Ou kapab vin gen yon pi bon memwa

SE Jewova Dye ki kreye sèvo lèzòm e ki bay sèvo a yon kapasite estrawòdinè pou l sonje enfòmasyon. Li fè sèvo nou pou l jwe yon wòl ki tankou wòl yon rezèvwa dlo. Sa vle di nou ka toujou pran enfòmasyon ladan l pou nou itilize e enfòmasyon nou mete ladan l yo pa pèdi, yo pa deplase al okenn kote. Fason Bondye fè sèvo lèzòm byen kadre ak objektif li genyen pou lèzòm viv pou toutan. — Sòm 139:14; Jan 17:3.

Sepandan, ou kapab santi w pèdi twòp nan enfòmasyon ou te gen nan sèvo w yo. Se kòmsi enfòmasyon sa yo pa la lè w gen bezwen yo. Ki sa w ka fè pou w vin gen yon pi bon memwa?

Pou nou gen yon pi bon memwa, li enpòtan pou nou montre nou enterese nan sa n vle sonje a. Lè n pran abitid suiv moun ki nan antouraj nou, nou suiv sa k ap pase bò kote nou e nou pran abitid enterese nan yo, sa gen yon bon efè sou kapasite mantal nou. Konsa, l ap pi fasil pou nou montre nou enterese menm jan an lè nou li oswa nou tande yon bagay ki gen anpil valè.

An jeneral, li fasil pou yon moun bliye non lòt moun. Men, antanke kretyen, nou konnen moun gen anpil enpòtans pou nou. Pami moun sa yo, gen konpayon kretyen nou yo, moun n ap preche yo ansanm ak moun nou gen kontak avèk yo nan yon seri aktivite ki nesesè nan lavi a. Ki sa ki ka ede nou sonje non moun nou vrèman bezwen sonje yo? Apot Pòl te site non 26 moun nan yon kongregasyon li te ekri. Li te enterese nan yo, piske nonsèlman li te konn non yo, men tou, li te mansyone yon seri detay presi sou anpil nan yo (Wom. 16:3-16). Jodi a, nan òganizasyon Temwen Jewova yo, gen siveyan itineran k ap deplase sot nan yon kongregasyon al nan yon lòt chak semèn e ki rive sonje anpil non moun nan kongregasyon yo. Ki sa ki ede yo? Yo ka sèvi ak non yon moun plizyè fwa depi premye fwa y ap pale avè l la. Yo chèche asosye non moun nan ak vizaj li. Anplis, yo pase tan avèk divès moun nan travay predikasyon an e genyen yo manje ansanm avèk yo. Lè w rankontre yon moun, èske w ap sonje non l? Pou w ka sonje non l, kòmanse bay tèt ou yon bon rezon ki fè ou dwe sonje non l, ansuit, eseye suiv kèk nan sijesyon nou sot bay yo.

Li enpòtan tou pou w sonje sa w li. Ki sa k ka ede w amelyore nan domèn sa a? Se fason w enterese nan sa w ap li a ak fason w konprann li. Pou w ka rete konsantre sou sa w ap li a, ou bezwen enterese anpil ladan l. Ou pap sonje enfòmasyon yo si lespri w yon lòt kote nan moman w ap eseye li a. W ap vin gen plis konpreyansyon sou sa w ap li a lè w konpare enfòmasyon w ap li yo ak bagay ou abitye oswa ak bagay ou deja konnen. Mande tèt ou: ‘Ki jan m ka aplike enfòmasyon sa a nan lavi m? Ki jan m ka sèvi avè l pou m ede yon lòt moun?’ W ap vin gen plis konpreyansyon tou sou sa w ap li a si w li gwoup mo olye w li chak grenn mo poukont yo. W ap vin plis anmezi pou w konprann ide yo e pou w wè ide prensipal yo, konsa l ap fasil pou w sonje yo.

Moun ki espesyalis nan domèn edikasyon montre revizyon gen anpil valè. Gen yon pwofesè inivèsite ki te montre nan yon etid li te fè lè yon moun pase yon minit ap fè revizyon sou yon enfòmasyon tousuit apre li fin aprann li, sa pèmèt li sonje de fwa kantite enfòmasyon li t ap gen pou l sonje. Kidonk, tousuit apre w fin fè yon lekti, oswa tousuit apre w fin li yon bon pati nan yon lekti w ap fè, fè revizyon sou ide prensipal yo yon fason pou w ka byen fikse ide sa yo nan lespri w. Reflechi sou fason w ka esplike lòt moun nouvo pwen ou aprann yo ak pwòp mo pa w. Lè w rafrechi memwa w tousuit apre w fin aprann yon pwen, w ap sonje pwen sa a pandan plis tan toujou.

Anplis, nan jou ki vin apre yo, chèche yon okazyon pou w fè revizyon sou sa w li a lè w pataje enfòmasyon yo ak lòt moun. Ou ka fè sa avèk yon manm fanmi w, yon moun nan kongregasyon w, yon kòlèg travay ou, yon kondisip ou, yon vwazen w oswa yon moun ou rankontre nan predikasyon. Pa annik repete pwen kle yo, men tou pale de rezònman yo fè sou vèsè ki kore pwen kle yo. Sa ap itil ou, sa ap ede w fè pwen enpòtan yo byen chita nan lespri w e lòt moun ap jwenn byenfè tou.

Nonsèlman li enpòtan pou w fè revizyon sou sa w li yo e pou w pale ak lòt moun sou yo, men tou w ap wè li bon pou w medite sou bagay enpòtan ou aprann yo. Asaf ak David, de moun ki te ekri nan Bib la, te fè sa. Men sa Asaf te di: “M ap sonje fason Ya konn aji, paske m ap sonje mèvèy ou te fè nan tan lontan yo. E asireman, m ap medite sou tout sa w fè, e m ap konsantre atansyon m sou fason w aji.” ​(Sòm 77:11, 12). Nan menm sans lan, men sa David te ekri: “Mwen medite sou ou pandan nuit lan” e “mwen sonje jou tan lontan yo, mwen medite sou tout sa w fè”. (Sòm 63:6; 143:5.) Èske w fè sa?

Si w byen reflechi sou fason Jewova aji, sou kalite l ak sou volonte l li fè moun konnen e ou konsantre w sou bagay sa yo, sa ap gen yon bon efè sou ou, se pa annik sonje w ap sonje enfòmasyon yo. Si w pran abitid reflechi sou bagay sa yo, sa ap pèmèt ou vrèman grave bagay ki enpòtan yo nan kè w, sa ap gen yon enfliyans sou moun ou ye pa anndan an. Se enfòmasyon w sonje yo k ap vin tounen panse ou gen nan fon kè w yo. — Sòm 119:16.

Lè n ap chèche sonje verite nou te aprann sou sa Jewova fè e sou sa Jezi Kris te di, nou pa poukont nou nan efò n ap fè yo. Nan lannuit anvan Jezi te mouri a, men sa l te di disip li yo: “Pandan m t ap viv ansanm avèk nou, mwen te konn di nou bagay sa yo. Men, èd la, lespri sen Papa a ap voye nan non m nan, ap anseye nou tout bagay, e l ap fè nou sonje tout bagay mwen te di nou yo.” ​(Jan 14:25, 26). Matye ak Jan te pami moun ki te la yo. Èske lespri sen te ede yo jan Jezi te di sa? Wi, pa gen dout nan sa! Anviwon uitan annapre, Matye te ekri liv li a, ki se premye istwa detaye sou lavi Kris. Liv sa a gen yon seri pasaj enpòtan nou bezwen sonje tankou Sèmon sou montay la, detay konsènan siy prezans Kris la ak fen sistèm nan. Swasannsenkan apre lanmò Jezi, apot Jan te ekri Evanjil li a, ki gen enfòmasyon presi sou sa Jezi, Seyè nou an, te di nan dènye nuit li te pase avèk apot li yo anvan li te bay lavi l pou nou. Pa gen dout, Matye ak Jan te sonje byen klè sa Jezi te di ak sa l te fè pandan yo te avèk li, men lespri sen te jwe yon gwo wòl nan ede yo sonje detay enpòtan Jewova te vle yo ekri nan Pawòl li a.

Èske lespri sen aji antanke yon èd pou l ede sèvitè Bondye yo jodi a? Se sèten! Anfèt, lespri sen pap mete nan lespri nou bagay nou pa t janm aprann, li aji antanke yon èd pou l fè nou sonje bagay enpòtan nou te etidye (Lik 11:13; 1 Jan 5:14). Konsa, lè nou bezwen sa, lespri sen ap fòtifye kapasite nou genyen pou nou reflechi a pou l ede nou ‘sonje ni pawòl pwofèt ki sen yo te deja di ni kòmandman Seyè a, Sovè a’. — 2 Pyè 3:1, 2.

Jewova te bay pèp Izrayèl la egzòtasyon ki vin apre a plizyè fwa: ‘Nou pa dwe bliye.’ Sa pa vle di li te atann y ap sonje tout bagay yon fason san fay. Men yo te dwe veye pou yo pa t konsantre sou bagay pa yo nan pwen pou sa ta fè yo bliye aksyon Jewova te fè yo. Yo te dwe kenbe byen klè nan lespri yo aksyon Jewova te fè pou l delivre yo lè zanj li a t ap touye tout premye pitit ann Ejip yo e lè Jewova te ouvri lanmè Wouj pou yo te pase epi annapre li te fèmen l sou Farawon ak lame l la ki te mouri neye. Izrayelit yo te dwe sonje Bondye te ba yo Lalwa nan mòn Sinayi, li te gide yo nan dezè a e li te fè yo antre nan Latè pwomiz. Yo pa t dwe bliye bagay sa yo, sa vle di bagay sa yo ki te nan lespri yo te dwe kontinye gen yon gwo efè sou lavi yo chak jou. — Det. 4:9, 10; 8:10-18; Egz. 12:24-27; Sòm 136:15.

Nou menm tou, nou ta dwe veye pou nou pa bliye. Lè n ap fè fas ak presyon nan lavi a, nou bezwen sonje Jewova, nou bezwen sonje ki kalite Dye li ye e nou bezwen sonje lanmou li demontre li gen pou nou lè l te ban nou Pitit li a, ki te bay lavi l kòm ranson pou peche nou yon fason pou nou ka vin pafè e pou nou ka gen lavi pou toutan (Sòm 103:2, 8; 106:7, 13; Jan 3:16; Wom. 6:23). Si nou li Labib regilyèman e nou patisipe yon fason aktif nan reyinyon kongregasyon an ak nan travay predikasyon an, sa ap ede nou kenbe verite enpòtan sa yo byen klè nan lespri nou ak nan kè nou.

Lè nou gen desizyon pou n pran, kit se ti desizyon, kit se gwo desizyon, nou bezwen bat pou nou sonje verite enpòtan sa yo e nou bezwen kite yo enfliyanse fason nou panse. Wi, ‘nou pa dwe bliye’. Mande Jewova pou l ban nou direksyon l. Olye nou annik gade bagay yo selon pwennvi lachè oswa olye nou annik mete konfyans nan kè nou ki tou enpafè e nou kite l pouse nou aji, nou chak dwe mande tèt nou: ‘Ki konsèy Pawòl Bondye a bay oswa ki prensip li gen ladan l ki ta dwe enfliyanse desizyon m ap pran an?’ ​(Pwo. 3:5-7; 28:26). Nou pa ka sonje bagay nou pa t janm li oswa nou pa t janm tande. Sepandan, tank n ap gen plis konesans egzak ak plis lanmou pou Jewova, se tank n ap gen plis bagay lespri Bondye ka fè n sonje e lanmou nou gen pou Jewova ki vin pi plis ap pouse n aji ann amoni ak konesans sa a.