Mark

5 Udah nya, sida datai ba menua Gerasa ba seberai danau. 2 Sepengudah Jesus pansut ari perau, siku lelaki ke dirasuk melikat ti jai, ke datai ari pendam mansang ngagai iya. 3 Iya diau ba sebelah pendam, lalu nyentuk ngagai maya nya nadai orang ulih nanchang iya, indah ngena rantai pan enda ulih. 4 Orang suah ngerantai jari enggau kaki iya, tang iya ulih mutuska enggau mechahka rantai nya. Nadai orang ke chukup kering ulih masung* iya. 5 Siang malam, iya rauh-rauh ba sebelah pendam enggau ba sebelah bukit, lalu ngurik diri ngena batu. 6 Tang lebuh iya tepedaka Jesus ari jauh, iya belanda lalu besugang ba mua Jesus. 7 Udah nya, iya manjung enggau inggar: “Jesus, Anak Petara ti Pemadu Tinggi, nama kebuah nuan kitu? Besumpah meh dalam nama Petara, nuan enda merinsaka aku!” 8 Tu ketegal sebedau nya, Jesus udah madah ngagai iya: “Melikat ti jai, pansut nuan ari lelaki tu!” 9 Jesus nanya iya: “Sapa nama nuan?” Lalu melikat ti jai nya nyaut: “Nama aku Legiun,* laban kami mayuh!” 10 Lalu iya suah amat minta Jesus ngambika enda muru sida ari endur nya.

11 Maya nya, mayuh babi benung makai ba sebelah bukit. 12 Nya alai, bala melikat ti jai minta Jesus: “Asuh kami tama ngagai raban babi nya.” 13 Jesus lalu ngemendarka nya. Nya alai, melikat ti jai nya pansut ari orang nya, lalu tama ngagai babi. Raban babi nya lalu belanda terejun nurun tingkah ngagai danau, lalu lemas. Pemayuh babi nya kira 2,000 iku. 14 Orang ke ngibun raban babi nya rari, lalu nusui pasal utai ke udah nyadi nya ba nengeri enggau ba menua pesisir. Nya alai, orang mayuh pan datai, deka meda utai ke udah nyadi nya. 15 Sida datai ngagai Jesus lalu meda orang ke udah dirasuk Legiun.* Semua sida takut meda iya duduk dia, udah begari, sereta enda agi gila. 16 Pia mega, orang ke udah meda utai ke nyadi nya madah ngagai orang mayuh ke datai, pasal utai ke nyadi ba lelaki ke dirasuk melikat ti jai sereta utai ke nyadi ba raban babi nya. 17 Nya alai, sida bebendar minta Jesus mupuk ari menua sida.

18 Lebuh Jesus benung nepan perau, orang ke udah dirasuk melikat ti jai nya lalu bebendar minta Jesus mai iya. 19 Tang Jesus enggai mai iya, lalu bejaku ngagai iya: “Pulai ke rumah ngagai kaban belayan nuan, lalu padahka ngagai sida semua utai ti udah dikereja Jehovah ke nuan, enggau pengasih ke diayanka Iya ngagai nuan.” 20 Lelaki nya pan mupuk, lalu madah ngagai orang ba Dekapolis* pasal semua utai ke udah digaga Jesus ke iya. Semua orang ba dia balat alit ati.

21 Jesus nepan perau, lalu pulai baru ke seberai danau. Lebuh iya ba tebing danau, mayuh orang datai ngagai iya. 22 Siku tuai balai gempuru, ke benama Jairus, datai. Lebuh iya meda Jesus, iya lalu nyungkurka diri ba kaki Jesus. 23 Iya enda ngetu-ngetu minta kasih ari Jesus. Ku iya: “Anak indu aku ke agi mit benung sakit raya.* Datai meh, lalu engkahka jari nuan ba atas iya, ngambika iya gerai lalu idup!” 24 Maya Jesus mupuk enggau iya, mayuh orang nitihka Jesus lalu ngempit iya.

25 Nyadi ba dia, bisi siku indu ke balat datai kain* pengelama 12 taun. 26 Iya balat pedis maya berubat enggau mayuh lutur. Duit iya nyau abis dikena berubat. Taja pia iya lalu enda gerai, tang majak balat sakit. 27 Lebuh iya ninga rita pasal Jesus, iya nyelitka diri ba bala orang mayuh, mansang ngagai Jesus ari belakang, lalu negu gari luar Jesus. 28 Laban iya majak nyebut: “Enti aku semina negu gari luar iya, aku tentu deka gerai.” 29 Lalu tekala nya iya ngetu datai kain. Iya ngasaika tubuh diri udah digeraika ari penyakit ti balat nya.

30 Jesus lalu tekala nya nemu bisi kuasa udah pansut ari iya. Iya malik ngagai orang mayuh lalu nanya: “Sapa negu gari aku?” 31 Murid iya lalu nyaut iya: “Peda nuan pemayuh orang ngempit nuan, lalu agi ga nuan nanya, ‘Sapa negu aku?’” 32 Jesus majak malik kia-kia ngiga orang ke udah negu iya. 33 Pengudah indu nya nemu utai ke nyadi ba iya, iya kesal sereta takut. Iya besugang ba mua Jesus, lalu madah ngagai Jesus semua utai ti udah nyadi. 34 Ku Jesus bejaku ngagai iya: “Anak, pengarap nuan udah ngeraika nuan. Mupuk meh, anang irau.* Nuan udah gerai ari penyakit nuan ti balat nya.”

35 Lebuh Jesus agi benung bejaku, sekeda orang ari rumah Jairus datai, lalu madah ngagai Jairus: “Anak indu nuan udah mati! Anang ngiruh Pengajar nya agi.” 36 Tang Jesus ninga utai ku sida, lalu ku iya bejaku ngagai Jairus: “Anang irau, tang ayanka pengarap.” 37 Jesus enda ngasuh sapa-sapa nitihka iya, kelimpah ari Peter, James, enggau menyadi James ke benama John.

38 Lebuh sida datai ba rumah Jairus, Jesus meda orang begau, sereta ninga orang nyau bekeduie sereta rauh-rauh nyabak. 39 Lebuh iya tama, iya bejaku ngagai sida: “Nama kebuah kita begau lalu nyabak baka tu? Anak mit tu ukai mati, tang iya semina tinduk aja.” 40 Sida pan ketawa ngeleseka iya. Pengudah Jesus ngasuh semua sida pansut, iya mai apai indai anak mit nya sereta bala murid ke bisi enggau iya, tama ngagai endur anak mit nya gali. 41 Iya megai jari anak mit nya lalu bejaku: “Talita kumi,” reti nya: “Endu, aku madah ngagai nuan, angkat nuan!” 42 Anak mit nya lalu angkat tekala nya, lalu belabuh bejalai. (Umur iya 12 taun.) Maya nya, apai indai iya enda ulih nagang asai ati diri laban kelalu balat gaga. 43 Tang Jesus bebendar* enda ngasuh sida madahka utai ke nyadi nya ngagai orang. Udah nya, iya lalu ngasuh sida meri anak mit nya utai diempa.