Etid pèsonèl ak etid familyal esansyèl !
1. Ki prensipal sousi Kolèj Santral la gen pou nou nan peryòd n ap viv kounye a, e poukisa ?
1 Menm jan ak nan premye syèk la, Kolèj santral la sousye l de byennèt pèp Jewova a anpil (Tra. 15:6, 28). Ofiramezi nyaj nwa gwo tribilasyon an ap pwoche pi pre, li vrèman enpòtan pou tout pwoklamatè Wayòm nan gen yon relasyon solid ak Jewova. Ki jan w pral sèvi ak tan nou te konn itilize pou Etid liv kongregasyon an ? Kolèj santral la ankouraje nou tout pou nou sèvi ak tan sa a pou nou adore Jewova an fanmi. Si nou sèvi ak tan sa a avèk sajès, sa ap pèmèt nou fouye pi fon nan Pawòl Bondye enspire a, konsa, n ap rale dlo ki bay lavi a monte sot ladan l. — Sòm 1:1-3 ; Wom. 11:33, 34.
2. Ki dispozisyon nou ka pran pou nou adore Jewova an fanmi nan aswè ?
2 Adore Jewova an fanmi nan aswè : Yo ankouraje chèf fanmi yo pou yo andose responsablite yo genyen devan Jewova pou yo asire yo yo gen yon bonjan pwogram etid familyal, e yo dwe asire yo etid sa a fèt regilyèman (Det. 6:6, 7). Frè ak sè ki selibatè e ki pa gen okenn responsablite familyal ap ka sèvi ak tan sa a pou yo fè etid pèsonèl e pou yo fè rechèch. Li vrèman enpòtan pou nou tout “ rachte moman apwopriye ” pou nou etidye e pou nou medite dekwa pou nou ka toujou gen fòs espirityèl ki nesesè pou nou fè fas ak ‘ jou makawon sa yo ’. — Efe. 5:15, 16.
3, 4. Ki piblikasyon yo sijere pou nou itilize, e ki objektif nou dwe gen nan lespri nou lè n ap itilize yo ?
3 Ki sijè nou ka egzamine ? : Pou w jwenn enfòmasyon k ap pèmèt fanmi w pran plezi nan etid familyal la, ou ka sèvi ak Index des publications de la société Watch Tower oswa ak Watchtower Library sou CD-ROM. Fanmi yo ka egzamine kèk atik ki parèt regilyèman nan Toudegad, nan ribrik tankou : “ Sekrè pou gen kè kontan nan yon fanmi ”, “ Anseye pitit ou ”, “ Pou jèn yo ”. Anplis de sa, nan Réveillez-vous ! gen ribrik “ Les jeunes s’interrogent ” la ak yon bann lòt bèl atik konsènan yon pakèt mèvèy ki gen nan kreyasyon an.
4 Lè nou pran tan pou nou li Bib la e nou pa fè sa nan prese, sa ka grave prensip Bondye yo ak leson nou aprann nan sa nou li yo ni nan lespri ni nan kè tout moun ki nan fanmi an (Ebre 4:12). Nan lòt okazyon, nou ka gade yon videyo òganizasyon an pwodui e fanmi an ka fè kòmantè sou li. Ou gen anpil lòt posiblite devan w, ou ka fè tèt ou travay pou w wè ki lòt inisyativ ou ka pran. Sa w panse si w mande moun nan fanmi an ki sijè yo ta renmen egzamine nan etid la ?
5. Poukisa nou dwe bay etid pèsonèl ak etid familyal anpil enpòtans nan lavi nou kounye a ?
5 Rezon ki fè sa pi enpòtan kounye a : Si nou ranfòse espirityalite nou sa ap prepare nou pou nou “ kenbe fèm e n ap wè delivrans Jewova ” ap bay la (Egz. 14:13). Paran yo bezwen direksyon nan men Bondye pou yo ka leve pitit yo “ nan mitan yon jenerasyon ki kwochi e ki kòwonpi ”. (Fil. 2:15.) Timoun yo bezwen èd pou yo reziste devan tout degradasyon ki genyen nan domèn moral nan lekòl yo jodi a (Pwo. 22:3, 6). Li ta bon pou koup yo ranfòse “ kòd twa branch ” ki ini yo ak Jewova a (Ekl. 4:12). Kidonk, annou sèvi ak tan ki rete a avèk sajès pou nou bati tèt nou “ sou lafwa nou ki trè sen ”. — Jid 20.