Satu Korint

9 Endaka aku ulih ngereja sebarang utai ke dikedekaka aku? Endaka aku siku rasul? Endaka aku kala meda Tuan kitai, Jesus? Endaka kita nya asil ari pengawa aku ke Tuan kitai? 2 Enti sema orang madahka aku tu ukai rasul, tang ba kita, aku tu endang rasul, enda pia? Kita nya tanda* ke ngesahka aku tu rasul ke bekereja ke Tuan.

3 Tu meh saut aku ngagai orang ke ngakim aku: 4 Endaka kami bisi hak makai enggau ngirup? 5 Baka bala rasul ke bukai, bala menyadi Tuan kitai, enggau Kefas,* endaka kami mega bisi hak kawin enggau menyadi indu ke arap lalu mai iya enggau kami? 6 Tauka kati semina aku enggau Barnabas aja ke nadai hak ngetu ngiga belanja? 7 Ni bagi soldadu ke patut mansutka belanja kediri empu, lebuh gawa nyadi soldadu? Ni bagi orang ke nanam buah anggur ba kebun diri, tang enda makai buah iya? Ni bagi pengibun bedus ke enda ngirup ai tusu ke diulih ari raban bedus iya empu?

8 Kati utai ke disebut aku nya semina ari runding mensia? Endaka Adat mega nyebut utai ti sama? 9 Adat Moses madahka: “Anang mampul mulut sapi ke lelaki lebuh sapi nya benung ngindik gandum.” Kati Petara irau pasal sapi nya? 10 Tauka Iya bejaku munyi nya ke penguntung kitai? Kebendar iya, pesan tu ditulis ke penguntung kitai, laban orang ke ngeradu tanah enggau orang ke ngindik gandum tentu ngarapka diri bulih ungkup diri.

11 Enti kami udah nanam utai ke diterima ari Petara ba bala kita, kati nya salah enti kami minta bantu ari kita nyediaka utai ke diguna kami? 12 Enti orang bukai bisi hak nerima bantu ari kita, endaka kami lebih agi bisi hak ari sida? Taja pia, kami enda ngena hak nya, tang kami indah ngenatka diri napi semua utai, ngambika pengawa nusui Berita Manah pasal Kristus enda diketu ketegal kami. 13 Kati kita enda nemu, orang ke bejalaika pengawa ti tuchi bulih pemakai ari Rumah Sembiang Petara, lalu sida ke seruran gawa ba alta* nerima sebagi ari utai ke diberi ba alta nya? 14 Pia mega, Tuan kitai udah ngasuh sida ke nusui Berita Manah nerima utai dikena beridup nengah Berita Manah.

15 Tang sekali pan nadai meh aku ngena atur ke disediaka nya. Indah aku nulis pasal pekara tu ukai ketegal aku deka bulih penguntung ngena atur nya. Manah agi aku mati ari ke ngereja nya! Nadai orang ulih ngerampas utai ke dikemegahka aku. 16 Taja pan aku nusui Berita Manah, tang nya ukai kebuah aku temegahka diri, laban nya endang pengawa ke patut digaga aku. Kebendar nya, tulah meh aku enti aku enda nusui Berita Manah! 17 Enti aku ngereja pengawa tu ari ati, aku deka bulih upah. Tang taja pan aku lembau ngereja pengawa tu, aku agi dikearapka bejalaika tanggung pengawa ke diterima aku. 18 Enti pia, nama upah aku? Tu meh upah aku: Aku ulih nusui Berita Manah lalu nadai minta bayar. Enggau nya, aku enda salah guna hak aku ke nyadi orang ke nusui Berita Manah.

19 Taja pan aku ukai ulun sapa-sapa, tang aku ngasuh diri empu nyadi ulun semua orang, ngambika aku ulih nulung enggau naka pemayuh orang ke ulih ditulung aku. 20 Lebuh aku begulai enggau orang Judah, aku nyadi baka orang Judah, ngambika aku ulih nulung sida. Taja pan aku empu enda ba baruh Adat, tang lebuh begulai enggau orang ke ba baruh Adat, aku nyadi baka orang ke ba baruh Adat, ngambika aku ulih nulung sida. 21 Taja pan aku empu ba baruh adat Petara enggau adat Kristus, tang lebuh begulai enggau orang ke enda ba baruh adat, aku nyadi orang ke enda ba baruh adat, ngambika aku ulih nulung sida. 22 Lebuh aku begulai enggau orang ke lemi, aku nyadi orang ke lemi, ngambika aku ulih nulung sida. Aku udah ngereja semua utai ke ulih aku, kena nulung semua macham orang, ngambika aku ulih nyelamatka sekeda ari sida ngena semua macham chara. 23 Aku sanggup ngereja nama-nama utai ketegal Berita Manah, ngambika aku ulih nusui Berita nya ngagai orang bukai.

24 Kati kita enda nemu, ba pekit belanda, mayuh orang deka belanda, tang semina siku aja ke bulih prais? Nya alai, belanda meh ngambika kita bulih prais nya. 25 Tiap iku orang* ke bepekit patut nagang diri ba semua utai. Nya ketegal sida deka ngulihka makota ke enda tan lama, tang kitai deka ngulihka makota ke tan belama iya. 26 Nya alai, aku enda belanda enggau nadai tuju, lalu aku nentuka diri enda mukut angin. 27 Aku malu* tubuh aku, lalu ngaga tubuh aku nyadi ulun, ngambika pengudah aku nginjil ngagai orang bukai, aku empu enda ditulak Petara.*