Surat Kereja Rasul
16 Paul datai ba Derbe, lalu udah nya iya mupuk ngagai Listra. Ba dia, bisi siku murid ke benama Timoti. Indai iya orang bansa Judah ke arapka Jesus. Tang apai iya orang bansa Gerika. 2 Timoti dipuji bala menyadi ba Listra enggau Ikonium. 3 Paul madahka pengingin iya ke deka mai Timoti enggau iya. Nya alai, Paul mai Timoti lalu nyunat* iya, laban semua orang Judah ba endur ke deka digagai Paul, nemu apai Timoti nya orang bansa Gerika. 4 Lebuh sida bejalai ari siti nengeri ngagai siti nengeri, sida nusui pesan bala rasul enggau bala tuai gempuru ba Jerusalem ngagai bala menyadi ba dia, ngambika bala menyadi ba dia nitihka pesan nya. 5 Nya alai, pengarap raban gempuru ba dia majak tegap, lalu ninting hari penyampau sida majak nambah.
6 Sida bejalai nengah Prigia enggau menua Galatia, laban kuasa kudus Petara nagang sida ngerembaika jaku Petara ba Asia. 7 Lebuh sida datai ba Misia, sida nguji deka mansang ngagai Bitinia, tang Jesus nengah kuasa kudus Petara nagang sida kia. 8 Nya alai, sida mansa Misia lalu mupuk ngagai Troas. 9 Malam nya, Paul bulih genera. Iya meda siku lelaki ari Masedonia bediri lalu bebendar minta iya datai. Ku lelaki nya: “Datai meh ngagai Masedonia lalu tulung meh kami.” 10 Sepengudah Paul bulih genera nya, kami nguji mupuk ngagai Masedonia laban kami ngumbai Petara udah ngasuh kami ngerembaika Berita Manah ngagai orang ba dia.
11 Nya alai, kami belayar terus ari Troas ngagai Samotras. Hari siti, kami datai ba Neapolis. 12 Ari nya, kami mupuk ngagai Pilipi, indu nengeri Masedonia ke dipegai Rome. Kami diau beberapa hari ba nengeri nya. 13 Maya Hari Sabat, kami ngagai tebing sungai ba luar pintu penama nengeri nya. Kami ngumbai ba dia bisi endur orang besampi. Nya alai, kami duduk lalu berandau enggau bala indu ke begelumu ba dia. 14 Siku ari bala indu ke ningaka Paul bejaku nya benama Lidia. Iya orang ke nyembah Petara lalu datai ari nengeri Tiatira. Iya nyual kain enggau gari ke bechura* ungu. Jehovah muka besai ati iya, ngambika iya ulih mendingka jaku Paul enggau manah. 15 Pengudah Lidia enggau semua sida ke diau serumah enggau iya dibaptisa, iya bebendar minta kami datai. Ku iya: “Enti kita ngasaika aku tetap ati ngagai Jehovah, datai meh lalu diau meh ba rumah aku.” Iya majak ngumbuk kami nyentukka kami nyau nitihka iya.
16 Nyadi sekali, lebuh kami benung mansang ngagai endur orang besampi, kami betemu enggau siku ulun indu. Iya dirasuk melikat ti jai ke ngasuh iya nemu betilit nasit.* Ketegal pengawa iya nya, bala tuan iya bulih untung ti besai. 17 Indu nya majak nitihka Paul enggau kami. Ku iya bejaku enggau nyawa ti inggar: “Sida tu ulun Petara ti Pemadu Tinggi. Sida madah ngagai kita baka ni kita ulih diselamatka.” 18 Iya majak ngereja nya beberapa hari, nyentukka Paul nyau enda tan agi. Nya alai, Paul nguing lalu bejaku ngagai melikat ti jai nya: “Dalam nama Jesus Kristus, aku ngasuh nuan pansut ari indu tu.” Tekala nya mega, melikat ti jai nya pansut ari indu nya.
19 Lebuh bala tuan iya nemu sida nyau nadai agi chara kena bulih untung, sida nangkap Paul enggau Silas lalu ngirit seduai iya ngagai bala pemerintah ba pasar. 20 Sida mai Paul enggau Silas ngagai bala pemerintah nengeri nya lalu bejaku: “Dua iku orang Judah tu ngasuh nengeri kitai balat charut. 21 Seduai iya ngajar adat ke enda ulih diterima tauka dititihka kitai, laban kitai orang Rome.” 22 Orang mayuh pan lalu angkat ngelaban seduai iya. Bala pemerintah ba nengeri nya nyarikka gari Paul enggau Silas lalu ngasuh seduai iya dipalu ngena kayu. 23 Pengudah dipalu bekali-kali, seduai iya dikurung ba rumah jil. Jejaga rumah jil diasuh nyaga seduai iya enggau terit. 24 Pengudah iya nerima pesan nya, iya ngurung seduai iya ba bilik jil ke pemadu ujung, lalu nganchin kaki seduai iya ngena kanchin kayu.
25 Kira-kira ba urung tengah malam, Paul enggau Silas besampi sereta belagu muji Petara. Bala orang jil ke bukai ningaka seduai iya. 26 Enda memukai, tanah berenyang ti balat nyadi, nyentukka pugu rumah jil nya nyau beguyat. Tekala nya, semua pintu rumah jil tebuka, lalu rantai ke dikena nanchang semua orang jil tebeleka magang. 27 Lebuh jejaga rumah jil nya tedani, iya meda pintu rumah jil tebuka magang. Iya ngumbai semua orang jil ba dia udah ngerarika diri. Nya alai, iya nyintak* pedang iya lalu deka munuh diri. 28 Tang Paul ngangau enggau nyawa ti inggar: “Anang munuh diri. Semua kami agi ba ditu. 29 Nya alai, jejaga rumah jil nya ngasuh orang mai lampu, lalu udah nya, iya belanda tama ke dalam. Iya balat takut lalu besugang ba mua Paul enggau Silas. 30 Udah nya, iya mai seduai iya pansut lalu nanya: “Tuan, nama patut digaga aku ngambika ulih selamat?” 31 Seduai iya madahka: “Arap meh ke Tuan Jesus, lalu nuan enggau orang ke diau serumah enggau nuan deka selamat.” 32 Udah nya, seduai iya nusui jaku Jehovah ngagai iya sereta semua orang ke diau serumah enggau iya. 33 Malam nya mega, iya mai Paul enggau Silas lalu masu telih seduai iya. Udah nya, iya enggau semua orang ke diau serumah enggau iya lalu dibaptisa tekala nya. 34 Iya mai seduai iya ke rumah iya, lalu nyediaka pemakai ke seduai iya. Iya enggau sida serumah balat gaga ati laban iya diatu udah arapka Petara.
35 Lebuh hari udah siang, bala pemerintah nengeri nya nganjung bala pegawai lalu ngasuh sida madahka pesan tu: “Lepaska seduai iya.” 36 Jejaga rumah jil nya madahka pesan sida ngagai Paul. Ku iya: “Bala pemerintah nengeri udah nganjung orang kena ngelepaska seduai. Seduai ulih pansut diatu. Mupuk meh! Anang irau.”* 37 Tang ku Paul bejaku ngagai sida: “Kami duai peranak* menua Rome. Tang sida udah malu kami duai ba mua orang mayuh. Sida ngejil kami duai taja pan bedau dipechara. Kati diatu sida deka ngasuh kami duai mupuk belalai? Enggai kami duai! Awakka sida empu ke datai lalu mai kami duai pansut.” 38 Bala pegawai nya nusui jaku iya ngagai bala pemerintah nengeri nya. Lebuh sida nemu Paul enggau Silas nya peranak* Rome, sida nyau takut. 39 Nya alai, sida datai lalu minta ampun ngagai Paul enggau Silas, lalu mai seduai iya pansut ari rumah jil. Udah nya, sida minta Paul enggau Silas mupuk ari nengeri nya. 40 Tang pengudah pansut ari rumah jil, Paul enggau Silas mansang ngagai rumah Lidia. Seduai iya betemu enggau bala menyadi ba dia, lalu pengudah meransang sida, seduai iya pan lalu mupuk.