Pemandang

22 Melikat nya nunjukka ngagai aku sungai ke bisi ai pengidup, lalu sungai nya chiru baka kristal. Sungai nya rarat ari kerusi diraja Petara enggau kerusi diraja Anak Bedus 2 ngagai tengah-tengah jalai besai nengeri nya. Ba kedua-dua piak sungai nya, bisi mayuh pun kayu pengidup ke bebuah 12 kali setaun. Reti nya, pun kayu nya bebuah sebulan sekali. Daun pun kayu nya ulih ngeraika semua bansa.

3 Semua sumpah deka nadai agi. Kerusi diraja Petara enggau kerusi diraja Anak Bedus deka bisi ba nengeri nya, lalu bala ulun Petara deka bejalaika pengawa ti tuchi ke Iya. 4 Sida deka meda mua Iya lalu nama Iya deka ditulis ba kening sida. 5 Pia mega, malam deka nadai agi lalu sida enda begunaka panchar lampu tauka panchar mata panas, laban Petara Jehovah deka manchar sida lalu sida deka merintah nyadi raja nyentuk ke belama iya.

6 Melikat nya bejaku ngagai aku: “Jaku tu amat sereta tau dikearapka. Jehovah, Petara ke bejaku nengah bala nabi, udah nganjung melikat Iya ngagai bala ulun Iya lalu nunjukka utai ke mesti nyadi enda lama da agi. 7 Peda! Aku deka datai enggau jampat. Gaga ati meh orang ke ngasika jaku ti benabi ba gulung surat tu.”

8 Aku, John, aku meh ke ninga sereta meda semua utai tu. Pengudah ninga sereta meda semua nya, aku lalu besugang nyembah melikat ke mandangka semua nya ngagai aku. 9 Tang iya madah ngagai aku: “Bejimat! Anang baka nya! Sembah meh Petara. Aku mega ulun baka nuan enggau baka bala menyadi nuan ke mega bala nabi sereta baka sida ke ngasika jaku ba gulung surat tu.”

10 Iya mega madah ngagai aku: “Anang ngeresiaka jaku benabi ba gulung surat tu laban maya ke udah ditetapka nyau semak. 11 Awakka orang ke enda lurus terus ngereja utai ti enda lurus, lalu awakka orang ke kamah terus ngereja utai ti kamah. Tang, awakka orang ke lurus terus ngereja utai ti lurus, lalu awakka orang ke kudus terus ngereja utai ti kudus.

12 “‘Peda! Aku deka datai enggau jampat. Upah kena malas pengawa tiap iku orang bisi dibai aku. 13 Aku meh Alfa enggau Omega.* Aku meh ti keterubah enggau kepenudi. Aku meh pun enggau pengujung. 14 Gaga ati meh orang ke nuchi baju jubah sida, ngambika sida bisi hak makai buah ari pun kayu pengidup sereta ngambika sida ulih tama ngagai nengeri nya nengah pintu penama iya. 15 Ba luar bisi bala ukui,* orang ke ngereja pengawa ti bekaul enggau melikat ti jai,* orang ke ngereja ulah seks ti kamah,* bala pemunuh, orang ke nyembah engkeramba, sereta semua orang ke rindu bula nengah jaku enggau pengawa.’

16 “‘Aku, Jesus, udah nganjung melikat aku ngambika madah semua pekara tu ngagai kita ke penguntung bala raban gempuru. Aku meh urat enggau peturun David. Aku meh bintang pagi ti terang.’”

17 Kuasa kudus Petara enggau pengantin indu nya majak nyebut, “Aram kitu!” Lalu awakka orang ke ninga nya mega madahka, “Aram kitu!” Awakka orang ke aus datai. Sapa-sapa ke ka, ulih ngambi ai pengidup enggau pechuma.

18 “Aku madah ngagai semua orang ke ninga jaku benabi ba gulung surat tu: Enti bisi orang nambahka utai ba jaku tu, Petara deka nambahka bencana ke ditulis ba gulung surat tu ngagai orang nya. 19 Enti orang muai utai ari jaku benabi ba gulung surat tu, Petara enda ngemendarka iya nerima utai ti manah ke ditulis ba gulung surat tu. Petara enda ngemendarka iya makai buah ari pun kayu pengidup, lalu iya enda tau tama ngagai nengeri ti kudus nya.

20 “Iya ke madahka pasal utai tu madahka, ‘Au, aku deka datai enggau jampat.’”

“Amin! Datai meh, Tuan Jesus.”

21 Ngarapka Tuan Jesus ngayanka pemanah ati iya ti besai ngagai bala nembiak Petara ti kudus.