Matthew

24 Lebuh Jesus ninggalka Rumah Sembiang, bala murid iya datai ngagai iya. Sida nunjukka ngagai iya Rumah Sembiang nya enggau dinding iya. 2 Ku Jesus bejaku: “Kita alit ati meda Rumah Sembiang nya, enda pia? Enggau bendar aku madah ngagai kita, iya deka diruntuhka. Nadai sigi batu pan deka mengkang betusun ba atas pangan diri.”

3 Lebuh Jesus duduk ba Bukit Kana, bala murid datai ngagai iya kediri, lalu bejaku: “Padahka ngagai kami, kemaya semua utai tu deka nyadi, lalu nama tanda ti nunjukka nuan pulai baru ngagai kami,* sereta tanda pengujung dunya* tu?”

4 Disaut Jesus: “Bejimat kita, enggaika orang nesatka kita. 5 Laban mayuh orang deka datai dalam nama aku. Ku sida, ‘Aku tu Kristus!’ lalu sida deka nesatka mayuh orang. 6 Kita deka ninga munyi perang, enggau berita pasal perang ba mayuh endur bukai. Tang anang takut, laban utai nya patut nyadi. Taja pia, pengujung bedau datai.

7 “Laban bansa siti deka beperang ngelaban bansa siti, lalu perintah siti deka beperang ngelaban perintah siti. Pia mega, lapar pungkang enggau tanah berenyang deka nyadi ba mayuh bengkah endur. 8 Semua utai tu nunjukka pemerinsa baru berengkah, baka indu ke radai deka beranak.

9 “Maya nya orang deka merinsaka kita, lalu munuh kita. Semua bansa deka begedika kita ketegal nama aku. 10 Kelimpah ari nya, mayuh orang deka ninggalka pengarap,* nyerahka pangan diri ngagai munsuh, sereta begedika pangan diri. 11 Mayuh nabi ti pelesu deka bisi, lalu nesatka mayuh orang. 12 Lalu ketegal penyai majak nyadi, pengerindu orang ke pangan diri deka majak kurang. 13 Tang orang ke tan datai ke ujung, deka diselamatka. 14 Berita Manah pasal Perintah Petara deka ditusui ba serata dunya, nyadika saksi ngagai semua bansa. Udah nya, baru pengujung deka datai.

15 “Nya alai, lebuh kita meda utai ti dipegedi* ke mai pengerusak, ke disebut Nabi Daniel, bediri ba endur ti kudus (awakka orang ke macha berundingka enggau manah ngambika meretika utai tu), 16 orang ke diau ba Judea patut rari ngagai bukit. 17 Orang ke ba atas perabung* enda patut nurun ngambi utai ari rumah iya, 18 lalu orang ke ba ladang, enda patut nikal ngambi gari luar iya. 19 Naka meh penusah indu ke ngandung enggau bala indai ke nusuka anak maya nya! 20 Anang ngetu besampi, ngambika maya kita patut ngerarika diri, nya ukai maya musin chelap, tauka maya Hari Sabat. 21 Laban maya nya, Penusah ti Besai deka nyadi. Penusah nya nadai kala nyadi kenyau ari penumbuh dunya nyentuk ngagai seharitu, lalu iya enda agi nyadi pengudah nya. 22 Enti timpuh nya enda dikurangka, nadai siku orang pan ulih diselamatka. Tang ketegal sida ke udah dipilih, timpuh nya deka dikurangka.

23 “Udah nya, enti bisi orang nyebut ngagai kita, ‘Peda! Kristus bisi ba ditu!’ tauka, ‘Kristus ba din!’ anang arapka nya. 24 Laban Kristus ti pelesu, enggau nabi ti pelesu endang deka bisi, lalu ngaga kereja ajih, sereta kereja nyelai ti ngalitka ati, kena nesatka orang. Enti ulih, sida indah deka nesatka nembiak Petara ke udah dipilih. 25 Dinga kita! Aku udah nangkan kita sebedau utai nya nyadi. 26 Nya alai, enti orang madah ngagai kita, ‘Peda kita! Iya bisi ba menua puang,’ anang kita kia. Tauka enti sida nyebut, ‘Peda kita! Iya bisi ba dalam bilik resia!’ anang arapka nya. 27 Laban baka kilat ti nyelar ari timur ngagai barat, baka nya meh maya Anak Mensia pulai baru ngagai kita.* 28 Dia alai bangkai, dia meh alai burung menaul deka begelumu.

29 “Maya nya, sepengudah penusah nya nyadi, mata panas deka bebali petang, lalu bulan nadai agi mancharka penampak iya. Bintang deka labuh ari langit, lalu kuasa ti ba langit deka begegar. 30 Udah nya tanda Anak Mensia deka ayan ba langit, lalu semua raban bansa ba dunya deka mandam dada diri ketegal balat tusah ati. Sida deka meda Anak Mensia datai ba atas remang,* ngena kuasa enggau mulia ti besai. 31 Terumpit deka disepu enggau inggar, lalu Anak Mensia deka ngirumka bala melikat iya ngagai semua sukut dunya.* Bala melikat nya deka ngempuruka sida ke udah dipilih, ari ujung langit siti ngagai ujung langit ke bukai.

32 “Belajar meh ari jaku sempama pasal pun kayu ara: Lebuh dan muda iya ke lembut belabuh bedaun, kita nemu musin panas nyau semak. 33 Pia mega, lebuh kita meda semua utai tu, kita nemu Anak Mensia udah ba mua pintu. 34 Enggau bendar aku madah ngagai kita, rebak tu enda mati seagi-agi semua utai tu bedau nyadi. 35 Langit enggau dunya deka lenyau, tang jaku aku deka mengkang meruan belama iya.

36 “Nadai orang nemu hari enggau jam iya. Melikat ke ba serega enda nemu. Indah Anak pan enda nemu. Semina Apai aja nemu. 37 Laban baka maya jeman Noah kelia, baka nya meh gaya maya Anak Mensia pulai baru ngagai kita.* 38 Sebedau Bah Besai nyadi, orang majak makai ngirup, jadi melaki-bini, nyentuk ngagai maya Noah tama ke dalam bandung.* 39 Sida enda kiruhka utai ke nyadi, nyentuk ngagai maya ai bah datai lalu munuh semua sida. Baka nya meh maya Anak Mensia pulai baru ngagai kita.* 40 Maya nya ila, dua iku lelaki deka gawa ba ladang; siku deka ditabanka, lalu siku ditinggalka. 41 Dua iku indu deka ngisar gandum; siku deka ditabanka, lalu siku ditinggalka. 42 Nya alai, terus meh kita mengkang bejaga, laban kita enda nemu kemaya Tuan kita deka datai.

43 “Perundingka pekara tu: Enti orang ke bempu rumah nemu jam berapa penchuri deka datai maya malam hari, iya tentu deka bejaga semalam-malam, lalu enda nejuka rumah iya dirumpak. 44 Nya alai, kita patut sedia, laban Anak Mensia deka datai ba jam ti enda disangka kita.

45 “Sapa kebendar iya ulun ke tetap ati sereta bepenemu-dalam,* ke udah dipilih tuan iya ngemataka semua ulun ti bukai, ngambika meri sida pemakai ba maya ti patut? 46 Ulun nya tentu deka gaga ati lebuh tuan iya datai lalu nemu iya benung ngereja pengawa iya! 47 Enggau bendar aku madah ngagai kita: Tuan nya deka milih ulun nya ngemataka semua reta tengkira iya.

48 “Tang enti sema ulun nya jai, lalu bejaku dalam ati diri, ‘Tuan aku laun datai,’ 49 lalu iya belabuh bepaluka ulun ti bukai, sereta makai ngirup enggau orang ke pemabuk, 50 tuan iya deka datai ba hari ti enda disangka iya, enggau ba jam ti enda ditemu iya. 51 Tuan iya deka balat amat ngukum iya, lalu muai iya sama enggau orang ke pura-pura ngapa. Ba dia meh iya deka nyabak sereta begerit ngeli.