Matthew

13 Ba hari nya, Jesus pansut ari rumah lalu duduk ba tebing danau. 2 Mayuh amat orang begelumu ngelingi iya. Nya alai, iya nepan sebuah perau, lalu nudukka diri ba dia. Bala orang mayuh bediri ba tebing. 3 Iya lalu madahka mayuh macham utai ngagai sida ngena jaku sempama. Ku iya: “Orang siku pansut lalu naburka benih. 4 Lebuh iya naburka benih, sekeda leka benih nya labuh ba jalai. Burung datai lalu makai benih nya. 5 Sekeda labuh ba tanah ti bebatu ti nadai mayuh tanah, lalu leka benih nya berengkah tumbuh* tekala nya, laban tanah ba dia mabu. 6 Tang lebuh mata panas niki, sida kena panchar mata panas nya lalu layu laban sida nadai urat. 7 Leka benih ti bukai labuh ba madang duri. Duri tumbuh lalu ngachau benih nya ari tumbuh. 8 Bisi mega benih ke labuh ba tanah ti ami* lalu bebuah, sekeda mansutka 100 kali lipat, sekeda 60 kali lipat, lalu sekeda agi 30 kali lipat. 9 Awakka orang ke bisi pending, ninga enggau manah.”

10 Udah nya sida murid iya datai lalu bejaku enggau iya: “Nama kebuah nuan bejaku ngagai sida ngena jaku sempama?” 11 Ku iya nyaut sida: “Petara udah meri kita penemu bekaul enggau resia ti kudus pasal Perintah serega, tang sida enda. 12 Barang sapa ke bisi penemu, deka diberi mayuh agi penemu, ngambika penemu iya betambah; tang barang sapa ke nadai penemu, indah penemu ti mimit ke dikembuan iya deh, deka diambi ari iya. 13 Nya kebuah aku bejaku ngagai sida ngena jaku sempama. Laban taja pan sida merening, sida enda ulih meda, lalu taja pan sida mending, sida enda ulih mereti. 14 Ba sida tu meh jaku Nabi Isaiah dikeamatka: ‘Kita amat mending, tang enda mereti, lalu kita amat merening, tang enda meda. 15 Ati orang ari bansa tu udah ditutup. Taja pan sida ninga, sida ngaga diri enda ninga; sida mejamka mata ngambika enda meda; lalu mampul pending ngambika enda ninga. Nya alai, ati sida enda ulih mereti, lalu sida enda nguingka diri ngagai Aku ngambika digeraika.’

16 “Tang gaga ati meh kita, laban mata kita ulih meda, lalu pending kita ulih ninga. 17 Enggau bendar aku madah ngagai kita: Mayuh nabi enggau orang ke lurus ingin deka meda utai ti dipeda kita, tang sida enda ulih meda utai nya. Sida ingin deka mendingka utai ti dipendingka kita, tang sida enda ulih ninga utai nya.

18 “Diatu, dinga lalu meretika sempama pasal orang ke nabur benih. 19 Benih ke labuh ba jalai nya, orang ke ninga jaku pasal Perintah Petara, tang iya enda meretika nya. Nya alai, benih ke ditanam dalam ati iya, dirampas Sitan.* 20 Benih ti labuh ba tanah ti bebatu nya, orang ke ninga jaku nya, lalu tekala nya nerima iya enggau ati ti gaga. 21 Tang jaku nya enda beurat dalam ati iya. Iya arapka jaku nya enda lama, tang lebuh iya dituntung penusah tauka pemerinsa ketegal jaku nya, iya lalu tekala nya mantul.* 22 Benih ti labuh ba madang duri nya, orang ke ninga jaku nya, tang ketegal pengirau pasal pengidup ba dunya* tu sereta kuasa pengaya ti ulih nipu, jaku nya alah lalu enda ulih bebuah. 23 Tang benih ti labuh ba tanah ti ami nya, orang ke ninga jaku nya lalu meretika iya. Siku bebuah lalu mansutka asil 100 kali lipat, siku 60 kali lipat, lalu siku da agi 30 kali lipat.”

24 Jesus madahka siti agi jaku sempama ngagai sida. Ku iya: “Perintah serega tau dibandingka enggau orang siku ke nanam leka benih ti manah ba ladang iya. 25 Tang lebuh semua orang tinduk, munsuh datai lalu nanam leka lalang* ba madang gandum nya, lalu mupuk ari endur nya. 26 Nya alai, lebuh tangkai gandum tumbuh, lalu udah bisi igi gandum, lalang mega ayan. 27 Bala ulun orang ke bempu ladang nya datai lalu bejaku ngagai iya: ‘Tuan, ukai enda nuan naburka benih ti manah ba ladang nya? Kati lalang nya tau bisi ba dia deh?’ 28 Ku tuan nya nyaut: ‘Nya utai dikereja munsuh.’ Lalu ku sida bejaku ngagai iya: ‘Kati nuan deka ngasuh kami nyabut lalang nya?’ 29 Tang ku iya nyaut: ‘Anang, enggaika kita techabutka gandum lebuh kita nyabut lalang. 30 Awakka gandum enggau lalang nya sama tumbuh nyentuk ngagai maya ngetau. Maya ngetau ila, aku deka bejaku enggau orang ke ngetau, ngasuh sida ngumpul lalang nya dulu, nanchang iya lalu nunu lalang nya. Udah nya, baru gandum tau digumpul lalu disimpan dalam setor aku.’”

31 Jesus madahka siti agi jaku sempama ngagai sida. Ku iya: “Perintah serega nya baka igi mustard* ti dibai orang siku, lalu ditanam iya ba ladang iya. 32 Igi mustard nya leka ti pemadu mit ari semua leka utai. Tang lebuh iya udah tumbuh, iya ulih nyadi utai tumbuh ti besai, baka pun kayu, datai ke burung begagaka tansang ba sebelah dan iya.”

33 Jesus madahka siti agi jaku sempama ngagai sida: “Perintah serega nya baka ragi ti diambi siku indu lalu dichampurka iya enggau tepung ke mayuh,* datai ke semua tepung nya nyau kembai magang.”

34 Jesus madahka semua utai nya ngagai orang mayuh ngena jaku sempama. Lebuh bejaku ngagai orang mayuh ba dia, iya enda kala enda ngena jaku sempama. 35 Tu ngamatka jaku ti udah disebut nengah siku nabi: “Mulut aku deka bejaku ngena jaku sempama; aku deka nyebut pasal utai ti udah dilalaika kenyau ari pun.”*

36 Pengudah ngasuh orang mayuh nya pulai, iya tama ke dalam rumah. Bala murid iya lalu datai ngagai iya. Ku sida: “Padahka ngagai kami reti sempama pasal lalang ti ba ladang gandum nya.” 37 Ku Jesus nyaut: “Orang ke naburka benih ti manah nya, Anak Mensia. 38 Ladang gandum nya, dunya tu. Benih ti manah nya, nembiak Perintah Petara. Lalang nya, nembiak Sitan.* 39 Lalu munsuh ke nanam leka lalang nya, Sitan.* Maya ngetau nya, pengujung dunya,* lalu orang ke ngetau nya, bala melikat. 40 Baka lalang ti digumpul lalu ditunu, baka nya meh gaya utai ti deka nyadi maya pengujung dunya.* 41 Anak Mensia deka ngirumka bala melikat iya, lalu sida deka muai ari Perintah Petara, semua orang ti ngasuh orang bukai bedosa, enggau semua orang ke ngereja penyai. 42 Sida deka nikauka bala orang nya ngagai serumbung api. Ba dia, bala orang nya deka nyabak sereta begerit ngeli. 43 Maya nya, orang ke lurus deka manchar enggau terang baka mata panas ba Perintah Apai sida. Awakka orang ke bisi pending, ninga enggau manah.

44 “Perintah serega baka reta ti berega ke dilalaika dalam sebidang tanah, ti ditemu orang siku lalu dilamun iya baru. Enggau ati ti gaga iya mupuk, lalu nyual semua reta iya lalu meli tanah nya.

45 “Perintah serega mega baka siku orang dagang ke bejalai begigaka batu mutiara ti manah. 46 Lebuh iya tetemuka sigi batu mutiara ti berega amat, iya lalu mupuk nyual semua reta iya, lalu meli batu mutiara nya.

47 “Perintah serega mega baka pukat ti diulurka ke dalam ai, lalu bulih semua macham ikan. 48 Lebuh pukat nya nyau penuh, orang lalu narit pukat nya ke tebing. Sida duduk lalu nyimpan ikan ti manah dalam bakul, tang muai ikan ti enda manah. 49 Baka nya meh gaya utai ti deka nyadi lebuh pengujung dunya.* Bala melikat deka datai lalu nyeraraka orang ke jai ari orang ke lurus. 50 Sida deka nikauka bala orang ke jai nya ngagai serumbung api. Ba dia, bala orang ke jai nya deka nyabak sereta begerit ngeli.

51 “Kati kita meretika semua utai tu?” “Au,” ku sida nyaut. 52 Ku iya madah ngagai sida: “Enti pia, tiap iku pengajar ke udah belajar pasal Perintah serega, baka orang ke bempu rumah ti mantaika reta ti baru enggau reta ti lama ari setor iya.”

53 Pengudah Jesus tembu madahka semua jaku sempama nya, iya lalu mupuk ari endur nya. 54 Lebuh iya datai ba menua asal iya, iya ngajar orang mayuh ba balai gempuru. Sida alit ati lalu ku sida bejaku: “Dini alai orang tu bulih penemu-dalam enggau kuasa kena ngereja pengawa ajih baka tu? 55 Ukai enda iya tu anak tukang kayu? Ukai enda indai iya benama Maria? Lalu ukai enda iya tu menyadi James, Josep, Simon, enggau Judas? 56 Ukai enda semua menyadi indu iya diau ditu sama enggau kitai? Nyadi dini alai iya bulih semua utai tu?” 57 Nya alai, sida lalu enggai arapka iya.* Tang ku Jesus bejaku ngagai sida: “Nabi endang dibasa orang ba dini-dini endur, tang ukai ba menua enggau ba ruang bilik iya empu.” 58 Ketegal sida enda arap, iya enda ngereja mayuh pengawa ajih ba dia.