Poukisa nou ta dwe priye toutan ?
“ Priye toutan. Di mèsi pou tout bagay. ” —1 Tesalonisyen 5:17, 18.
1, 2. Ki jan Danyèl te montre li te apresye privilèj li genyen pou l lapriyè, e ki efè sa te genyen sou relasyon l avèk Bondye ?
PWOFÈT Danyèl te gen abitid priye Bondye twa fwa pa jou. Li te konn met ajenou devan fenèt nan chanmòt kay li, ki te bay fas nan direksyon vil Jerizalèm pou l priye (1 Wa 8:46-49 ; Danyèl 6:10). Menm lè Dariyis, wa peyi Medi a, te bay yon dekrè ki te entèdi pou moun pa priye pèsonn lòt moun sof li menm, Danyèl pa t ezite yon segonn pou l konn sa pou l fè. Kit lavi l te an danje, kit li pa t an danje, mesye sa a ki te gen abitid lapriyè a te konn sipliye Jewova toutan.
2 Ki jan Jewova te konsidere Danyèl ? Lè zanj Gabriyèl te vin reponn youn nan priyè Danyèl yo, li te dekri l kòm “ yon moun ki trè apresyab ” oswa “ yon moun Bondye renmen anpil ”. (Danyèl 9:20-23 ; Bib la.) Nan pwofesi Ezekyèl la, Jewova pale de Danyèl kòm yon moun ki jis (Ezekyèl 14:14, 20). Diran tout lavi Danyèl, li klè priyè l yo vin pèmèt li gen yon relasyon entim avèk Bondye l ap sèvi a, e se yon verite menm Dariyis te rekonèt. — Danyèl 6:16.
3. Jan eksperyans yon misyonè montre sa, ki jan lapriyè ka ede nou kenbe entegrite nou ?
3 Lè nou lapriyè regilyèman, sa ka ede nou tou pou nou afwonte gwo eprèv. Pa egzanp, ann konsidere sa k te rive Harold King, yon misyonè nan peyi Lachin yo te kondane pou pase senkan nan kacho poukont li. Frè King pale de eksperyans li. Men sa l di : “ Yo te ka separe m ak moun parèy mwen, men pèsonn pa t ka separe m ak Bondye. [...] Donk, mwen te konn met ajenou twa fwa pa jou devan je nenpòt moun ki ta pase devan selil mwen an, e m te konn priye byen fò, etan m sonje egzanp Danyèl Bib la rapòte. [...] Sanble nan moman sa yo, lespri Bondye te gide lespri m pou m panse sou bagay ki pi itil, e sa te fè m santi m kalm. Lapriyè te vrèman ban mwen fòs ak rekonfò espirityèl ! ”
4. Ki kesyon ki gen rapò ak lapriyè nou pral konsidere nan atik sa a ?
4 Bib la di : “ Priye toutan. Di mèsi pou tout bagay. ” (1 Tesalonisyen 5:17, 18). Anrapò ak konsèy sa a, annou reflechi sou kesyon sa yo : Poukisa nou ta dwe analize priyè nou yo ? Ki rezon nou genyen pou nou pwoche toutan bò kote Jewova ? E ki sa nou ta dwe fè si nou santi nou pa diy pou nou priye Bondye akoz mankman ki lakay nou ?
Chèche vin zanmi Bondye pa mwayen lapriyè
5. Ki amitye san parèy lapriyè ede nou pwofite ?
5 Èske w pa ta renmen Jewova konsidere w kòm zanmi l ? Li te pale de Abraram kòm zanmi l (Izayi 41:8 ; Jak 2:23). Jewova vle pou nou devlope yon relasyon konsa avèk li. Dayè li envite nou pou nou pwoche bò kote l (Jak 4:8). Èske envitasyon sa a pa ta dwe fè nou reflechi sou lapriyè, yon dispozisyon ki san parèy ? Ann pran egzanp yon manm enpòtan ki nan yon gouvènman. Jan l deja difisil pou l akòde nou yon randevou, alewè pou l ta vin zanmi nou ! Epoutan, Kreyatè linivè a ankouraje nou pou nou pwoche alèz bò kote l nan lapriyè kèlkeswa lè nou vle, kèlkeswa lè nou santi nesesite a (Sòm 37:5). Priyè nou fè toutan yo ede nou pou nou vin zanmi entim Jewova.
6. Ki sa egzanp Jezi a anseye nou konsènan nesesite pou nou “ priye toutan ” ?
6 Epoutan, jan sa fasil pou nou neglije lapriyè ! Debat anba presyon nou jwenn chak jou nan lavi a sèlman ka fè lespri nou vin tèlman okipe, nou pa menm fè yon efò pou nou pale ak Bondye. Jezi te ankouraje disip li yo pou yo “ priye nètale ”, e li menm li te konn fè sa (Matye 26:41). Aktout li te konn toujou okipe depi maten jis aswè, li te konn rezève tan pou l pale ak Papa l ki nan syèl la. Gendelè Jezi leve “ byen bonè nan maten ” pou l ka priye, “ alòske li te toujou fè nwa ”. (Mak 1:35.) Nan kèk lòt okazyon, li konn retire kò l yon kote poukont li, nan fen jounen an, pou l ka pale ak Jewova (Matye 14:23). Jezi te toujou kreye tan pou l lapriyè, e nou ta dwe fè menm jan an tou. — 1 Pyè 2:21.
7. Ki sitiyasyon ki ta dwe pouse nou pale ak Papa nou ki nan syèl la chak jou ?
7 Nou jwenn moman ki apwopriye pou nou priye an prive plizyè fwa nan yon jounen, tankou lè n ap fè fas ak pwoblèm, lè nou devan tantasyon e lè n ap pran desizyon (Efezyen 6:18). Lè nou chèche direksyon Bondye bay nan tout aspè nan lavi nou, amitye nou avèk li pap pa vin pi solid. Si de zanmi ap afwonte pwoblèm ansanm, èske lyen amitye antre yo de a pap vin pi fèm (Pwovèb 17:17) ? Se konsa sa ap ye si nou apiye sou Jewova e si nou benefisye èd li. — 2 Kwonik 14:11.
8. Ki sa egzanp Neyemya, Jezi ak Ana aprann nou konsènan longè priyè pèsonèl nou yo ?
8 Ala kontan nou kontan dèske Bondye pa limite ni konbyen tan ni konbyen fwa nou ka pale avèk li ! Neyemya te fè yon priyè an silans byen vit anvan l te mande wa peyi Pès la yon bagay (Neyemya 2:4, 5). Jezi tou te fè yon priyè toukout lè l t ap mande Jewova pou l ba li pisans pou l resisite Laza (Jan 11:41, 42). Yon lòt bò, Ana te “ priye byen long devan Jewova ” lè li t ap vide kè l ba li (1 Samyèl 1:12, 15, 16). Priyè pèsonèl nou yo ka kout oswa long selon bezwen an e selon sikonstans yo.
9. Poukisa priyè nou yo ta dwe gen louwanj ak remèsiman pou tout sa Jewova fè pou nou ?
9 Anpil priyè ki nan Bib la eksprime yon rekonesans sensè pou pozisyon siprèm Jewova e pou bèl mèvèy li fè (Egzòd 15:1-19 ; 1 Kwonik 16:7-36 ; Sòm 145). Nan yon vizyon, apot Jan wè 24 ansyen ki reprezante total kretyen wen yo nan pozisyon selès yo k ap louwe Jewova e k ap di : “ Ou merite, Jewova, wi, Bondye nou an, pou w resevwa laglwa, ak onè ak pisans, paske se ou ki kreye tout bagay, e se akoz volonte w ki fè yo la, e ki fè yo te kreye. ” (Revelasyon 4:10, 11). Nou menm tou, nou gen rezon pou nou louwe Jewova regilyèman. Ala kontan paran yo konn kontan lè yon pitit yo remèsye yo ak tout kè l pou yon bagay yo te fè pou li ! Lè nou reflechi avèk rekonesans sou bonte Jewova e lè nou eksprime rekonesans nou ak tout kè nou pou sa, se yon bèl fason pou nou amelyore kalite priyè nou yo.
“ Priye toutan ” : Poukisa ?
10. Ki wòl lapriyè jwe nan fòtifye lafwa nou ?
10 Priye regilyèman se yon bagay ki esansyèl pou lafwa nou. Apre Jezi fin bay yon egzanp sou ‘ nesesite pou nou toujou priye e pou nou pa renonse ’, li poze yon kesyon : “ Lè Pitit Gason lòm nan vini, èske vrèmanvre l ap jwenn lafwa sou tè a ? ” (Lik 18:1-8). Lè nou lapriyè ak senserite e ak tout kè nou, sa bati lafwa nou. Lè patriyach Abraram t ap pran laj e li potko gen yon desandans, li te pale ak Bondye sou sa. Kòm repons, Jewova te mande l toudabò pou l gade syèl la e pou l konte zetwal yo si l kapab. Apre sa, Bondye te asire Abraram ak pawòl sa yo : “ Se konsa semans ou ap vini. ” Ki rezilta sa te bay ? Ebyen, Abraram “ te mete lafwa l nan Jewova, e konsa, Jewova te konte sa pou li kòm jistis ”. (Jenèz 15:5, 6.) Si nou ouvri kè nou bay Jewova nan lapriyè, si nou aksepte pwomès li fè nou nan Bib la e si nou obeyi l, l ap fòtifye lafwa nou.
11. Ki jan lapriyè ka ede nou fè fas ak pwoblèm nou rankontre ?
11 Lapriyè ka ede nou tou pou nou fè fas ak pwoblèm nou rankontre. Èske se yon chay w ap pote nan lavi a, èske w ap fè fas ak sitiyasyon ki rèd anpil ? Men sa Bib la di nou : “ Lage fado w yo sou Jewova li menm, e bò kote pa l, l ap soutni w. Li pa gendwa janm kite moun ki jis la kilbite. ” (Sòm 55:22). Lè nou dwe pran desizyon ki difisil, nou ka imite egzanp Jezi. Li te pase tout yon nuit ap priye poukont li anvan l chwazi 12 apot li yo (Lik 6:12-16). E lannuit anvan Jezi mouri a, li te tèlman priye avèk anpil santiman, “ swè l te vin tankou gout san k ap tonbe atè ”. (Lik 22:44.) Ki rezilta li te jwenn ? “ Bondye te reponn li, paske li te gen krent pou li. ” (Ebre 5:7). Lapriyè nou fè avèk santiman e ak pèseverans ap ede nou pou nou fè fas ak sitiyasyon ki bay strès e pou nou fè fas ak eprèv ki rèd anpil.
12. Nan domèn lapriyè, ki jan nou fè wè Jewova enterese pèsonèlman nan nou ?
12 Yon lòt rezon nou genyen pou nou pwoche pi pre Jewova grasa lapriyè, sèke li menm tou, l ap pwoche pi pre nou (Jak 4:8). Èske lè nou ouvri kè nou bay Jewova nan lapriyè, nou pa santi li enterese nan bezwen nou yo e li pran swen nou avèk tandrès ? Nou benefisye lanmou Bondye pèsonèlman. Jewova pa bay okenn lòt moun responsablite pou koute pa menm yon sèl priyè sèvitè l yo adrese l, li menm ki Papa yo ki nan syèl la (Sòm 66:19, 20 ; Lik 11:2). E li envite nou pou nou “ lage tout tèt chaje nou sou li, paske li gen sousi pou nou ”. — 1 Pyè 5:6, 7.
13, 14. Ki rezon nou genyen pou nou priye toutan ?
13 Lapriyè ka ban nou plis zèl nan predikasyon e li ka fòtifye nou lè endiferans ak opozisyon fè nou anvi kite sa (Travay 4:23-31). Lapriyè ka pwoteje nou tou kont “ manèv Dyab la ”. (Efezyen 6:11, 17, 18.) Lè n ap debat ak eprèv nou rankontre chak jou yo, nou kapab toutan ap mande Bondye pou l fòtifye nou. Modèl priyè Jezi kite pou nou an gen ladan l yon demann pou Jewova “ delivre nou anba mechan an ”, Satan Ledyab. — Matye 6:13.
14 Si nou kontinye priye pou nou jwenn èd pou nou metrize tandans nou genyen pou nou fè peche, n ap benefisye èd nan men Jewova. Men asirans nou genyen : “ Bondye fidèl, e li pap kite nou tante depase sa nou ka sipòte, men ansanm ak tantasyon an l ap ouvri yon chemen pou nou dekwa pou nou ka andire l. ” (1 Korentyen 10:13). Apot Pòl li menm te benefisye èd sa a nan men Jewova nan tout kalite sitiyasyon. Men sa l di : “ Mwen gen fòs pou tout bagay grasa moun ki ban m pisans lan. ” — Filipyen 4:13 ; 2 Korentyen 11:23-29.
Pèsevere nan lapriyè malgre mankman nou yo
15. Ki sa k ka rive lè konduit nou pa ann amoni ak prensip Bondye yo ?
15 Pou Bondye koute priyè nou yo, nou pa dwe rejte konsèy nou jwenn nan Pawòl li a. Apot Jan te ekri : “ Kèlkeswa sa nou mande n ap resevwa l nan men l, paske nou obsève kòmandman l yo e paske nou fè sa ki agreyab nan je l. ” (1 Jan 3:22). Men, ki sa k ta ka rive si konduit nou depaman ak prensip Bondye yo ? Adan ak Èv te al kache apre yo fin peche nan jaden Edenn nan. Nou menm tou, nou ka santi nou anvi “ kache pou Jewova ” e nou sispann lapriyè (Jenèz 3:8). “ Dapre sa m remake, prèske toutan, premye fo pa moun fè anvan yo kite Jewova ak òganizasyon l lan, se sispann yo sispann priye. ” Sa a se kòmantè yon siveyan itineran eksperimante ki rele Klaus te fè (Ebre 2:1). Se sa k te rive José Ángel. Men sa l di : “ Pandan apeprè uit an, se raman m te konn priye Jewova. Mwen te santi mwen pa diy pou m pale avè l, byenke mwen te toujou konsidere l kòm Papa mwen ki nan syèl la. ”
16, 17. Bay egzanp ki montre ki jan priyè regilye nou fè yo ka ede nou venk feblès espirityèl.
16 Gen nan nou ki ka santi nou pa diy pou nou lapriyè akoz kèk feblès espirityèl nou genyen oswa paske nou tonbe nan fè sa k pa sa. Men se nan moman sa yo menm nou plis bezwen pwofite lapriyè. Yona te kouri pou misyon yo te konfye l la. Men, ‘ nan detrès Yona, li rele Jewova, e lè sa a li reponn li. Nan vant cheyòl la li rele osekou, e Jewova tande vwa l ’. (Yona 2:2.) Yona priye, Jewova tande priyè l la, e Yona reprann li espirityèlman.
17 José Ángel tou te priye avèk anpil santiman pou l jwenn èd. Men sa l raple l : “ Mwen ouvri kè m e mwen sipliye Bondye pou l padone m. E vrèmanvre, li ede m. Mwen pa panse mwen t ap retounen nan laverite san èd lapriyè. Kounye a, mwen priye chak jou regilyèman, e m ap tann pou moman sa yo rive. ” Nou ta dwe toujou santi nou alèz pou nou fran ak Bondye konsènan fot nou yo e avèk imilite, pou nou mande l padon. Lè wa David te konfese peche l yo, Jewova te padone l (Sòm 32:3-5). Jewova vle ede nou, li pa vle kondane nou (1 Jan 3:19, 20). E priyè ansyen yo nan kongregasyon an ka ede nou espirityèlman, paske priyè sa yo gen “ anpil fòs ”. — Jak 5:13-16.
18. Ki asirans sèvitè Bondye yo genyen, menmsi yo ta ekate yo byen lwen chemen Bondye a ?
18 Ki papa ki t ap repouse yon pitit gason l ki vin mande l èd ak konsèy avèk imilite apre l fin fè yon fot ? Parabòl pitit gason gaspiyè a montre menmsi nou ta ekate nou byen lwen chemen Bondye a, Papa nou ki nan syèl la kontan lè nou retounen vin jwenn li (Lik 15:21, 22, 32). Jewova ankouraje tout moun ki devye yo pou yo rele l “ paske li pa mezire padon l ”. (Izayi 55:6, 7.) Malgre David te komèt plizyè peche grav, li te rele Jewova, li di l : “ Panche zòrèy ou, o Bondye, pou w koute priyè m. E pa kache devan demann favè m yo. ” Li kontinye pou l di : “ Ni leswa, ni lematen, ni a midi, mwen pa ka pa montre enkyetid mwen genyen. Mwen jemi e [Jewova] tande vwa m. ” (Sòm 55:1, 17). Ala sa rekonfòtan !
19. Poukisa nou pa ta dwe panse priyè nou fè ki sanble pa jwenn repons yo se yon prèv ki montre Bondye dezapwouve nou ?
19 E si nou pa jwenn repons sa nou mande a tousuit ? Nan ka sa a, nou dwe asire nou demann nou an ann amoni ak volonte Jewova e se nan non Jezi nou fè l (Jan 16:23 ; 1 Jan 5:14). Disip Jak te pale de kèk kretyen ki te konn priye e yo pa t konn jwenn repons priyè yo a paske yo t ap “ mande nan move entansyon ”. (Jak 4:3.) Yon lòt bò, nou pa ta dwe kouri panse depi nou lapriyè, e nou gen enpresyon priyè sa yo pa jwenn repons, se yon prèv Bondye dezapwouve nou. Pafwa, Jewova gendwa pèmèt sèvitè fidèl li yo kontinye priye l sou yon bagay pandan kèk tan anvan repons li bay la parèt klè. Jezi te di : “ Kontinye mande, e y ap ban nou. ” (Matye 7:7). Donk, nou bezwen “ pèsevere nan lapriyè ”. — Women 12:12.
Priye regilyèman
20, 21. a) Poukisa nou bezwen priye toutan nan “ dènye jou ” sa yo ? b) Ki sa n ap jwenn lè nou pwoche chak jou bò kote twòn bonte Jewova a, bonte moun pa merite a ?
20 Presyon ak pwoblèm ap miltipliye nan “ dènye jou ” sa yo ki gen “ tan ki di e ki difisil pou moun sipòte ”. (2 Timote 3:1.) E eprèv kapab ap toumante lespri nou byen fasil. Sepandan, priyè nou fè toutan yo ap ede nou kenbe lavi nou konsantre sou bagay espirityèl malgre pwoblèm k ap pèsiste, malgre tantasyon, malgre dekourajman. Lefètke nou priye Jewova chak jou, sa ka ban nou sipò esansyèl nou bezwen an.
21 Jewova, li menm “ ki konn tande lapriyè ” a, pa janm twò okipe pou l koute nou (Sòm 65:2). Pinga nou janm twò okipe pou nou pale avèk li. Amitye nou avèk Bondye se pi gwo byen nou genyen. Pinga nou janm pran l kòm yon bagay òdinè. “ Pakonsekan, annou pwoche bò kote twòn bonte moun pa merite a, san nou pa pè pale, pou nou ka resevwa mizèrikòd e pou nou ka jwenn bonte moun pa merite a kòm èd nan bon moman an. ” — Ebre 4:16.
Ki repons nou ta bay ?
• Ki sa pwofèt Danyèl aprann nou konsènan valè lapriyè genyen ?
• Ki jan nou ka fòtifye amitye nou avèk Jewova ?
• Poukisa nou ta dwe priye toutan ?
• Poukisa nou pa ta dwe kite santiman kòmkwa nou pa diy anpeche nou priye Jewova ?
[Foto nan paj 14]
Neyemya te fè yon priyè toukout, an silans, anvan l pale ak wa a.
[Foto nan paj 15]
Ana te “ priye byen long devan Jewova ”.
[Foto nan paj 16]
Jezi te fè tout yon nuit ap priye anvan l te chwazi 12 apot li yo.
[Foto nan paj 18]
Pa manke okazyon pou nou priye nan yon jounen.