Հավատարիմ քրիստոնյա կանայք թանկագին են Աստծո աչքում
«Սուտ է վայելչութիւնը, եւ ունայն գեղեցկութիւնը. այն կինը, որ վախենում է Տէրիցը՝ նա կ’գովուի» (ԱՌԱԿԱՑ 31։30)։
1. Գեղեցկության վերաբերյալ Եհովայի տեսակետը ինչպե՞ս է տարբերվում աշխարհի տեսակետից։
ԱՇԽԱՐՀԸ մեծ կարևորություն է տալիս արտաքին տեսքին, հատկապես կանանց արտաքինին։ Սակայն Եհովային գլխավորապես հետաքրքրում է ներքին անձնավորությունը, որը տարիքի հետ զուգընթաց՝ նույնիսկ շատ ավելի կարող է գեղեցկանալ (Առակաց 16։31)։ Ուստի Աստվածաշունչը կանանց հորդորում է. «Ձեր զարդարանքը չ’լինի դրսեւանց մազերի հիւսելը, եւ ոսկեղէնների շարելը կամ շքեղ հանդերձներ հագնելը. այլ սրտի ծածուկ մարդը հեզ եւ հանդարտ հոգու անեղծութեամբը. որ դա Աստուծոյ առաջին շատ թանգագին է» (Ա Պետրոս 3։3, 4)։
2, 3. Առաջին դարում կանայք ինչպե՞ս են նպաստել բարի լուրի տարածմանը, և ինչպե՞ս էր դա կանխագուշակվել։
2 Աստվածաշնչում հիշատակված շատ կանայք դրսևորել են այդպիսի ոգի, որը գովասանքի է արժանի։ Առաջին դարում նրանցից ոմանք առանձնաշնորհում են ունեցել ծառայելու Հիսուսին և նրա առաքյալներին (Ղուկաս 8։1–3)։ Հետագայում նրանք դարձել են եռանդուն ավետարանիչներ. նրանցից ոմանք մեծապես աջակցել են առաջնորդություն վերցրած քրիստոնյա տղամարդկանց, այդ թվում նաև Պողոս առաքյալին։ Ոմանք բացառիկ հյուրընկալություն են ցույց տվել և նույնիսկ իրենց տունն են տրամադրել ժողովի հանդիպումների համար։
3 Գրություններում կանխագուշակվել էր, որ Եհովան կանանց մեծապես մասնակից էր դարձնելու իր նպատակի իրագործմանը։ Օրինակ՝ Յովել 2։28, 29–ում կանխագուշակվել էր, որ և՛ երիտասարդ, և՛ տարեց տղամարդիկ ու կանայք ստանալու էին սուրբ ոգին և մասնակցելու էին Թագավորության բարի լուրը տարածելուն։ Այդ մարգարեությունը սկսեց կատարվել մ.թ. 33–ի Պենտեկոստեին (Գործք 2։1–4, 16–18)։ Ոգով օծված որոշ կանանց շնորհվեցին գերբնական պարգևներ, օրինակ՝ մարգարեանալու պարգևը (Գործք 21։8, 9)։ Ծառայության մեջ իրենց ցուցաբերած եռանդով հավատարիմ քույրերի այս մեծ հոգևոր բանակը նպաստեց, որ առաջին դարում քրիստոնեությունն արագորեն տարածվի։ Փաստորեն, մ.թ. մոտ 60 թ.–ին Պողոս առաքյալը գրեց, որ բարի լուրը «երկնքի տակ լինող բոլոր արարածներին քարոզուեցաւ» (Կողոսացիս 1։23)։
Նրանց գովեցին իրենց քաջության, եռանդի ու հյուրընկալության համար
4. Առաջին դարում քրիստոնյա կանանց գովելու ի՞նչ հիմնավոր պատճառ ուներ Պողոսը։
4 Պողոս առաքյալը բարձր էր գնահատում որոշ կանանց կատարած աշխատանքը, ինչպես որ այսօր քրիստոնյա վերակացուներն են գնահատում եռանդուն կանանց կատարած ծառայությունը։ Պողոսի հիշատակած կանանցից էին՝ ‘Տրիփանոսն ու Տրիփոսը, որ աշխատավորներ էին Տերումը’, նաև ‘Պերսիդե սիրելին, որ շատ աշխատեց Տերումը’ (Հռովմայեցիս 16։12)։ Պողոսը գրեց, որ Եվոդիան և Սյունտիքը «ճիգ թափելով աշխատեցին աւետարանումն [իր] հետ միասին» (Փիլիպպեցիս 4։2, 3)։ Պրիսկիղան իր ամուսնու՝ Ակյուղասի հետ նույնպես ուս–ուսի ծառայեց Պողոսի հետ։ Ակյուղասը և նա նույնիսկ «վտանգեցին իրենց գլուխը» (ԷԹ) հանուն Պողոսի, և դա մղեց վերջինիս գրելու. «Ոչ միայն ես եմ շնորհակալ՝ այլ եւ հեթանոսների բոլոր եկեղեցիները» (Հռովմայեցիս 16։3, 4; Գործք 18։2)։
5, 6. Ո՞ր բնագավառներում է Պրիսկիղան լավ օրինակ քույրերի համար այսօր։
5 Ինչո՞ւ էր Պրիսկիղան եռանդուն և քաջ։ Պատասխանը գտնում ենք Գործք 18։24–26-ում, որտեղ կարդում ենք, որ նա աջակցում էր իր ամուսնուն, որպեսզի վերջինս Ապողոսին՝ մի շնորհալի մարդու, օգներ տեղեկանալու նոր ճշմարտություններին։ Այստեղից ակնհայտ է դառնում, որ Պրիսկիղան Աստծո Խոսքը և առաքյալների ուսուցումները ջանասիրաբար ուսումնասիրում էր։ Արդյունքում նա մշակեց հիանալի հատկություններ, որոնց շնորհիվ թանկագին դարձավ ոչ միայն Աստծո և իր ամուսնու, այլև վաղ քրիստոնեական ժողովի համար։ Այսօր այդպիսի գնահատանքի են արժանի նաև շատ քրիստոնյա քույրեր, ովքեր ջանասիրաբար ուսումնասիրում են Աստվածաշունչը, ինչպես նաև սնվում են այն հոգևոր սննդով, որ տալիս է Եհովան ‘հավատարիմ տնտեսի’ միջոցով (Ղուկաս 12։42)։
6 Ակյուղասն ու Պրիսկիղան արտակարգ հյուրասեր մարդիկ էին։ Պողոսը Կորնթոսում նրանց տանն էր մնում, երբ նրանց հետ միասին վրանագործություն էր անում (Գործք 18։1–3)։ Երբ այդ զույգը տեղափոխվեց Եփեսոս, իսկ հետագայում Հռոմ, նրանք շարունակեցին քրիստոնեական հյուրընկալություն դրսևորել և նույնիսկ իրենց տունը տրամադրեցին ժողովի հանդիպումների համար (Գործք 18։18, 19; Ա Կորնթացիս 16։8, 19)։ Նիմփան և Մարիամը՝ Հովհաննես Մարկոսի մայրը, նույնպես տրամադրել էին իրենց տները ժողովի հանդիպումների համար (Գործք 12։12; Կողոսացիս 4։15)։
Թանկարժեք ներդրում այսօր
7, 8. Ներկայումս շատ քրիստոնյա կանայք սուրբ ծառայության հետ կապված ի՞նչ անուն են ստեղծել, որ արժանի է գովասանքի, և ինչո՞ւմ կարող են նրանք համոզված լինել։
7 Ինչպես որ առաջին դարում, այսօր էլ քրիստոնյա կանայք մեծ դեր են խաղում Աստծո նպատակի իրագործման մեջ, հատկապես ավետարանչական գործում։ Ի՜նչ լավ անուն են ստեղծել այս քույրերը։ Քննարկենք Գվենի օրինակը, որը մինչև մահ (2002 թ.) 50 տարուց ավելի հավատարմորեն ծառայեց Եհովային։ «Գվենը՝ որպես եռանդուն քարոզիչ, քաջ հայտնի էր մեր քաղաքում,— պատմում է նրա ամուսինը։— Յուրաքանչյուր մարդու նա վերաբերվում էր որպես մի անձնավորության, որը գուցե ընդուներ Եհովայի սերը և հավատ ընծայեր նրա խոստումներին։ Գվենի նվիրվածությունն Աստծուն, նրա կազմակերպությանը և մեր ընտանիքին, նաև նրա տված սիրալիր քաջալերանքը, երբ ընկճված էինք լինում, մեծապես օգնել են ինձ և երեխաներիս մեր ամբողջ կյանքում, որն այնքան ուրախություններ է բերել։ Մենք նրան շատ ենք կարոտում»։ Գվենը և իր ամուսինը միասին ապրել են 61 տարի։
8 Տասնյակ հազարավոր քրիստոնյա կանայք՝ ամուսնացած թե չամուսնացած, ծառայում են որպես ռահվիրաներ ու միսիոներներ։ Բավարարվելով կյանքի միայն ամենաանհրաժեշտ բաներով՝ նրանք Թագավորության պատգամը տարածում են ամենուր՝ սկսած աղմկոտ քաղաքներից մինչև հեռավոր վայրերը (Գործք 1։8)։ Շատերը Եհովային լիարժեքորեն ծառայելու համար մի կողմ են դրել տուն կամ երեխաներ ունենալու ծրագրերը։ Կան այնպիսի կանայք, ովքեր հավատարմորեն աջակցում են իրենց ամուսիններին, որոնք ծառայում են որպես շրջագայող վերակացուներ, իսկ հազարավոր քույրեր էլ ծառայում են Բեթելի տներում, որոնք սփռված են աշխարհի տարբեր ծայրերում։ Անկասկած, այս անձնազոհ կանայք «բոլոր ազգերի ցանկալիք[ի]» թվում են, և նրանք Եհովայի տունը փառքով են լցնում (Անգէ 2։7)։
9, 10. Ինչպե՞ս են իրենց գնահատանքն արտահայտել որոշ ընտանիքների անդամներ քրիստոնյա կանանց և մայրերի լավ օրինակի մասին։
9 Ճիշտ է, շատ քրիստոնյա կանայք ընտանեկան պարտականություններ ունեն, սակայն նրանք շարունակում են առաջին տեղում դնել Թագավորության շահերը (Մատթէոս 6։33)։ Մի ամուրի քույր, որը ծառայում է որպես ռահվիրա, գրել է. «Մայրս իր անսասան հավատով ու լավ օրինակով շատ կարևոր դեր է խաղացել այն բանում, որ ես դարձել եմ ռահվիրա։ Նա ռահվիրայական ծառայության մեջ իմ ամենալավ գործընկերներից է եղել»։ Մի ամուսին իր կնոջ մասին, որը հինգ մեծ աղջիկների մայր է, ասում է. «Մեր տունը միշտ մաքուր և կոկիկ է եղել։ Բոնին այն պահել է համեստ վիճակում, որպեսզի մեր ընտանիքը կարողանա կենտրոնացած լինել հոգևորի վրա։ Այն, որ նա մեր նյութական միջոցները խնայողաբար է տնօրինել, հնարավորություն է ստեղծել, որ ես 32 տարի շարունակ աշխատեմ ոչ լրիվ աշխատանքային օր, ինչն օգնել է ինձ ավելի շատ ժամանակ հատկացնել մեր ընտանիքին ու հոգևոր հարցերին։ Կինս նաև սովորեցրել է երեխաներին լինել աշխատասեր։ Ես միայն կարող եմ գովել նրան»։ Այսօր այս ամուսինները ծառայում են Եհովայի վկաների գլխավոր վարչությունում։
10 Մի ամուսին գրում է իր կնոջ մասին, որն արդեն մեծ երեխաների մայր է. «Սյուզանի մեջ ամենից շատ ինձ հիացնում են նրա մեծ սերն Աստծո և մարդկանց հանդեպ, հասկացողությունը, կարեկցանքը և ազնվությունը։ Նա միշտ ունեցել է այն տեսակետը, թե Եհովան արժանի է լավագույնին, որ կարող ենք տալ նրան. դա մի սկզբունք է, որը նա կիրառում է թե՛ որպես Աստծո ծառա և թե՛ որպես մայր»։ Այս ամուսինը իր կնոջ աջակցությամբ հնարավորություն է ունեցել մի շարք հոգևոր առանձնաշնորհումներ ստանձնել, այդ թվում ծառայել որպես երեց, ռահվիրա, շրջանային վերակացուին փոխարինող և Հիվանդանոցների հետ կապի կոմիտեի անդամ։ Որքա՜ն թանկ են այսպիսի կանայք իրենց ամուսինների, հավատակիցների և հատկապես Եհովայի համար (Առակաց 31։28, 30)։
Թանկագին կանայք, որ ամուսին չունեն
11. ա) Ինչպե՞ս է Եհովան իր մտահոգությունն արտահայտել հավատարիմ կանանց՝ հատկապես այրիների մասին։ բ) Քրիստոնյա այրիները և ամուսին չունեցող հավատարիմ քույրերը ինչո՞ւմ կարող են համոզված լինել։
11 Եհովան հաճախ է իր մտահոգությունն արտահայտել այրիների բարօրության մասին (Բ Օրինաց 27։19; Սաղմոս 68։5; Եսայիա 10։1, 2)։ Նա չի փոխվել։ Այսօր նա շարունակում է խորապես հետաքրքրվել ոչ միայն այրիներով, այլև միայնակ մայրերով ու այն կանանցով, ովքեր որոշել են ամուրի մնալ կամ համապատասխան քրիստոնյա կողակից չեն գտել (Մաղաքիա 3։6; Յակոբոս 1։27)։ Եթե դու նրանց թվում ես, ովքեր հավատարմորեն ծառայում են Եհովային՝ առանց քրիստոնյա ամուսնու աջակցության, կարող ես համոզված լինել, որ թանկ ես Աստծո աչքում։
12. ա) Ինչպե՞ս են որոշ քրիստոնյա քույրեր ցույց տալիս իրենց հավատարմությունը Եհովայի հանդեպ։ բ) Ի՞նչ զգացումի դեմ են պայքարում մեր քույրերից ոմանք։
12 Քննարկենք մեր քրիստոնյա քույրերի օրինակը, որոնք չեն ամուսնացել, քանի որ հավատարմորեն հնազանդվում են Եհովայի խորհրդին՝ ամուսնանալ «միայն թէ Տէրով» (Ա Կորնթացիս 7։39; Առակաց 3։1)։ Աստծո Խոսքը նրանց հավաստիացնում է, որ հավատարիմ անձնավորության հետ Եհովան հավատարմորեն կվարվի (Բ Թագաւորաց 22։26, ՆԱ)։ Այնուհանդերձ, նրանցից շատերի համար միայնակ մնալը դժվար է։ Մի քույր ասում է. «Ես վճռել եմ ամուսնանալ միայն Տերով, բայց շատ անգամ արտասվել եմ՝ տեսնելով, որ ընկերուհիներս ամուսնանում են հիանալի եղբայրների հետ, մինչդեռ ես միայնակ եմ»։ Մեկ ուրիշ քույր նշում է. «Ես ծառայում եմ Եհովային արդեն 25 տարի։ Լի եմ նրան հավատարիմ մնալու վճռականությամբ, սակայն միայնության զգացումը հաճախ ճնշում է ինձ»։ Նա ավելացնում է. «Ինձ նման քույրերը քաջալերության մեծ կարիք են զգում»։ Ինչպե՞ս կարող ենք օգնել այս հավատարիմ կանանց։
13. ա) Ի՞նչ ենք սովորում նրանց օրինակից, ովքեր այցելում էին Հեփթայեի աղջկան։ բ) Ուրիշ ինչպե՞ս կարող ենք հոգատարություն ցույց տալ մեր ժողովի ամուրի քույրերի հանդեպ։
13 Հին ժամանակների մի դեպք օգնում է մեզ իմանալ, թե ինչպես կարող ենք դա անել։ Երբ Հեփթայեի աղջիկը հրաժարվեց ամուսին ունենալու հնարավորությունից, մարդիկ հասկացան, որ նա զոհողություն է անում։ Ի՞նչ արվեց նրան քաջալերելու համար։ Աստվածաշնչում ասվում է, որ Իսրայելի աղջիկները ամեն տարի չորս օրով գնում էին գաղաադացի Հեփթայեի աղջկա մոտ ու «գովում» (ՆԱ) նրան (Դատաւորաց 11։30–40)։ Նմանապես մենք պետք է սրտանց գովենք ամուրի քույրերին, որոնք հավատարմորեն հնազանդվում են Աստծո օրենքին։a Ուրիշ ինչպե՞ս կարող ենք ցույց տալ մեր հոգատարությունը։ Մեր աղոթքներում պետք է աղերսենք Եհովային, որ նա աջակցի այս սիրելի, հավատարիմ քույրերին, որ նրանք շարունակեն իրենց անձնվեր ծառայությունը։ Նրանք արժանի են մեր հավաստիացումներին, որ ջերմորեն սիրված են և խորապես գնահատվում են Եհովայի ու ամբողջ քրիստոնեական ժողովի կողմից (Սաղմոս 37։28)։
Ինչպես են միայնակ ծնողները հաջողության հասնում
14, 15. ա) Ինչո՞ւ պետք է քրիստոնյա միայնակ մայրերը օգնության համար դիմեն Եհովային։ բ) Ինչպե՞ս կարող են միայնակ ծնողները գործել իրենց աղոթքներին ներդաշնակ։
14 Միայնակ ծնող հանդիսացող քրիստոնյա կանայք նույնպես բազմաթիվ դժվարություններ են դիմագրավում։ Սակայն նրանք կարող են դիմել Եհովային, որպեսզի նա օգնի իրենց մեծացնել երեխաներին՝ աստվածաշնչյան սկզբունքների համաձայն։ Ճիշտ է, եթե դու միայնակ ծնող ես, չես կարող բոլոր առումներով լինել և՛ մայր, և՛ հայր։ Այնուամենայնիվ, Եհովան կօգնի քեզ գլուխ հանել քո բազմաթիվ պարտականություններից, եթե հավատով խնդրես նրան։ Օրինակ՝ պատկերացրու, որ նպարեղենով լի մի ծանր պայուսակ ունես ու այն պետք է բարձրացնես բարձրահարկ շենքում գտնվող բնակարանդ։ Աստիճաններո՞վ կբարձրանայիր, եթե շենքում վերելակ լիներ։ Իհարկե, ո՛չ։ Նմանապես, ծանր էմոցիոնալ բեռները մի փորձիր տանել միայնակ. չէ՞որ կարող ես Եհովայից օգնություն խնդրել։ Նա հրավիրում է քեզ դիմել իրեն։ Սաղմոս 68։19–ում (ՆԱ) ասվում է. «Օրհնյալ լինի Եհովան, որ օրեցօր կրում է մեր բեռը»։ Ա Պետրոս 5։7–ում նույնպես քեզ առաջարկվում է քո բոլոր հոգսերը գցել Եհովայի վրա, քանի որ «նա հոգս լինի անում [քեզ] համար»։ Երբ խնդիրներն ու անհանգստությունները ճնշում են քեզ, սիրտդ բացիր քո երկնային Հոր առջև ու այդպես վարվիր «անդադար» (Ա Թեսաղոնիկեցիս 5։17; Սաղմոս 18։6; 55։22)։
15 Օրինակ՝ եթե մայր ես, անշուշտ անհանգստացած ես, թե դպրոցում ինչ ազդեցություն կարող են թողնել հասակակիցները երեխաներիդ վրա, կամ մտահոգվում ես այն բանով, ինչը որ կարող է փորձել նրանց անարատությունը (Ա Կորնթացիս 15։33)։ Այս անհանգստությունները հիմնավոր են։ Բայց դրանք նաև աղոթքի թեմաներ են։ Ինչո՞ւ չաղոթել այդպիսի բաների մասին երեխաներիդ հետ, նախքան նրանք դպրոց կգնան, թերևս օրվա խոսքը միասին քննարկելուց հետո։ Սրտաբուխ, կոնկրետ աղոթքները կարող են մեծապես տպավորվել երեխաների մտքում։ Իսկ ամենակարևորը, Եհովան օրհնում է, երբ համբերատար կերպով ձգտում ես Աստծո Խոսքը արմատավորել երեխաների սրտում (Բ Օրինաց 6։6, 7; Առակաց 22։6)։ Հիշի՛ր՝ «Տիրոջ աչքերն արդարների վերայ են, եւ նորա ականջները դէպի նորանց աղօթքը» (Ա Պետրոս 3։12; Փիլիպպեցիս 4։6, 7)։
16, 17. ա) Ի՞նչ է ասում մի որդի իր մոր դրսևորած սիրո մասին։ բ) Ինչպե՞ս են ազդել մոր հոգևոր հայացքները նրա երեխաների վրա։
16 Քննարկենք Օլիվիայի՝ վեց երեխա ունեցող մի մոր օրինակը։ Ամուսինը, որ չէր ընդունում նրա հավատը, լքեց ընտանիքը ճիշտ այն ժամանակ, երբ ծնվեց վերջին երեխան, բայց Օլիվիան պատրաստակամորեն հանձն առավ դաստիարակել իր երեխաներին Աստծո ճանապարհով։ Օլիվիայի որդին՝ Դարենը, որն այժմ 31 տարեկան է և ծառայում է որպես երեց ու ռահվիրա, այդ ժամանակ մոտ 5 տարեկան էր։ Ի հավելումն Օլիվիայի անհանգստությունների՝ Դարենը լուրջ հիվանդություն ձեռք բերեց, որը մինչև այժմ էլ նրան անհանգստացնում է։ Խորհրդածելով իր մանկության մասին՝ Դարենը գրում է. «Մինչև հիմա հիշում եմ, թե հիվանդանոցում մահճակալիս նստած ինչպես էի անձկագին սպասում մորս։ Նա նստում էր կողքիս և ամեն օր Աստվածաշունչ կարդում ինձ համար։ Հետո երգում էր «Շնորհակալ ենք, Եհովա» վերնագրով Թագավորության երգը։b Մինչև օրս դա իմ սիրած երգն է»։
17 Այն, որ Օլիվիան վստահում և սիրում էր Եհովային, նպաստեց, որ նա հաջողությամբ կատարի միայնակ մոր դերը (Առակաց 3։5, 6)։ Նրա հիանալի տրամադրվածությունը արտացոլվում էր այն նպատակների մեջ, որոնք դնում էր իր երեխաների առջև։ «Մայրս միշտ քաջալերում էր մեզ լիաժամ ծառայության նպատակ հետապնդել,— ասում է Դարենը։— Արդյունքում ես ու հինգ քույրերիցս չորսը սկսեցինք լիաժամ ծառայել։ Սակայն մայրս ուրիշների մոտ երբեք չի պարծեցել այս բաներով։ Ես ձգտում եմ ընդօրինակել նրա հիանալի հատկությունները»։ Ճիշտ է, ոչ բոլոր երեխաներն են ի վերջո դառնում Եհովայի ծառաներ, ինչպես Օլիվիայի երեխաները։ Բայց երբ մայրը իր ձեռքից եկածն անում է Աստվածաշնչի սկզբունքներով ապրելու համար, նա կարող է համոզված լինել, որ Եհովան կառաջնորդի ու սիրով կաջակցի իրեն (Սաղմոս 32։8)։
18. Ինչպե՞ս կարող ենք ցույց տալ, որ գնահատում ենք Եհովայի կողմից տրված քրիստոնեական ժողովը։
18 Աստված իր ծառաներին մեծապես աջակցում է քրիստոնեական ժողովի, այնտեղ կանոնավորապես տրվող հոգևոր սննդի, քրիստոնեական եղբայրության և հոգևորապես հասուն՝ մարդկանց տեսքով ‘պարգևների’ միջոցով (Եփեսացիս 4։8)։ Հավատարիմ երեցները ծանր աշխատանք են տանում ժողովում գտնվող բոլոր անհատներին կերտելու համար՝ առանձնահատուկ ուշադրություն հատկացնելով «որբերին եւ այրիներին.... նորանց նեղութեան մէջ» (Յակոբոս 1։27)։ Ուրեմն՝ մոտիկ մնա Աստծո ժողովրդին ու երբեք մի առանձնացիր նրանից (Առակաց 18։1, ԱԱ, ծան.; Հռովմայեցիս 14։7)։
Հնազանդության գեղեցկությունը
19. Կնոջ հնազանդությունը ինչո՞ւ չի նշանակում, որ նա ստորադաս դիրք ունի, և ո՞ր աստվածաշնչյան օրինակն է թիկունք կանգնում այս մտքին։
19 Եհովան կնոջը ստեղծել է որպես տղամարդու լրացում (Ծննդոց 2։18, ՆԱ)։ Ուստի հնազանդվել ամուսնուն ոչ մի դեպքում չի նշանակում ստորադաս լինել։ Ընդհակառակը՝ դա վեհացնում է կնոջը՝ հնարավորություն տալով, որ նա իր բազմաթիվ ունակություններն ու հմտություններն օգտագործի Աստծո կամքին ներդաշնակ։ «Առակաց» գրքի 31–րդ գլխում նկարագրվում են այն բազմաթիվ գործերը, որոնք հին Իսրայելում կատարում էր շնորհալի կինը։ Նա օգնում էր կարիքավորներին, նաև խաղողի այգի տնկում ու հող գնում։ Այո՛, «նորա վերայ վստահ [էր] իր մարդի սիրտը, եւ շահի կարօտութիւն [չէր] լինիլ» (11, 16, 20 համարներ)։
20. ա) Ինչպե՞ս պետք է քրիստոնյա կինը վերաբերվի Աստծուց տրված իր ունակություններին։ բ) Ինչպիսի՞ լավ հատկություններ է Եսթերը դրսևորել, և արդյունքում ինչպե՞ս Եհովան կարողացավ գործել նրա միջոցով։
20 Համեստ աստվածավախ կինը փառասիրաբար իրեն չի բարձրացնում կամ ամուսնու հետ մրցակցում (Առակաց 16։18)։ Նա չի ձգտում ինքնագոհացման՝ գլխավորապես աշխարհիկ նպատակներ հետապնդելով, այլ իր աստվածատուր պարգևները հիմնականում օգտագործում է ծառայելու համար մյուսներին՝ իր ընտանիքին, հավատակիցներին, հարևաններին ու նախևառաջ Եհովային (Գաղատացիս 6։10; Տիտոս 2։3–5)։ Քննարկենք Եսթեր թագուհու օրինակը, որ գրի է առնված Աստվածաշնչում։ Թեև Եսթերը գեղեցիկ արտաքին ուներ, նա համեստ էր ու հնազանդ (Եսթեր 2։13, 15)։ Լինելով ամուսնացած՝ նա խոր հարգանք էր ցույց տալիս իր ամուսնու՝ Ասուերոս թագավորի հանդեպ՝ ի տարբերություն թագավորի նախկին կնոջ՝ Վաշթիի (Եսթեր 1։10–12; 2։16, 17)։ Անգամ թագուհի դառնալուց հետո Եսթերը, հարգանք ցուցաբերելով իր մեծ հորեղբորորդու՝ Մուրթքեի հանդեպ, շարունակում էր հաշվի առնել նրա կարծիքը։ Սակայն նա ամենևին էլ թույլ անձնավորություն չէր։ Նա համարձակորեն քողազերծեց Համանին՝ իշխանություն ունեցող և դաժան մի մարդու, որը ծրագրում էր բնաջնջել հրեաներին։ Եհովան Եսթերին կարևոր դեր հատկացրեց իր ժողովրդին պահպանելու գործում (Եսթեր 3։8–4։17; 7։1–10; 9։13)։
21. Ինչպե՞ս կարող է քրիստոնյա կինը ավելի թանկագին դառնալ Եհովայի համար։
21 Պարզ է, որ ինչպես անցյալում, այնպես էլ այսօր աստվածապաշտ կանայք բացառիկ նվիրվածություն են ցույց տվել Եհովային ու նրա երկրպագությանը։ Այդ պատճառով էլ աստվածավախ կանայք թանկագին են Եհովայի աչքում։ Քրիստոնյա՛ քույրեր, թո՛ւյլ տվեք, որ Եհովան իր ոգու միջոցով աստիճանաբար ձևավորի ձեզ ու դարձնի էլ ավելի ցանկալի «անօթ». մեկը, որ «ամեն բարի գործերի համար պատրաստուած» է (Բ Տիմոթէոս 2։21; Հռովմայեցիս 12։2)։ Այս թանկագին երկրպագուների մասին Աստծո Խոսքն ասում է. «Տուէք նորան իր ձեռքի արդիւնքիցը, եւ նորա գործերը գովեն նորան դռներումը» (Առակաց 31։31)։ Թող որ սա ճշմարիտ լինի ձեզանից յուրաքանչյուրի առնչությամբ։
[ծանոթագրություններ]
a Այն մասին, թե ինչպես կարելի է գովել նրանց, կարող եք կարդալ «Դիտարանի» 2002 թ. մարտի 15–ի համարում, էջ 26-28։
b Երգ 212, «Երգով փառաբանենք Եհովային» երգարան։ Հրատարակվել է Եհովայի վկաների կողմից։
Հիշո՞ւմ եք
• Ինչպե՞ս առաջին դարի որոշ քրիստոնյա կանայք թանկագին դարձան Եհովայի աչքում։
• Ինչպե՞ս են մեր ժամանակներում շատ քույրեր թանկագին դարձել Եհովայի համար։
• Ինչպե՞ս է Եհովան աջակցում միայնակ մայրերին և ամուսին չունեցող քույրերին։
• Ինչպե՞ս կարող է կինը սրտանց հարգանք ցուցաբերել գլխավորության սկզբունքի հանդեպ։
[շրջանակ 17–րդ էջի վրա]
Օրինակներ՝ խորհրդածելու համար
Կցանկանայի՞ք Աստվածաշնչում հիշատակված հավատարիմ կանանց մի քանի այլ օրինակներ էլ քննել։ Եթե այո, ապա հաճեցեք կարդալ ներքևում բերված համարները։ Հիշատակված անհատների մասին խորհելիս փորձեք նկատել այն սկզբունքները, որոնք ձեր կյանքում կկարողանաք ավելի մեծ չափով կիրառել (Հռովմայեցիս 15։4)։
◆ Սարրան (Ծննդոց 12։1, 5; 13։18ա; 21։9–12 Ա Պետրոս 3։5, 6)։
◆ Առատաձեռն իսրայելացի կանայք (Ելից 35։5, 22, 25, 26; 36։3–7; Ղուկաս 21։1–4)։
◆ Դեբորան (Դատաւորաց 4։1–5։31)։
◆ Հռութը (Հռութ 1։4, 5, 16, 17; 2։2, 3, 11–13; 4։15)։
◆ Սունամացի կինը (Դ Թագաւորաց 4։8–37)։
◆ Քանանացի կինը (Մատթէոս 15։22–28)։
◆ Մարթան և Մարիամը (Մարկոս 14։3–9, Ղուկաս 10։38–42; Յովհաննէս 11։17–29; 12։1–8)։
◆ Տաբիթան (Գործք 9։36–41)։
◆ Փիլիպպոսի չորս աղջիկները (Գործք 21։9)։
◆ Փիբեն (Հռովմայեցիս 16։1, 2)։
[նկար 15–րդ էջի վրա]
Գովո՞ւմ եք չամուսնացած քույրերին, որոնք հավատարմորեն հնազանդվում են Աստծո օրենքին
[նկար 16–րդ էջի վրա]
Ի՞նչ առանձնահատուկ խնդրանքներ կարող եք հիշատակել ձեր աղոթքներում երեխաների՝ դպրոց գնալուց առաջ