Daniel

11 “Ba taun ti keterubah Darius ari Media merintah, aku datai laban deka nyukung sereta ngelindung Mikael. 2 Utai ke deka dipadahka aku ngagai nuan tu amat:

“Bisi tiga iku da agi raja deka datai ba Persia. Raja ti keempat deka ngumpul mayuh agi pengaya enti dibandingka enggau raja ke bukai. Lebuh raja nya nyadi kering ketegal pengaya iya, iya deka ngena semua utai ngelaban perintah Greece.

3 “Siku raja ti amat bekuasa deka datai. Iya deka merintah kawasan ti besai, lalu ngereja utai sepeneka ati iya. 4 Lebuh kuasa iya majak besai, perintah iya deka bepechah lalu bebagi ngagai arah ti enda sama,* tang ukai ngagai bala peturun iya. Perintah iya deka dichabut lalu diempu orang bukai, tang kawasan ke diperintah sida enda besai baka kawasan ke diperintah iya.

5 “Siku tuai ke dibaruh kuasa iya deka nyadi kering. Iya nya meh raja selatan. Tang siku orang deka ngalahka iya, lalu deka nyadi bekuasa agi ari iya.

6 “Pengudah beberapa taun, seduai iya deka beserakup. Anak indu raja selatan deka mansang ngagai raja utara laban deka ngaga sempekat. Tang kuasa anak indu raja nya deka lenyau, lalu kuasa raja nya mega deka lenyau. Anak indu raja nya deka diserahka ngagai orang bukai, nyengkaum orang ke mai iya, orang ke ngadaka iya, sereta orang ke ngeringka iya maya nya. 7 Iya ke tumbuh ari urat anak indu raja nya deka datai nganti raja nya.* Iya deka mansang ngagai raban soldadu raja utara, lalu ngepung kubu raja nya. Iya deka nyerang lalu ngalahka sida. 8 Iya deka mai bala petara sida, patung sida ke digaga ari besi, utai sida ti berega ke digaga ari pirak enggau emas, sereta orang ke udah ditangkap iya ngagai Ejip. Pengelama beberapa taun, iya deka ngenyauhka diri ari raja utara. 9 Udah nya, raja utara deka nyerang perintah raja selatan, tang iya deka pulai ngagai menua iya empu.

10 “Bala anak raja nya* deka nyediaka diri beperang, lalu ngempuruka raban soldadu ti amat mayuh. Iya deka mansang lalu nyerang baka ai bah. Tang iya deka datai baru, lalu beperang nyentuk ngagai kubu iya empu.

11 “Raja selatan deka ringat, lalu deka belaban enggau raja utara. Iya deka ngempuruka mayuh orang, tang orang ti mayuh nya deka diserahka ngagai raja nya.* 12 Orang ti mayuh nya deka dibai. Ati raja nya deka nyadi sumbung, lalu iya deka ngemunaska bepuluh ribu iku orang. Taja pan iya bekuasa, iya enda ngena kuasa iya enggau manah.

13 “Raja utara deka datai baru, lalu deka ngempuruka mayuh agi orang ari ke sebedau tu. Ba pengujung timpuh, iya nya pengudah beberapa taun, iya tentu deka datai enggau raban soldadu ti besai ke chukup disikap enggau senyata. 14 Mayuh orang deka angkat ngelaban raja selatan.

“Orang ke ganas* ari bansa nuan deka dibai ngambika sida nguji ngamatka jaku benabi, tang sida enda mujur.*

15 “Raja utara deka datai lalu nirika benteng kena ngepung kuta ke dikelingi dinding ti teguh. Bala soldadu selatan enda ulih belaban agi, nyengkaum bala soldadu sida ke pemadu manah. Semua sida nadai daya agi deka belaban. 16 Raja nya deka nyerang raja selatan, lalu iya ngereja utai sepeneka ati iya. Nadai siku pan ulih telabanka iya. Iya deka bediri ba Menua ti Lawa, lalu iya bisi kuasa ngemunaska orang. 17 Iya deka bisi pengingin ti kuat deka datai enggau semua kuasa perintah iya, lalu iya deka ngaga sempekat enggau raja nya. Utai ke digaga iya deka bisi asil. Iya deka diberi pemendar ngemunaska siku anak indu. Anak indu nya enda ulih mujur, lalu iya enda diempu raja nya agi. 18 Raja nya deka malik ngagai kawasan tebing tasik, lalu nguasa mayuh endur. Siku ketuai soldadu deka ngetuka penyumbung iya, ngambika ketuai soldadu nya enda dikemaluka agi, laban iya ke ngemaluka deka dikemaluka. 19 Udah nya, iya* deka pulai baru ngagai kubu-kubu ba menua iya empu. Iya deka labuh sereta enda ulih mujur, lalu iya enda ulih ditemu agi.

20 “Siku orang deka nganti iya. Orang nya deka ngasuh pengumpul chukai* bejalai nengah perintah ti amat manah nya. Taja pia, iya deka dipunaska pengudah beberapa hari, tang ukai ketegal pengeringat tauka perang.

21 “Udah nya, siku orang ke nadai guna* deka nganti iya. Orang nya enda diberi mulia perintah nya. Iya deka datai maya orang idup likun* lalu ngerampas perintah nya ngena chara nipu. 22 Iya deka ngalahka soldadu ke baka ai bah. Sida deka dipunaska. Kepala sempekat mega deka dipunaska. 23 Ketegal sida beserakup enggau iya, iya deka majak nipu. Iya deka angkat lalu nyadi kuat ketegal bulih tulung ari siti bansa ti mit. 24 Ba maya orang idup likun, iya deka datai* ngagai begian ke pemadu kaya ba wilayah nya. Iya deka ngereja utai ke nadai kala digaga aki ini iya. Iya deka nyadung utai ke udah dirampas, barang ke diulih maya beperang, enggau reta tengkira ngagai bala rayat. Iya deka ngaga pelan kena nyerang endur ke bekubu, tang nya enda lama aja.

25 “Iya deka ngempuruka kuasa iya, lalu ngemeranika diri ngelaban raja selatan. Iya deka mai raban soldadu ti mayuh kena ngelaban raja nya. Raja selatan deka nyediaka diri beperang, lalu mai naka pemayuh soldadu ti kering. Tang iya* enda ulih tan, laban sida deka ngaga pelan kena ngelaban iya. 26 Orang ke makai pemakai iya ti nyamai deka ngasuh iya labuh.

“Bala soldadu iya deka anyut, lalu mayuh orang deka dibunuh.

27 “Dua iku raja nya selalu bisi ati deka ngereja utai ti jai. Seduai iya deka duduk ba mija ti sama, lalu ngemulaka pangan diri. Tang seduai iya enda ulih mujur, laban pengujung deka datai ba maya ke udah ditetapka.

28 “Iya* deka pulai ngagai menua iya mai mayuh reta tengkira. Iya bisi ati deka ngelaban sempekat ti kudus. Iya deka ngereja nya, lalu pulai ngagai menua iya.

29 “Ba maya ke udah ditetapka, iya deka pulai lalu nyerang menua selatan, tang kali tu enda sama baka ke sebedau tu. 30 Nya ketegal kapal-kapal Kitim deka datai nyerang iya, lalu iya deka ngemaruhka diri.

“Iya deka pulai lalu ngelepaska pengeringat iya ngagai sempekat ti kudus. Iya deka ngereja utai ke diperundingka iya. Iya deka pulai lalu beratika orang ke ninggalka sempekat ti kudus. 31 Bala soldadu iya deka angkat lalu ngamahka endur ti kudus, iya nya kubu, lalu sida mega deka ngetuka pemeri ninting hari.

“Sida deka nirika utai ti keji ke nganchurka utai.

32 “Ngena jaku manis,* iya deka nipu orang ke jai ke ngelanggar sempekat, ngambika orang nya ngelaban Petara. Tang, orang ke ngelala Petara ke disembah diri deka mengkang tegap sereta mujur. 33 Sida ke nemu berunding deka nulung mayuh orang bulih penemu. Pengelama beberapa hari, sida deka labuh ketegal pedang enggau api, sereta ketegal ditangkap enggau dirumpak. 34 Lebuh sida labuh, sida deka nerima tulung mimit. Mayuh orang deka nitihka sida, tang orang nya enda ikhlas.* 35 Sekeda ari sida ke nemu berunding deka labuh. Ketegal sida, orang deka digaga nyadi tulin, diberesi, sereta digaga nyadi tuchi nyentukka timpuh ti penudi, laban maya ke udah ditetapka bedau datai.

36 “Raja nya* deka ngereja utai sepeneka ati iya, lalu iya deka ngeninggika diri, sereta ngemuliaka diri lebih agi ari semua petara. Iya deka nyebut utai ti jai kena ngelaban Petara atas semua petara. Iya deka mujur nyentukka timpuh pengeringat abis, laban utai ke udah ditentuka mesti nyadi. 37 Iya enda bebasaka Petara aki ini iya. Iya mega enda bebasaka bala petara ke bukai, sereta enda ibuhka utai ke dikinginka bala indu. Tang, iya deka ngeninggika diri lebih agi ari semua orang. 38 Iya* deka meri mulia ngagai petara ke bekuasa atas semua kubu, iya nya petara ke enda dikelala aki ini iya. Iya deka ngemuliaka petara nya ngena emas, pirak, batu ti berega, enggau mayuh macham utai ti berega. 39 Nengah bantu petara asing, iya deka mujur nyerang kuta bekubu ti pemadu tegap. Iya deka meri mulia ti besai ngagai sida ke nyukung iya,* lalu iya deka ngasuh sida bekuasa atas mayuh orang. Iya deka bebagika tanah enti iya dibayar ngena rega ti ngena.

40 “Ba timpuh ti penudi, iya enggau raja selatan deka ngeju* pangan diri. Raja utara deka nyerang iya ngena kerita kuda, bala soldadu ke nepan kuda, sereta mayuh kapal. Iya deka tama ngagai mayuh menua, lalu nyerang sida baka ai bah. 41 Iya mega deka tama ngagai Menua ti Lawa, lalu mayuh menua deka dialahka. Tang orang Edom, orang Moap, enggau raban orang ti pemadu penting ari orang Amon deka ngelepaska diri ari iya. 42 Iya deka majak ngena kuasa iya nyerang mayuh menua, tang menua Ejip enda ulih ngelepaska diri. 43 Iya deka bekuasa atas reta ti dilalaika, baka emas, pirak, enggau semua reta Ejip ti berega. Orang Libia enggau orang Etiopia deka nitihka iya.

44 “Tang, riput ke datai ari timur enggau utara deka ngachau iya. Nya alai, iya balat ringat. Iya deka mupuk lalu munuh sereta ngemunaska mayuh orang. 45 Iya deka nirika langkau kain diraja ba entara tasik ti besai enggau gunung ti kudus ba Menua ti Lawa. Udah nya, iya deka dipunaska, lalu nadai orang deka nulung iya.