Pemandang

2 “Tuliska tu ngagai melikat raban gempuru ba Epesus: Tu meh utai ke dipadah iya ke megai tujuh igi bintang ba jari kanan iya, sereta ke bejalai ba tengah-tengah tujuh iti penuduk lampu ke digaga ari emas: 2 ‘Aku nemu utai ke digaga nuan, pemagas nuan, sereta pemendar nuan ke ngayanka diri tan ati. Nuan enda nerima orang ke jai. Nuan nguji orang ke ngumbai diri rasul taja pan sida ukai, lalu nuan nemu sida bula. 3 Ketegal nama aku, nuan mega terus tan ati, enda putus asa, sereta enda lemi semengat. 4 Taja pia, bisi utai ke enda ngelantangka ati aku. Nuan udah ngelengkaka pengerindu nuan ti keterubah iya suba.

5 “‘Nya alai, perundingka meh, ni penyauh nuan udah labuh. Udah nya, nesal ati meh lalu kereja utai ke udah digaga nuan keterubah iya suba. Enti nuan enda nesal ati, aku deka datai lalu muai penuduk lampu nuan ari endur iya. 6 Taja pia, nuan bisi ngereja utai ti manah: Nuan begedika pengawa raban pengarap Nikolaus, ke mega dipegedika aku. 7 Awakka orang ke bisi pending, mendingka utai ke disebut kuasa kudus ngagai tiap iti raban gempuru: Ngagai orang ke menang belaban, aku deka ngemendarka iya makai buah ari pun kayu ke meri pengidup, ke bisi ba paradais* Petara.’

8 “Tuliska tu ngagai melikat raban gempuru ba Smirna: Tu meh utai ke dipadah iya, iya nya, ‘Keterubah enggau Kepenudi,’ sereta ke udah mati tang idup baru: 9 ‘Aku nemu nuan merinsa sereta miskin, tang kebendar iya nuan kaya. Aku mega nemu orang ke madahka diri orang Judah bejaku ngelaban nuan, tang kebendar iya sida ukai orang Judah. Sida seraban orang* ke enggi Sitan. 10 Anang takutka pemerinsa ke deka ninggang nuan. Peda! Sitan* deka terus muai sekeda ari bala kita ngagai rumah jil ngambika kita diuji enggau pengabis iya, lalu kita deka merinsa pengelama 10 hari. Tunjukka diri tetap setia sampai mati, lalu aku deka meri nuan makota pengidup. 11 Awakka orang ke bisi pending, mendingka utai ke disebut kuasa kudus ngagai tiap iti raban gempuru: Orang ke menang belaban tentu enda ditinggang pemati ti kedua.’

12 “Tuliska tu ngagai melikat raban gempuru ba Pergamum: Tu meh utai ke dipadah iya ke bisi pedang ke bemata dua, ti panjai, sereta tajam: 13 ‘Aku nemu dini alai nuan diau. Nuan diau ba endur kerusi diraja Sitan. Taja pia, nuan terus bepegai rat ba nama aku. Nuan terus arapka aku, indah maya Antipas, iya nya saksi aku ti setia, dibunuh ba endur nuan diau, ke mega endur Sitan diau.

14 “‘Taja pia, bisi sekeda utai ke enda ngelantangka ati aku. Sekeda ari bala nuan bebendar deka bepegai ba ajar Balam. Balam meh ke ngajar Balak ngambika narit ati orang Israel awakka makai utai ke diserahka ngagai engkeramba sereta ngereja ulah seks ti kamah,* ngambika sida bedosa. 15 Sekeda ari bala nuan mega bebendar deka bepegai ba ajar raban pengarap Nikolaus. 16 Nya alai, nesal ati meh. Enti enda, aku deka datai ngagai nuan enggau jampat lalu aku deka beperang ngelaban sida ngena pedang ti panjai ke pansut ari mulut aku.

17 “‘Awakka orang ke bisi pending, mendingka utai ke disebut kuasa kudus ngagai tiap iti raban gempuru: Ngagai orang ke menang belaban, aku deka meri ngagai iya sekeda manna ke udah dilalaika. Aku mega deka meri ngagai iya seleka batu burak. Ba atas batu nya bisi ditulis nama ti baru ke enda ditemu sapa-sapa, kelimpah ari orang ke nerima iya.’

18 “Tuliska tu ngagai melikat raban gempuru ba Tiatira: Tu meh utai ke dipadah Anak Petara, ke bisi mata ti mau baka api sereta kaki ke baka temaga ti tulin: 19 ‘Aku nemu utai ke digaga nuan, pengerindu enggau pengarap nuan, pengawa nuan ke Petara sereta pemendar nuan nentuka diri tan ati. Aku mega nemu utai ke digaga nuan baru-baru tu mayuh agi ari utai ke digaga nuan keterubah iya suba.

20 “‘Taja pia, bisi utai ke enda ngelantangka ati aku. Nuan nejuka Jesebel, indu ke ngumbai diri nabi, ngajar sereta nesatka bala ulun aku ngambika ngereja ulah seks ti kamah* sereta makai utai ke udah diserahka ngagai engkeramba. 21 Aku meri iya masa ngambika nesal ati, tang iya enggai nesal ati ari ngereja ulah seks ti kamah.* 22 Peda! Enda lama agi, aku deka muai iya ngagai katil orang sakit. Enti orang ke butang* enggau iya enda nesal ati ari pengawa ke dikereja iya, sida tentu deka ditinggang pemerinsa ti balat. 23 Aku deka munuh bala anak iya ngena penyakit ke ngujungka pemati, ngambika semua raban gempuru nemu aku meh ke meresa utai ti pemadu dalam ba runding* enggau ati mensia. Aku deka malas tiap iku kita nitihka pengawa kita.

24 “‘Tang, ngagai bala kita ke bukai ba Tiatira, iya nya semua sida ke enda nitihka ajar Jesebel sereta sida ke enda nemu pasal utai ke dikumbai “penemu Sitan ti dalam,” tu meh utai ke deka dipadah aku ngagai kita: Aku enggai ngenusahka kita ngena pekara bukai. 25 Tang, bepegai meh ba utai ke dikemisi kita nyentuk ke aku datai. 26 Ngagai orang ke menang belaban sereta ke nitihka pengawa aku nyentuk ke ujung, aku deka meri iya kuasa atas bansa bukai, 27 baka kuasa ke udah diterima aku ari Apai aku. Baka pengibun bedus, iya deka merintah orang ngena tungkat besi ngambika sida pechah baka periuk ke digaga ari tanah liat. 28 Aku mega deka meri iya bintang pagi. 29 Awakka orang ke bisi pending, mendingka utai ke disebut kuasa kudus ngagai tiap iti raban gempuru.’