèsè sa yo ak kèk lòt vèsè avèk swen, nou vin konprann byen klè tanp espirityèl la pa nan faz konstriksyon e kretyen wen yo pa “wòch” y ap prepare sou tè a, apre pou y al mete yo nan tanp sa a. Okontrè, kretyen wen yo ap sèvi ni nan lakou ni nan Lye sen tanp espirityèl la, kote y ap ofri “Bondye lwanj kòm sakrifis” chak jou. —Ebre 13:15, Bib Kreyòl La.
[Foto nan paj 23]
Ki jan nou kapab rive konprann “bagay pwofon Bondye yo” pi byen toujou?