Pemansut

23 “Anang nusui berita pelesu. Anang nulung orang jai lalu meri saksi laban deka ngemediska orang bukai. 2 Anang enggau orang mayuh ngereja utai ti jai. Lebuh kita meri saksi maya bisi laya nyadi, anang nyebut utai ti bula ketegal deka ngelantangka ati orang mayuh. 3 Lebuh mutarka laya entara orang miskin enggau orang bukai, anang nyukung orang miskin semina ketegal iya miskin.

4 “Enti kita tepedaka sapi tauka keledai munsuh kita lepas, kita mesti mai jelu nya pulai ngagai iya. 5 Enti kita meda keledai munsuh kita labuh ketegal mai barang ti berat, anang terus mupuk ari endur nya. Kita mesti nulung iya ngangkatka barang nya ari keledai nya.

6 “Anang ngakim kes orang miskin ngena chara ti enda adil.

7 “Anang bisi sangkut-paut lebuh orang nyebut jaku tuduh ti pelesu. Lalu anang ngasuh orang ke nadai penyalah enggau orang ke lurus diukum mati, laban Aku enda ngelepaska orang ke jai.

8 “Anang nerima rasuah, laban rasuah ulih mampul mata orang ari meda utai ti betul, lalu ulih ngubah jaku orang ke lurus.

9 “Anang ngasuh orang asing idup merinsa. Kita nemu baka ni asai iya nyadi orang asing, laban kita empu kala nyadi orang asing ba menua Ejip.

10 “Pengelama enam taun, kita ulih betanam lalu ngetau utai ke ditanam kita. 11 Tang ba taun ti ketujuh, anang nanam utai ba ladang kita, lalu tejuka ladang nya pia aja. Enti bisi utai ke tumbuh ba dia, awakka orang miskin ngumpul iya. Nama-nama utai ke enda digumpul sida, awakka jelu ti liar makai iya. Kita mesti ngereja utai ti sama ngagai kebun anggur enggau ladang buah kana kita.

12 “Kita ulih kereja pengelama enam hari. Tang anang bekereja ba hari ti ketujuh, ngambika sapi kita, keledai kita, ulun kita, enggau orang asing ulih rehat.

13 “Tentuka kita ngereja semua utai ke udah dipadahka Aku ngagai kita. Anang nyebut nama petara-petara bukai. Tentuka nama sida enda pansut ari mulut kita.

14 “Tiap taun, kita mesti ngintu tiga iti pengerami ke Aku. 15 Ba bulan Abib,* kita mesti ngintu Pengerami Roti ti Enda Beragi ba maya ke udah ditetapka, laban nya meh maya kita pansut ari Ejip. Pengelama tujuh hari, kita patut makai roti ti enda beragi, baka ke udah dipadahka Aku ngagai kita. Nadai siku pan kita tau mansang ngagai Aku enti kita nadai mai utai. 16 Kita mega mesti ngintu Pengerami Ngetau* lebuh kita ngetau asil ti keterubah ari ladang kita. Ba ujung taun, kita mesti ngintu Pengerami Belangkau lebuh kita ngumpul asil ti penudi ke diketau kita ari ladang kita. 17 Tiga kali setaun, semua bala kita ke lelaki mesti datai ngagai Aku, Jehovah, Tuan ti bendar.

18 “Anang nyerahka darah korban jelu ngagai Aku begulai enggau nama-nama utai ke beragi. Lemak jelu ke diserahka maya pengerami Aku enda tau ditejuka sampai pagi hari siti.

19 “Kita patut mai asil kita ti keterubah sereta ke pemadu manah ari ladang kita ngagai rumah Aku, Jehovah, Petara kita.

“Anang ngerebus dagin anak kambin dalam ai tusu indai iya.

20 “Aku deka nganjung siku melikat mupuk dulu ari kita kena nyaga kita lebuh kita bejalai, lalu mai kita ngagai endur ke udah disediaka Aku. 21 Dinga sereta ngasika utai ke dipadahka iya. Iya datai dalam nama Aku. Nya alai, anang ngelaban iya, laban iya tentu enda ngampunka penyalah kita. 22 Enti kita ngasika semua utai ke dipadahka iya lalu ngereja semua utai ke diasuh Aku, Aku deka ngelaban orang ke ngelaban kita, lalu Aku deka nyerang orang ke nyerang kita. 23 Melikat Aku deka mupuk dulu ari kita, lalu mai kita ngagai orang Amor, orang Het, orang Peris, orang Kanaan, orang Ibi, enggau orang Jebus, lalu Aku deka ngemunaska semua sida. 24 Anang besugang ngagai petara-petara sida tauka tetarit ati deka nyembah petara-petara sida. Anang nunda utai ke biasa dikereja sida. Tang, kita mesti nganchurka patung petara sida sereta mechahka tiang batu keramat sida. 25 Kita mesti nyembah Aku, Jehovah, Petara kita, lalu Aku deka merekatka kita ngambika kita bisi roti enggau ai. Aku deka muai penyakit ari bala kita. 26 Bala indu ba menua kita enda gugur anak tauka mandul. Aku deka ngasuh kita idup panjai umur.

27 “Aku deka ngasuh bala munsuh kita takutka Aku sebedau kita datai, lalu Aku deka ngasuh tiap iti bansa ke ngelaban kita charut. Aku deka ngasuh semua munsuh kita alah lalu ngerarika diri. 28 Aku deka ngasuh bala munsuh kita lemi semengat* sebedau kita datai. Aku deka muru orang Ibi, orang Kanaan, enggau orang Het ari kita. 29 Aku enda muru sida dalam timpuh setaun, ngambika menua nya enda puang, lalu jelu ti liar ke ulih ngemediska kita enda majak nambah. 30 Aku deka muru sida mimit-mimit nyentukka kita udah chukup mayuh lalu ulih ngambi menua nya.

31 “Sempadan menua ke deka diberi Aku ngagai kita deka berengkah ari Tasik Mirah nyentuk ngagai Tasik Mediterranean,* sereta berengkah ari menua puang nyentuk ngagai Sungai Eupratis. Aku deka nyerahka orang ke diau ba menua nya ngagai kita, lalu kita deka muru sida. 32 Anang ngaga sempekat enggau sida tauka enggau petara-petara sida. 33 Sida enda tau diau ba menua kita enggaika sida ngasuh kita bedosa ngagai Aku. Enti kita nyembah petara-petara sida, nya tentu deka manjuk kita.”