Ulang Adat

24 “Enti siku lelaki jadi enggau siku indu, tang udah nya iya begedika bini iya nya ketegal tetemuka bini iya nya udah ngereja utai ti enda senunuh, iya mesti meri surat sarak ngagai bini iya nya, lalu ngasuh bini iya angkat ari rumah iya. 2 Pengudah iya ninggalka rumah lelaki nya, iya tau jadi enggau lelaki bukai. 3 Enti lelaki ti kedua nya mega begedika iya, lalu meri iya surat sarak, lalu ngasuh iya angkat ari rumah iya, tauka enti lelaki ti kedua nya mati, 4 laki dulu iya enda tau jadi enggau iya baru, laban iya udah ngamahka diri. Jehovah amat begedika utai ti baka nya. Kita enda tau ngereja dosa ke baka nya ba menua ke deka diberi Petara kita, Jehovah, ngagai kita nyadika pesaka.

5 “Lebuh siku lelaki baru udah kawin, iya enda tau nyadi soldadu tauka diasuh ngereja pengawa bukai pengelama setaun. Enggau nya, iya ulih diau ba rumah begulai enggau bini iya sereta ngelantangka bini iya.

6 “Anang ngambi batu kisar ke dipusin ngena jari tauka begian atas batu kisar nya nyadika jamin utai ke dijali, laban enti kita ngereja nya, kita ngambi utai ke dikena orang nya ngidupka diri.*

7 “Enti sesiku penculik ditemu nabanka orang ke sebansa enggau iya, lalu iya jai ngelayan orang nya sereta nyual orang nya, penculik nya mesti diukum mati. Kita mesti muai utai ti jai ari bala kita.

8 “Enti penyakit kulit ti balat* bisi ngelekai ngagai bala kita, kita mesti nitihka semua utai ke diasuh bala imam Lewi. Kita mesti nentuka diri amat-amat ngereja semua utai ke dipadahka aku ngagai sida. 9 Kingatka utai ke udah dikereja Jehovah, Petara kita, ngagai Miriam lebuh kita ba rantau jalai pansut ari menua Ejip.

10 “Lebuh kita nyali utai ngagai orang bukai, anang tama ngagai rumah orang nya ngambi utai ke deka diberi orang nya nyadika jamin. 11 Kita patut nganti ba luar, lalu ngawakka orang nya mai utai ke deka diberi iya nyadika jamin ngagai kita. 12 Enti orang nya miskin, anang nyimpan gari ke diberi iya ngagai kita nyadika jamin nyentuk ngagai hari siti. 13 Pulaika gari nya ngagai iya enggau jampat lebuh mata panas padam, ngambika iya ulih ngena gari nya lebuh iya tinduk. Iya deka minta Petara merekatka kita, lalu Jehovah, Petara kita, deka ngumbai kita lurus.

14 “Anang nipu pekereja kita ti miskin sereta idup tusah, sekalika iya orang ke sebansa enggau kita tauka orang asing ke diau ba kuta kita. 15 Kita mesti mayar gaji iya ninting hari sebedau mata panas padam, laban iya miskin lalu iya begunaka duit nya kena iya ngidupka diri. Enti kita enda ngereja nya, iya deka besebana ngagai Jehovah pasal kita, lalu kita deka dikumbai bedosa.

16 “Apai enda patut diukum mati ketegal dosa anak, lalu anak enda patut diukum mati ketegal dosa apai. Tiap iku orang patut diukum mati ketegal dosa diri.

17 “Anang enda adil ngagai orang asing tauka ngagai anak ke nadai apai,* lalu anang ngambi gari indu ke balu nyadika jamin utai ke dijali. 18 Anang enda ingat, suba kita kala nyadi ulun ba menua Ejip, lalu Jehovah, Petara kita, udah ngelepaska kita ari menua nya. Nya meh kebuah aku ngasuh kita ngereja semua utai tu.

19 “Pengudah kita ngetau asil ba ladang kita lalu kita enda ingat mai sesikat ari utai ke diketau kita, anang pulai ngambi utai nya. Tinggalka utai nya ke orang asing, anak ke nadai apai, sereta bala sida ke balu. Enggau nya, Jehovah, Petara kita, deka merekatka semua utai ke dikereja kita.

20 “Pengudah kita malu dan pun kayu kana kena ngulihka buah iya, anang pulai baru ngereja utai ti sama. Tinggalka buah ke agi ba pun kayu nya ke orang asing, anak ke nadai apai, sereta sida ke balu.

21 “Pengudah kita ngumpul buah anggur ari ladang kita, anang pulai baru ngumpul buah ke tinggal. Tinggalka buah nya ke orang asing, anak ke nadai apai, sereta sida ke balu. 22 Anang enda ingat, suba kita kala nyadi ulun ba menua Ejip. Nya meh kebuah aku ngasuh kita ngereja semua utai tu.