Matthew

21 Lebuh Jesus enggau bala murid iya nyau datai semak Jerusalem, sida ngetu ba Betpagi ba Bukit Kana. Jesus bejaku enggau dua iku murid iya. 2 Ku iya: “Alai seduai mupuk ngagai genturung pendiau ba mua nyin. Ba din seduai deka tetemuka siku keledai ke ditanchang, enggau anak iya ngimbai iya. Buka tali jelu dua iku nya, lalu bai jelu nya ngagai aku. 3 Enti orang bisi bejaku ngagai seduai, sebut aja munyi tu, ‘Tuan begunaka dua iku keledai nya.’ Lalu iya deka ngasuh seduai mai jelu nya tekala nya.”

4 Utai tu nyadi kena ngamatka jaku ti udah disebut nengah siku nabi: 5 “Padahka ngagai anak indu Sion,* ‘Peda kita! Raja kita datai ngagai kita. Iya baruh ati, lalu nepan keledai ti agi biak. Au, iya datai nepan anak keledai.’”

6 Nya alai, dua iku murid Jesus nya mupuk, lalu ngereja utai ti diasuh iya. 7 Seduai iya mai keledai enggau anak keledai nya, lalu ngelempaika gari luar seduai iya ba belakang jelu dua iku nya. Jesus lalu nepan anak keledai nya. 8 Mayuh amat orang nganchau gari luar sida ba jalai. Sida ti bukai nyarau lalu nganchau dan kayu ba jalai nya. 9 Lalu bala orang ke bejalai dulu ari iya enggau ke entudika iya manjung: “Kami besampi,* selamatka meh Anak David! Beberekat meh iya ke datai dalam nama Jehovah! Awakka Petara ke ba endur ti pemadu tinggi nyelamatka iya!”

10 Lebuh Jesus tama ngagai Jerusalem, semua orang dalam nengeri nya begau magang. Ku sida nanya: “Sapa orang nya?” 11 Orang mayuh ke nitihka Jesus majak madahka: “Iya nya Jesus, siku nabi ke datai ari Nasaret ba menua Galili.”

12 Udah nya, Jesus tama ngagai Rumah Sembiang lalu muru semua orang ke bejual-bebeli dalam Rumah Sembiang. Iya nungkupka mija orang ke penukar duit, enggau bangku orang ke nyual burung achang. 13 Ku iya bejaku ngagai sida: “Endang udah ditulis, ‘Rumah Aku deka dikumbai rumah endur besampi.’ Tang kita ngaga iya nyadi sarang perumpak!” 14 Orang ke buta, enggau orang ke pinchat datai ngagai iya ba Rumah Sembiang, lalu iya ngeraika sida.

15 Tang lebuh bala tuai imam enggau bala penulis Adat meda kereja ajih ke digaga Jesus, sereta meda bala anak mit manjung ba Rumah Sembiang, “Kami besampi. Selamatka meh Anak David!” sida balat pedis ati, 16 lalu nanya Jesus: “Kati nuan bisi ninga utai ke disebut sida?” Jesus lalu nyaut sida: “Bisi. Kati kita nadai kala macha ayat ke madahka: ‘Nuan udah ngasuh mulut bala anak mit enggau anak mit ke benung nusu meri puji ngagai Nuan’?” 17 Jesus ninggalka sida, lalu pansut ari nengeri nya. Iya mansang ngagai Betani, lalu bemalam ba dia.

18 Lebuh iya mulaika diri ngagai nengeri tumu pagi hari siti, iya lapar. 19 Iya tepedaka sepun kayu ara ba tisi jalai. Iya lalu mansang ngagai pun kayu nya. Tang sigi buah pan nadai ditemu iya ba pun kayu nya. Semina daun aja bisi. Lalu iya bejaku ngagai pun kayu nya: “Awakka nuan enda agi bebuah.” Pun kayu ara nya lalu mati tekala nya. 20 Lebuh bala murid iya meda nya, sida balat alit ati. Ku sida: “Baka ni ku pun kayu ara nya tau mati tekala nya?” 21 Lalu ku Jesus nyaut sida: “Enggau bendar aku madah ngagai kita, enti kita arap lalu enda kakang ati, kita ulih ngereja utai ti udah dikereja aku ngagai pun kayu ara tu. Indah, enti kita bejaku ngagai bukit tu, ‘Angkat nuan lalu buai diri empu ngagai tasik,’ lalu utai nya deka nyadi. 22 Enti kita arap, kita deka nerima sebarang utai ti dipinta kita dalam sampi.”

23 Lebuh Jesus tama ngagai Rumah Sembiang, bala tuai imam enggau bala tuai bansa orang Judah datai ngagai iya, maya iya benung ngajar. Sida nanya iya, “Ari ni nuan bulih kuasa? Sapa ke meri nuan kuasa ngereja utai tu?” 24 Disaut Jesus, “Aku bisi siti tanya ke kita. Enti kita tesautka aku, nya baru aku deka madah ngagai kita sapa ke meri aku kuasa ngereja semua utai tu. 25 Sapa ke nganjung John maptisa orang? Petara ke ba serega tauka mensia?” Sida lalu berandau enggau pangan diri. Ku sida, “Enti kitai nyebut, ‘Petara,’ iya deka nyebut ngagai kitai, ‘Enti pia, nama kebuah kita enda arapka iya deh?’ 26 Tang enti kitai nyebut, ‘Mensia,’ kitai takutka orang mayuh, laban semua sida ngumbai John nya nabi.” 27 Nya alai sida lalu nyaut Jesus, “Enda kami nemu.” Lalu ku iya bejaku ngagai sida, “Enti pia, aku pan enggai madah ngagai kita sapa ke meri aku kuasa ngereja semua utai tu.

28 “Nama runding kita? Siku lelaki bisi dua iku anak lelaki. Iya mansang ngagai anak iya ke tuai agi, lalu bejaku, ‘Anak, alai nuan gawa ba kebun anggur seharitu.’ 29 Lalu ku anak tuai iya nyaut, ‘Enggai.’ Tang udah nya, iya nesal, lalu nurun gawa. 30 Udah nya, apai nya mansang ngagai anak iya ke biak, lalu bejaku munyi nya mega enggau iya. ‘Au, apai,’* ku anak iya nya nyaut, tang iya enda nurun gawa. 31 Ni bagi seduai nya ke ngereja utai ti dikedekaka apai seduai iya?” “Iya ke tuai agi,” ku sida nyaut. Jesus lalu bejaku ngagai sida: “Enggau bendar aku madah ngagai kita: Bala pengumpul chukai enggau bala indu sundal deka tama dulu agi ari kita ke dalam Perintah Petara. 32 Laban John udah datai ngagai kita nunjukka jalai ngagai pengelurus, tang kita enda arapka iya. Enda baka kita, bala pengumpul chukai enggau bala indu sundal arapka iya. Taja pan kita meda utai nya nyadi, kita agi enda nesal ati ke dosa diri lalu arapka iya.

33 “Pendingka jaku sempama siti tu: Siku orang bisi kebun anggur. Iya nanam anggur, lalu nirika pagar ngelingi kebun nya. Iya numbak lubang endur nganchurka buah anggur, lalu ngaga sebuah menara. Udah nya, iya nyua kebun anggur nya ngagai orang, lalu bejalai ngagai menua bukai. 34 Lebuh musin ngumpul buah anggur datai, iya ngasuh bala ulun iya mansang ngagai orang ke nyua kebun anggur nya, ngambi buah ke endang sigi ungkup iya. 35 Bala orang ke nyua kebun nya lalu nangkap bala ulun iya, malu siku, munuh siku, lalu nuku siku ke bukai ngena batu. 36 Orang ke bempu kebun anggur nya lalu ngasuh mayuh agi ulun iya ke bukai mansang kin. Tang, bala orang ke nyua kebun nya mega ngereja utai ti sama ngagai bala ulun nya. 37 Pengujung iya, iya lalu ngasuh anak lelaki iya empu mansang kin. Ku iya, ‘Sida tentu deka bebasaka anak lelaki aku.’ 38 Tang lebuh bala orang ke nyua kebun anggur nya meda anak lelaki iya datai, sida lalu bejaku enggau pangan diri, ‘Tu orang ke deka bempu kebun anggur tu. Aram kitai munuh iya lalu ngerampas semua reta pesaka iya!’ 39 Nya alai sida nangkap iya, muai iya ari kebun anggur nya, lalu munuh iya. 40 Lebuh orang ke bempu kebun anggur nya datai, nama deka dikereja iya ngagai orang ke nyua kebun anggur nya?” 41 Disaut bala tuai imam enggau bala tuai bansa orang Judah: “Iya tentu deka munuh orang nya ketegal sida jai. Udah nya, iya ngasuh orang bukai nyua kebun nya, iya nya orang ke deka meri iya buah lebuh musin ngumpul buah anggur datai.”

42 Ku Jesus bejaku enggau sida: “Kati kita nadai kala macha dalam Bup Kudus, ‘Batu ti dibuai tukang rumah, udah nyadi batu sukut ti pemadu beguna. Batu tu datai ari Jehovah, lalu manah amat dipeda mata kitai’? 43 Nya alai, aku madah ngagai kita, Perintah Petara deka diambi ari kita, lalu diberi ngagai siti bansa ke deka ngereja peneka Petara.* 44 Barang sapa ke labuh ninggang batu nya deka redak, lalu barang sapa ke ditinggang batu nya deka anchur.”

45 Lebuh bala tuai imam enggau bala orang Parisi ninga jaku sempama Jesus, sida nemu iya bejaku pasal sida. 46 Taja pan sida keran deka nangkap iya, tang sida takutka orang mayuh laban orang mayuh ngumbai Jesus nya nabi.