John

12 Enam hari sebedau Pengerami Paska, Jesus datai ba Betani. Lasarus ke udah diidupka Jesus ari mati, diau ba dia. 2 Nya alai, sida nyediaka pengerami makai besai ke Jesus ba dia. Marta nyediaka pemakai. Tang Lasarus enggau orang bukai makai* enggau Jesus. 3 Udah nya, Maria ngambi kira-kira setengah liter* minyak wangi. Minyak wangi nya minyak nard* ti tulin sereta mar amat rega. Iya nuangka minyak wangi nya ba kaki Jesus lalu ngendas kaki Jesus ngena buk iya. Rumah nya penuh laban bau minyak wangi nya. 4 Tang siku ari bala murid Jesus, iya nya Judas Iskariot, ke deka nyerahka iya ngagai munsuh madahka: 5 “Nama kebuah minyak wangi nya enda dijual ngena rega 300 denari* lalu duit nya diberi ngagai orang ke seranta?” 6 Iya nyebut munyi nya ukai ketegal iya ibuhka orang ke seranta, tang ketegal iya penchuri. Iya meh ke megai kutak duit, lalu iya suah ngenchuri duit ke disimpan dalam kutak nya. 7 Nya alai, Jesus madahka: “Anang ngachau iya. Awakka iya ngereja nya, laban iya benung ngereja utai ke deka digaga ba hari aku dikuburka. 8 Orang ke seranta deka seruran bisi enggau kita, tang aku enda seruran bisi enggau kita.”

9 Maya nya, seraban besai orang Judah nemu Jesus bisi ba Betani. Nya alai, sida datai ukai semina ketegal deka meda Jesus, tang sida mega deka meda Lasarus ke udah diidupka Jesus ari mati. 10 Bala tuai imam mega belabuh ngiga chara kena munuh Lasarus. 11 Laban ketegal iya, mayuh orang Judah ngagai Betani lalu arapka Jesus.

12 Hari siti, orang mayuh ke udah datai ngagai pengerami nya ninga rita Jesus benung mansang ngagai Jerusalem. 13 Nya alai, sida lalu ngambi dan kayu engkerema lalu mansang betemu enggau Jesus. Ku sida iya manjung: “Kami besampi,* selamatka iya! Beberekat meh Raja orang Israel ke datai dalam nama Jehovah!” 14 Lebuh Jesus tetemuka siku anak keledai, iya nepan jelu nya baka ke udah ditulis: 15 “Anang takut, anak indu Sion.* Peda kita! Raja kita datai nepan anak keledai.” 16 Keterubah iya, bala murid Jesus enda meretika utai nya. Tang pengudah Jesus dimuliaka, nya baru sida teingatka, utai ke digaga orang mayuh nya endang amat sama baka utai ke ditulis ba Bup Kudus pasal iya.

17 Kelimpah ari nya, orang mayuh ke bisi enggau Jesus lebuh iya ngangauka Lasarus pansut ari kubur lalu ngidupka iya ari mati, majak meri saksi pasal Jesus. 18 Ketegal nya mega, orang mayuh datai deka betemu enggau iya laban sida udah ninga iya ngereja pengawa ajih nya. 19 Nya alai, orang Parisi bejaku enggau pangan diri: “Peda kita! Lebu ngapa pengawa kitai. Semua orang ba dunya udah nitihka iya.”

20 Maya nya, sekeda orang Gerika mega bisi datai nyembah Petara ba pengerami nya. 21 Sida mansang ngagai Philip ke datai ari Betsaida, Galili. Ku sida bejaku: “Tuan, kami deka betemu enggau Jesus.” 22 Nyadi, Philip madah ngagai Andrew. Lalu seduai iya madah ngagai Jesus.

23 Tang ku Jesus nyaut sida: “Maya udah datai alai Anak Mensia dimuliaka. 24 Enggau bendar aku madah ngagai kita: Enti seleka gandum enda labuh ke tanah lalu mati, iya deka meruan nyadi seleka gandum. Tang enti iya mati, iya deka mansutka mayuh gandum. 25 Barang sapa ke sayauka nyawa diri, deka ngelenyauka nyawa iya. Tang barang sapa ke begedika nyawa diri ba dunya tu, deka nyelamatka nyawa iya lalu bulih pengidup ti meruan belama iya. 26 Barang sapa ke deka nyadi ulun aku, iya patut nitihka aku. Ba dini alai aku, ba dia meh alai iya. Barang sapa ke nyadi ulun aku, deka dipebasa Apai aku. 27 Diatu, ati aku balat tusah. Lalu, nama utai ke patut disebut aku? Apai, selamatka aku ari maya ti balat tusah tu. Tang ketegal maya ti tusah tu meh, aku datai ke dunya. 28 Apai, muliaka nama Nuan.” Udah nya, nyawa ari serega bejaku: “Aku udah ngemuliaka nama Aku, lalu deka ngemuliaka iya baru.”

29 Orang mayuh ke bediri ba dia madahka bunyi ke didinga sida nya bunyi guntur. Sida ke bukai madahka: “Bisi melikat bejaku enggau iya.” 30 Ku Jesus nyaut: “Nyawa ke ulih didinga nya ukai ke aku, tang ke kita. 31 Diatu dunya tu benung diakim lalu pemerintah dunya tu deka diburu. 32 Tang lebuh aku dituatka,* aku deka mai semua macham orang ngagai aku.” 33 Kebendar iya, Jesus bejaku munyi nya kena nunjukka chara iya deka mati. 34 Udah nya, orang mayuh nyaut iya: “Ari Adat, kami ninga Kristus deka idup belama iya. Nya alai, nama kebuah nuan madahka Anak Mensia patut dituatka?* Sapa Anak Mensia nya?” 35 Ku Jesus nyaut: “Penampak agi ulih enggau kita enda lama. Bejalai meh lebuh penampak nya agi bisi, ngambika pemetang enda bekuasa atas kita. Barang sapa ke bejalai dalam pemetang, enda nemu kini ke penunga diri. 36 Arap meh ke penampak lebuh penampak nya agi bisi, ngambika kita ulih nyadi anak penampak.”

Pengudah Jesus nyebut munyi nya, iya mupuk lalu belalai ari sida. 37 Taja pan iya udah ngereja mayuh pengawa ajih ba mua sida, tang sida agi enda arapka iya. 38 Lalu tu ngamatka jaku ti udah disebut Nabi Isaiah: “Jehovah, sapa ke deka arapka berita ke ditusui kami? Ngagai sapa Jehovah deka mandangka kuasa* Iya?” 39 Isaiah mega madahka kebuah sida enda arap: 40 “Iya udah ngasuh mata sida buta lalu ati sida kieh.* Enggau nya, sida enda ulih meda lalu ati sida enda ulih mereti. Sida mega enda nguingka diri ngagai Aku ngambika digeraika.” 41 Isaiah nyebut nya laban iya udah meda mulia Kristus. 42 Kebendar iya, mayuh orang indah mayuh bala ketuai arapka Jesus. Tang sida enda berani ngaku nya ketegal orang Parisi, laban sida enggai diburu ari balai gempuru. 43 Sida rindu agi nerima mulia ari mensia, ukai mulia ari Petara.

44 Ku Jesus bejaku: “Barang sapa ke arapka aku, ukai aja arapka aku tang mega arapka Iya ke ngirumka aku. 45 Barang sapa ke meda aku, mega meda Iya ke ngirumka aku. 46 Aku datai nyadi penampak ke dunya tu, ngambika genap iku orang ke arapka aku enda agi diau dalam pemetang. 47 Enti orang ninga jaku aku tang enda nitihka iya, aku enda ngakim orang nya, laban aku ukai datai ngakim dunya tang nyelamatka dunya. 48 Barang sapa ke nulak aku sereta enggai nerima jaku aku deka diakim. Jaku ke disebut aku nya meh ke deka ngakim iya jemah ila.* 49 Aku enda bejaku nitihka peneka aku empu, tang Apai ke ngirumka aku meh ke meri pesan pasal utai ke patut dipadah sereta disebut aku. 50 Aku mega nemu pesan Iya meri pengidup ti meruan belama iya. Nama-nama utai ke disebut aku nya, endang utai ke dipadahka Apai ngagai aku.”