Pemandang

1 Pemandang tu ari Jesus Kristus, lalu Petara udah meri tu ngagai iya, ngambika iya ulih mandangka ngagai bala ulun Petara pasal utai ke mesti nyadi enda lama da agi. Jesus nganjung melikat iya ngambika nusui pasal utai nya ngena tanda ngagai ulun Petara,* John. 2 John meri saksi pasal jaku Petara sereta pasal saksi ke diberi Jesus Kristus. Au, John meri saksi pasal semua utai ke dipeda iya. 3 Gaga ati meh orang ke macha jaku ti benabi tu enggau inggar sereta sida ke ningaka jaku ti benabi tu lalu ngasika utai ke ditulis ba dia, laban maya ke ditetapka Petara udah semak.

4 Aku, John, nulis tu ngagai tujuh iti raban gempuru* ba Asia:*

Awakka kita nerima pemanah ati ti besai sereta pengelantang ari “Iya ke bisi diatu, ke bisi suba, enggau ke deka datai,” ari tujuh iti kuasa ke bisi ba mua kerusi diraja Iya, 5 sereta ari Jesus Kristus, iya nya “Saksi ti Setia,” “iya ti keterubah diidupka baru ari bala orang ke udah mati,” sereta “Pemerintah atas bala raja ba dunya.”

Iya rinduka kitai lalu ngelepaska kitai ari dosa nengah darah iya empu. 6 Iya ngaga kitai nyadi raja sereta imam ke Petara enggau Apai iya. Arapka mulia enggau kuasa iya meruan belama iya, Amin.

7 Peda! Iya datai ngena remang lalu semua orang deka meda iya, nyengkaum orang ke udah ngerejang iya ngena sangkuh. Ketegal iya, semua raban bansa ba dunya deka mandam dada diri laban balat tusah ati. Au, Amin.

8 Ku Petara Jehovah* bejaku: “Aku meh Alfa enggau Omega.* Aku meh ke bisi diatu, ke bisi suba, sereta ke deka datai. Aku meh ke Pemadu Bekuasa.”

9 Aku tu John, menyadi kita ke nitihka Jesus, ke sama enggau kita bebendar nentuka diri tan ati, ke sama merinsa, sereta sama nyadi raja. Aku ba Pulau Patmos ketegal aku bejaku pasal Petara sereta meri saksi pasal Jesus. 10 Kuasa kudus* mai aku ngagai hari Tuan, lalu aku ninga nyawa ti inggar baka bunyi terumpit ari belakang aku. 11 Ku nyawa nya madahka: “Tuliska utai ke dipeda nuan ba gulung surat, lalu kirumka ngagai tujuh iti raban gempuru, iya nya raban gempuru ba Epesus, Smirna, Pergamum, Tiatira, Sardis, Piladelpia, enggau Laudisia.”

12 Aku malik ke belakang deka meda sapa ke bejaku enggau aku. Tang lebuh aku malik, aku meda tujuh iti penuduk lampu ke digaga ari emas. 13 Ba tengah semua penuduk lampu nya, bisi siku orang ke baka anak mensia. Iya ngena gari ti panjai nyentuk ngagai kaki, lalu dada iya dibelit kain selampai emas. 14 Kelimpah ari nya, pala enggau buk iya burak baka bulu bedus sereta baka seleju, lalu mata iya mau baka api. 15 Kaki iya baka temaga ti tulin ke manchar enggau terang ba dalam serumbung api, lalu nyawa iya baka bunyi ai ti deras. 16 Ba jari kanan iya bisi tujuh igi bintang, lalu siti pedang ke bemata dua ti panjai sereta tajam pansut ari mulut iya. Mua iya baka mata panas ke benung manchar enggau balat terang. 17 Lebuh aku meda iya, aku rebah ba kaki iya baka orang mati.

Iya ngengkahka jari kanan iya ba aku, lalu madahka: “Anang takut. Aku meh ti Keterubah enggau Kepenudi, 18 sereta ke idup. Aku kala mati, tang peda, diatu aku idup belama iya, lalu aku bisi kunchi pemati enggau kunchi Kubur.* 19 Nya alai, tuliska semua utai ke udah dipeda nuan, utai ke benung nyadi, sereta utai ke deka nyadi udah nya. 20 Tujuh igi bintang ke dipeda nuan ba jari kanan aku enggau tujuh iti penuduk lampu ke digaga ari emas nya, resia ti kudus. Tujuh igi bintang nya reti iya bala melikat ba tujuh iti raban gempuru, lalu tujuh iti penuduk lampu nya reti iya tujuh iti raban gempuru.