Պահե՛ք

Ինչպիսի՞ն է իմ վերաբերմունքը արյան մանր բաղադրամասերի և այն բժշկական պրոցեդուրաների նկատմամբ, որոնց ժամանակ կարող է գործածվել իմ սեփական արյունը

Աստվածաշունչը պատվիրում է քրիստոնյաներին հեռու մնալ արյունից (Գործք 15։20)։ Հետևաբար, Եհովայի վկաները հրաժարվում են ամբողջական արյան կամ արյան չորս հիմնական բաղադրամասերի փոխներարկումից. այդ բաղադրամասերն են՝ էրիթրոցիտները (արյան կարմիր մարմնիկները), լեյկոցիտները (արյան սպիտակ բջիջները), թրոմբոցիտները (արյան թիթեղիկները) և պլազման։ Նրանք նաև հրաժարվում են ուրիշներին փոխներարկելու նպատակով իրենց արյունը տալուց կամ այն հետագայում իրենց իսկ մարմին փոխներարկելու նպատակով պահածոյացնելուց (Ղեւտ. 17։13, 14; Գործք 15։28, 29)։

Որո՞նք են արյան մանր բաղադրամասերը, և ինչո՞ւ պետք է յուրաքանչյուր քրիստոնյա անձամբ որոշում կայացնի դրանք գործածելու վերաբերյալ

Արյան մանր բաղադրամասերը արյունից ստացվող տարրերն են, որոնք ստացվում են մի պրոցեսի միջոցով, որը հայտնի է մասնաբաժանում անվանումով։ Օրինակ՝ պլազման, որը արյան հիմնական բաղադրամասերից է, կարելի է բաժանել հետևյալ նյութերի. ջուր (մոտ 91 տոկոս). սպիտակուցներ, որոնցից են՝ ալբումինները, գլոբուլինները և ֆիբրինոգենները (մոտ 7 տոկոս). և այլ նյութեր, ինչպես օրինակ՝ սննդարար նյութեր, հորմոններ, գազեր, վիտամիններ, նյութափոխանակության արգասիքներ և էլեկտրոլիտներ (մոտ 1,5 տոկոս)։

Արդյոք արյունից հեռու մնալու պատվերը տարածվո՞ւմ է մանր բաղադրամասերի գործածության վրա։ Մենք չենք կարող որոշակիորեն պատասխանել այս հարցին։ Աստվածաշունչը կոնկրետ առաջնորդություն չի տալիս մանր բաղադրամասերի գործածության վերաբերյալ։a Իհարկե, շատ մանր բաղադրամասեր ստացվում են այն արյունից, որը տրվում է բժշկական նպատակներով օգտագործելու համար։ Յուրաքանչյուր քրիստոնյա, առաջնորդվելով իր խղճով, անձամբ պետք է որոշում կայացնի համաձայնվել բժշկական նկատառումներով մանր բաղադրամասերի օգտագործմանը, թե հրաժարվել դրանց օգտագործելուց։

Այդպիսի որոշումներ կայացնելիս խորհիր հետևյալ հարցերի շուրջ. գիտակցո՞ւմ եմ արդյոք, որ արյան բոլոր մանր բաղադրամասերի գործածումից հրաժարվելը նշանակում է, որ ես հրաժարվում եմ նաև որոշ դեղամիջոցներից, օրինակ՝ այնպիսի դեղամիջոցներից, որոնք պայքարում են վիրուսների և հիվանդությունների դեմ կամ նպաստում են արյան մակարդելիությանը՝ արյունահոսությունը դադարեցնելու նպատակով։ Կարո՞ղ եմ բացատրել բժշկին, թե ինչու եմ հրաժարվում արյան որևէ մանր բաղադրամաս ընդունելուց կամ ինչու եմ համաձայն ընդունել այն։

Ինչո՞ւ է անձնական որոշման հարց այն, թե կհամաձայնվե՞մ արդյոք բուժման որոշ մեթոդների, որոնց ժամանակ գործածվում է իմ սեփական արյունը

Թեև քրիստոնյաները հրաժարվում են ուրիշներին փոխներարկելու նպատակով իրենց արյունը տալուց կամ հետագայում իրենց իսկ մարմին փոխներարկելու նպատակով այն պահածոյացնելուց, որոշ պրոցեդուրաներ կամ հետազոտություններ, որոնց ժամանակ գործածվում է անհատի արյունը բացահայտորեն չեն հակասում Աստվածաշնչի սկզբունքներին։ Հետևաբար, յուրաքանչյուր անհատ, առաջնորդվելով իր խղճով, պետք է անձամբ որոշում կայացնի՝ համաձայնվել բուժման որոշ մեթոդների, որոնց ժամանակ գործածվում է իր սեփական արյունը, թե հրաժարվել դրանցից։

Այդպիսի որոշումներ կայացնելիս ինքդ քեզ տուր հետևյալ հարցերը. «Եթե իմ արյունից որոշ մաս դուրս գա իմ մարմնից, և գուցե արյանս շրջանառությունը որոշ ժամանակով կանգ առնի, իմ խիղճը թույլ կտա՞ ինձ համարել, որ այդ արյունը դեռ իմ մարմնի մի մասն է, ուստի չի պահանջվում այն «գետինը թափե[լ]» (Բ Օրին. 12։23, 24)։ Աստվածաշնչով դաստիարակված իմ խիղճը կտանջի՞, եթե բուժման ինչ–որ պրոցեդուրայի ժամանակ իմ արյունից որոշ մաս հեռացվի, ենթարկվի փոփոխության և նորից վերադառնա իմ մարմին։ Արդյոք գիտակցո՞ւմ եմ, որ հրաժարվելով բուժման բոլոր այն պրոցեդուրաներից, որոնց ժամանակ գործածվում է իմ սեփական արյունը, ես հրաժարվում եմ բուժման այնպիսի մեթոդներից, ինչպիսիք են՝ հեմոդիալիզը կամ արհեստական շրջանառության սարքի գործածումը։ Աղոթքով խորհրդածե՞լ եմ այս հարցի շուրջ մինչ որոշում կայացնելը»։b

Ի՞նչ որոշում կկայացնեմ ես

Քննիր հաջորդ երկու էջերում տեղ գտած աղյուսակները։ Առաջին աղյուսակում թվարկվում են մի քանի մանր բաղադրամասեր, որոնք ստացվում են արյունից, և նշվում է, թե ինչպես են սովորաբար գործածվում բժշկության մեջ։ Լրացրու այդ աղյուսակը՝ անձամբ որոշում կայացնելով, և յուրաքանչյուր մանր բաղադրամասի կողքին նշիր, թե արդյոք համաձայն ես ընդունել դրանք, թե՝ ոչ։ Երկրորդ աղյուսակում բերվում են մի շարք տարածված բժշկական մեթոդներ, որոնց ժամանակ օգտագործվում է անհատի սեփական արյունը։ Լրացրու այդ աղյուսակը՝ անձամբ որոշում կայացնելով, և նշիր, թե արդյոք համաձայն ես այդ մեթոդների գործածությանը, թե՝ ոչ։ Այս աղյուսակները իրավական ուժ չունեն, սակայն կարող ես օգտվել դրանցից, երբ լրացնես «Դիրքորոշում և լիազորագիր բժշկական միջամտության վերաբերյալ» բլանկի քո անձնական օրինակը։

Դու անձամբ պետք է որոշումներ կայացնես այս հարցերի վերաբերյալ և որոշում կայացնելիս չպետք է առաջնորդվես մեկ ուրիշի խղճով։ Նաև ոչ մի քրիստոնյա չպետք է քննադատի իր հավատակցին նրա կայացրած որոշման համար։ Այս հարցերում «ամեն մէկն իր բեռը պիտի վեր առնէ» (Գաղ. 6։4, 5)։

[Ծանոթագրություններ]