Mark

4 Sekali agi, Jesus ngajar ba tebing danau, lalu mayuh amat orang begempuru semak iya. Iya nepan sebuah perau, duduk ba dia lalu ngayuhka perau nya jauh mimit ari tebing. Tang orang mayuh nya agi ba tebing danau. 2 Iya ngajar sida mayuh macham utai ngena jaku sempama. Maya iya ngajar sida, iya madah: 3 “Dinga kita! Orang siku pansut lalu naburka benih. 4 Lebuh iya naburka benih, sekeda leka benih nya labuh ba jalai. Burung datai lalu makai benih nya. 5 Sekeda labuh ba tanah ti bebatu ti nadai mayuh tanah, lalu leka benih nya berengkah tumbuh* tekala nya, laban tanah ba dia mabu. 6 Tang lebuh mata panas nyau niki, sida kena panchar mata panas nya lalu layu laban sida nadai urat. 7 Leka benih ti bukai labuh ba madang duri. Duri tumbuh lalu ngachau benih nya ari tumbuh, nyentukka iya enda ulih bebuah. 8 Bisi mega benih ke labuh ba tanah ti ami,* lalu majak tumbuh sereta bebuah. Sekeda mansutka 30, 60, enggau 100 kali lipat.” 9 Udah nya, ku iya: “Awakka orang ke bisi pending, ninga enggau manah.”

10 Lebuh iya benung kediri, sekeda murid iya enggau 12 iku rasul iya datai nanya iya pasal jaku sempama nya. 11 Ku iya madah ngagai sida: “Petara udah meri kita penemu bekaul enggau resia ti kudus pasal Perintah Petara, tang orang bukai semina ninga jaku sempama aja. 12 Nya alai, taja pan sida merening, sida agi enda ulih meda. Taja pan sida mending, tang sida agi enda mereti. Sida mega enda nguingka diri ngagai Petara ngambika diampunka Iya.” 13 Udah nya, Jesus nanya sida: “Enti kita enda meretika jaku sempama tu, baka ni ku kita ulih meretika semua jaku sempama ke bukai?

14 Penabur benih naburka jaku Petara. 15 Sekeda orang baka benih ti labuh ba jalai. Sepengudah sida ninga jaku Petara, Sitan datai lalu ngerampas jaku ti udah ditanam dalam ati sida. 16 Pia mega, benih ti labuh ba tanah ti bebatu nya, orang ke ninga jaku Petara lalu tekala nya nerima iya enggau ati ti gaga. 17 Tang jaku nya enda beurat dalam ati sida. Sida arapka jaku nya enda lama. Tang sepengudah sida dituntung penusah tauka pemerinsa ketegal jaku nya, sida lalu mantul.* 18 Benih ti labuh ba madang duri nya, orang ke ninga jaku nya. 19 Tang pengirau pasal pengidup ba dunya* tu sereta kuasa pengaya ti ulih nipu, enggau pengingin ti bukai tama ke dalam ati sida, lalu ngalahka jaku nya ngambika enda bebuah. 20 Ke penudi, benih ti labuh ba tanah ti ami nya, orang ke ninga jaku nya lalu nerima iya enggau ati ti gaga. Sekeda mansutka buah 30, 60, enggau 100 kali lipat.”

21 Iya mega madahka: “Orang enda nangkup lampu kelita ngena bakul tauka ngengkahka iya ba baruh katil, enda pia? Endaka lampu kelita patut diengkah ba penuduk iya? 22 Laban semua utai ti ditudung deka dikebakka, lalu semua utai ti dilalaika enggau bebendar deka diayanka. 23 Awakka orang ke bisi pending, ninga enggau manah.”

24 Iya mega madah ngagai sida: “Peratika utai ti didinga kita. Takar ti dikena kita nakar, mega deka dikena nakar kita. Indah utai ti diterima kita deka lebih agi ari utai ti ditakar kita. 25 Laban barang sapa ke bisi penemu, deka diberi mayuh agi penemu. Tang barang sapa ke nadai penemu, indah penemu ti mimit ke dikembuan iya deh, deka diambi ari iya.”

26 Ku Jesus nampung: “Perintah Petara baka siku lelaki ke naburka benih ba tanah. 27 Malam hari iya tinduk, lalu lebuh siang hari iya angkat. Leka benih nya tumbuh* lalu mansang tinggi, tang iya enda nemu baka ni utai nya tau nyadi. 28 Tanah nya ti ngeluarka asil. Terubah, tangkai. Udah nya, murai. Lalu ke penudi, gandum nya mansau. 29 Tang sepengudah gandum nya mansau, lelaki nya mansutka ketap* iya lalu ngerat tangkai gandum nya, laban musin ngetau udah datai.”

30 Ku Jesus agi: “Nama utai ke ulih disemaka kitai enggau Perintah Petara? Nama jaku sempama ke ulih dikena kitai nerangka iya? 31 Perintah Petara baka igi mustard.* Lebuh ditanam, igi mustard nya leka ti pemadu mit ari semua leka utai ba dunya. 32 Tang pengudah ditanam, iya ulih nyadi utai tumbuh ti besai baka pun kayu, datai ke burung begagaka tansang ba dia sereta dilindung ari panchar mata panas.”

33 Jesus ngena mayuh jaku sempama ti baka nya kena iya ngajar orang pasal jaku Petara, nitihka naka ti ulih dimereti sida. 34 Iya enda kala enda bejaku enggau sida ngena jaku sempama. Tang lebuh iya kediri enggau bala murid iya, iya nerangka semua utai ngagai sida.

35 Sehari nya, lebuh hari nyau udah malam, Jesus bejaku ngagai bala murid iya: “Aram kitai ngelayang ke seberai danau.” 36 Pengudah bala murid Jesus ngasuh orang mayuh pulai, sida nepan perau enggau iya ngelayang ke seberai danau. Bisi sekeda perau bukai mega nitihka iya. 37 Enda mukai-mukai, kabut ti besai nyadi, lalu gelumbang enda ngetu mangka perau sida datai ke perau nya nyauka penuh laban ai. 38 Tang Jesus tinduk ba tilam mit, ba kemudi perau. Nya alai, sida ngerak iya, lalu bejaku: “Pengajar, kati nuan enda ibuhka kitai ke nyauka parai?” 39 Jesus pan angkat ngerara ribut nya, lalu bejaku ngagai danau: “Ngetu! Anang inggar!” Ribut pan badu lalu semua utai teduh magang. 40 Ku iya bejaku ngagai sida: “Nama kebuah kita balat takut? Kati kita agi enda arap?” 41 Tang sida agi balat takut, lalu bejaku enggau pangan diri: “Sapa iya tu kebendar iya? Indah ribut enggau danau pan ngasika iya.”