Penerang Leka Jaku Bup Kudus

A B C D E F G H I J K L M N O P R S T U W

A

• Adat.

  Lebuh ditulis ngena urup besai, leka jaku tu suah merujuk ngagai Adat Moses tauka lima iti bup mit ti keterubah ba Bup Kudus. Lebuh ditulis ngena urup mit, leka jaku tu merujuk ngagai tiap iti adat ke bisi ba Adat Moses tauka prinsip ari sesiti adat.​—Ppau 15:16; Ul 4:8; Mat 7:12; Gal 3:24.

• Adat Moses.

  Adat ke diberi Jehovah ngagai orang Israel nengah Moses, ba menua puang Sinai, kena taun 1513 S.M. Lima iti bup mit ti keterubah ba Bup Kudus suah dikumbai bup Adat.​—Mat 5:17; Luk 24:44.

• Akaya.

  Ba begian bup Matthew ngagai Pemandang, Akaya nya siti menua ke dipegai Rome ba selatan Greece. Korint nya indu nengeri Akaya. Akaya nyengkaum semua endur ba Peloponnesa enggau begian tengah menua Greece.​—SKR 18:12.

• Alabaster.

  Nama butul minyak wangi ti mit. Butul tu digaga ari batu ke ditemu semak Alabastron, Ejip. Kesuah iya, butul tu bisi rekung ti mit ke ulih ditutup ngambika minyak wangi ti berega enda siuh. Nyau kelama, batu ke dikena ngaga butul nya sama nama enggau butul nya.​—Mrk 14:3, nota kaki.

• Alamot.

  Leka jaku musik ke mai reti “Indu ke biak,” engka merujuk ngagai tiun nyawa ti tinggi (soprano) indu ke biak. Engka dikena nunjukka musik tauka iring musik iya patut ditebah ngena tiun ti tinggi.​—1Ba 15:20; Ms 46:Penerang Pandak.

• Alfa enggau Omega.

  Urup keterubah enggau kepenudi ba jaku Gerika. Alfa disebut begulai enggau Omega tiga kali ba bup Pemandang, lalu nyadi gelar ke Petara. Ba konteks tu, rambai jaku nya sama reti enggau rambai jaku “ti keterubah enggau kepenudi” sereta “pun enggau pengujung.”​—Pem 1:8; 21:6; 22:13.

• Alta.

  Endur nunu menyan enggau pemeri ke bukai. Alta digaga ngena tanah, batu, tekang batu, tauka kayu ke dilapis ngena logam. Ba bilik keterubah dalam Langkau Sembiang enggau Rumah Sembiang Petara, bisi siti alta ti mit ke “digaga ari emas,” alai nunu menyan. Alta nya digaga ari kayu ke dilapis ngena emas. Ba begian laman, bisi siti alta ti besai agi, iya nya ‘alta ti digaga ari temaga,’ alai nunu pemeri tunu. Alta mega dikena ba sembah ti pelesu.​—Psut 39:38, 39; 1Ra 6:20; Mat 5:23, 24; Luk 1:11; SKR 17:23.

• Amin.

  “Awakka baka nya,” tauka “tentu.” Leka jaku tu datai ari kata dasar jaku Hebrew ʼa·manʹ, ke mai reti “setia, ulih dikearapka.” “Amin” disebut kena nunjukka diri setuju enggau sumpah ke digaga, utai ke disampika, tauka utai ke udah disebut. Ba bup Pemandang, “Amin” nya gelar ke Jesus.​—Ul 27:26; 1Ba 16:36; Ro 1:25; Pem 3:14.

• Ampa.

  Kulit ke dibuai ari leka utai baka leka barli enggau leka gandum, lebuh leka nya ditampi tauka diindik. Ampa dikena ngambarka utai ke enda berega sereta enda beguna.​—Mat 3:12.

• Anak David.

  Rambai jaku tu suah merujuk ngagai Jesus, kena nunjukka iya datai ari peturun David. Siku ari peturun David deka nyadi waris sempekat Perintah, lalu rambai jaku “Anak David” nunjukka Jesus meh Waris nya.​—Mat 12:23; 21:9.

• Anak mensia.

  Rambai jaku tu ayan kira-kira 80 kali ba bup Matthew, Mark, Luke, enggau John. Nya merujuk ngagai Jesus Kristus kena nunjukka iya ada nyadi mensia, ukai bebali ari tubuh serega nyadi tubuh mensia. Rambai jaku nya mega nunjukka Jesus deka ngamatka jaku ti benabi ba Daniel 7:13, 14. Ba begian bup Pemungkal ngagai Malaki, Esekiel enggau Daniel mega dikumbai “anak mensia,” kena nunjukka seduai iya semina mensia ke ulih mati lalu seduai iya jauh bebida ari Petara, iya nya Pun Penatai pesan seduai iya.​—Esk 3:17; Dan 8:17; Mat 19:28; 20:28.

• Anak tuai.

  Kelebih agi anak lelaki keterubah siku apai. Maya jeman Bup Kudus, anak tuai ti lelaki bisi penuduk ti istimewa ba ruang bilik. Lalu enti apai iya mati, iya nganti apai iya nyadi tuai bilik. Kelimpah ari nyadi anak tuai Jehovah, Jesus mega nyadi anak tuai entara semua utai ke udah digaga Jehovah, lalu iya meh ti keterubah diidupka baru ari mati.​—Pkal 25:33; Psut 11:5; Kol 1:15; Pem 1:5.

• Anti-Kristus.

  Leka jaku Gerika tu mai dua iti reti. Kesatu, reti iya anti, tauka ngelaban, Kristus. Lalu kedua, reti iya Kristus ti pelesu, iya nya orang ke ngaku diri Kristus. Semua orang, gerempung, raban ke bebula ngaku diri ngarika Kristus, tauka ke ngaku diri Messiah, tauka ke ngelaban Kristus enggau bala murid iya, ulih dikumbai anti-Kristus tauka “munsuh Kristus.”​—1Jo 2:22, nota kaki.

• Aramaik.

  Siti ari bansa jaku Semitik ke nyauka sama enggau bansa jaku Hebrew. Jaku nya ngena urup ti sama enggau jaku Hebrew. Keterubah, jaku nya dikena orang Aram, tang udah nya nyadi jaku entarabansa ba pengawa dagang, lalu dikena ba menua ke dipegai perintah Asiria enggau Babilon. Bansa jaku nya mega nyadi jaku rasmi perintah Persia. (Esr 4:7) Sebagi ari bup Esra, Jeremiah, enggau Daniel ditulis dalam jaku Aramaik. Sekeda leka jaku Aramaik bisi dikena ba begian bup Matthew ngagai Pemandang.​—Esr 4:8–6:18; 7:12-26; Jer 10:11; Dan 2:4b–7:28; Mrk 14:36; SKR 9:36.

• Areopagus.

  Siti bukit ti tinggi ba Atens, ba begian barat laut Akropolis. Leka jaku nya mega nyadi nama raban kunsil (kot) ke baum ba dia. Paul kala dibai bala orang ke nitihka penemu Stoik enggau Epikuria ngagai Areopagus kena nerangka utai ke dipechayaka iya.​—SKR 17:19.

• Armagedon.

  Leka jaku nya datai ari leka jaku Hebrew Har Meghid·dohnʹ, ke mai reti “Bukit Megido.” Leka jaku nya bekaul enggau “perang ke nyadi maya hari besai Petara ti Pemadu Bekuasa.” Maya nya, “bala raja ba serata dunya” begempuru beperang ngelaban Jehovah. (Pem 16:14, 16; 19:11-21)​—Peda PENUSAH TI BESAI.

• Asasel.

  Nama Hebrew ke engka mai reti “Kambin ke Lenyau.” Ba Hari Pengampun Dosa, siku kambin ke Asasel deka dilepaska ngagai menua puang. Secara simbolik, lebuh kambin tu dilepaska, iya mega mai dosa ke udah digaga orang Israel ba taun ti udah.—Lew 16:8, 10.

• Aselgeia.

  —Peda ENDA MALU NGEREJA UTAI TI JAI.

• Asia.

  Ba begian bup Matthew ngagai Pemandang, Asia nya nama menua ke dipegai perintah Rome. Kemayaharitu, menua nya nyengkaum begian barat Turki sereta beberapa iti pulau, baka Samos enggau Patmos. Indu nengeri Asia nya Epesus.​—SKR 20:16; Pem 1:4.

B

• Baal.

  Petara orang Kanaan ke dikumbai petara ke ngempu langit, ke meri ujan, sereta ke ngasuh utai tanam enggau jelu tupi mayuh. “Baal” mega nyadi gelar petara ke baruh pangkat ke disembah orang Kanaan. Dalam jaku Hebrew, leka jaku nya mai reti “Iya ke Ngempu; Tuan.”​—1Ra 18:21; Ro 11:4.

• Bala melikat ti jai.

  Sida bisi tubuh serega, enda ulih dipeda, lalu amat bekuasa. Mega dikumbai ‘anak Petara’ ba Pemungkal 6:2. “Bala melikat” ke disebut ba Jude 6 mega merujuk ngagai bala melikat ti jai tu. Petara enda ngaga sida nyadi melikat ti jai, tang udah nya sida nyadi munsuh Petara, lebuh sida enda ngasika Petara maya jeman Noah. Sida mega begempung enggau Sitan ngelaban Jehovah.​—Luk 8:30; SKR 16:16; Jas 2:19.

• Bala pemerintah nengeri.

  Ba endur ke dipegai Rome, bala pemerintah nengeri bejalaika pengawa perintah. Sida betanggungjawap nentuka semua utai seruran teratur, ngatur pejalai duit perintah, ngakim orang ke ngelanggar undang-undang, sereta meri arahan ngambika ukum ke udah diputuska dipejalaika.​—SKR 16:20.

• Bala tuai; Lelaki ke tuai.

  Lelaki ke tuai umur. Tang ba Bup Kudus, kesuah iya leka jaku tu merujuk ngagai orang ke bisi tanggung pengawa enggau kuasa ba seraban orang tauka ba sesiti bansa. Ba bup Pemandang, leka jaku tu mega merujuk ngagai sida ke bisi ba serega. Leka jaku Gerika pre·sbyʹte·ros dikalihka nyadi “tuai gempuru” enti tu merujuk ngagai sida ke bisi tanggung pengawa ngiring raban gempuru.​—Psut 4:29; Ms 107:32; 1Ti 5:17; Pem 4:4.

• Balai gempuru.

  Jaku asal iya mai reti “mai begelumu; siti gempuru.” Tang ba mayuh ayat Bup Kudus, rambai jaku tu merujuk ngagai bengunan tauka endur alai orang Judah begelumu. Ba dia, sida macha ayat Bup Kudus, ningaka iring, ngajar, sereta besampi. Maya jeman Jesus, tiap iti nengeri ba menua Israel bisi siti balai gempuru, lalu ba nengeri ke besai agi, bisi beberapa iti balai gempuru.​—Luk 4:16; SKR 13:14, 15.

• Balsam.

  Getah ti bebau rengut sereta beminyak ke datai ari sebengkah utai tumbuh enggau pun kayu. Iya amat berega lalu dikena ngaga ubat enggau minyak wangi.—Pkal 37:25; Jer 8:22.

• Baptisa; Maptisa.

  Kata kereja nya mai reti “nyelamka,” tauka nyepuh ke dalam ai. Jesus madahka bala murid iya mesti dibaptisa. Bup Kudus mega nyebut pasal baptisa John, baptisa ngena kuasa kudus Petara, baptisa ngena api, sereta baptisa ke bukai.​—Mat 3:11, 16; 28:19; Jhn 3:23; 1Pe 3:21.

• Batu.

  Sukatan ke dikena nyukat penyauh. Ba teks ti asal begian bup Matthew ngagai Pemandang, leka jaku tu semina ayan sekali aja, iya nya ba Matthew 5:​41. Leka jaku tu engka merujuk ngagai sukatan batu orang Rome. Satu batu sama enggau 1,479.5 m (4,854 kaki).

• Batu kisar.

  Siti batu ke segala ke baka roda diengkah ba atas siti da agi batu ke sama. Iya dikena ngisar leka utai ngambika nyadi tepung. Sebatang kayu diengkah ba tengah-tengah batu ke ba baruh ngambika batu ke ba atas nya ulih dipusinka enggau senang. Maya jeman Bup Kudus, sida ke indu amat-amat begunaka batu kisar ke dipusin ngena jari kena nyediaka roti ke diguna diri sebilik ninting hari. Nya alai, Adat Moses nagang orang ngerampas batu kisar tauka begian atas batu kisar nyadika gadai utang. Batu kisar ke besai agi dipusinka ngena jelu.​—Ul 24:6; Mrk 9:42.

• Batu sukut.

  Batu ke diengkah ba sukut sesiti bengunan, iya nya alai dua iti dinding betemu, sereta dikena nyambung kedua-dua dinding nya. Batu sukut ke pemadu beguna nyadi batu pugu. Kesuah iya, batu ti amat kering dipilih kena ngaga dinding kuta enggau bengunan ke orang awam. Leka jaku tu bisi dikena ngambarka baka ni dunya digaga, lalu Jesus dikumbai “batu sukut ti pemadu beguna” ke raban gempuru Kristian, ti disemaka enggau rumah ti didirika ngena kuasa kudus Petara.​—Eps 2:20; Jop 38:6.

• Bejaku enggau berani.

  Leka jaku Gerika par·re·si′a ulih mai reti enda nangi bejaku sereta bejaku enggau terus terang pasal pengarap Kristian. Leka jaku tu mega ulih mai reti yakin, berani, tauka enda nangi lebuh datai semak ngagai Petara nengah sampi. Iya mega ulih mai reti sikap sesiku orang pasal kaul iya enggau Petara.​—SKR 28:31; Eps 3:12; 1Ti 3:13.

• Belsebup.

  Gelar ke diberi ngagai Sitan, ke nyadi ketuai bala melikat ti jai. Engka diambi ari nama Baal-zebub, iya nya Baal ke disembah orang Pilistin ba Ekron.​—2Ra 1:3; Mat 12:24.

• Beresi.

  Ba Bup Kudus, leka jaku tu ukai semina mai reti pemeresi ari segi fizikal. Nya mega mai reti nentuka keadaan sesiti utai tauka orang nya mengkang nadai penimpang, nadai bepetik, enda kamah, sereta bibas ari nama-nama utai ke tau ngasuh enda tuchi ari segi moral tauka rohani. Tauka mega ulih mai reti mulaika baru ngagai keadaan ke disebut ba atas. Ba baruh Adat Moses, leka jaku nya nunjukka sesiku orang tauka sesiti utai nya udah nyadi tuchi nitihka Adat.​—Lew 10:10; Ms 51:7; Mat 8:2; 1Ko 6:11.

• Berita Manah.

  Ba begian bup Matthew ngagai Pemandang, nya merujuk ngagai Berita Manah pasal Perintah Petara sereta pasal pengelepas ke diulih ketegal arapka Jesus Kristus.​—Luk 4:18, 43; SKR 5:42; Pem 14:6.

• Besumpah.

  Orang besumpah kena nunjukka sesiti utai nya endang amat. Sumpah mega siti semaya ke nunjukka orang nya deka ngereja tauka enda ngereja sekeda utai. Orang mega besumpah kena nunjukka diri besemaya ngagai Petara laban deka ngereja sekeda utai, laban deka nyerahka sekeda pemeri, laban deka ngereja sekeda pengawa, tauka laban deka nyeliahka diri ari ngereja sekeda utai taja pan utai nya enda salah. Kesuah iya, orang besumpah atas nama orang ke tinggi agi ari sida, kelebih agi atas nama Petara. Jehovah besumpah kena nanggam sempekat Iya enggau Abraham.​—Pkal 14:22; Mat 5:33; Heb 6:16, 17.

• Bintang pagi.

  Nya bintang kepenudi ayan ba begian timur, sebedau mata panas tumbuh, lalu nya nandaka hari ti baru.​—Pem 22:16; 2Pe 1:19.

• Buah keterubah.

  Buah keterubah ke diulih maya musin ngetau. Nama-nama asil keterubah ke diulih. Jehovah dekaka orang Israel meri buah keterubah sida, enda ngira asil ke diulih nya orang, jelu, tauka utai ke ditanam sida. Semua bansa Israel meri buah keterubah ngagai Petara maya ngintu Pengerami Roti ti Enda Beragi enggau maya Pengerami Pentikos. Rambai jaku “buah keterubah” mega ngambarka Kristus enggau sida ke dipilih ngagai serega.​—1Ko 15:23, nota kaki; Ul 26:10; Jlam 3:9; Pem 14:4.

• Bulan baru.

  Hari keterubah tiap bulan ba kalendar orang Judah. Maya nya, orang begelumu enggau pangan diri, berami, sereta nyerahka pemeri ti istimewa. Nyau kelama udah nya, iya nyadi siti pengerami ti penting ba sesiti menua, lalu orang enda bekereja maya nya.​—Ppau 10:10; 2Ba 8:13; Kol 2:16.

• Buntak.

  Indu utai ke mindah dalam raban ti besai. Nitihka Adat Moses, buntak nya indu utai ti beresi lalu tau diempa. Dalam raban ti besai, sida deka dikumbai siti tulah, laban sida deka makai semua utai ke dipansa sida, lalu ngasuh mayuh utai abis anchur.​—Psut 10:14; Mat 3:4.

C

• Cherub.

  Bala melikat ke tinggi pangkat ke diberi pengawa ti istimewa. Sida enda sama enggau bala serapim.​—Pkal 3:24; Psut 25:20; Isa 37:16; Heb 9:5.

• Chop.

  Perengka ke dikena ngengkahka chap tauka tanda (kesuah iya ba tanah liat tauka lilin) kena nunjukka bukti sapa ke ngempu sesiti utai nya (hak milik), kena nunjukka sesiti utai nya original, tauka kena nunjukka persetujuan. Enti udah dichop, dokumen enda tau diubah tauka ditegu, lalu nya mega nyengkaum pintu tauka kubur. Chop kelia digaga ari utai ti kering (batu, gading, tauka kayu), lalu ba utai nya bisi ukir urup tauka corak ke ditunsangka. Chop mega ulih dikena ngambarka reti bukai ke merujuk ngagai sesiti utai ke tau dipechaya, tauka sesiti utai ke dilalaika sereta diresiaka. Iya mega ngambarka bukti hak milik.​—Mat 27:66; Jhn 6:27, nota kaki; Eps 1:13, nota kaki; Pem 5:1; 9:4.

D

• Danau api.

  Ukai endur ti amat, tang simbolik. Endur nya “mau laban api sereta merirang,” lalu ngambarka “pemati ti kedua.” Orang ke bedosa ti enda nesal ati, Iblis, pemati, enggau Kubur (tauka Hades), ditikau kia. Pemati, Hades, enggau sida ke bisi tubuh serega, enda ulih ditunu ngena api. Nya alai, endur tu semina simbolik aja. Tu ukai endur merinsa nyentuk ke belama iya. Endur tu semina ngambarka sida ke dibuai kia deka dipunaska belama iya.​—Pem 19:20; 20:14, 15; 21:8.

• Dekapolis.

  Nama kawasan ke asal iya bisi 10 buah nengeri orang Gerika (datai ari leka jaku Gerika deʹka, mai reti “sepuluh,” lalu poʹlis, mai reti “nengeri”). Iya mega nyadi nama kawasan ba timur Danau Galili enggau Sungai Jordan, laban mayuh ari nengeri nya bisi ba dia. Nengeri-nengeri nya nyadi pusat endur orang bedagang enggau pusat budaya orang Gerika. Jesus kala mansa endur nya, tang nadai rikut ke nunjukka Jesus bisi ngelawa nengeri ba endur nya.​—Mat 4:25; Mrk 5:20.

• Denari.

  Duit pirak Rome. Berat iya kira-kira 3.85 g lalu bisi gambar raja Rome ba sepiak duit seling nya. Sesingkap denari sama penyampau enggau gaji sehari pekereja biasa. Orang Judah ngena duit tu mayar “chukai pala” ke dipinta orang Rome.​—Mat 22:17; Luk 20:24.

• Drakma.

  Ba begian bup Matthew ngagai Pemandang, leka jaku tu merujuk ngagai duit pirak Gerika. Sesingkap duit seling nya berat iya 3.4 g.​—Mat 17:24, nota kaki.

• Dukun.

  Orang ke ngena kuasa ke datai ari bala melikat ti jai.​—SKR 13:6.

E

• Enda bebagi ati nyembah Petara.

  Orang ke enda bebagi ati nyembah Petara nya orang ke nyembah sereta ngayanka basa ti besai ngagai Petara Jehovah. Iya gawa ke Petara sereta setia ngagai Petara ke nyadi pemerintah ti pemadu tinggi ba dunya raya.​—1Ti 4:8; 2Ti 3:12.

• Enda malu ngereja utai ti jai.

  Rambai jaku tu datai ari jaku Gerika a·selʹgei·a, ke mai reti penyalah ti serius ke ngelanggar adat Petara sereta ngayanka ulah ti enda nemu malu. Tu nunjukka sesiku orang sengaja enda pedulika adat Petara, lalu enda bebasa tauka indah ngeleseka kuasa, adat, enggau standard ke ditetapka. Rambai jaku nya enda merujuk ngagai penyalah ti mit.​—Gal 5:19; 2Pe 2:7.

• Enda tuchi.

  Engka mai reti kamah ari segi fizikal tauka ngelanggar adat moral. Ba Bup Kudus, rambai jaku tu kesuah iya merujuk ngagai utai ke enda ulih diterima tauka enda beresi nitihka Adat Moses. (Lew 5:2; 13:45; Mat 10:1; SKR 10:14; Eps 5:5)​—Peda BERESI.

• Endur nganchurka buah anggur.

  Kesuah iya merujuk ngagai dua iti lubang ke ditumbak ba kawasan batu kapur. Lubang ke siti tinggi agi ari lubang ke siti da agi. Dua iti lubang nya disambung ngena parit ti mit. Buah anggur diindik ba lubang ke tinggi agi, lalu ai anggur mengalir ngagai lubang ke baruh agi. Rambai jaku tu mega ngambarka pemutus Petara pengudah Iya ngakim.​—Pem 19:15.

• Endur ti Kudus.

  Bilik keterubah ba Langkau Sembiang tauka ba Rumah Sembiang. Bilik nya besai agi ari Endur ti Pemadu Kudus. Ba Langkau Sembiang, Endur ti Kudus bisi penuduk lampu emas, alta emas alai nunu menyan, mija alai ngengkahka roti ke diberi ngagai Petara, sereta pekekas emas. Ba Rumah Sembiang, Endur ti Kudus bisi alta emas, 10 iti penuduk lampu emas, sereta 10 iti mija alai ngengkahka roti ke diberi ngagai Petara.​—Psut 26:33; Heb 9:2.

• Endur ti Pemadu Kudus.

  Bilik ti pemadu dalam ba Langkau Sembiang enggau Rumah Sembiang. Ba dia meh peti lampang batu Adat diengkahka. Nitihka Adat Moses, semina imam besai aja ke tau tama ngagai Endur ti Pemadu Kudus. Iya semina tau tama kia maya Hari Pengampun Dosa ke diintu setaun sekali.​—Psut 26:33; Lew 16:2, 17; 1Ra 6:16; Heb 9:3.

• Engkeramba; Nyembah engkeramba.

  Engkeramba nya patung, gambar, tauka lambang, ke ngambarka sesiti utai ke amat bisi, tauka utai ke semina bisi ba runding orang. Engkeramba dikena orang ba pengawa sembah. Nyembah engkeramba reti iya balat bebasaka, rinduka, ngeninggika, tauka besembiang ngagai sesiti engkeramba.​—Ms 115:4; SKR 17:16; 1Ko 10:14.

• Eupratis.

  Sungai ti pemadu panjai sereta ti pemadu penting ba barat daya Asia. Sungai tu siti ari dua iti sungai ti utama ba Mesopotamia. Keterubah iya disebut ba Pemungkal 2:​14, lalu sungai tu siti ari empat iti sungai ba Taman Eden. Sungai tu nyadi sempadan ba utara menua Israel.​—Pkal 15:18; Pem 9:14; 16:12.

F

• Fatom.

  Sukatan kena nyukat penalam ai. Satu fatom sama enggau 1.8 m (6 kaki).​—SKR 27:28, nota kaki.

• Firaun.

  Gelar ke diberi ngagai bala raja Ejip. Bup Kudus bisi nyebut lima iku nama firaun (Sisak, So, Tirhakah, Neko, enggau Hopra). Tang nama firaun ke bukai, nyengkaum sida ke kala bisi urusan enggau Abraham, Moses, enggau Josep enda ulih ditemu.​—Pkal 41:45, 46; Ro 9:17, nota kaki.

G

• Gari.

  Selalu iya, lelaki enggau indu ngena dua serak gari. Sida bisi ngena gari dalam ke bisi lengan (jaku Gerika, khi·ton′), lalu pemanjai gari nya naka patung tauka naka buku ali. Pengudah ngena gari dalam, sida mega ngerasukka gari luar (jaku Gerika, hi·ma′ti·on). Kekadang, gari luar tu besai sais. Selalu iya, gamal gari tu segi empat tepat, lalu senang dipasuk tauka dibuka.​—Mat 5:40.

• Gehena.

  Nama Gerika ke Lebak Hinom ke bisi ba selatan enggau barat daya Jerusalem kelia. (Jer 7:31) Jaku benabi madahka bangkai deka ngachir ba endur nya. (Jer 7:32; 19:6) Nadai bukti ke madahka jelu tauka mensia dibuai ngagai Gehena ngambika diperinsa tauka ditunu idup-idup. Nya alai Gehena ukai ngambarka endur ke enda ulih dipeda alai merinsaka semengat mensia belama iya ba api. Kebendar iya, Jesus enggau bala murid iya ngena leka jaku nya ngambarka “pemati ti kedua,” ke mai reti dipunaska belama iya.​—Pem 20:14; Mat 5:22; 10:28.

• Gerika.

  Bansa jaku ke dikena orang Gerika. Mega merujuk ngagai orang ke ada ba Greece tauka ruang bilik ke asal iya datai ari endur nya. Ba begian bup Matthew ngagai Pemandang, leka jaku tu bisi skop reti ke besai agi, lalu merujuk ngagai semua orang ke ukai orang Judah, tauka orang ke ngena bansa jaku sereta nitihka budaya orang Gerika.​—Jol 3:6; Jhn 12:20.

• Gulung surat.

  Selambar surat ti panjai ke digaga ari kulit jelu tauka papirus. Ba depan surat nya bisi tulisan, lalu kesuah iya surat nya digulung ba sebatang kayu ti mit. Ayat Bup Kudus ditulis sereta dikupi ba gulung surat. Nya meh bup ke biasa dikena orang maya jeman Bup Kudus ditulis.​—Luk 4:17-20; 2Ti 4:13.

H

• Hades.

  Leka jaku Gerika ke sama reti enggau leka jaku Hebrew “Sheol.” Leka jaku tu dikalihka nyadi “Kubur” (urup besai), enti iya merujuk ngagai pendam umum ke bala mensia.​—Peda KUBUR.

• Hari pechara.

  Hari tauka timpuh maya Petara ngakim siti-siti raban orang, bansa, tauka mensia. Maya nya, orang ke udah diakim lalu patut diukum mati deka dipunaska, tang orang bukai engka diberi peluang ngambika diselamatka. Jesus Kristus enggau bala rasul iya bisi nyebut pasal “Hari Pechara” ti deka nyadi jemah ila, ti bekaul enggau orang ke agi idup enggau orang ke udah mati.​—Mat 12:36.

• Hari Pengampun Dosa.

  Hari ti kudus ke pemadu penting ba orang Israel. Hari nya mega dikumbai Yom Kippur (ari rambai jaku Hebrew yohm hak·kip·pu·rimʹ, “hari penutup”). Hari nya diintu kena 10 Etanim. Ninting taun, ba hari nya, imam besai tama ngagai Endur ti Pemadu Kudus ba Langkau Sembiang. Iya deka mai darah jelu ke udah disayat lalu dipechik iya ketegal dosa iya empu, dosa orang Lewi, sereta dosa orang Israel. Pemeri ke baka nya ngambarka Jesus ke nyerahka diri nyadika pemeri kena nebus dosa mensia enggau pengabis iya, sekali aja ke belama iya. Enggau nya, mensia bisi peluang ulih bebaik baru enggau Jehovah. Maya nya, orang Israel begempuru nyembah Jehovah sereta bepuasa. Hari nya mega Hari Sabat. Nya alai, sida enda tau gawa.​—Lew 23:27, 28; SKR 27:9; Kol 1:20; Heb 9:12.

• Hari ti penudi.

  Rambai jaku tu merujuk ngagai siti timpuh, maya peristiwa ti besejarah ke dipadah ba jaku ti benabi dalam Bup Kudus datai ba klimaks iya. (SKR 2:17) Bepanggai ba jaku ti benabi ke dipadah, timpuh tu engka nyengkaum beberapa taun aja, tauka lama agi ari nya. Ba Bup Kudus, rambai jaku tu kelebih agi merujuk ngagai “hari ti penudi” ba dunya tu, maya Jesus pulai baru.​—2Ti 3:1; Jas 5:3; 2Pe 3:3.

• Hebrew.

  Keterubah iya, nya gelar ke diberi ngagai Abram (Abraham), kena nemu iya enda sama enggau orang Amor. Udah nya, leka jaku tu merujuk ngagai bala peturun Abraham ke datai nengah uchu iya Jakop sereta mega merujuk ngagai bansa jaku ke dikena sida. Maya jeman Jesus, jaku Hebrew ngundan mayuh rambai jaku Aramaik, lalu bansa jaku nya meh ke dikena Jesus enggau bala murid iya bejaku.​—Pkal 14:13; Psut 5:3; SKR 26:14.

• Hermis.

  Siku ari petara orang Gerika sereta anak Seus. Ba Listra, Paul dikumbai Hermis, laban ba runding orang, Hermis meh ke mai pesan ari bala petara, lalu iya mega petara ke landik bejaku.​—SKR 14:12.

• Herod.

  Nama ruang bilik siti dinasti ti dipilih orang Rome kena merintah orang Judah. Herod ti Tebilang dikelala orang ketegal iya udah nirika baru Rumah Sembiang ba Jerusalem, sereta ketegal iya ngasuh bala anak mit ke lelaki dibunuh, laban iya nguji deka munuh Jesus. (Mat 2:16; Luk 1:5) Anak Herod ti Tebilang, iya nya Herod Arkelaus enggau Herod Antipas, dipilih nyadi pemerintah ba kawasan-kawasan ke kala dipegai apai seduai iya. (Mat 2:22) Antipas suah dikumbai “raja,” lalu iya udah merintah sepemanjai tiga taun setengah Kristus bejalaika pengawa nginjil nyentuk ngagai maya ke disebut ba Surat Kereja Rasul bagi 12. (Mrk 6:14-17; Luk 3:1, 19, 20; 13:31, 32; 23:6-15; SKR 4:27; 13:1) Udah nya, Herod Agripa I, iya nya uchu Herod ti Tebilang, dibunuh melikat Petara enda lama pengudah iya merintah. (SKR 12:1-6, 18-23) Anak iya, Herod Agripa II, merintah nyentuk ngagai maya orang Judah ke ngelaban perintah Rome.​—SKR 23:35; 25:13, 22-27; 26:1, 2, 19-32.

• Herod, bala nembiak.

  Seraban orang ke nyukung politik dinasti Herod, iya nya bala raja ke merintah ba baruh kuasa Rome. Sekeda orang Saduki engka udah enggau raban tu. Bala nembiak Herod bela enggau orang Parisi ngelaban Jesus.​—Mrk 3:6.

• Hisop.

  Utai tumbuh ke bisi daun sereta pating ti mit. Dikena mechikka darah tauka ai lebuh pengawa nuchi ke dipejalaika nitihka adat. Leka jaku Hebrew enggau Gerika ke dikena ba Bup Kudus engka merujuk ngagai beberapa bansa utai tumbuh ti bebida. “Hisop” ke disebut ba John 19:29, engka sebengkah utai tumbuh ke panjai pating. Nya alai, kapuk ke disepuhka ba wain masam ulih dituatka ngena pating ti panjai nya ngagai mulut Jesus.​—Heb 9:19.

I

• Iblis.

  Reti iya, “iya ke ngenyaika nama manah orang bukai.” Ba begian bup Matthew ngagai Pemandang, leka jaku tu nyadi gelar ke Sitan. Nya ketegal iya meh ketuai ke balat ngenyaika nama manah Jehovah. Iya mega nyebut jaku tuduh ti pelesu pasal Jehovah, pasal jaku Jehovah ti manah, sereta pasal nama Jehovah ti kudus.​—Mat 4:1; Jhn 8:44; Pem 12:9.

• Ilirikum.

  Siti endur ke dipegai Rome, ba barat laut Greece. Paul bejalai jauh nyentuk ngagai endur tu, tang enda nemu sekalika iya nginjil ba Ilirikum tauka iya semina ba sempadan endur nya aja.​—Ro 15:19.

• Ilmu sihir.

  Tu bekaul enggau utai ke dipechayaka orang pasal semengat orang mati ke agi terus idup, lalu ulih bejaku enggau orang ke agi idup nengah siku orang tengah. Jaku Gerika phar·ma·kiʹa ke dikalihka nyadi “pengawa ti bekaul enggau melikat ti jai,” asal iya mai reti “pengawa ti bekaul enggau dadah.” Nya ketegal kelia menya, orang ngena dadah minta kuasa ari bala melikat ti jai ngambika sida ulih ngena ilmu sihir.​—Gal 5:20; Pem 21:8 (semua ba nota kaki).

• Imam.

  Siku lelaki ke nyadi pengari Petara, lalu betanggungjawap ngajar orang pasal Petara enggau adat Iya. Ba mua Petara, bala imam mega nyadi pengari bala nembiak Petara. Sida nyerahka pemeri, nyadi orang tengah, sereta bebendar besampi ngagai Petara ngarika nembiak Iya. Sebedau bisi Adat Moses, tuai bilik meh ke nyadi imam ba ruang bilik diri empu. Pengudah bisi Adat Moses, sida ke lelaki ba ruang bilik Aron, ke datai ari raban bansa Lewi, nyadi imam. Bala lelaki orang Lewi ke bukai nyadi penulung sida. Pengudah bisi sempekat ti baru, Israel rohani nyadi bala imam, lalu Jesus Kristus nyadi Imam Besai sida.​—Psut 28:41; Heb 9:24; Pem 5:10.

• Imam besai.

  Ba baruh Adat Moses, imam besai nya imam ti utama ke ngarika orang Israel ba mua Petara sereta ngemataka bala imam ke bukai. Semina iya aja ke dikemendarka tama ngagai Endur ti Pemadu Kudus, iya nya bilik ti pemadu dalam ba Langkau Sembiang enggau Rumah Sembiang. Iya semina ngereja nya setaun sekali, iya nya ba Hari Pengampun Dosa. Rambai jaku “imam besai” mega merujuk ngagai Jesus Kristus.​—Lew 16:2, 17; 21:10; Mat 26:3; Heb 4:14.

• Israel.

  Nama ke diberi Petara ngagai Jakop. Udah nya, nama nya dikena merujuk ngagai semua peturun Jakop. Peturun 12 iku anak lelaki Jakop suah dikumbai bala anak Israel, peturun Israel, bansa Israel, tauka orang Israel. Israel mega nyadi nama perintah 10 raban bansa ba utara ke beserara enggau perintah ba selatan. Udah nya, nama nya dikena nyadi gelar orang Kristian ke dipilih ke serega, iya nya “Israel ke enggi Petara.”​—Gal 6:16; Pkal 32:28; SKR 4:10; Ro 9:6.

• Iya ti jai.

  Gelar ke Sitan, ke mega dikumbai Iblis. Iya ngelaban Petara sereta standard Petara ti lurus.​—Mat 6:​13; 1Jo 5:​19 (semua ba nota kaki).

J

• Jakop.

  Anak lelaki Isak enggau Rebekah. Udah nya, Petara meri iya nama Israel, lalu iya nyadi tuai bilik bansa Israel (mega dikumbai orang Israel, lalu udah nya dikumbai orang Judah). Iya bisi 12 iku anak lelaki. Bala anak lelaki iya enggau peturun sida nyadi 12 raban bansa Israel. Bansa tauka orang Israel mega dikangau ngena nama Jakop.​—Pkal 32:28; Mat 22:32.

• Jaku-dalam.

  Peribahasa tauka pepatah. Jaku ti ngembuan penemu-dalam tauka cherita ti pandak, ke madahka utai ti amat tauka ngajar pasal sesiti utai ngena beberapa leka jaku aja. Ba Bup Kudus, jaku-dalam engka dipadahka ngena teka-teki tauka ngena jaku ke patut diperundingka enggau dalam. Jaku-dalam suah ngena rambai jaku ke udah dipilih enggau manah kena nerangka pemendar, lalu kesuah iya jaku ke dipilih nya ngambarka reti bukai. Sekeda jaku-dalam nyau suah dikena orang ngeleseka tauka ngemelika sekeda orang.​—Pjar 12:9; 2Pe 2:22.

• Jaku ti benabi.

  Pesan ke datai ari Petara. Pesan nya mandangka tauka madahka peneka Iya. Jaku ti benabi engka madahka jaku ajar pasal moral, madahka pesan tauka pemutus ari Petara, tauka madah pasal utai ti deka nyadi.​—Mat 13:14; 2Pe 1:20, 21.

• Jalai Tuan.

  Ba Bup Kudus, leka jaku “jalai” ulih ngambarka reti bukai, iya nya merujuk ngagai pengawa tauka ulah ke diterima tauka ke enda diterima Jehovah. Orang ke nyadi murid Jesus Kristus dikumbai orang ke nitihka “Jalai Tuan,” laban sida arapka Jesus Kristus lalu idup nitihka teladan iya.​—SKR 19:9.

• Jehovah.

  Bup Kudus Salin Dunya Baru bisi ngena nama “Jehovah,” lalu nama nya ayan 237 kali ba begian bup Matthew ngagai Pemandang. Pemutus deka ngena nama Petara digaga nitihka bukti tu:

  1. Ba teks begian bup Pemungkal ngagai Malaki ke dikena maya jeman Jesus enggau bala rasul iya bisi Tetragrammaton (iya nya, nama Petara ke ditulis ngena empat iti urup konsonan Hebrew יהוה).

  2. Ba jeman Jesus enggau bala rasul iya, Tetragrammaton mega bisi ayan ba begian bup Pemungkal ngagai Malaki ke udah dikalihka ngagai jaku Gerika.

  3. Ba begian bup Matthew ngagai Pemandang bisi madahka Jesus suah ngena nama Petara, lalu madahka nama nya ngagai orang.—John 17:6, 11, 12, 26.

  4. Sama baka begian bup Pemungkal ngagai Malaki, begian bup Matthew ngagai Pemandang mega datai ari Petara. Nya alai, tentu nyelai enti nama Jehovah tiba-tiba lenyau ari begian teks Matthew ngagai Pemandang.

  5. Nama pandak Petara bisi ayan ba begian bup Matthew ngagai Pemandang.—Pemandang 19:1, 3, 4, 6.

  6. Utai ke ditulis orang Judah kelia nunjukka orang Kristian bansa Judah bisi ngena nama Petara lebuh sida nulis utai.

  7. Sekeda pakar Bup Kudus ngaku, nama Petara engka patut ayan ba ayat ke bisi ba begian bup Matthew ngagai Pemandang, enti ayat nya diambi ari ayat ke bisi nama Petara ba begian bup Pemungkal ngagai Malaki.

  8. Begian bup Matthew ngagai Pemandang ke udah dikalihka ngagai lebih ari 100 bansa jaku bisi nama Petara.

  Endang amat, kitai bisi kebuah ti terang deka mulaika nama Petara, iya nya Jehovah, ba begian bup Matthew ngagai Pemandang. Nya meh utai ke digaga bala penterjemah Bup Kudus Salin Dunya Baru. Sida amat bebasaka nama Petara. Ketegal sida nangika Petara, sida enggai muai nama-nama utai ke bisi ba teks ti asal.—Pemandang 22:18, 19.

• Jejaga.

  Sida nyaga orang tauka reta ari utai ke tau ngachau tauka ari utai ke tau ngemediska. Kesuah iya, sida bejaga maya malam hari, lalu enti bisi utai ke tau ngachau pengelikun, sida deka meri amaran. Sida suah bejaga ba atas dinding kuta tauka menara, ngambika sida ulih meda orang ke datai semak ngagai kuta. Soldadu mega bisi nyadi jejaga.​—Mat 27:65; 28:4.

• Jejaga Istana.

  Seraban soldadu Rome ke nyadi pengawal ke nyaga raja Rome. Udah nya, sida nyadi kuasa politik ti besai, ke ulih nyukung tauka ngelabuhka raja ari penuduk iya.​—Plp 1:13.

• Judah.

  Anak lelaki Jakop enggau Leah ti keempat. Sebedau Jakop mati, Jakop madahka jaku ti benabi pasal siku pemerintah ke amat bekuasa. Pemerintah nya ke deka merintah belama iya deka datai ari peturun Judah. Jesus datai ari peturun Judah. Leka jaku nya mega merujuk ngagai raban bansa Judah, lalu udah nya merujuk ngagai perintah Judah.​—Pkal 29:35; 49:10; Heb 7:14.

K

• Kain guni.

  Kain ti kasar kena ngaga guni tauka kantung, baka kantung kena ngisi leka utai. Kesuah iya, bulu kambin bewarna gelap disulam kena ngaga kain guni. Maya ngulit, orang suah ngerasukka kain guni nyadika gari.​—Pkal 37:34; Luk 10:13.

• Kain tirai.

  Kain tenun ti lawa sereta ke bisi gambar cherub ti disulam. Dikena nyeraraka Endur ti Kudus ari Endur ti Pemadu Kudus ba dalam Langkau Sembiang enggau Rumah Sembiang Petara.​—Psut 26:31; 2Ba 3:14; Mat 27:51; Heb 9:3.

• Kaisar.

  Nama ruang bilik orang Rome ke udah nya nyadi gelar ke raja Rome, baka Augustus, Tiberius, enggau Klaudius (bisi disebut dalam Bup Kudus) sereta Nero (nadai disebut dalam Bup Kudus). Ba begian bup Matthew ngagai Pemandang, “Kaisar” mega ulih merujuk ngagai piak ti bekuasa tauka perintah menua.​—Mrk 12:14, nota kaki; SKR 25:8, nota kaki.

• Kambut kulit wain.

  Kambut ke digaga ari kulit jelu, baka kulit kambin tauka kulit bedus, lalu dikena nyimpan wain. Wain ti baru, disimpan ba dalam kambut kulit ti baru, laban wain nya deka mansutka gas karbon dioksida (proses penapaian), lalu ngasuh tekanan ba dalam kambut nya majak nambah. Enti tekanan nambah, kambut ti baru ulih kembai, tang kambut ti lama deka pechah.​—Jos 9:4; Mat 9:​17.

• Kanchin kayu.

  Perengka ke dikena ngukum orang ngambika orang nya enda ulih mindah. Sekeda perengka semina dikena nganchin kaki. Tang bisi mega ke dikena nganchin kaki, jari, enggau rekung ngambika orang nya merinsa.​—SKR 16:24.

• Kereban perang.

  Dikena soldadu ngelindung diri. Ambika chunto: Tupi besi, baju besi, belulang, utai kena nyaga kaki, enggau terabai.​—1Sa 31:9; Eps 6:13-17.

• Kereja ajih; Pengawa ke ngalitka ati.

  Pengawa tauka utai ke nyadi ketegal kuasa ke besai agi ari semua kuasa ke ditemu mensia. Utai nya nyadi ketegal Petara tauka utai ti luar biasa. Kekadang, Bup Kudus ngena leka jaku “tanda” enggau “kereja ajih” kena ngenataika reti ti sama.​—Mat 11:20; SKR 4:22; Heb 2:4.

• Kerita kuda.

  Rengka pengangkut ke bisi dua iti roda, sereta ke ditarit kuda. Kerita kuda dikena maya beperang sereta dikena ngangkut utai enggau orang.​—Psut 14:23; P-lu 4:13; SKR 8:28; Pem 9:9.

• Kerusi hakim.

  Tu kesuah iya merujuk ngagai pentas ti tinggi. Pentas tu bisi tangga, lalu diengkah ba endur ti lapang. Lebuh duduk ba pentas nya, bala pegawai ulih bejaku ngagai orang mayuh lalu madahka pemutus sida. Rambai jaku “kerusi hakim Petara” enggau “kerusi hakim Kristus” dikena ngambarka atur Jehovah kena ngakim mensia.​—Ro 14:10; 2Ko 5:10; Jhn 19:13.

• Ketuai ke Dipilih Meri Pengidup.

  Merujuk ngagai peranan penting Jesus Kristus ke ngelepaska orang ti setia ari dosa enggau pemati. Iya mega ngiring sida ngambika bulih pengidup ti meruan belama iya.​—SKR 3:15; 5:31; Heb 2:10.

• Kiubit.

  Sukatan pemanjai. Satu kiubit pemanjai iya ari siku nyentuk ngagai ujung tunjuk jari tengah. Kesuah iya, orang Israel ngena sukatan kiubit ke pemanjai kira-kira 44.5 cm. Sida mega bisi ngena sukatan kiubit ke panjai agi, kira-kira 51.8 cm, iya nya siti tapa jari panjai agi ari sukatan kiubit biasa.​—Pkal 6:15; Mat 6:27, nota kaki; Luk 12:25, nota kaki; Pem 21:17, nota kaki.

• Kor.

  Sukatan ke dikena nyukat utai ti rangkai tauka cecair. Nitihka sukatan bath, satu kor sama penyampau enggau 220 L.​—Luk 16:7, nota kaki.

• Korban.

  Diserahka ngagai Petara kena meri terima kasih, kena ngaku penyalah diri, sereta kena ngemanahka baru kaul diri enggau Petara. Berengkah ari Abel, orang meri bemacham korban nyengkaum korban jelu secara sukarela. Pengudah bisi Adat Moses, korban mesti diserahka ngagai Petara. Pengudah Jesus nyerahka nyawa diri nyadi korban ti sempurna, korban jelu tau enda ibuh agi diserahka ngagai Petara. Taja pia, orang Kristian agi terus meri korban rohani ngagai Petara.​—Pkal 4:4; Heb 13:15, 16; 1Jo 4:10, nota kaki.

• Kristian.

  Gelar ke diberi Petara ngagai bala murid Jesus Kristus.​—SKR 11:26; 26:28.

• Kristus.

  Gelar ke diberi ngagai Jesus. Ari leka jaku Gerika Khri·stosʹ, ke sama reti enggau leka jaku Hebrew ke dikalihka nyadi “Messiah,” tauka “Iya ke Ditata.”​—Mat 1:16; Jhn 1:41.

• Kuasa kudus.

  Kesuah iya dikumbai “roh kudus.” Kuasa tauka tenaga ke enda ulih dipeda ke dikena Petara ngereja peneka Iya. Kuasa nya kudus laban iya datai ari Jehovah, ke tuchi sereta ke pemadu lurus. Kuasa nya mega kudus laban Petara ngena iya ngereja pengawa ti kudus.​—Luk 1:35; SKR 1:8.

• Kubur.

  Enti ditulis ngena urup mit, nya merujuk ngagai kubur sesiku orang. Enti ditulis ngena urup besai, nya merujuk ngagai pendam umum ke bala mensia, lalu iya sama reti enggau jaku Hebrew “Sheol” sereta jaku Gerika “Hades.” Ba Bup Kudus, leka jaku nya ngambarka keadaan tauka siti endur secara simbolik. Nadai pengawa dikereja ba dia, lalu orang ke mati nadai nemu utai. (Pkal 47:30; Mat 27:61; SKR 2:31) Leka jaku Gerika mne·mei′on mega udah dikalihka nyadi “kubur.” Leka jaku tu datai ari kata kereja “kena ngingatka,” ke mai reti orang ke udah mati deka dikingatka.​—Jhn 5:28, 29, nota kaki.

• Kudus; Pengudus.

  Jehovah kudus laban Iya endang sigi tuchi, lalu Iya tuchi ba semua pekara. Semua pengawa Iya tuchi sereta kudus. (Lew 10:3; Jhn 17:11; Pem 4:8) Lebuh merujuk ngagai mensia (Mrk 6:20; SKR 3:21), utai (Ro 7:12; 11:16; 2Ti 3:15), endur (Mat 4:5; SKR 7:33; Heb 9:1), sereta pengawa (Ro 15:16), dalam jaku asal, iya nya Hebrew enggau Gerika, leka jaku tu mai reti diseraraka tauka diasuh nyadi tuchi ke Petara ti kudus; diseraraka kena bejalaika pengawa ke Jehovah. Ba begian bup Matthew ngagai Pemandang, leka jaku “kudus” mega mai reti ulah ti tuchi.​—2Ko 7:1; 1Pe 1:15, 16.

L

• Laman.

  Endur ti lapang ke ngelingi Langkau Sembiang. Endur nya dikelingi pagar. Udah nya, leka jaku nya mega merujuk ngagai endur ti lapang ke ngelingi bengunan Rumah Sembiang, lalu endur nya dikelingi dinding. Alta pemeri tunu bisi diengkah ba laman Langkau Sembiang sereta ba begian laman Rumah Sembiang ke dikumbai laman dalam. Bup Kudus mega bisi nyebut pasal laman rumah enggau laman istana.​—Psut 8:13; 27:9; 1Ra 7:12; Mat 26:3; Mrk 15:16; Pem 11:2.

• Lepton.

  Maya jeman ke dipadahka ba begian bup Matthew ngagai Pemandang, lepton nya duit seling ke pemadu mit ke dikena orang Judah. Iya digaga ari temaga tauka gangsa.​—Mrk 12:42; Luk 21:2 (semua ba nota kaki).

• Lewi; Orang Lewi.

  Anak lelaki Jakop enggau Leah ti ketiga. Mega merujuk ngagai raban bansa Lewi. Tiga iku anak lelaki Lewi mansutka tiga iti ruang bilik ti utama ba bala peturun Lewi. Kekadang, rambai jaku “orang Lewi” merujuk ngagai semua orang ba raban bansa nya. Tang kesuah iya, enda nyengkaum bala imam ke datai ari ruang bilik Aron. Raban bansa Lewi nadai nerima tanah ba Menua ti Udah Disemaya, tang sida diberi 48 iti nengeri ke bisi ba tanah ke diberi ngagai raban bansa bukai.​—Ul 10:8; 1Ba 6:1; Heb 7:11.

• Lubang ti amat dalam.

  Ari leka jaku Gerika aʹbys·sos, ke mai reti “amat dalam” tauka “enda ulih disukat, nadai tatak.” Ba begian bup Matthew ngagai Pemandang, leka jaku tu mai reti endur ngurung tauka gaya pendiau ke kena kurung. Tu mega ulih nyengkaum pendam.​—Luk 8:31; Ro 10:7; Pem 20:3.

M

• Makai Malam Tuan.

  Maya nya, roti ti enda beragi enggau wain ke ngambarka tubuh enggau darah Kristus disediaka. Tuju iya kena ngingatka pemati Jesus. Semua orang Kristian mesti ngingatka pemati Kristus.​—1Ko 11:20, 23-26.

• Manna.

  Utai ke suah diempa orang Israel lebuh sida ba menua puang pengelama 40 taun. Utai ke diempa nya disediaka Jehovah. Nengah kereja ajih, ninting pagi, iya ayan ba atas tanah ba baruh ambun. Semina Hari Sabat aja iya enda ayan. Lebuh keterubah kali orang Israel meda manna, sida nanya: “Nama utai nya?” tauka, dalam jaku Hebrew, “man huʼ?” (Psut 16:13-15, 35) Jesus mega nyebut pasal manna ke ngambarka reti bukai.​—Jhn 6:49, 50.

• Masedonia.

  Siti kawasan ba utara Greece. Iya nyadi tekenal lebuh diperintah Aleksander ti Tebilang, lalu kawasan nya mengkang enda dipegai perintah bukai, nyentuk ngagai maya iya dikuasa orang Rome. Lebuh Rasul Paul keterubah kali ngagai Eropah, Masedonia dipegai Rome. Paul kala kia tiga kali.​—SKR 16:9.

• Masmur.

  Lagu kena muji Petara. Musik dimainka lebuh bala nembiak Petara belagu. Masmur mega dikena lebuh nembiak Petara begelumu nyembah Jehovah ba Rumah Sembiang Iya ba Jerusalem.​—Luk 20:42; SKR 13:33; Jas 5:13.

• Media.

  Bala peturun anak Japet ke benama Madai. Sida diau ba endur ti rata ba kawasan gunung menua Iran. Udah nya, kawasan nya nyadi menua Media. Orang Media bisi ba Jerusalem maya Pentikos 33 M.​—SKR 2:9.

• Melikat.

  Ari leka jaku Hebrew mal·ʼakhʹ enggau leka jaku Gerika agʹge·los. Kedua-dua leka jaku nya reti iya “orang ke mai pesan,” tang dikalihka nyadi “melikat” enti iya ke mai pesan nya ngembuan tubuh serega. (Pkal 16:7; 32:3; Jas 2:25; Pem 22:8) Bala melikat amat bekuasa. Sida udah lama dulu digaga Petara, sebedau mensia digaga. Ba Bup Kudus, melikat mega dikumbai “bala orang serega” enggau “bintang.” (Jop 1:6; 38:7) Sida digaga Petara siku-siku, lalu enda ulih ngadaka anak. Penyampau bala melikat bisi lebih ari 100 juta iku. (Dan 7:10) Bup Kudus nunjukka sida bisi nama enggau sifat sida empu. Taja pia, sida baruh ati lalu enggai disembah. Indah mayuh ari sida enggai nama sida ditemu orang. (Pkal 32:29; Luk 1:26; Pem 22:8, 9) Sida bisi pangkat enggau tanggungjawap ti enda sama. Sida bisi tanggungjawap baka gawa ba mua kerusi diraja Jehovah, madahka pesan Iya, nulung nembiak Jehovah ba dunya, sereta nyukung pengawa ngerembaika Berita Manah. Pengudah Jehovah ngakim, sida mega deka bejalaika pemutus ke udah digaga Iya. (2Ra 19:35; Ms 34:7; Mat 4:11; Luk 1:30, 31; Pem 5:11; 14:6) Jemah ila, sida deka enggau Jesus ba perang Armagedon.​—Pem 19:14, 15.

• Menyan.

  Getah wangi ke dichampur enggau balsam. Iya bebau rengut lebuh ditunu. Menyan ke dikena ba Langkau Sembiang enggau Rumah Sembiang digaga ngena empat iti utai, lalu ditunu ninting pagi enggau malam ba atas alta ba Endur ti Kudus. Tang ba Hari Pengampun Dosa, menyan nya ditunu ba Endur ti Pemadu Kudus. Menyan ngambarka sampi ke diterima Petara, ke dikenataika nembiak Iya ti setia. Orang Kristian tau enda ibuh ngena menyan.​—Psut 30:34, 35; Lew 16:13; Pem 5:8.

• Menyan burak.

  Getah ti rangkai ari pun kayu sereta sebengkah utai tumbuh ti baruh ke datai ari spesis Boswellia. Iya bebau rengut lebuh ditunu. Iya nyadi siti bahan ke dikena nyediaka menyan ti kudus ke ditunu ba Langkau Sembiang enggau Rumah Sembiang Petara. Iya mega diserahka begulai enggau pemeri leka utai, lalu diengkahka ba atas tiap iti tugung roti ke udah diberi ngagai Petara, ke bisi ba Endur ti Kudus.​—Psut 30:34-36; Lew 2:1; 24:7; Mat 2:11.

• Messiah.

  Diambi ari leka jaku Hebrew ke mai reti “ditata” tauka “iya ke ditata.” Sama reti enggau jaku Gerika ke dikalihka nyadi “Kristus.”​—Dan 9:25; Jhn 1:41.

• Minyak nard.

  Minyak wangi ti mar rega ke bewarna mirah muda. Diambi ari utai tumbuh ke dikumbai spikenard (Nardostachys jatamansi). Ketegal minyak nard mar rega, nya alai iya suah dichampurka enggau minyak ke enda entu bekualiti. Kadang-kadang, orang ngaga minyak nard tiruan. Enti kitai beratika, Mark enggau John sama madahka “minyak nard ti tulin” dituangka ba Jesus.​—Mrk 14:3; Jhn 12:3.

• Molek.

  Petara orang Amon; engka sama enggau Malkam, Milkom, enggau Molok. Nya engka merujuk ngagai gelar, tang ukai nama petara. Nitihka Adat Moses, barang sapa ke nyerahka anak iya ngagai Molek mesti diukum bunuh.—Lew 20:2; Jer 32:35; SKR 7:43.

• Molok.​—

  Peda MOLEK.

• Mur.

  Getah wangi ke diambi ari bemacham utai tumbuh ti baruh ke beduri, tauka ari pun kayu ti mit ke datai ari spesis Commiphora. Mur nya siti ari utai ke dikena ngaga minyak tata ti kudus. Iya dikena nyadi wangi gari tauka wangi peninduk. Minyak ke udah dichampur enggau mur ulih dikena beurut sereta nyadi losyen tubuh. Mur ke dichampur ba wain ulih meri kesan baka ubat bius. Mur mega diunsut ba bangkai ke deka dikuburka.​—Psut 30:23; Jlam 7:17; Mrk 15:23; Jhn 19:39.

N

• Nefilim.

  Merujuk ngagai orang ke ngembuan pemesai tubuh enggau peninggi ti luar biasa, ke idup sebedau Bah Besai nyadi. Indai sida mensia lalu apai sida melikat ke bebali nyadi mensia.—Pkal 6:4, nota kaki.

• Nephesh.

  Jaku Hebrew neʹphesh sama reti enggau jaku Gerika psy·kheʹ. Ba Bup Kudus, leka jaku tu kesuah iya merujuk ngagai (1) orang, (2) jelu, tauka (3) nyawa orang tauka nyawa jelu. (Pkal 1:20; 2:7; Ppau 31:28; 1Pe 3:20, nota kaki) Bup Kudus nunjukka neʹphesh enggau psy·kheʹ merujuk ngagai utai ti idup ba dunya, ke bisi tubuh, ke ulih dipeda, ke ulih ditegu, sereta ke ulih mati. Ba Bup Kudus tu, leka jaku nya dikalihka nitihka konteks ngena leka jaku tauka rambai jaku baka “pengidup,” “utai ti idup,” “orang,” tauka kata ganti diri (chunto iya, “aku”). Ba sekeda ayat Bup Kudus, neʹphesh enggau psy·kheʹ dikalihka nyadi “enggau pengabis pengidup,” ke mai reti ngereja pengawa enggau pengabis ati. (Ul 6:5; Mat 22:37) Ba sekeda konteks, leka jaku tu merujuk ngagai pengingin utai ti idup. Leka jaku tu mega ulih merujuk ngagai orang ke udah mati tauka bangkai.—Ppau 6:6, 7; Jlam 23:2; Isa 56:11; Hag 2:13.

• Nesal ati.

  Ba Bup Kudus, tu mai reti berubah runding sereta asa ati ketegal chara pengidup ti lama, pengawa ti salah, tauka ketegal enda mujur ngereja sekeda utai. Enti sesiku orang amat-amat nesal ati, iya deka nunjukka nya nengah pengawa diri. Iya mega deka berubah, lalu nitihka jalai ti betul.​—Mat 3:8; SKR 3:19; 2Pe 3:9.

• Ngengkahka jari ba atas orang.

  Jari diengkahka ba atas orang kena nunjukka orang nya dipilih ngereja pengawa ti istimewa. Nya mega digaga kena merekat, ngeraika, tauka meri sesiku orang pemeri ke datai ari kuasa kudus Petara.​—Ppau 27:18; SKR 19:6; 1Ti 5:22.

• Ngindik; Endur ngindik.

  Pengawa nyeraraka leka utai ari tangkai enggau ampa; endur alai ngereja pengawa nya. Orang mega bisi nyeraraka leka utai ngena jari enggau sebatang kayu. Enti penyampau leka utai nya mayuh, pengawa tu dipejalaika ngena perengka baka papan tauka roller ke ditarit jelu. Pengudah leka utai diengkahka ba endur ngindik, perengka ke ditarit jelu nya deka dikena ngindik leka utai nya. Kesuah iya, endur ngindik nya rata sereta segala, lalu iya bisi ba endur ti tinggi ke berangin.​—1Ba 21:20; Isa 41:15; Mat 3:12.

• Ngulit.

  Nunjukka diri balat tusah ati ketegal pemati tauka ketegal sekeda utai jai ke nyadi. Maya jeman Bup Kudus, orang biasa ngulit ba sesiti timpuh. Kelimpah ari rerauh nyabak, orang ke ngulit ngena gari ke patut, ngengkahka amau ba atas pala, nyarikka gari diri, lalu mandam dada diri. Kekadang, bisi orang dikangau ngambika nyabakka orang ke mati.​—Est 4:3; Mat 11:17; Mrk 5:38; Jhn 11:33; Pem 21:4, nota kaki.

• Nisan.

  Pengudah orang Judah dilepaska ari Babilon, Nisan nyadi nama baru ke bulan Abib, iya nya bulan keterubah ba kalendar pengarap orang Judah, ti sama enggau bulan ti ketujuh ba kalendar sekular sida. Bulan tu berengkah ari tengan bulan Mac ngagai tengan bulan April. (Est 3:7) Pengerami Paska orang Judah diintu kena 14 Nisan, lalu malam nya, Jesus Kristus ngepunka Makai Malam Tuan. (Luk 22:15, 19, 20) Iya dibunuh ba tiang perinsa ba hari ti sama.​—Luk 23:44-46.

• Nyipat.

  Ba begian bup Matthew ngagai Pemandang, leka jaku tu mai reti malu tauka ngembat ngena tali ke bisi simpul tauka ke bisi duri ba ujung tali nya.​—Jhn 19:1.

O

• Orang Etiopia.

  Orang ke datai ari menua Etiopia, iya nya siti perintah kelia menya ba selatan menua Ejip. Perintah tu nyengkaum begian selatan Ejip ke diatu enggau begian utara Sudan ke diatu.​—SKR 8:27.

• Orang Judah.

  Tu merujuk ngagai orang ke datai ari raban bansa Judah, pengudah perintah Israel ke bisi 10 raban bansa labuh. (2Ra 16:6) Pengudah orang Israel dilepaska ari Babilon, rambai jaku nya merujuk ngagai semua orang Israel ke ari bemacham raban bansa, ke pulai baru ngagai menua Israel. (Esr 4:12) Udah nya, rambai jaku nya dikena ngambika nemu bida entara semua orang Israel ba serata dunya ari orang bansa bukai. (Est 3:6) Rasul Paul mega ngena rambai jaku nya kena ngambarka reti bukai, lebuh iya madahka semua bansa nadai bida ba raban gempuru Kristian.​—Ro 2:28, 29; Gal 3:28.

• Orang Kaldea.

  Orang ke diau ba kawasan delta Sungai Tigris enggau Sungai Eupratis. Kelia menya, nengeri ke pemadu penting ba Kaldea nya nengeri Ur, menua asal Abraham.​—SKR 7:4.

• Orang ke bibas; Orang ke udah dilepaska.

  Lebuh dipegai perintah Rome, “orang ke bibas” nya orang ke endang enda nyadi ulun kenyau ari ada sereta bisi hak ti penuh nyadi rayat menua Rome. Tang, “orang ke udah dilepaska” merujuk ngagai orang ke dilepaska ari nyadi ulun. Ulun ke udah dilepaska enggau sah deka nyadi rayat menua Rome, tang iya enda ulih megai pengawa politik. Ulun ke dilepaska enggau chara ti enda sah enda diberi hak ti penuh baka rayat menua Rome.​—1Ko 7:22.

• Orang ke megai pengarap Judah.

  Dalam Bup Kudus, tu merujuk ngagai orang ke nukar agama diri ngagai agama orang Judah. Orang lelaki ke udah megai agama orang Judah patut disunat.​—Mat 23:15; SKR 13:43.

• Orang ke nemu nujum.

  Orang ke mansik pejalai mata panas, bulan, enggau bintang, ngambika ulih nemu pasal utai ke deka nyadi dudi hari.​—Mat 2:1.

• Orang ke ngemata.

  Orang lelaki ke bisi tanggungjawap nyaga sereta ngibun raban gempuru. Leka jaku Gerika e·piʹsko·pos mai reti ngemataka ngambika ulih nyaga. Ba raban gempuru Kristian, “orang ke ngemata” mega dikumbai “tuai gempuru” (pre·sbyʹte·ros). Rambai jaku “tuai gempuru” nunjukka sida ke lelaki ke udah dipilih nya bisi sifat ti matang, lalu rambai jaku “orang ke ngemata” merujuk ngagai tanggungjawap sida.​—SKR 20:28; 1Ti 3:2-7; 1Pe 5:2.

• Orang ke nitihka penemu Epikuria.

  Bala sida ke nitihka ahli falsafah Gerika ke benama Epikuria (341-​270 S.M.). Nitihka ajar sida, utai ti pemadu penting, iya nya orang patut ngelantangka ati diri.​—SKR 17:18.

• Orang ke nitihka penemu Stoik.

  Seraban ahli falsafah orang Gerika. Sida pechaya orang ulih idup lantang enti sida berunding enggau dalam sereta idup sejalai enggau hukum alam. Sida mega pechaya enti sesiku orang nya amat-amat pintar, pemedis enggau pengelantang nadai kesan ba orang nya.​—SKR 17:18.

• Orang Nasaret.

  Merujuk ngagai Jesus, laban iya datai ari nengeri Nasaret. Rambai jaku tu engka bekaul enggau leka jaku Hebrew ke dikena ba Isaiah 11:1 ke ulih dikalihka nyadi ‘telesak’ tauka “sumbuk.” Udah nya, iya mega merujuk ngagai bala murid Jesus.​—Mat 2:23, nota kaki; SKR 24:5.

• Orang Nasir.

  Diambi ari leka jaku Hebrew na·zirʹ ke mai reti “Orang ke Dipilih,” “Orang ke Diserahka,” sereta “Orang ke Diseraraka.” Bisi dua jenis orang Nasir, iya nya orang ke sukarela deka nyadi orang Nasir tauka orang ke dipilih Petara nyadi orang Nasir. Siku lelaki tauka siku indu ulih ngaga semaya ti istimewa ngagai Jehovah ngambika nyadi orang Nasir ba sesiti timpuh. Orang ke milih deka nyadi orang Nasir patut nitihka tiga iti syarat ti utama tu: (1) Sida enda tau ngirup ai bisa tauka makai nama-nama utai ari pun anggur, (2) sida enda tau nguntin buk sida, lalu (3) sida enda tau negu bangkai. Sida ke dipilih Petara nyadi orang Nasir deka nitihka syarat nya seumur idup sida, lalu Jehovah mega netapka syarat bukai ke sida.​—Ppau 6:2-7; P-lu 13:5.

• Orang Parisi.

  Raban agama orang Judah ti tebilang ba abad keterubah M. Sida ukai ari peturun imam, tang sida nitihka Adat Moses enggau terit, nyengkaum utai ti pemadu mit ke dipadah ba Adat nya. Sida mega nitihka enggau terit tradisi ke udah disebut. (Mat 23:23) Sida enda nerima budaya orang Gerika. Ketegal sida pakar pasal Adat Moses enggau pasal tradisi, sida bisi kuasa ti besai atas orang. (Mat 23:2-6) Sekeda ari sida mega nyadi sebagi ari Raban Kunsil Orang Judah. Sida suah ngelaban Jesus pasal ngintu Hari Sabat, pasal tradisi, sereta pasal begulai enggau orang ke bedosa enggau bala pengumpul chukai. Sekeda ari sida nyadi orang Kristian, baka Saul ari Tarsus.​—Mat 9:11; 12:14; Mrk 7:5; Luk 6:2; SKR 26:5.

• Orang Saduki.

  Raban agama orang Judah ti tebilang. Orang ke enggau raban nya datai ari orang kaya ke tinggi pangkat sereta bala imam. Sida bisi kuasa ti besai atas pengawa ke dipejalaika ba Rumah Sembiang. Sida enggai nerima mayuh tradisi ke udah disebut orang sereta utai ke dipechayaka orang Parisi. Sida enda pechayaka pengangkat ari mati sereta enda pechaya bala melikat bisi. Sida ngelaban Jesus.​—Mat 16:1; SKR 23:8.

• Orang Samaria.

  Keterubah iya, tu merujuk ngagai orang Israel ke datai ari perintah 10 raban bansa ba utara. Tang pengudah Samaria dikuasa orang Asiria ba taun 740 S.M., rambai jaku tu mega merujuk ngagai orang asing ke dibai orang Asiria kia. Maya jeman Jesus, rambai jaku tu enda merujuk ngagai bansa tauka menua sesiku orang. Tang kesuah iya, merujuk ngagai orang ke enggau raban pengarap ba kawasan ke semak Sekem enggau Samaria kelia. Utai ke dipechayaka sida balat enda sama enggau utai ke dipechayaka agama orang Judah.​—Jhn 8:48.

• Orang tengah.

  Orang ke nulung dua iti piak bebaik enggau pangan diri. Ba Bup Kudus, Moses nyadi orang tengah ke sempekat Adat Moses, lalu Jesus nyadi orang tengah ke sempekat ti baru.​—Gal 3:19; 1Ti 2:5; Heb 12:24.

• Orang ti limpang ke ngelaban Petara.

  Ba jaku Gerika, leka jaku a·po·sta·siʹa datai ari kata kereja ke mai reti “bediri jauh ari.” Kata nama leka jaku nya mai reti “ninggalka tauka ngelaban.” Ba begian bup Matthew ngagai Pemandang, leka jaku nya kelebih agi mai reti orang ke limpang ari sembah ti bendar.​—SKR 21:21; 2Te 2:3.

P

• Paradais.

  Taman ti amat lawa. Paradais ti keterubah dikumbai Taman Eden. Taman nya digaga Jehovah ke sepasang mensia ti keterubah. Lebuh Jesus bejaku enggau siku penjenayah ke dipantang ba tiang perinsa sepiak iya, Jesus nunjukka dunya deka nyadi siti paradais. Ba 2 Korint 12:4, leka jaku “paradais” merujuk ngagai paradais ke bisi jemah ila, lalu ba Pemandang 2:7, iya merujuk ngagai paradais ba serega.​—Pdai 4:13; Luk 23:43.

• Parousia.

  Leka jaku Gerika “parousia,” reti iya “bisi ba sepiak [tauka ‘enggau’] (sesiku orang).” Rambai jaku Jesus Kristus “pulai baru” tauka “parousia,” merujuk ngagai maya iya berengkah merintah nyadi Raja ba serega nyentuk ngagai pengujung sistem dunya tu. Maya nya, iya enda ulih dipeda. Maya nya mega, iya sempama baka bisi ba sepiak bala mensia. Iya pulai baru ukai reti nya iya datai lalu mupuk enggau jampat. Tang rambai jaku tu merujuk ngagai sesiti timpuh masa.​—Mat 24:3.

• Pasa.

  Bepuasa tauka enda makai ba sesiti timpuh. Orang Israel bepasa ba Hari Pengampun Dosa, maya bisi penusah, sereta maya sida begunaka iring Petara. Ninting taun, orang Judah bepasa empat kali kena ngingatka penusah ti balat ke kala ditapi bansa sida. Orang Kristian tau enda ibuh bepasa.​—Esr 8:21; Isa 58:6; Mat 4:2; 9:14; Luk 18:12; SKR 13:2, 3; 27:9.

• Paska.

  Pengerami ke diintu ninting taun kena 14 haribulan Abib (udah nya dikumbai bulan Nisan). Iya diintu kena ngingatka maya orang Israel dilepaska ari Ejip. Maya nya, anak bedus (tauka kambin) disayat lalu dipanggang. Udah nya, dagin nya diempa enggau sayur pait sereta roti ti enda beragi.​—Psut 12:27; Jhn 6:4; 1Ko 5:7.

• Pekekas endur nunu menyan.

  Pekekas tu digaga ari emas, pirak, tauka temaga. Pekekas tu dikena nunu menyan ba dalam Langkau Sembiang sereta Rumah Sembiang. Iya mega dikena muai arang ari alta sereta muai sumbu ke udah angus ari penuduk lampu emas. Mega dikumbai pekekas bara api.​—Psut 37:23; 2Ba 26:19; Heb 9:4.

• Pemanah ati ti besai.

  Datai ari leka jaku Gerika ke mai reti ngelantangka ati sereta narit ati. Kesuah iya, leka jaku tu merujuk ngagai hadiah ke diberi ketegal pemanah ati tauka chara meri utai enggau manah. Lebuh merujuk ngagai pemanah ati Petara ti besai, leka jaku tu ngambarka hadiah ti pechuma ke diberi Petara enggau gerah jari, lalu Iya enda ngarapka balas. Nya alai, rambai jaku tu fokus ngagai pengerah jari Petara, pengerindu Iya ti besai, sereta pemanah ati Iya ngagai mensia. Leka jaku Gerika tu mega ulih dikalihka ngagai rambai jaku baka “ngereja utai secara sukarela” sereta “meri tulung tauka derma.” Iya diberi ukai ketegal orang ke nerima nya layak nerima iya, tang iya diberi ketegal orang ke meri nya endang gerah jari.​—2Ko 6:1; Eps 1:7.

• Pemeri kena nebus dosa.

  Enti enda sengaja ngereja dosa ketegal pengelemi diri sereta ketegal enda sempurna, korban tu patut diserahka kena minta ampun. Sapi ti lelaki, burung achang, sereta jelu ti bukai ulih diserahka nyadi korban, lalu korban nya bepanggai ba situasi sereta utai ke mampu diserahka orang ke minta ampun.​—Lew 4:27, 29; Heb 10:8.

• Pemeri tunu.

  Jelu disayat lalu ditunu ba alta nyadika pemeri ngagai Petara. Jelu nya diberi abis ngagai Petara, lalu orang ke nyerahka pemeri nya enda tau nyimpan nama-nama perengka tubuh jelu (sapi ti lelaki, bedus ti lelaki, kambin ti lelaki, burung kukur, tauka burung achang ti agi biak) ke diberi iya.​—Psut 29:18; Lew 6:9; Mrk 12:33; Heb 10:6.

• Pemeri wain.

  Dituang ba atas alta, lalu diserahka sama enggau pemeri ke bukai. Paul ngambarka diri baka pemeri wain kena nunjukka diri sanggup ninggalka semua utai ketegal bala menyadi Kristian iya.​—Ppau 15:5, 7; Plp 2:17.

• Pengangkat ari mati.

  Reti iya, diidupka baru ari mati. Leka jaku Gerika a·naʹsta·sis mai reti “angkat; bediri.” Ba Bup Kudus, bisi semilan iti cherita ke madahka pasal pengangkat ari mati, lalu nya nyengkaum cherita pasal Petara Jehovah ke ngidupka Jesus baru ari mati. Taja pan Elijah, Elisa, Jesus, Peter, enggau Paul kala ngidupka orang ari mati, tang kebendar iya, utai tu semina ulih digaga ngena kuasa Petara. “Orang ke lurus enggau orang ke enda lurus” deka diidupka baru ba dunya. Tu amat penting kena ngamatka tuju Petara. (SKR 24:15) Bup Kudus mega madahka pasal pengangkat ari mati ke serega, ke dikumbai pengangkat ti “tumu agi” tauka pengangkat “ti keterubah.” Pengangkat tu bekaul enggau bala menyadi Jesus ke dipilih ngena kuasa kudus Petara.​—Plp 3:11; Pem 20:5, 6; Jhn 5:28, 29; 11:25.

• Pengawa ti tuchi.

  Kereja ti tuchi ke bekaul enggau sembah ngagai Petara.​—Ro 12:1; Pem 7:15.

• Pengelurus.

  Ba Bup Kudus, pengelurus reti iya utai ti betul nitihka standard Petara pasal utai ti betul enggau salah.​—Pkal 15:6; Mat 6:33.

• Pengerami Belangkau.

  Diintu kena 15-​21 Etanim, nitihka kalendar orang Hebrew. Ba orang Israel, pengerami tu nandaka maya musin ngetau ujung taun udah abis. Nya maya orang Israel rami gaga ati sereta ngayanka terima kasih ke berekat ari Jehovah, ketegal asil ke diketau sida. Maya nya, sida diau ba langkau, kena sida ngingatka diri pasal maya sida ke udah dilepaska ari menua Ejip. Sida ke lelaki patut mupuk ngagai Jerusalem kena ngintu tiga iti pengerami ninting taun. Siti ari pengerami nya Pengerami Belangkau.​—Lew 23:34; Esr 3:4; Jhn 7:2.

• Pengerami Nyerahka Rumah Sembiang.

  Diintu ninting taun kena ngingatka pengawa nguduska Rumah Sembiang Petara, pengudah Antiokus Epipanes ngamahka Rumah Sembiang nya. Pengerami tu berengkah kena 25 Kislew lalu diintu pengelama lapan hari.​—Jhn 10:22.

• Pengerami Roti ti Enda Beragi.

  Pengerami ti keterubah ari tiga iti pengerami ti utama ke patut diintu orang Israel ninting taun. Pengerami tu diintu sehari pengudah Pengerami Paska, iya nya kena 15 Nisan, lalu iya diintu pengelama tujuh hari. Orang Israel semina tau makai roti ti enda beragi, kena ngingatka maya sida dilepaska ari menua Ejip.​—Psut 23:15; Mrk 14:1.

• Pengujung sistem dunya.

  Timpuh sebedau sistem dunya ke dikuasa Sitan dipunaska. Timpuh nya berengkah serentak enggau maya Kristus pulai baru. Ba baruh iring Jesus, bala melikat deka “nyeraraka orang ke jai ari orang ke lurus,” lalu ngemunaska orang ke jai. (Mat 13:40-42, 49) Bala murid Jesus ingin deka nemu kemaya “pengujung dunya tu” deka berengkah. (Mat 24:3) Sebedau Jesus niki ke serega, iya besemaya ngagai bala murid iya, iya deka enggau sida nyentuk ngagai pengujung dunya tu.​—Mat 28:20.

• Pentikos.

  Pengerami ti kedua ari tiga iti pengerami ti utama ke patut diintu orang Israel. Semua orang Judah ke lelaki patut mupuk ngagai Jerusalem kena ngintu pengerami nya. Pentikos reti iya “(Hari) Ke-50.” Ba begian bup Matthew ngagai Pemandang, “Pentikos” merujuk ngagai Pengerami Ngetau, ke disebut ba begian bup Pemungkal ngagai Malaki. Pengerami nya diintu ba hari ke-50, ke berengkah dikira ari 16 haribulan Nisan.​—Psut 23:16; 34:22; SKR 2:1.

• Penulis Adat.

  Orang ke ngupi ayat ba begian bup Pemungkal ngagai Malaki. Maya jeman Jesus, rambai jaku tu merujuk ngagai seraban orang ke landik pasal Adat Moses. Sida ngelaban Jesus.​—Mrk 12:38, 39; 14:1.

• Penulung gempuru.

  Datai ari leka jaku Gerika di·aʹko·nos, ke suah dikalihka nyadi “ulun” tauka “orang ke ngintu.” “Penulung gempuru” merujuk ngagai orang ke nulung raban tuai gempuru. Iya mesti chukup syarat nitihka syarat ke dipadah ba Bup Kudus, ngambika layak nerima pengawa nya.​—1Ti 3:8-10, 12.

• Penusah ti Besai.

  Leka jaku “penusah” dalam jaku Gerika mai reti pemerinsa ke ditapi tauka asai ati ti amat tusah ke diasaika sesiku orang ketegal ditekan penanggul ke benung nyadi. Jesus nyebut pasal “Penusah ti Besai” ke deka ninggang Jerusalem kelia, lalu kelebih agi pasal penusah ke deka ninggang mensia lebuh iya ‘datai enggau mulia’ jemah ila. (Mat 24:21, 29-31) Paul madahka Petara ti lurus deka ngenataika penusah nya ngagai “sida ke enda ngelala Petara sereta sida ke enda ngasika Berita Manah” pasal Jesus Kristus. Pemandang bagi 19 nunjukka Jesus meh ke deka ngiring bala soldadu serega ngelaban “jelu ti siga enggau bala raja ba dunya sereta raban soldadu sida.” (2Te 1:6-8; Pem 19:11-21) Bisi “seraban orang ti mayuh” deka selamat ari Penusah ti Besai nya. (Pem 7:9, 14)​—Peda ARMAGEDON.

• Penutup Peti.

  Merujuk ngagai penutup peti lampang batu Adat. Ba Hari Pengampun Dosa, ba mua penutup peti nya, imam besai mechikka darah jelu ke udah diserahka kena nebus dosa. Dalam jaku Hebrew, rambai jaku tu datai ari kata kereja ke mai reti “nutup (dosa)” tauka engka “muai (dosa).” Penutup nya digaga ari emas tulin. Ba atas penutup nya bisi dua iku cherub. Siku ba ujung siti, lalu siku ba ujung siti da agi. Kadang-kadang iya dikumbai “tudung.”​—Psut 25:17-22; Heb 9:5.

• Penyakit berampit.

  Nama-nama penyakit berampit ke ulih ngelekai enggau jampat nyentukka datai ba tahap epidemik (ulih ngerampit mayuh orang ba sesiti kawasan ba maya ti sama), lalu ngujungka pemati.​—Luk 21:11.

• Perintah Petara.

  Merujuk ngagai Perintah ke ngambarka hak Petara merintah, lalu Anak Iya, iya nya Jesus Kristus meh ke nyadi raja ba Perintah nya.​—Mat 12:28; Luk 4:43; 1Ko 15:50.

• Peti lampang batu Adat.

  Peti ke digaga ari kayu akasia lalu dilapis ngena emas. Peti tu disimpan ba Endur ti Pemadu Kudus dalam Langkau Sembiang, lalu udah nya disimpan ba Endur ti Pemadu Kudus dalam Rumah Sembiang Petara ke digaga Solomon. Peti tu bisi penutup ke digaga ari emas ti tulin. Ba atas penutup nya, bisi dua iku melikat cherub ke betunga mua enggau pangan diri. Dalam peti nya bisi dua iti lampang batu alai Sepuluh Pesan udah ditulis.​—Ul 31:26; 1Ra 6:19; Heb 9:4.

• Pneuma.

  Leka jaku Hebrew ruʹach enggau leka jaku Gerika pneuʹma suah dikalihka nyadi “roh” ba sekeda Bup Kudus. Leka jaku tu bisi beberapa iti reti. Semua reti iya merujuk ngagai utai ke enda ulih dipeda mensia, lalu nunjukka bisi kuasa ke benung bekereja. Leka jaku Hebrew enggau Gerika tu ulih merujuk ngagai (1) angin, (2) seput pengidup semua utai ti idup ba dunya, (3) pengeran ati ke ngasuh sesiku orang nyebut tauka ngereja utai nitihka sekeda chara, (4) pesan tauka utai ke disebut ti datai ari sumber ke enda ulih dipeda, (5) sida ke bisi tubuh serega, enggau (6) kuasa kudus Petara.​—Psut 35:21; Ms 104:29; Mat 12:43; Luk 11:13.

• Porneia.​—

  Peda ULAH SEKS TI KAMAH.

• Psykhe.​—

  Peda NEPHESH.

• Pun kayu pengidup.

  Siti pun kayu ba Taman Eden. Bup Kudus nadai madahka buah ari pun kayu tu bisi kuasa kena meri pengidup. Tang, pun kayu tu ngambarka jamin ari Petara, iya nya Iya deka meri pengidup ti meruan belama iya ngagai sida ke dikemendarka Iya makai buah ari pun kayu tu. Ba bup Pemandang, pun kayu tu ngambarka atur Petara kena ngulihka pengidup ti meruan belama iya.​—Pkal 2:9; 3:22; Pem 2:7; 22:19.

R

• Raban gempuru.

  Seraban orang ke begelumu ketegal bisi siti-siti tuju tauka pengawa. Ba begian bup Pemungkal ngagai Malaki, leka jaku nya suah merujuk ngagai bansa Israel. Ba begian bup Matthew ngagai Pemandang, leka jaku nya merujuk ngagai siti-siti raban gempuru Kristian, tang kesuah agi merujuk ngagai semua raban gempuru Kristian.​—1Ra 8:22; SKR 9:31; Ro 16:5.

• Raban Kunsil Orang Judah.

  Kot tinggi orang Judah ba Jerusalem. Maya jeman Jesus, kot nya bisi 71 iku ahli, lalu nya nyengkaum imam besai, sida ke kala nyadi imam besai, sida ke datai ari ruang bilik imam besai, bala tuai orang Judah, bala tuai raban bansa, bala tuai bilik, enggau bala penulis Adat.​—Mrk 15:1; SKR 5:34; 23:1, 6.

• Raban pengarap.

  Seraban orang ke nitihka sesiti ajar tauka sesiku orang ke ngiring sida. Sida bisi utai ke dipechayaka sida empu. Iya merujuk ngagai dua iti raban agama orang Judah ti tebilang, iya nya raban Parisi enggau raban Saduki. Orang ke ukai Kristian madahka Kristian nya siti “raban pengarap” tauka “raban pengarap orang Nasaret,” laban sida ngumbai agama Kristian nya siti raban ti baru ke datai ari agama orang Judah. Nyau kelama, raban gempuru Kristian nyau bepechah nyadi beberapa iti raban. Bup Pemandang bisi madah pasal “raban pengarap Nikolaus.”​—SKR 5:17; 15:5; 24:5; 28:22; Pem 2:6; 2Pe 2:1.

• Ragi.

  Utai ke dichampurka ba adunan tepung, ngambika adunan nya kembai, tauka utai ke dikena ngaga ai arak. Kelebih agi merujuk ngagai adunan ti mit ke diambi ari adunan ke udah kembai, lalu adunan ti mit nya dikena ngaga adunan ti baru. Ba Bup Kudus, leka jaku tu suah dikena ngambarka dosa sereta utai ke mai kesan ti jai. Tu mega ngambarka utai ke jampat mansang, tang pemansang nya enda ulih dipeda.​—Psut 12:19, 20; Mat 13:33; Gal 5:9.

• Rasul.

  Leka jaku tu reti iya “ke dianjung,” lalu merujuk ngagai Jesus sereta sekeda orang ke dianjung ngambika ngereja pengawa ke orang bukai. Leka jaku tu kesuah iya merujuk ngagai 12 iku murid Jesus. Raban sida nya meh ke dipilih Jesus nyadi pengari.​—Mrk 3:14; SKR 14:14.

• Resia ti kudus.

  Datai ari Petara sereta sebagi ari tuju Iya. Semina dipandangka Petara ngagai sida ke dipilih Iya sereta ba maya ke ditetapka Iya.​—Mrk 4:11; Kol 1:26.

• Roti ti diberi ngagai Petara.

  Dua belas iti tuku roti ke diengkahka ba mija ba Endur ti Kudus ke ba dalam Langkau Sembiang enggau Rumah Sembiang. Dua belas iti tuku roti nya dibagi nyadi dua iti tugung. Siti tugung bisi enam iti tuku roti. Mega dikumbai “roti ti kudus.” Tiap-tiap Hari Sabat, roti ti diberi ngagai Petara tu diganti ngena roti ti baru. Kesuah iya roti ke udah diganti nya semina diempa bala imam aja.​—2Ba 2:4; Psut 25:30; Lew 24:5-9; Mat 12:4; Heb 9:2.

• Rumah Sembiang.

  Bengunan ti tetap ba Jerusalem ke nganti Langkau Sembiang. Bengunan nya nyadi pusat alai orang Israel nyembah Petara. Rumah Sembiang ti keterubah digaga Solomon, lalu Rumah Sembiang nya diruntuhka orang Babilon. Rumah Sembiang ti kedua digaga Serubabel pengudah orang Israel dilepaska ari Babilon. Udah nya, Herod ti Tebilang nirika baru Rumah Sembiang nya. Kadang-kadang, Rumah Sembiang semina dikangau ngena leka jaku “Rumah.” (Mat 21:13; Luk 11:51; 1Ba 29:1; 2Ba 2:4; Mat 24:1) Rambai jaku “Rumah Sembiang” mega merujuk ngagai endur alai Petara diau ba serega.​—Pem 11:19; Psut 25:8, 9; 2Ra 10:25; 1Ba 28:10.

S

• Sabat.

  Datai ari leka jaku Hebrew ke mai reti “berehat; ngetu.” Ba orang Judah, nya hari ketujuh dalam seminggu (kenyau ari maya mata panas padam kena Hari Lima nyentuk ngagai mata panas padam kena Hari Enam). Sekeda pengerami nyengkaum taun ke-7 enggau taun ke-50 mega dikumbai Sabat. Maya Hari Sabat, orang enda tau bekereja. Semina bala imam aja ke bekereja ba Langkau Sembiang enggau Rumah Sembiang. Maya taun Sabat, tanah enda tau dikena betanam, lalu orang Hebrew enda tau ngansak pangan diri mayar utang. Nitihka Adat Moses, atur Hari Sabat enda mar dititihka. Tang bala tuai agama belubah-lubah nambahka atur kediri empu. Nya alai, maya jeman Jesus, orang tusah deka nitihka atur nya.​—Psut 20:8; Lew 25:4; Luk 13:14-16; Kol 2:16.

• Sakit lan.

  Penyakit kulit ti serius. Penyakit lan ke disebut ba Bup Kudus lain ari penyakit lan ke bisi kemayaharitu, laban iya ukai aja ulih ngerampit mensia, tang mega ulih ngerampit gari enggau rumah.​—Lew 14:54-56; Luk 5:12.

• Samaria.

  Pengelama kira-kira 200 taun, Samaria nyadi indu nengeri perintah 10 raban bansa Israel ba utara. Samaria mega nyadi nama ke semua endur ti dipegai perintah nya. Nengeri tu didirika ba atas gunung ke mega dikumbai Samaria. Maya jeman Jesus, Samaria nya nama siti kawasan ba entara Galili (ba utara) enggau Judea (ba selatan). Kesuah iya, Jesus nyeliahka kawasan nya maya nginjil. Tang kekadang, iya nengah kawasan nya lalu bejaku enggau orang ba dia. Peter ngena kunchi kedua Perintah Petara lebuh orang Samaria nerima kuasa kudus Petara.​—1Ra 16:24; Jhn 4:7; SKR 8:14.

• Satu persepuluh.

  Sepuluh peratus ari utai ke dikemisi diberi tauka dibayar nyadika pemeri, kelebih agi kena pengawa ke bekaul enggau agama. (Ul 26:12; Mal 3:10; Mat 23:23; Heb 7:5) Nitihka Adat Moses, satu persepuluh ari asil utai tanam ke diulih enggau satu persepuluh ari jelu tupi ke udah nambah, deka diberi ngagai orang Lewi ninting taun kena nyukung sida. Orang Lewi meri satu persepuluh ari utai ke diterima sida kena nyukung bala imam ke datai ari peturun Aron. Nambahka nya, bisi mega pemeri 10 peratus ke bukai ke patut diberi. Orang Kristian tau enda ibuh meri pemeri 10 peratus.

• Sempekat.

  Persetujuan, tauka kontrak rasmi, entara dua iti piak, iya nya entara Petara enggau bala mensia, tauka entara mensia enggau mensia. Persetujuan tauka kontrak nya digaga ketegal deka ngereja sesiti utai, tauka ketegal enggai ngereja sesiti utai. Kekadang, semina siti piak aja ke patut ngereja utai ke udah ditetapka ba sempekat nya (sempekat unilateral, ti kebendar iya mai reti siti semaya). Bisi maya nya, kedua-dua piak patut ngereja utai ke udah ditetapka ba sempekat nya (sempekat bilateral). Kelimpah ari nyebut pasal sempekat entara Petara enggau mensia, Bup Kudus mega nyebut pasal sempekat entara orang, raban bansa, bansa, tauka entara sekeda raban orang. Entara sempekat ke udah meri kesan ti besai, iya nya sempekat ke digaga Petara enggau Abraham, David, bansa Israel (sempekat Adat Moses), sereta Israel ke enggi Petara (sempekat ti baru).​—Pkal 9:11; 15:18; 21:27; Psut 24:7; 2Ba 21:7; Luk 22:29; SKR 3:25; 2Ko 3:6; Heb 8:6.

• Serambi Solomon.

  Maya jeman Jesus, Serambi Solomon nya endur orang bejalai ke bisi atap. Serambi nya ba begian timur laman luar Rumah Sembiang. Mayuh orang pechaya, serambi nya sebagi ari Rumah Sembiang Petara ke digaga Solomon kelia. Jesus bejalai ba dia ‘maya musin chelap,’ lalu orang Kristian ba abad keterubah begelumu ba dia nyembah Petara.​—Jhn 10:22, 23; SKR 5:12.

• Seus.

  Petara orang Gerika ti pemadu tinggi. Ba Listra, orang saru lalu ngumbai Barnabas nya Seus. Ukir kelia menya ke ditemu enda jauh ari Listra bisi nyebut pasal “bala imam Seus” enggau “Seus, petara mata panas.” Ba kapal ke ditepan Paul lebuh iya belayar ari Pulau Malta, bisi patung “Anak Seus ke besapit,” iya nya Castor enggau Pollux.​—SKR 14:12; 28:11.

• Sheminit.

  Leka jaku musik ke mai reti “kelapan.” Engka merujuk ngagai tiun ti baruh. Engka mega merujuk ngagai perengka musik ke bisi tiun ti baruh, tauka diasuh belagu ngena tiun nyawa ti baruh nitihka munyi musik ke ditebah ngena tiun ti baruh.​—1Ba 15:21; Ms 6:Penerang Pandak; 12:Penerang Pandak.

• Sida-sida.

  Merujuk ngagai lelaki ke udah dibuai perengka seks. Lelaki ke baka nya kesuah iya gawa ba istana. Sida nyaga tauka ngintu kuin sereta bala indu simpan raja. Leka jaku tu mega merujuk ngagai lelaki ke nyadi pegawai istana, taja pan perengka seks iya enda dibuai. Kelimpah ari nya, leka jaku tu mega dikena ngambarka orang ke “enda nikah ketegal Perintah serega,” kena nunjukka orang nya nagang diri ngambika iya ulih gawa mayuh agi ke Petara.​—Mat 19:12; Est 2:15; SKR 8:27, nota kaki.

• Sion; Bukit Sion.

  Nama kuta orang Jebus ke mega nyadi kubu sida. Kuta tu ba atas bukit ke bisi ba tenggara Jerusalem. Pengudah David nguasa kuta nya, iya nirika istana iya ba dia, lalu ngangauka kuta nya “Nengeri David.” (2Sa 5:​7, 9) Pengudah David mindahka peti lampang batu Adat kia, Sion nyadi bukit ti kudus ke Jehovah. Udah nya, Sion mega ulih merujuk ngagai kawasan Rumah Sembiang ba Bukit Moriah, lalu kekadang, ulih merujuk ngagai serata endur ba nengeri Jerusalem. Ba begian bup Matthew ngagai Pemandang, Sion suah dikena ngambarka reti bukai.​—Ms 2:6; 1Pe 2:6; Pem 14:1.

• Siria.

  Ba begian bup Matthew ngagai Pemandang, Siria nya kawasan ke dipegai perintah Rome, lalu Antiok nyadi indu nengeri Siria. Mayuh ari kawasan iya sama enggau kawasan Siria (mega dikumbai Aram) ke disebut ba begian bup Pemungkal ngagai Malaki. Gabenor Siria mega ngemataka serata menua Palestin.​—Luk 2:2; SKR 18:18; Gal 1:21.

• Sirtis.

  Dua iti teluk ti besai ba tebing tasik Libia, Afrika Utara. Bala pelayar kelia menya takut belayar kia laban ai iya pabu, lalu tebing pasir iya suah berubah nitihka pasang surut ai.​—SKR 27:17.

• Sistem dunya.

  Datai ari leka jaku Gerika ai·onʹ. Merujuk ngagai situasi ke benung nyadi tauka tanda-tanda ke nunjukka sesiti timpuh masa, era, tauka jeman. Bup Kudus bisi nyebut pasal “sistem dunya,” ke merujuk ngagai situasi ke benung nyadi ba dunya secara umum sereta chara pengidup ke nitihka dunya. (2Ti 4:10, nota kaki) Nengah sempekat Adat Moses, Petara bisi madahka pasal sistem ke dikumbai jeman orang Israel tauka jeman orang Judah. Tang nengah tebus Jesus Kristus, Petara bisi madahka pasal sistem ti baru ke bisi kaul ti besai enggau raban orang Kristian ke dipilih ke serega. Nya nandaka jeman ti baru udah berengkah. Enggau nya, utai ke digambarka ba sempekat Adat Moses udah dikeamatka, lalu nya meh ke nyadi tanda jeman ti baru nya. Dalam jaku asal, enti leka jaku nya dalam bentuk jamak, iya merujuk ngagai bemacham sistem tauka situasi ke benung nyadi ba dunya, sekalika nya situasi ke endang udah bisi tauka situasi ke deka nyadi dudi hari.​—Mat 24:3; Mrk 4:19; Ro 12:2; 1Ko 10:11 (semua ba nota kaki).

• Sitan.

  Merujuk ngagai Iblis, iya nya Munsuh utama Petara. Dalam jaku Hebrew, “Sitan” mai reti “Iya ke Ngelaban.”​—Jop 1:6; Mat 4:10; Pem 12:9.

• Sumpah.

  Enda sama reti enggau bejaku jai pasal orang bukai. Iya disebut kena ngenakutka tauka kena ngasuh utai jai nyadi ba sesiku orang tauka ba sesiti utai. Jaku nya kesuah iya dikena madahka pasal utai jai ti engka deka nyadi. Pengawa nyumpah ke disebut Petara tauka disebut sesiku orang ke nerima kuasa ari Petara, kesuah agi bekaul enggau jaku ti benabi lalu jaku nya sigi deka nyadi.​—Pkal 12:3; Ppau 22:12; Mrk 11:21; SKR 23:12; Ro 12:14; Gal 3:10.

• Sunat.

  Muai kulit ba ujung perengka seks sida ke lelaki. Pengawa tu mesti digaga Abraham enggau bala peturun iya, tang orang Kristian tau enda ibuh ngereja nya. Leka jaku tu mega dikena ngambarka utai ba mayuh macham konteks.​—Pkal 17:10; 1Ko 7:19; Plp 3:3.

• Sundal.

  Orang ke ngereja ulah seks ba luar tikah, kelebih agi ketegal deka ngulihka duit. (Jaku Gerika porʹne, ke dikalihka nyadi “sundal,” asal iya mai reti “nyual.”) Kesuah iya, merujuk ngagai orang indu, taja pan ba Bup Kudus bisi mega nyebut pasal orang lelaki ke nyadi sundal. Rumah sembiang orang kapir suah ngena bala sundal ngulihka duit. Tang nitihka Adat Moses, pengawa nya utai ti balat salah. Gaji ke diterima sida ari pengawa nya enda ulih diterima nyadika pemeri ba Rumah Sembiang Jehovah. (Ul 23:17, 18; 1Ra 14:24) Bup Kudus mega ngena leka jaku tu kena ngambarka reti bukai, iya nya merujuk ngagai orang, bansa, tauka gerempung ke ngereja sekeda pengawa ke bisi kaul enggau engkeramba, lalu ba maya ti sama ngaku diri nyembah Petara. Ambika chunto, ba bup Pemandang, raban pengarap ke dikumbai “Babilon ti Besai” digambarka baka siku indu sundal, laban iya bisi kaul ti balat amat rapat enggau bala pemerintah ba dunya tu kena ngulihka kuasa enggau pengaya.​—Pem 17:1-5; 18:3; 1Ba 5:25.

• Syneidesis.

  Leka jaku tu ke dikalihka nyadi “ati,” mai reti asai ati mensia pasal utai ti betul enggau utai ti salah sereta pasal utai ti patut enggau utai ti enda patut digaga. Ba Bup Kudus, leka jaku Gerika tu asal iya mai reti penemu pasal diri empu. Reti iya, ati kitai ulih ngakim tauka nuduh kitai pengudah ngereja utai ti salah tauka ngasuh kitai berasai lantang pengudah ngereja utai ti betul. Ati mega ulih meri amaran ngagai kitai pasal pemutus ti salah.​—Ro 2:14, 15; 9:1 (semua ba nota kaki).

T

• Talenta.

  Sukatan pemerat enggau sukatan penyampau duit ti pemadu besai ke dikena orang Hebrew. Satu talenta berat iya 34.2 kg. Berat satu talenta orang Gerika kurang agi, iya nya kira-kira 20.4 kg.​—Mat 18:24.

• Tanda.

  Utai, pengawa, situasi, tauka utai ti luar biasa ke ulih dipeda, ti madahka reti pasal utai bukai, sekalika nya diatu tauka jemah ila.​—Mat 24:3; Pem 1:1.

• Tanduk.

  Merujuk ngagai tanduk jelu, lalu dikena nyadika perengka kena ngirup, sarang endur nyimpan minyak, endur nyimpan dawat, sereta endur nyimpan perengka kena nganta. Tanduk mega digaga nyadika perengka musik tauka perengka kena meri amaran. (1Ra 1:39; Ms 98:6; Esk 9:2) “Tanduk” suah dikena ngambarka “pengering” sereta ulih mai reti “menang” enggau “nguasa munsuh.”​—Ul 33:17; Mik 4:13; Luk 1:69, nota kaki.

• Tanduk alta.

  Utai ke baka tanduk ke bisi ba keempat-empat iti sukut sekeda alta.​—Lew 8:15; 1Ra 2:28; Pem 9:13.

• Tangkun.

  Sebatang kayu ke disan ba bau orang, lalu kedua-dua ujung kayu nya dikena ngantung utai ke diangkut. Tu mega merujuk ngagai kayu ke diengkahka ba atas rekung dua iku jelu (kesuah iya sapi), lebuh narit perengka kena betanam tauka kerita. Ketegal ulun suah ngena tangkun ngesan utai ti berat, nya alai tangkun ulih dikena ngambarka reti bukai. Iya ulih mai reti nyadi ulun tauka dikuasa sesiku orang, dilayan enggau chara ti jai, sereta merinsa. Tangkun ke dibuai tauka dipatahka mai reti dilepaska ari nyadi ulun. Nya mega mai reti dilepaska ari kuasa ti balat nekan sereta kuasa ke beambi ulih ba orang.​—Lew 26:13; Mat 11:29, 30.

• Tartarus.

  Ba begian bup Matthew ngagai Pemandang, tu merujuk ngagai keadaan ti dikurung sereta ngemaluka. Bala melikat ke enda ngasi maya jeman Noah udah ditikauka kia. Nitihka mitos orang kapir, Tartarus nya siti jil ba baruh tanah sereta endur ti petang kena ngurung bala petara ke baruh penuduk. Kata kereja tar·ta·roʹo (“ditikauka ngagai Tartarus”) ke dikena ba 2 Peter 2:4, ukai mai reti “bala melikat ti bedosa” udah ditikauka ngagai Tartarus mitos orang kapir nya. Tang kata kereja tu mai reti bala melikat ke udah bedosa nya udah diukum Petara. Penuduk enggau tanggung pengawa sida ba serega udah lenyau, lalu sida diserahka ngagai pemetang ti pemadu balat ari segi mental, ngambika sida enda ulih meretika tuju Petara ti terang. Pemetang mega ngambarka utai ke deka nyadi ngagai sida pengujung iya. Nitih ku Bup Kudus, sida deka dipunaska belama iya sama enggau pemerintah sida, iya nya Sitan ke mega dikumbai Iblis. Nya alai, Tartarus nya keadaan ti paling ngemaluka ke bala melikat ti enda ngasi nya. Tartarus enda sama enggau “lubang ti amat dalam” ke disebut ba Pemandang 20:1-3.

• Tata.

  Dalam jaku Hebrew, leka jaku tu mai reti “ngunsut ngena utai ti berai.” Minyak dituang ba siku orang tauka siti utai, kena nunjukka orang nya tauka utai nya diseraraka ngambika dikena ba siti-siti pengawa ti istimewa. Ba Bup Kudus tu, leka jaku tu dikalihka nyadi “milih” ba teks utama. Kesuah iya merujuk ngagai orang ke dipilih (ditata) ngambika nyadi imam tauka merintah nyadi raja. Mega merujuk ngagai sida ke dipilih Petara sereta bisi harapan ke serega, iya nya sida ke udah diberi kuasa kudus ngambika nyadi bala anak Petara.​—Psut 28:41; 1Sa 16:13; Luk 4:18, nota kaki; SKR 10:38, nota kaki; 2Ko 1:21, nota kaki.

• Tebus.

  Rega ke dibayar kena ngelepaska sesiku orang ke udah ditangkap, kena ngelepaska ari diukum, ari pemerinsa, ari dosa, tauka indah ari sesiti tanggungjawap. Rega nya ulih dibayar ngena chara bukai kelimpah ari ngena duit. (Isa 43:3) Bisi beberapa situasi ke ngasuh tebus patut dibayar. Ambika chunto, semua anak tuai ti lelaki diempu Jehovah, enda ngira anak mensia tauka jelu, lalu sida bisi tanggungjawap gawa ke Jehovah. Enti sida deka dilepaska ari tanggungjawap nya, tebus mesti dibayar. (Ppau 3:45, 46; 18:15, 16) Enti siku sapi ke lelaki ti siga enda dijaga lalu munuh sesiku orang, orang ke ngempu sapi nya mesti mayar tebus, enti iya deka dilepaska ari ukum bunuh. (Psut 21:29, 30) Tang, enti sesiku orang sengaja munuh orang bukai, iya enda ulih ditebus. (Ppau 35:31) Bup Kudus mega bisi nyebut pasal tebus ke pemadu penting, iya nya tebus ke dibayar Kristus, lebuh iya nyerahka nyawa diri kena ngelepaska mensia ke ngasi ari dosa enggau pemati.​—Ms 49:7, 8; Mat 20:28; Eps 1:7.

• Terumpit.

  Siti perengka ke disepu sereta digaga ari besi. Dikena meri amaran sereta dikena nebah musik. Ba bup Pemandang, pengudah terumpit disepu, pemutus Jehovah deka dipadahka tauka pengawa ke penting ke datai ari Iya deka dipejalaika.​—1Ko 15:52; Pem 8:7–11:15.

• Tiang.

  Tiang ti lurus ke dikena ngantung orang ke diukum. Ba sekeda bansa, tiang dikena ngukum bunuh sereta/tauka kena mandangka bangkai orang ke diukum nyadika amaran ngagai orang bukai, tauka kena ngemaluka orang ke diukum nya ba mua orang mayuh. Orang Asiria, ti tebilang ketegal sida chukup jai maya beperang, ngena tiang ke tajam ujung ngerejang perut orang ke ditangkap sida sampai ngagai dada orang nya. Udah nya, orang nya deka ditejuka tegantung ba ujung tiang nya. Tang nitihka adat orang Judah, sida ke ngereja jenayah ti besai baka bejaku ngelaban Petara tauka nyembah engkeramba, deka dituku ngena batu dulu sampai mati tauka dibunuh dulu ngena chara bukai. Udah nya, baru bangkai orang nya digantung ba tiang tauka ba pun kayu nyadika amaran ngagai orang bukai. (Ul 21:22, 23; 2Sa 21:6, 9) Kekadang, orang Rome nanchang orang ke diukum ba tiang. Udah nya, sida nejuka iya tegantung ba tiang nya beberapa hari ngambika iya berasai pedis, aus, lapar, sereta dipanchar mata panas nyentukka iya mati. Kekadang, baka ke digaga sida ngagai Jesus, sida mega mantang jari enggau kaki orang ke diukum ba tiang. (Luk 24:20; Jhn 19:14-16; 20:25; SKR 2:23, 36) Kelimpah ari nya, bisi mega tiang bengunan ke dikena ba Rumah Sembiang sereta ba rumah diraja ke digaga Solomon. (P-lu 16:29; 1Ra 7:21) Ba begian bup Matthew ngagai Pemandang, tiang mega dikena ngambarka reti bukai, baka meri sukung (1Ti 3:15) tauka penuduk ti tetap (Pem 3:12).​—Peda TIANG PERINSA.

• Tiang perinsa.

  Datai ari leka jaku Gerika stau·rosʹ, ke mai reti siti tiang ti lurus sama baka ke dikena ngukum Jesus sampai mati. Nadai bukti ke nunjukka leka jaku Gerika tu mai reti regang, baka ke dikena orang kapir nyadika tanda agama sida pengelama beratus-ratus taun S.M. “Tiang perinsa” ngambarka reti jaku Gerika stau·rosʹ enggau betul, laban Jesus empu mega nyebut leka jaku stau·rosʹ kena mai reti pemerinsa enggau pemalu ke deka diasaika bala murid iya. (Mat 16:24; Heb 12:2)​—Peda TIANG.

• Tuai imam.

  Gelar bukai “imam besai” ke ayan ba begian bup Pemungkal ngagai Malaki. Ba begian bup Matthew ngagai Pemandang, gelar “tuai imam” kesuah iya merujuk ngagai bala imam ke megai pengawa ti penting agi ari bala imam ke bukai. Tu engka nyengkaum sida ke kala nyadi imam besai sereta sida ke nyadi ketuai ba 24 iti raban bala imam.​—Mat 2:4; Mrk 8:31.

• Tuai melikat.

  Ba Bup Kudus, rambai jaku tu semina ayan dalam bentuk tunggal. Tu nunjukka semina bisi siku aja “tuai melikat,” iya nya Mikael.​—Dan 12:1; Jud 9; Pem 12:7.

• Tukang periuk tanah.

  Orang ke ngaga periuk, pinggai, enggau utai bukai ngena tanah liat. Siku tukang periuk tanah ulih ngaga tanah liat nitihka bentuk ke dikedekaka iya. Tu suah dikena ngambarka hak Jehovah merintah atas semua orang enggau semua bansa.​—Isa 64:8; Ro 9:21.

• Tukang tilit nasit.

  Orang ke ngaku diri ulih nemu pasal utai ke deka nyadi dudi hari. Ba Bup Kudus, rambai jaku tu nyengkaum bala imam ke nemu magik, orang ke nemu betilit nasit ngena bantu melikat ti jai, orang ke nemu nujum nengah bintang, sereta sida ke bukai.​—Lew 19:31; Ul 18:11; SKR 16:16.

• Tungkat besi kena ngiring.

  Tungkat ke panjai sereta tajam ujung ke dikena orang ke betanam ngiring jelu bejalai. Tungkat tu disemaka enggau jaku orang ke bepenemu-dalam ke ulih meransang orang ke ninga, ngambika nitihka jaku ajar. Rambai jaku “majak nendang tungkat besi” dikena ngambarka ulah sapi ti lelaki ke kieh ke majak nendang tungkat besi nya ketegal enggai diiring. Tu ngujungka sapi nya bakal.​—SKR 26:14, nota kaki; P-lu 3:31.

• Tungkat diraja.

  Tungkat mit ke dibai raja, ke nyadi lambang pemesai kuasa diraja.​—Pkal 49:10; Heb 1:8.

U

• Ulah seks ti kamah.

  Datai ari leka jaku Gerika por·neiʹa. Ba Bup Kudus, leka jaku tu merujuk ngagai sekeda ulah seks ke ditagang Petara. Nya nyengkaum seks entara orang ti udah kawin enggau orang ke ukai kaling pengidup iya, pengawa nyundal, seks luar tikah, pengawa homoseksual (indu enggau indu tauka lelaki enggau lelaki), sereta seks enggau jelu. Ba bup Pemandang, rambai jaku tu dikena ngambarka siku indu sundal ke dikumbai “Babilon ti Besai,” laban iya bisi kaul ti balat amat rapat enggau bala pemerintah ba dunya tu kena ngulihka kuasa enggau pengaya. (Pem 14:8; 17:2; 18:3; Mat 5:32; SKR 15:29; Gal 5:19)​—Peda SUNDAL.

• Undi.

  Batu mit tauka repik kayu kena ngaga pemutus. Diengkah ba dalam gari ke dilipat tauka ba dalam siti sarang, lalu udah nya digusak. Enti undi nya tepansut ke luar, tauka undi nya dichabut, nya meh undi ke dipilih. Kesuah iya orang besampi lebuh ngereja tu.​—Mat 27:35; SKR 1:26.

• Urim enggau Tumim.

  Utai ke dikena imam besai nentuka peneka Petara lebuh ngaga pemutus ke bekaul enggau bansa Israel. Chara ngena nya sama baka chara bechabutka undi. Utai nya diengkahka ba dalam penutup dada imam besai lebuh iya tama ngagai Langkau Sembiang. Utai nya enda dikena agi pengudah orang Babilon nganchurka Jerusalem.​—Psut 28:30; Neh 7:65.

• Utai tumbuh ti pait.

  Bemacham utai tumbuh ti bekayu ke balat amat pait sereta bisi bau ti tajam. Ba Pemandang 8:11, “utai tumbuh ti pait” merujuk ngagai utai ti pait sereta berachun, ke mega dikumbai absinthe.

W

• Wadi.

  Lebak tauka dasar sungai ti rangkai kecuali maya musin ujan. Nya mega ulih merujuk ngagai sungai, laban ai iya datai ari mata ai. Ba sekeda konteks, wadi mega ulih dikalihka nyadi lebak.—Pkal 26:19; Ppau 34:5; Ul 8:7; 1Ra 18:5; Jop 6:15.