Ann pran detèminasyon pou n “kontinye gen lanmou pou frè yo”!

1, 2. Poukisa apot Pòl te ekri yon lèt pou kretyen ebre yo?

SE TE nan ane 61 epòk nou an. Toupatou ann Izrayèl, kongregasyon kretyen an pa t gen twòp pwoblèm. Aktout apot Pòl te prizonye nan vil Wòm, li te gen espwa li pap pran tan pou l libere. Yo te fèk libere Timote, konpayon l lan, e yo t ap planifye pou y al vizite frè ki te nan Jide yo (Ebre 13:23). Sepandan, nan senkan ankò, gen “lame [ki t apral] monte kan toutotou Jerizalèm” jan Jezi te fè konn sa. Kretyen nan Jide yo, sitou sa ki t ap viv Jerizalèm yo, te dwe aji san pèdi tan. Jezi te fè yo konnen yo ta dwe kouri tousuit yo fin wè evènman sa yo kòmanse rive. — Lik 21:20-24.

² Nan 28 ane ki te gentan pase depi Jezi te bay pwofesi sa a, Juif fidèl ki t ap viv ann Izrayèl yo te deja rete djanm devan anpil opozisyon ak pèsekisyon (Ebre 10:32-34). Sepandan, Pòl te konnen yo t apral fè fas ak youn nan pi gwo eprèv pou lafwa yo (Mat. 24:20, 21; Ebre 12:4). Li te vle pou yo prepare yo pou kèlkeswa sa k te ka vin devan yo a. Yo t apral bezwen gen yon lafwa ak yon andirans ki estrawòdinè, yon lafwa solid ki t ap pèmèt yo rete an vi. (Li Ebre 10:36-39.) Lespri Jewova te pouse Pòl ekri frè ak sè sa yo li te renmen anpil la yon lèt ki te pale de sa yo bezwen an. Kounye a, yo rele lèt sa a liv Ebre yo.

 3. Ki sa k fè n ta dwe enterese nan liv Ebre a?

³ Jodi a, nou tout ta dwe enterese nan sa apot Pòl te ekri kretyen ebre sa yo ki t ap viv nan premye syèk la. Sa k fè sa? Se paske n nan yon sitiyasyon ki sanble ak pa yo a. Nan ‘tan sa yo ki di e ki difisil pou moun sipòte’, pèp Jewova a ap fè fas ak tout kalite opozisyon ak pèsekisyon (2 Tim. 3:1, 12). Nou pa gen okenn dout lafwa nou ak ve n fè bay Bondye a se bagay ki solid. Sepandan, gen anpil nan nou k ap viv kounye a nan yon ti moman kalmi san okenn pèsekisyon dirèk. Aktout sa, menm jan ak kretyen yo nan epòk Pòl la, okenn nan nou pa ta dwe bliye sa k gen pou rive: talè konsa, lafwa n pral pase anba pi gwo eprèv ki te ka genyen an! — Li Lik 21:34-36.

 4. Ki sa tèks pou ane 2016 la di, e poukisa l apwopriye?

⁴ Ki sa k pral ede n prepare nou pou sa k pral rive talè konsa yo? Nan liv ebre a, Pòl te pale de anpil bagay ki pral ede n fòtifye lafwa nou. Youn nan bagay enpòtan sa yo parèt nan premye vèsè ki nan dènye chapit lèt sa a. Nou te chwazi vèsè sa a kòm tèks pou ane 2016 la. Men ki ankourajman nou jwenn nan vèsè sa a: “Se pou nou kontinye gen lanmou pou frè yo.” — Ebre 13:1.

 5. Ki sa gen lanmou pou frè yo vle di?

⁵ Ki sa sa vle di pou nou gen lanmou pou frè yo? Yon fason literal, tèm grèk Pòl te itilize a ki se filadèlfya vle di “afeksyon pou yon frè”. Donk, gen lanmou pou frè yo se yon kalite afeksyon ki gen ladan l yon atachman ki fò, ki sere nou gen pou yo, tankou afeksyon manm fanmi yo oswa bon zanmi yo gen youn pou lòt (Jan 11:36). Nou pa pran pòz nou se frè ak sè paske se frè ak sè nou ye (Mat. 23:8). Men ki bèl fason Bib la rezime kokenn atachman nou gen youn pou lòt la: “Se pou lanmou nou gen pou frè nou yo makònen ak gwo afeksyon nou gen youn pou lòt. Pran devan nan onore youn lòt.” ​(Wom. 12:10). Lè kalite lanmou sa a makònen ak lanmou agapè a, li fè gen bonjan tèt ansanm pami pèp Bondye a.

 6. Pou vrè kretyen yo, ki sa gen lanmou pou frè yo vle di?

⁶ Selon sa yon biblis fè konnen: “Ekspresyon ‘lanmou pou frè yo’ se yon bagay ki ra nan liv moun ki pa kretyen yo ekri.” Nan relijyon Jidayis la, pafwa, sans mo “frè” a konn ale pi lwen pase relasyon ki gen ant moun ki menm fanmi, men, sans mo sa a te toujou konsène moun ki te nan nasyon Juif la e moun lòt nasyon yo pa t ladan l. Sepandan, tout moun ki kwè nan Bondye yo se kretyen kèlkeswa nasyonalite yo (Wom. 10:12). Antanke frè, se Jewova ki anseye nou pou n gen afeksyon youn pou lòt (1 Tes. 4:9). Men, ki sa k fè l enpòtan pou n kontinye gen lanmou pou frè yo?

 7. a) Ki pi gwo rezon n genyen pou n gen lanmou pou frè yo? b) Bay yon lòt rezon ki fè l enpòtan pou n vin gen plis afeksyon youn pou lòt?

⁷ Repons ki senp lan sèke Jewova mande pou youn gen lanmou pou lòt. Nou pa ka di nou renmen Bondye, epi anmenmtan nou refize renmen frè nou (1 Jan 4:7, 20, 21). Anplis de sa, nou bezwen youn lòt. Sa sitou enpòtan lè gen pwoblèm. Pòl te konnen gen kèk nan kretyen ebre li t ap ekri yo ki t apral bezwen kite kay yo ak byen yo genyen nan yon ti tan ankò. Jezi te montre jis nan ki pwen moman sa a t ap difisil (Mak 13:14-18; Lik 21:21-23). Donk, plis pase nenpòt lè anvan sa, kretyen sa yo te bezwen vin gen plis afeksyon youn pou lòt. — Wom. 12:9.

 8. Ki sa n bezwen fè depi kounye a anvan gwo tribilasyon an kòmanse?

⁸ Talè konsa, van destriksyon pi gwo tribilasyon ki pral genyen an pral frape tout kote (Mak 13:19; Rev. 7:1-3). Lè sa a, l ap bon pou n koute konsèy sa a Bondye te fè ekri a ki di: “Ale, pèp mwen an, antre nan chanm nou epi, fèmen pòt nou. Kache pou yon ti tan jiskaske kòlè a pase.” ​(Eza. 26:20). “Chanm” sa yo kapab gen rapò ak kongregasyon nou yo. Se kote sa yo nou konn vin adore Jewova ansanm antanke frè ak sè. Men, sa pa sifi pou n annik reyini ansanm regilyèman. Pòl te fè kretyen ebre yo sonje yo ta dwe sèvi ak okazyon sa yo pou youn pouse lòt gen “lanmou, [e] pou youn pouse lòt fè bèl aksyon”. (Ebre 10:24, 25.) Nou bezwen vin gen lanmou pou frè yo depi kounye a paske sa ap ede n nan kèlkeswa eprèv oswa tribilasyon nou kapab rankontre alavni.

 9. a) Ki okazyon nou gen jodi a pou n montre lanmou nou gen pou frè yo? b) Bay kèk egzanp ki montre fason frè ak sè yo nan pèp Jewova a montre yo gen lanmou youn pou lòt.

⁹ Menm depi kounye a, anvan gwo tribilasyon an eklate, nou vrèman bezwen gen lanmou pou frè yo. Gen anpil nan frè nou yo k ap fè fas ak tranblemanntè, inondasyon, siklòn, sounami oswa lòt katastwòf natirèl. Gen kèk frè k ap soufri akoz opozisyon ak pèsekisyon (Mat. 24:6-9). Mete sou tout bagay sa yo, se chak jou n ap fè fas ak pwoblèm ekonomik akoz n ap viv nan yon monn ki kòwonpi (Rev. 6:5, 6). Tank pwoblèm sa yo ap ogmante se tank n ap vin gen plis okazyon pou n demontre gwo lanmou nou gen pou frè yo. Nou bezwen bay prèv n ap kontinye gen lanmou pou frè yo menmsi “lanmou pifò moun ap vin rafredi”. — Mat. 24:12.^[1]

10. Ki sa n pral egzamine kounye a?

¹⁰ Malgre tout kantite pwoblèm n ap rankontre yo, ki jan n ka sèten n ap kontinye gen lanmou pou frè yo? Ki fason nou ka bay prèv nou gen kalite afeksyon sa a pou frè nou yo? Apre apot Pòl te fin di “se pou nou kontinye gen lanmou pou frè yo”, li te site plizyè fason kretyen yo ka fè sa. Ann egzamine sis nan yo.

11, 12. Ki sa montre nou akeyan vle di? (Gade foto ki nan kòmansman atik la.)

¹¹ “Pa bliye montre nou akeyan.” ​(Li Ebre 13:2.) Nan lang orijinal la, ekspresyon lè yo tradui l yo met “akeyan” pou li a vle di “lanmou pou etranje”. Fraz sa a ka fè n sonje egzanp Abraram ak Lòt. Toule de mesye sa yo te demontre lanmou pou vizitè yo pa t konnen. An reyalite, vizitè sa yo se te zanj (Jen. 18:2-5; 19:1-3). Pòl te pale de egzanp mesye sa yo yon fason pou l te ankouraje kretyen ebre yo pou yo montre yo gen lanmou pou frè yo lè yo akeyan.

¹² Èske n montre nou akeyan lè n envite lòt moun vin manje lakay nou oubyen vin pase kèk ti moman detant ki ankourajan avèk nou? Nou pa bezwen fè gwo aranjman oswa anpil depans pou n montre nou akeyan, nitou nou pa vle envite sèlman moun ki ka remèt nou sa (Lik 10:42; 14:12-14). Objektif nou ta dwe pou n ankouraje lòt moun, men, pa pou n enpresyone yo! Menm lè n ka pa konn siveyan sikonskripsyon nou an ak madanm li trè byen, èske n chofe pou n montre nou akeyan anvè yo (3 Jan 5-8)? Aktout pwogram nou byen chaje e malgre nou jwenn anpil strès chak jou nan lavi a, se pa ti enpòtan l enpòtan pou n “pa bliye montre nou akeyan”!

13, 14. Ki jan n ka kontinye “sonje moun ki nan prizon yo”?

¹³ “Sonje moun ki nan prizon yo.” ​(Li Ebre 13:3.) La a, apot Pòl pa t ap pale de nenpòt kalite prizonye. Li t ap pale de frè yo te met nan prizon akoz lafwa yo. Pòl li menm te gentan gen katran nan prizon nan moman l t ap ekri pawòl sa yo pou kretyen ebre yo (Flp. 1:12-14). Li te felisite frè yo dèske yo te montre yo “gen kè sansib pou frè ki nan prizon yo”. (Ebre 10:34.) Kontrèman ak moun ki te ede Pòl pèsonèlman pandan l te nan prizon an, kretyen ebre sa yo pa t la fizikman ak Pòl. Donk, ki fason yo t ap ka kontinye sonje l? Yo te ka fè sa grasa priyè yo te konn fè pou li. — Ebre 13:18, 19.

¹⁴ Jodi a, menm jan an tou, nou gendwa pa ansanm ak frè nou yo ki nan prizon. Nou gendwa pa ka ba yo èd ki pratik Temwen k ap viv toupre prizon an ka ba yo. Men, nou ka montre nou gen tandrès ak afeksyon pou frè yo lè n toujou sonje moun fidèl sa yo, lè n priye pou yo ak lè n kontinye sipliye Jewova pou yo. Pa egzanp, èske n kontinye sonje kantite frè ak sè e pafwa menm timoun piti ki nan prizon nan peyi Eritre yo, san wete twa frè ki gentan gen plis pase 20 an nan prizon nan peyi sa a anpalan de: Paulos Eyassu, Isaac Mogos, ak Negede Teklemariam.

15. Ki jan n kapab onore maryaj?

¹⁵ “Se pou tout moun onore maryaj.” ​(Li Ebre 13:4.) Nou ka bay prèv nou gen lanmou pou frè yo tou lè n kontinye rete pwòp nan domèn moral (1 Tim. 5:1, 2). Si yon moun ta “depase limit li” epi l ta fè yon frè oswa yon sè “ditò” lè l fè imoralite seksyèl avè l oswa ak yon moun nan fanmi l, sa t ap kraze konfyans ki gen nan mitan nou ki baze sou lanmou nou gen youn pou lòt antanke frè a (1 Tes. 4:3-8). Anplis de sa, imajine ki jan yon madanm t ap santi l si l ta dekouvri jan mari l trayi l nan gade pònografi. Èske yon konduit konsa t ap montre l gen lanmou pou madanm li e l respekte maryaj? — Mat. 5:28.

16. Lefètke n aprann kontante n, ki jan sa ede n montre lanmou pou frè yo?

¹⁶ “Kontante nou ak sa nou genyen.” ​(Li Ebre 13:5.) Moun ki kontante l toutbon an se yon moun ki fè Jewova konfyans. Sa pèmèt nou gen yon pwennvi ekilibre sou bagay materyèl (1 Tim. 6:6-8). Sa ede n rann nou kont relasyon nou gen ak Jewova ansanm ak frè nou yo pi enpòtan lontan pase nenpòt bagay lajan ka achte. Yon moun ki kontante l ak sa l genyen pap nan plenyen, li pap nan fè kòlè oswa ap chèche bay moun responsab fot li. Anplis de sa, li pap kite jalouzi ak anbisyon domine l paske bagay sa yo ka anpeche l montre lanmou pou frè yo. Olye de sa, lefètke l kontante l ak sa l genyen, sa fè l renmen bay. — 1 Tim. 6:17-19.

17. Ki jan lè n “gen anpil kouraj” sa ap ede n montre lanmou pou frè yo?

¹⁷ Se pou n “gen anpil kouraj”. (Li Ebre 13:6.) Konfyans nou gen nan Jewova a fè n gen kouraj nan kèlkeswa difikilte nou kapab ap rankontre. Yon lòt bò, kouraj sa a ap ede n rete pozitif. Piske nou gen lanmou pou frè yo e nou rete pozitif, sa ap pèmèt nou fòtifye kwayan parèy nou yo epi rekonfòte yo (1 Tes. 5:14, 15). Menm lè monn nan pral fè fas ak moman ki pi fènwa a pandan gwo tribilasyon an, n ap ka “kanpe dwat [epi n ap] leve tèt nou” paske n ap konnen delivrans nou pa lwen. — Lik 21:25-28.

18. Ki jan n ka vin gen plis lanmou pou ansyen ki nan kongregasyon nou yo?

¹⁸ “Sonje moun k ap dirije nou yo.” ​(Li Ebre 13:7, 17.) Lè n reflechi ak jan ansyen nou yo ap travay di pou nou, e yo fè tout sa san yo pa peye yo, n ap vin gen plis lanmou ak rekonesans pou yo. Nou pa t ap janm vle yo pèdi jwa yo oswa pou yo ta plede plenyen akoz yon bagay nou fè. Olye de sa, lè n obeyi yo epi n soumèt devan yo nou montre “nou renmen yo anpil [epi] nou gen anpil konsiderasyon pou yo pou travay y ap fè a”. — 1 Tes. 5:13.

19, 20. Ki jan n ka kontinye montre n gen lanmou pou frè yo plis toujou?

¹⁹ Pa gen dout nan sa, tout moun konn pèp Jewova a pou fason yo montre lanmou pou frè yo. Pòl te rekonèt sa nan epòk li a. Men, apre sa, li te ankouraje tout frè yo pou yo “kontinye fè sa plis toujou”. (1 Tes. 4:9, 10.) Nou toujou kapab kontinye pwogrese nan domèn nan!

²⁰ Kidonk, ann medite sou kesyon sa yo toutpandan n ap kenbe tèks pou ane a nan lespri nou: Èske m ka montre m pi akeyan? Ki jan m ka sonje frè ki nan prizon yo? Èske m montre m onore maryaj ki se yon dispozisyon Bondye pran? Ki sa k pral ede m kontante m toutbon ak sa m genyen? Ki jan m ka vin gen plis konfyans nan Jewova? Ki jan m ka kowopere plis toujou ak moun k ap dirije m yo? Si n fè tout sa n kapab nan sis domèn sa yo, tèks pou ane a pap sèlman yon tèks ki parèt sou mi Sal Wayòm nou an, men, l ap fè n sonje konsèy sa a ki di: “Se pou nou kontinye gen lanmou pou frè yo”. — Ebre 13:1.