Satu Korint

10 Bala menyadi, aku deka kita nemu, semua aki ini kitai bejalai ba baruh remang lalu meraka tasik. 2 Semua sida dibaptisa lebuh sida nitihka Moses, maya sida bejalai ba baruh remang lalu meraka tasik. 3 Semua sida makai pemakai ti sama ke diberi Petara, 4 lalu semua sida ngirup ai ti sama ke diberi Petara. Batu ke alai sida bulih ai ke diirup sida baka ke nitihka sida. Batu nya diberi Petara, lalu iya ngambarka Kristus.* 5 Taja pia, Petara enda lantang ati ngagai mayuh ari bala sida. Nya alai, sida dibunuh ba menua puang.

6 Semua utai tu nyadika tangkan ke kitai, ngambika kitai enda inginka utai ti jai, baka ke dikinginka sida. 7 Anang nyembah engkeramba, baka ke digaga sekeda ari sida. Baka ke ditulis ba Bup Kudus: “Sida duduk makai enggau ngirup. Udah nya, sida angkat lalu berami.” 8 Anang ngereja ulah seks ti kamah,* baka ke digaga sekeda ari bala sida, ke ngujungka 23,000 iku orang ari bala sida mati dalam sehari. 9 Anang nguji Jehovah, baka ke digaga sekeda ari bala sida, ke ngujungka sida mati dipantuk ular. 10 Anang mut-mut baka sekeda ari bala sida, ke ngujungka sida dibunuh melikat. 11 Kitai patut belajar ari utai ke nyadi ba sida, laban utai nya ditulis nyadika tangkan ke kita, ke idup ba pengujung dunya* tu.

12 Orang ke ngumbai diri bediri tegap patut bejimat, ngambika iya enda labuh. 13 Penguji ke ditapi kita kebendar nya penguji ke biasa ditapi orang. Taja pia, Petara ke tetap ati enda nejuka kita napi penguji ke enda ulih ditatka kita. Lebuh diuji, Iya deka meri kita jalai pansut, ngambika kita tan napi penguji nya.

14 Nya alai, bala menyadi ke dikerinduka aku, rari ari pengawa nyembah engkeramba. 15 Aku bejaku ngagai kita baka ke bejaku ngagai orang ke nemu berunding. Perunding kediri empu, sekalika jaku aku tu amat tauka enda. 16 Endaka mangkuk berekat ke disadung kitai pengudah meri terima kasih ngagai Petara ngambarka darah Kristus? Endaka roti ke dipechahka kitai ngambarka tubuh Kristus? 17 Nya alai, taja pan kitai mayuh, tang kitai siti tubuh, laban semua kitai makai roti nya. Lalu roti nya semina siti aja.

18 Perundingka orang Israel: Lebuh sida makai utai ke diberi ba alta, endaka sida baka ke makai begulai enggau Petara? 19 Nama reti ku aku nya? Kati engkeramba tauka utai ke diberi ngagai engkeramba bisi reti? 20 Nadai. Tang reti ku aku nya, utai ke diberi orang ke nyembah engkeramba, diberi sida ngagai bala melikat ti jai, ukai ngagai Petara. Aku enggai kita bisi nama-nama kaul enggau bala melikat ti jai. 21 Kita enda tau ngirup ari mangkuk Jehovah, lalu ba maya ti sama, ngirup ari mangkuk bala melikat ti jai. Kita enda tau makai ba mija Jehovah, lalu ba maya ti sama, makai ba mija bala melikat ti jai. 22 Tauka ‘kati kitai deka ngasuh Jehovah chemburu’? Kati kitai kering agi ari Iya?

23 Kitai dikemendarka ngereja semua utai, tang ukai semua nya meri penguntung. Kitai dikemendarka ngereja semua utai, tang ukai semua nya negapka orang. 24 Awakka tiap iku orang seruran ngereja utai ke penguntung orang bukai, ukai ke penguntung diri empu.

25 Empa meh nama-nama utai ke dijual ba makit dagin. Kita engka deka betanyaka utai, enggaika ati* kita ngachau kita. Tang kita enda ibuh ngereja nya, 26 laban dunya enggau semua utai ke ba dunya endang enggi Jehovah. 27 Enti orang ke enda arap mai kita makai, lalu kita ka makai enggau iya, empa aja utai ke disediaka. Kita engka deka betanyaka utai, enggaika ati* kita ngachau kita. Tang kita enda ibuh ngereja nya. 28 Taja pia, enti orang madahka, “Pemakai tu udah diberi ngagai engkeramba,” anang makai pemakai nya, ngambika orang nya enda labuh ba pengarap, lalu kita enda ngachau ati* sapa-sapa. 29 Reti ku aku nya, ukai ati* kita, tang ati orang nya. Aku bisi hak ngaga pemutus diri empu. Nya alai, nama kebuah ati orang bukai patut ngakim aku? 30 Taja pan aku makai pengudah meri terima kasih ngagai Petara, patut aku makai enti nya ngujungka orang bejaika aku?

31 Nya alai, sekalika kita makai, ngirup, tauka ngereja nama-nama utai, kereja semua nya kena ngemuliaka Petara. 32 Anang ngasuh orang bukai labuh ba pengarap, enda ngira orang nya orang Judah, orang Gerika, tauka raban gempuru Petara. 33 Tang tunda meh aku, ke bebendar ngelantangka ati semua orang ba semua pekara. Aku enda ngereja utai ke penguntung diri empu, tang ke penguntung mayuh orang, ngambika sida diselamatka.