Satu Tesalonika

5 Bala menyadi, nadai agi utai ke patut ditulis kami ngagai kita pasal hari enggau maya iya, 2 laban kita amat nemu hari Jehovah deka datai baka penchuri maya malam hari. 3 Lebuh orang madahka: “Diatu, kitai bisi pengelantang enggau pengelikun!” tekala nya meh sida deka dipunaska. Nya deka nyadi enggau ngenyit, baka pemedis ke diasaika indu ke deka beranak. Sida sigi enda ulih ngelepaska diri. 4 Tang bala menyadi, kita enda idup dalam pemetang. Nya alai, lebuh hari nya datai, kita enda tekenyit baka penchuri ke tekenyit lebuh hari nyau siang. 5 Nya ketegal semua kita anak penampak enggau anak siang hari. Kitai ukai anak malam hari tauka pemetang.

6 Nya alai, kitai anang majak tinduk baka orang bukai. Tang, aram meh kitai mengkang dani sereta mengkang bejaga. 7 Sida ke tinduk, tinduk maya malam hari, lalu sida ke mabuk, mabuk maya malam hari. 8 Tang ba kitai ke nyadi anak siang hari, aram meh kitai mengkang bejaga, ngerasukka terabai dada pengarap enggau pengerindu, sereta ngerasukka tupi besi, iya nya pengandal kitai nganti deka diselamatka. 9 Petara enda milih kitai ngambika nerima pengeringat Iya, tang ngambika kitai diselamatka nengah Tuan kitai, Jesus Kristus. 10 Enda ngira kitai dani tauka tinduk,* Jesus udah mati ke kitai, ngambika kitai ulih idup enggau iya. 11 Nya alai, terus meh meransang* sereta negapka pangan diri, baka ke benung digaga kita diatu.

12 Bala menyadi, kami minta kita ngayanka basa ngagai sida ke bebendar gawa ba bala kita, ke ngiring kita ba pengawa Tuan sereta ke ngelalau kita. 13 Ayanka diri amat manah ati sereta rinduka sida ketegal pengawa ke digaga sida. Terus meh bebaik enggau pangan diri. 14 Bala menyadi, kami mega bebendar minta kita ngambika nangkan* sida ke enda ngasi,* nyebut jaku ti ngelantangka ati ngagai sida ke balat tusah ati,* nulung orang ke lemi, sereta sabar enggau semua orang. 15 Anang malas penyai ngena penyai ngagai sapa-sapa. Tang, seruran ngereja utai ti manah ngagai pangan diri sereta ngagai semua orang bukai.

16 Seruran gaga ati. 17 Anang ngetu besampi. 18 Beri meh terima kasih ke semua utai. Nya meh peneka Petara ke semua kita ke nyadi murid Jesus Kristus. 19 Anang madamka api kuasa kudus. 20 Anang enda bebasaka jaku benabi. 21 Peresa semua utai, lalu bepegai tegut ba utai ti manah. 22 Seliahka semua macham penyai.

23 Ngarapka Petara ke meri pengelantang nguduska kita enggau pengabis iya. Ngarapka runding enggau ulah,* pengidup,* sereta tubuh kita, mengkang tuchi lalu nadai kurang ba semua pekara, lebuh Tuan Jesus Kristus pulai baru.* 24 Iya ke ngangauka kita nya tetap ati, lalu Iya tentu deka ngereja nya.

25 Bala menyadi, anang ngetu besampi ke kami.

26 Sambut meh semua menyadi enggau penuh pengerindu.*

27 Dalam nama Tuan, kita mesti macha surat tu ngagai semua bala menyadi.

28 Ngarapka pemanah ati ti besai ari Tuan kitai, Jesus Kristus, bisi enggau kita.