Dua Timoti

1 Aku, Paul, ke nyadi rasul Jesus Kristus, nitihka peneka Petara sereta nitihka semaya Iya pasal pengidup ke diulih nengah Jesus Kristus, 2 nulis surat tu ngagai anak ke dikesayauka aku, Timoti:

Ngarapka nuan bulih pemanah ati ti besai, pengasih, enggau pengelantang ari Petara ti Apai kitai, sereta ari Tuan kitai, Jesus Kristus.

3 Aku beterima kasih ngagai Petara. Aku bejalaika pengawa ti tuchi ke Iya baka aki ini aku suba, lalu aku ngereja nya enggau ati* ti beresi. Siang malam aku seruran ingatka nuan lebuh aku bebendar besampi. 4 Lebuh aku teingatka ai mata nuan, aku lelengau amat deka betemu enggau nuan ngambika aku penuh laban pengaga ati. 5 Aku agi ingat pasal nuan ke enda pura-pura ngayanka pengarap. Pengarap ke baka nya keterubah iya diayanka ini nuan Lois enggau indai nuan Eunis, lalu aku andal pengarap nuan pan baka nya.

6 Ketegal nya, aku ngingatka nuan ngambika pengeransing nuan majak mau baka api, lebuh ngena pemeri Petara ke diterima nuan maya aku ngengkahka jari aku ba atas nuan. 7 Kuasa kudus* ari Petara enda ngasuh kitai takut, tang meri kitai kuasa, pengerindu, sereta nulung kitai berunding enggau manah. 8 Nya alai, anang malu meri saksi pasal Tuan kitai sereta anang malu pasal aku ke dijil laban nyadi murid iya. Tang bepanggai meh ba kuasa Petara lalu besedia meh sama merinsa ketegal Berita Manah. 9 Iya udah nyelamatka kitai sereta ngangauka kitai nyadi nembiak ti kudus, ukai ketegal pengawa kitai, tang ketegal tuju Iya sereta pemanah ati Iya ti besai. Pemanah ati tu diberi ngagai kitai nengah Jesus Kristus kenyau ari kelia menya. 10 Tang diatu, pemanah ati Iya ti besai nya udah nyata dipeda lebuh Penyelamat kitai, Jesus Kristus, mandangka diri. Kristus udah ngemunaska pemati lalu nengah Berita Manah, iya udah nunjukka baka ni kitai tau bulih pengidup ti enda ulih reput.* 11 Aku udah dipilih nyadi penginjil, rasul, sereta pengajar ngambika nusui Berita Manah tu.

12 Ketegal nya meh aku merinsa baka tu. Tang, aku enda malu laban aku ngelala Iya ke dipechayaka aku lalu aku andal, Iya ulih nyaga semua utai ke diserahka aku ngagai Iya nyentuk ke hari ti udah ditetapka nya. 13 Terus meh bepegai ba asas* jaku ti manah* ke didinga nuan ari aku, lalu terus meh ngayanka pengarap enggau pengerindu nuan ketegal beserakup enggau Jesus Kristus. 14 Jaga meh reta ti berega tu ngena bantu kuasa kudus Petara ke bisi ba kitai.

15 Nuan nemu semua orang ba Asia,* nyengkaum Pigelus enggau Hemoginis, udah ninggalka aku. 16 Ngarapka Tuan ngayanka pengasih ngagai Onesiporus enggau sida serumah, laban iya selalu meransang aku lalu iya enda malu pasal aku ke dijil. 17 Indah, lebuh iya ba Rome, iya bebendar ngiga aku lalu betemu enggau aku. 18 Ngarapka Tuan kitai, Jehovah* ngayanka pengasih ngagai iya ba hari ke udah ditetapka nya. Nuan empu mega nemu pasal semua pengawa iya ba Epesus.